Gana Gotlhelele Tsela ya Lefatshe e e Tlhabisang Ditlhong
“E le dilō tse ba lo gakgamalèlañ kaga cōna, ba bua boshula kaga lona, ka lo sa sianele nabō mo tlhapeloñ euō e e heteletseñ.”—1 PETERE 4:4.
1. Bibela e tlhalosa jang tsela ya pele ya lefatshe eo Bakeresete ba bantsi ba lekgolo la ntlha la dingwaga ba neng ba siana mo go yone?
‘TLHAPELO e e feteletseng.’ Ke ka tsela eo moaposetoloi Petere a tlhalosang boemo jo bo tlhabisang ditlhong joo bontsi jwa batho mo lekgolong la ntlha la dingwaga ba neng ba le mo go jone pele ga ba nna Bakeresete. Diphetolelo tse dingwe di bua ka yone jaaka “bodiba jwa bopepe” (The New Americañ Bible); le “sebodu sa boitlhapediso” (The New Testament, ya ga Kleist le Lilly). Go ne go dirwa eng mo tlhapelong eno e e feteletseng? Moaposetoloi o umaka segolo-bogolo bopepe, dithato, go nwa bojalwa go feta selekanyo, ditlhapelo, ditago, le ditihelo tse di makgapha tsa medimo ya disetwa.—1 Petere 4:3, 4.
2. Ke ka ntlhayang fa Bakeresete gompieno ba tshwanetse go akgolwa?
2 Abo go na le pharologano e kgolo jang ne gareng ga lefatshe jeno le phuthego ya boammaaruri ya Bokeresete! Petere o ne a akgola Bakeresete bao a neng a ba kwalela ka mo go itumedisang go bo ba ne ba sa nne ba siana le ditsala tsa bone tsa pele tsa selefatshe mo bodibeng jono, sebodu seno, sa bopepe. Go re itumedisa fela thata go akgola Bakeresete gompieno ka mo go tshwanang, ka ebile maemo a le maswe go feta kafa a neng a ntse ka teng mo lekgolong la ntlha la dingwaga. Basupi ba ga Jehofa ba dira maiteko a bogolo go neela kobamelo e e phepa e e sa leswefalang e e amogelwang ke Modimo wa rona le Rraarona, eo e akareletsang ‘go ipoloka ga motho a sa mathwa gope ke lefatshe.’ (Yakobe 1:27) Ditekanyetso tsa bone tse di kwa godimo tsa boitsholo di lere tlotlo e kgolo mo leineng la ga Jehofa.
3. Ke eng seo se neng sa hutsafatsa Paulo, fela jaaka le rona se re hutsafatsa gompieno?
3 Lefa go ntse jalo, go boloka ditekanyetso tsa bone tse di kwa godimo jaaka phuthego e e phepa, batho ba Modimo fa gongwe ba tshwanelwa ke go kgalemela kana le eleng go kgaola bao ba seng kae ka palo bao ba iteseletsang go gogelwa mo ditirong tse di bodileng tsa lefatshe leno. Seno ke selo se se hutsafatsang, mme re ikutlwa fela jaaka moaposetoloi Paulo a ne a ikutlwa fa a ne a bona seemo se se tshwanang mo lekgolong la ntlha la dingwaga. O ne a kwala are: “Gonne batho ba bantsi ba sepela e le baba ba mokgoro oa ga Keresete, e le ba ke ba lo boleletsefi gantsi, me gompiyeno ke lo bolèlèla hèla ka go lela: Ke ba bokhutlō yoa bōnè e leñ tatlhègō, ke ba modimo oa bōnè e leñ mpa hèla, le ba boipelahaco yoa bōnè e leñ ditlhoñ tsa bōnè, ke ba ba tlhōkōmetseñ dilō tsa selehatshe.” (Bafilipi 3:18, 19) Ke jang rona, motho ka bongwe, re ka tilang gore selo sa go nna jalo se seka sa re diragalela? Ka go ithuta go et sa Jesu mo go rateng ditekanyetso tsa tshiamo tse di kwa godimo tsa ga Jehofa le ka go ila bomaswe jwa lefatshe leno.—Bahebera 1:9.
