Dipotso tse di Tswang go Babadi

◼ “Ba ba shomè le bobedi” bao Jesu a neng a ba bonalela, e ne e le bomang, jaaka go umakilwe go 1 Bakorintha 15:5?

Ponalo e e umakiwang go 1 Bakorintha 15:5 go bonala e le e e kwadilweng go Yohane 20:26-29, eo e neng e kopanyeletsa Thomase. Lefa go ntse jalo, seno se lebisitse go baaposetoloi jaaka setlhopha mme ebile go bonala go akarelediwa Mathaiase.

Fa a ne a tlotla ka tsogo, Paulo o ne a kwala kaga go bonalela batho ga ga Jesu fa A sena go tsosiwa. Moaposetoloi o ne a bolela gore Keresete o ne a “bōnwa ke Kefase; le ke ba ba shomè le bobedi moragō ga mouō; Me moragō a bōnwa ke badumedi ba ba hetañ makgolo matlhano ka lobaka lo le loñwe hèla.”—1 Bakorintha 15:5, 6.

Gareng ga bao ba neng ba mo sala morago jaaka barutwa, Jesu o ne a tlhopha baaposetoloi ba le 12. (Mathaio 10:2-5) Judase Isekariota e ne e le mongwe wa ba ba 12, mme o ne a fetoga mooki, a oka Jesu, mme go tswa foo a ikaletsa. (Mathaio 26:20-25; 27:3-10) Jalo ka nako ya loso lwa ga Keresete le tsogo ya gagwe, go ne go na le baaposetoloi ba le 11 fela ba ba ikanyegang mo go ba pele ba ba 12. Jesu o ne a bonalela barutwa ba ba farologaneng mo lobakeng lwa fa a sena go tsoga le pele ga go tlhatlogela ga gagwe kwa legodimong. Morago ga moo baaposetoloi ba ne ba lemoga kafa go tlhokafalang ka teng go emisetsa Judase. Ka kaelo ya bomodimo, Mathaiase o ne a tlhophiwa, mme “a balèlwa mo baaposetoloiñ ba ba shomè le mocō.”—Ditihō 1:6-26.

Jalo he bangwe ba ile ba ipotsa gore e ne e le ka ntlhayang fa Paulo a ne a ka kwala gore Jesu o ne a bonalela ba ba “shomè le bobedi,” ereka jaana ka nako eo Judase a ne a sule mme Mathaiase a ne a ise a tlhophiwe. Fa go buiwa ka tlhamalalo, go ne go na le “ba ba shomè le mocō” fela bao pele ba neng ba tlhophilwe le go romelwa ke Jesu.—Luke 6:13-16.

Ke selo se se tlwaelegileng go bua ka setlhopha ka kakaretso ya sone le eleng fa a le mongwe fela a seo. (“Lekoko la Batsamaisa-kgwebo le ne la re . . . ” “Setlhopha sa bagolwane se ne sa kopana . . . ”) Jalo lereo “shomè le bobedi” le ka nna la bo le ne le dirisiwa jaana go lebisa go setlhopha sotlhe sa baaposetoloi, le eleng fa a le mongwe kana ba le babedi ba ne ba seyo mo pakeng eo. (Bapisa Ditihō 6:1-6.) Fa e ne e le lantlha Jesu a ne a bonalela barutwa mo ntlwaneng e e lotletsweng, “Thomase, moñwe oa ba ba shomè le bobedi, . . . èna a bo a seeō mo go bōnè.” Malatsi a hera bobedi moragonyana o ne a le gone mme dipelaelo tsa gagwe tsa fedisiwa. (Yohane 20:19-29) Lemororo Mathaiase a ne a ise a tlhophiwe go tseela Judase sebaka, o ne a sa bolo go nna morutwa. (Ditihō 1:21, 22) Ereka jaana a ne a atamalane thata le baaposetoloi ba pele-pele mme ya re ka bokhutshwane moragonyana ‘a balelwa le bone,’ tlhaloso eo ya go bolela gore Jesu o ne a bonala mo go ba ba “shomè le bobedi” go bonala e ne e akareletsa Mathaiase.