O seka wa Leba kwa Morago
4. (a) Ke ka ntlhayang fa go ka kgonega gore re hepisege go boela mo ditirong tse di leswe tsa lefatshe leno? (b) Ke eng seo se ka re thusang go tila go nna le keletso e e phoso?
4 Le ka motlha o seka wa ba wa nyatsa maatla a sebe. Dilo tse di kgatlhang tsa lefatshe leno di maatla ebile di dintsi; Diabolo o maano ebile o tletse bogale; pelo ya motho e boferefere. (1 Yohane 2:15-17; 1 Petere 5:8; Yeremia 17:9) Fa pelo e tsepama mo sengweng seo e se ratang, gantsi ga e reetse mabaka ao a ntshiwang. Ke gone ka moo re neelwang dikgakololo tse dintsi mo Lefokong la Modimo go re thusa go boloka dipelo tsa rona di ineetse mo go Jehofa le mo go direng thato ya gagwe. Go botlhokwa fela thata gore re seka ra letlelela dikeletso tse di bosula le eleng go thaega mo dipelong tsa rona. (Yakobe 1:14, 15; Mathaio 5:27-30) Re tshwanetse go nna re tiisa dipelo tsa rona ka mabaka a gore ke ka ntlhayang re tshwanetse go rata se se siameng le go ila le go gana gotlhelele ditsela tsa lefatshe leno tse di leswe. Moaposetoloi Paulo o ne a e sobokanya ka tsela eno: “A loratō lo nnè hèla lo sena boitimokanyo. Ilañ se se boshula; ñaparèlañ se se molemō.”—Baroma 12:9.
5. Ke ka ntlhayang fa go le botlhale gore re tlhatlhobise ka kelotlhoko maikutlo a rona le dikeletso?
5 Fa re lemoga kotsi ya go fapoga mo tseleng ya Bokeresete, go botlhale gore mongwe le mongwe wa rona nako le nako re tlhatlhobise maikutlo a rona, dikeletso tsa rona, le mekgele ya rona. A ka bowena o tshwana le Bakeresete bao Petere a neng a kgona go ba akgolela go bo ba sa boela gape mo “tlhapeloñ eo e e heteletseñ”? Kana a ka dinako tse dingwe o bontsha boikutlo jwa mosadi wa ga Lote, yo o neng a gadima a tswela pelo dilo tseo a neng a golotswe mo go tsone?—Genesise 19:26; Luke 17:31-33.
Go Oketsega ga Boikepo mo “Metlheñ ea Bohèlō”
6, 7. (a) Ke boikutlo bofe malebana le boitlhapediso joo Bibela e reng bo tla tshwaya ‘metlha ya bofelo’? (b) Batho ba lefatshe ba supa go akanya ga bone mo go leswe le ditiro jang?
6 A o ko o akanye ka motsotswana ka lefatshe leo re tshelang mo go lone mo bowelong jwa lekgolo leno la bo-20 la dingwaga. Abo boikepo bo le bogolo jang ne! Fela jaaka moaposetoloi Paulo a ne a bolelela pele, banna le basadi ke “barati ba dikgatlhègo, bogolo go go nna barati ba Modimo.” Eleruri, ‘batho ba ba bosula le batsietsi ba nt se ba sulahalela pele fela, ba tsietsa ba bile ba tsiediwa.’—2 Timotheo 3:1, 4, 13.
7 Boaka, kgokahalo, bosodoma, bosodoma jwa sesadi, le go senya dimpa—mafoko ana le a mangwe ke a a tlwaelesegileng mo malapeng a le mantsi. Dilo tseno di a amogelesega ebile go buiwa ka tsone ka kgololesego mo diromamoweng le mo dithelebisheneng le mo mekgatlhong ya bodumedi le ya thuto. Dibuka tse di tsosang keletso ya tlhakanelo-dikobo ke kgwebo e kgolo ebile mongwe le mongwe o ka kgona go di reka motlhofo fela. Bontsi jwa dibaesekopo tseo di rategang thata, metshameko ya serala, le metshameko ya thelebishene di kapanyeletsa dipolelo tseo di amanang le boitsholo jo bo sa siamang jwa mofuta o o rileng. Abo re leboga jang ne go bo re se karolo ya seno! Mme abo re tshwanetse go lwa ka thata jang ne go tlhomamisa gore maaka ana a a rareetsang a seka a ama dipelo tsa rona!
8. Fa e le ka ditiro tsa boitsholo jo bo sa siamang tsa lefatshe leno, Bibela e a re re tshwanetse go dira eng le seo re sa tshwanelang go se dira?
8 Bakeresete ba ba botlhale ba utlwa tlhagiso ya ga Paulo e e reng: “Me boaka, le mashwè aotlhe, leha e le boiphètlhō, go seka ga ba ga umakwa mo go lona, yaka go chwanetse baitshepi . . . Lo nntse lo lekèla go lemoga se se kgatlhañ Morèna . . . Ke gōna, lo lebè thata kaha lo sepelañ ka gōna, e señ yaka ba ba señ botlhale, me yaka ba ba botlhale.” Go na le moo, Paulo o ne are, re tshwanetse go akanya ka dilo tse di boammaaruri, tse di siameng, tse di itshekileng, tse di rategang, le tse di molemo.—Baefesia 5:3-16; Bafilipi 4:8.
9. Ke eng seo se ka diragalang motlhofo fa re tlhopha boitlosobodutu jo bo sa siamang?
9 A ka kelotlhoko o nna o akantse ka kgakololo eno e e utlwalang fa o kgetha se o ratang go itlosa bodutu ka sone? Gakologelwa, fa re nnela go reetsa dilo tse di leswe, mokgwa wa go tshela wa lefatshe leno o nna o lebega e le o o amogelesegang, e se o o maswe mo go kalokalo. Re ka nna ra ba ra simolola go kgatlhegela kana go etsa mo sephiring bommampodi ba metshameko kana ba boitlosobodutu bao ba dirang dilo tseo. Nnang 10 itisitse mo tshekamelong epe fela ya go nna jalo.
Lo Seka lwa Raelwa ke go Akanya ga Lefatshe Leno
10. Ke thuto efe kaga botshelo e e neng e rutiwa ke Baepikuria ba lekgolo la ntlha la dingwaga?
10 Mo metlheng ya ga Paulo batho ba le bantsi ba ne ba dumela thuto ya Baepikuria, ba ba neng ba tshelela go itlhapedisa, ba kgotsofatsa ditlhaloganyo tsa bone. Ba ne ba re, fa oo swa go fela gotlhelele kaga gago. Jalo ke ka ntlhayang fa o sa itumele ka moo o ka kgonang ka teng mo botshelong fa o santse o tshedile, ka gonne o ka nna wa swa ka moso.
11. Batho ba le bantsi ba lefatshe gompieno ba etsa Baepikuria ka go akanya ga bone le ditiro jang?
11 Batho ba le bantsi gompieno ba na le boikutlo jo bo tshwanang le joo. Kwantle ga go tlhabiwa ke ditlhong ba tsenelela mo menateng ya mofuta mongwe le mongwe, ba sa re sepe ka gore boitshwaro jwa bone bo ama ba bangwe jang. Go ya ka bone, ga go na Modimo, kana fa o le teng, ga o supe fa o amega ka merero ya batho ka gope. Ereka motho a nnile teng ka tlhagelelo—jaaka ba bolela—tota ga ba tlhoke go ikarabelela mo go ope fela fa e se mo go bone le batho bao ba tshelang nabo. Ba bile ba nna le seipato sa go bo ba tshela jaaka diphologolo. Fa e le gore ditiro tsa boitsholo jo bo sa siamang tseo Bibela e di kgalemelelang di itumedisa tlhaloganyo, eleruri ga di a tshwanelwa go kgalwa. Batho ba go nna jalo ba akanya ka gore, ke ka ntlhayang fa motho a tshwanetse go tshela botshelo jwa go intsha dijo ganong le go ikhidia, fa rotlhe re felela mo lefelong le le lengwe fela—eleng mo lebitleng?
12, 13. (a) Go na le kotsi efe fa Bakeresete ba akanya ka tsela eo lefatshe le akanyang ka yone? (b) Motswedi wa bothata joo bo neng bo le mo Korintha e ne e le eng? (c) Ke eng seo se tshwanetsweng go dirwa go re thibela go amiwa ke pono e e bogagapa ya botshelo?
12 Go lemotshega gore Bakeresete bangwe ba Korintha ba ne ba lebega ba amilwe ke go akanya ga mofuta ono. Fa Paulo a ne a kwalela phuthego e e neng e le koo, o ne a bolela gore ‘fa e le gore baswi ga ba na go tsosiwa,’ he go tla bo go na le tlhaloganyo nngwe mo mafokong a a neng a buiwa tsatsi le letsatsi a go re: “A re yeñ, re nweñ, gonne re coga re shwa ka moshō.” Mme ka bofefo fela o ne a senola go akanya moo ga tsietso ka go re: “Lo seka loa tsietsèga: Go ikopanya le ba ba boshula, go tlo go bodise mekgwa e mentlè. Tsitsibogèlafi kwa tshiamoñ, me se leoheñ: gonne bañwe ga ba na kicō ea Modimo; mo, ke go bua go lo tlhabisa ditlhoñ.”—1 Bakorintha 15:32-34.
13 Elatlhoko kafa Paulo a epololang modi wa bothata jwa Bakeresete bao ba Korintha ka teng. Go akanya ga bone mo go phoso go ne go bakiwa ke go tsalana le ba ba bosula. Re ka ithuta sengwe mo go seno. Fa re sa eletlhoko, re ka simolola go akanya gore re tshwanetse go ikutlwela menate mengwe e e ilediwang pele ga re tsofala moo re sa kakeng ra tlhola re e ipelela kana pele ga re swa. Fa e le gore re na le tshekamelo ya go akanya ka tsela eno, re tshwanetse go fetola tsela ya rona ya go akanya ka bofefo. Jang? Gakologelwa gore pono eno ya bogagapa ke ya go tlhokomologa ditekanyetso tsa Modimo tsa tshiamo. E supa go tlhoka tumelo mo ditsholofetsong tsa Modimo tse di tlhomamisegang, go akareletsa le tsholofelo ya tsogo. Le eleng fela jaaka go diragala, bao ba tshelang botshelo joo jo bo bosula ba itlisetsa matlhoko a mantsi le mathata. Gore ba nne le pono e e siameng, ba tlhoka go ‘tsitsibogela kwa tshiamong.’ Ga ba kake ba akanya sentle le ka tsitsibogo fa ba “[sena] kicō ea Modimo.”
14. Ke bomang bao ba se kitlang ba rua masego a Bogosi jwa Modimo, lefa go le jalo Paulo o ne a itsise eng kaga botshelo jwa nako e e fetileng jwa batho bangwe?
14 Pelenyana mo lokwalong lwa gagwe go Bakorintha, moaposetoloi Paulo o ne a phepafatsa sentle gore bagokahadi, ba boaka, baobamedi ba medimo ya disetwa, basodoma, magodu, batho ba ba bogagapa, matagwa, bakgadi, le baikgagapeledi, bao botlhe ba neng ba tletse mo Korintha, ba ne ba se kitla ba nna karolo ya Bogosi jwa Modimo. A oketsa ka go re: “Me bañwe ba lona ba kile ba ne ba nntse yalo: me loa tlhapisiwa, loa itshepisiwa.” Go tlhapisiwa ga bone ka tsela eno go ne go bontsha maatla a Lefoko la Modimo le setlhabelo sa thekololo. (1 Bakorintha 6:9-11) Ka boammaaruri, go boela mo lesweng la lefatshe ja bogologolo e tla bo e le boeleele jo bogolo!
15. Ke puo efe e e tlhamaletseng eo Petere a neng a e dirisa go tlhalosa seemo sa bao ba boelang mo ditirong tse di leswe tsa lefatshe leno?
15 Petere o ne are: “Gonne ha e tla re ba sena go halola mo mashweñ a lehatshe ka kicō ea Morèna le Mmoloki Yesu Keresete, me ba ba ba tloga ba itlhakatlhakanya naō, me ba heñwa, popègō ea moragō mo go bauō, e tle e behe bogolo go ea pele. Go ba dihahaletse kaha lehokuñ ya amarure ye le reñ, Nca e boetse matlhatseñ a eōna, le kolobè e e tlhapisicweñ e boetse mo go bidikameñ mo seretseñ.” (2 Petere 2:20, 22) A mafoko a a boima! Lefa go le jalo, ka dinako tse dingwe go tlhokega mafoko a a boima go gatelela mo go rona bomasisi jwa kgakololo eo re e neelwang. Tlhagiso eno e e neng ya newa Bakeresete ba lekgolo la ntlha la dingwaga e re tshwanela le eleng go feta moo gompieno.
Re Roba Seo Re se Jetseng
16. Motho o ‘roba se a se jetseng’ ka ditsela dife fa a tshela botshelo jo bo bosula?
16 Bakeresete ba iponela bosupi mo tikologong ya bone yotlhe jwa gore botshelo jo bo sa siamang, jo bo maswe jwa lefatshe leno bo a gobatsa, ebile bo a bolaya. (Baroma 1:18-32) Fa re bua ka kgang ya go tlhakanela dikobo fela, akanya ka matlhoko le bomadimabe tseo di nnang gone fa go sa tlotliwe molao wa Modimo wa boitsholo: go thubega ga malapa, go ima bana ba dikgora, go senngwa ga dimpa, petelelo, go betelelwa ga bana, le malwetsi ao a tshelanwang a tlhakanelo-dikobo, fa go balololwa a sekae fela. Go tswa foo go na le mathata a botsogo ao a nnang teng fa mmele o sa dirisiwe sentle ka go ja kana go nwa go feta selekanyo, le go dirisa diokobatsi go ijesa monate fela. Go nna bogagapa gantsi go felela ka go utswa le go tsietsa. Tota ga go na go tlola molao wa Modimo gope fela moo go sa feleleng go gobaditse motlodi mo mmeleng kana mo boikutlong. Go nt se fela jaaka moaposetoloi Paulo a ne a gakolola Bakeresete a re: “Lo se tsietsege; Modimo ga o shotlwe: gonne se motho o se yalañ, ke shōna se o tla se robañ. Gonne eo o yalèlañ nama ea gagwè o tla rōba sebodu se se cwañ mo nameñ; me eo o yalèlañ Mōea o tla rōba botshelō yo bo sa khutleñ yo bo cwañ mo Moeeñ.”—Bagalatia 6:7, 8.
17. Ke ka ntlhayang fa Mokeresete a tshwanetse go tlhotlheletsega go tshela ka ditekanyetso tsa Modimo tsa tshiamo?
17 Mo letlhakoreng je lengwe, abo Dikwalo di neela mabaka a a maatla jang ne a go boloka ditekanyetso tsa Modimo. Abo seo Lefoko la Modimo le se bolelang se le boammaaruri jang ne: “Monna eo o boikañō o tla na le letlōtlō ya matshegō”! (Diane 28:20) Bao ba ganang tsela ya lefatshe leno e e tlhabisang ditlhong ba tila matswela a a boitshegang a botshelo jo bo bosula. Ba ipelela kamano e e phepa le bakaulengwe ba bone le bokgaitsadi, gammogo le Modimo wa bone, ebong Jehofa. Mo godimo ga moo, ba na le tsholofelo e e molemo ya go amogela tuelo ya botshelo jo bo sa khutleng mo lefatsheng le lesha la Modimo. Jaanong ka re le gaufi fela le bokhutlo jwa tsamaiso eno ya dilo, ba “dinku di sele” ba na le eleng tsholofelo e e kgethegileng ya go falola “sepitla se segolo” mme ba se kitla ba tlhola ba swa. Fa ba ka swa pele ga nako eo, ba na le tumelo e e feletseng ya gore Modimo o solofetsa gore o tla tsosa botlhe bao ba leng mo diphupung. (Yohane 5:28, 29; 10:16; Tshenolō 7:14) Ponong ya seno sotlhe, ke ka ntlhayang fa motho a ka akanya lefa e le go le gonnye fela kaga go tsenelela mo ditirong tse di makgapha tsa lefatshe leno?—Baroma 6:19-23; 1 Petere 4:1-3.
18. (a) Jehofa o tla atlhola jang “baikepi” ka nako ya “sepitla se segolo”? (b) Malebana le katlholo, Jehofa o itlhalosa jang mo mafokong a gagwe a bofelo a a kwadilweng mo Bibeleng?
18 Bibela e bontsha ka phepafalo gore re tshela mo karolong ya bofelo ya seo e se bitsang ‘bokhutlo jwa tsamaiso eno ya dilo.’ (Mathaio 24:3) Petere o ne a re “magodimo a gompiyeno a beecwe molelō, le lehatshe, e nntse e le ka yeōna lencwe yeuō, ka a letisiwa letsatsi ya tshekishō le ya tshenyègō ea baikepi.” (2 Petere 3:7) Fa letsatsi leno le le sa bolong go letelwa la go ikarabelela le tla, boiphako jwa gore motho o ka itirela dilo fela kwantle ga Modimo bo tla nyelediwa gammogo le jwa gore boitshwaro jwa gagwe jwa boitsholo jo bo sa siamang jwa thubakanyo di bakilwe fela ke tlhagelelo. (Bakolosa 3:5, 6) Reetsa kafa Modimo ka sebele o tlhalosang ka teng phelelo ya bao ba mo direlang, le bao ba sa mo direleng mo mafokong a gagwe a bofelo a a kwadilweng mo Bibeleng: “Bōnañ, ke tloga ke tla ka bonakō; me tuèlō ea me ke na naeō, gore ke duèlè motho moñwe le moñwe kaha tihō ea gagwè e nntseñ ka gōna. . . . Go segō ba ba tlhacwañ dikobō tsa bonè, gore ba nnè le tshiamèlō ea go tla mo setlhariñ sa botshelō, le go tsèna ka dikgōrō mo motsiñ. Kwa ntlè go dinca, le baloi, le bagokahadi, le babolai, le badihedi ba medimo ea disètwa, le moñwe le moñwe eo o ratañ a ba a diha maaka.”—Tshenolō 22:12-15.
19. Re tshwanetse go ikemisetsa go dira eng jaaka re lebane le isagwe?
19 Jaaka fa seemo sa boitsholo jwa lefatshe leno se senyegela pele, ikemisetse ka nitamo go itumedisa Jehofa ka go dira se se leng phepa, se se tlotlegang, le se se siameng. Nna o ntse o lekela go ya go tsaya sekgele sa botshelo. Gana go busediwa mo “tlhapeloñ euō e e heteletseñ” ya lefatshe leno eo e leng lemena la loso. O ka fenya mo ntweng ya go akanya bosula fa o gana gotlhelele tsela ya lefatshe leno e e tlhabisang ditlhong!
O ne o ka Araba Jang?
◻ Ke ka ntlhayang fa go na le kotsi ya go tsenelela mo ditirong tse di tlhabisang ditlhong tsa lefatshe leno?
◻ Ke ka ntlhayang fa re tlhoka go nna kelotlhoko thata fa re tlhopha boitlosobodutu?
◻ Ke go akanya gofe mo go kotsi moo go ka re tlhotlheletsang motlhofo fela fa re ikopanya le Baepikuria ba motlha wa segompieno?
◻ Jehofa o atlhola jang bao kwantle ga go ikwatlhaya ba boelang mo tseleng ya lefatshe leno e e tlhabisang ditlhong?
◻ Bao ba sa tseneleleng ka gope mo boitshwarong jo bo makgapha jwa lefatshe leno ba tla bona masego afe?
[Setshwantsho mo go tsebe 16, 17]
Go gana gotlhelele tsela ya lefatshe leno e e tlhabisang ditlhong go tla thusa batlhanka ba Modimo go tsena mo lefatsheng je lesha ja tshiamo
[Setshwantsho mo go tsebe 18]
Boitlosobodutu jwa lefatshe jo bo tlhabisang ditlhong bo ka rareetsa Mokeresete yo o seng kelotlhoko