Kgatelelo ya Go Batla go Atlega
PHASALATSO nngwe ya mo thelebisheneng e tlhotlheletsa baagi ba Nigeria gore “Ba atlege. Ba nne botlhokwa” ka go dirisa letshwao lengwe la molora o o tlhapang meno. Lefa rotlhe re itse gore molora o o tlhapang meno ga o kake wa dira gore motho a nne yoo o botlhokwa, baphasalatsi bano ba bontsha gore ba lemoga gore batho ba batla go itsege ka dilo tse di nang le letshwao la “katlego.”
Ke ga tlholego fela go eletsa go atlega le go amogelwa ke ba bangwe. Lefa go le jalo, gantsi banna le basadi ba otlelela dilo tse batho ba di fitlhelelang thata mo eleng gore ba ipaya mo kgatelelong ya go batla “go lekana le ba bangwe ka maemo.” A seno se ka nna kotsi? A se ka go ama?
Dikgatelelo Tseo Batho ba Lebaneng le Tsone
Keletso ya botho ya go batla go huma e ka tlisa kgatelelo. Batho ba le bantsi ba batla go kgona go ‘belafala ka matshelo a bone,’ go nna le botumo le maemo mo morafeng.—1 Yohane 2:16.
Lelapa le ka nna la tlisa kgatelelo. Mo magaeng a le mantsi rre o tshwanetse go leka ka metlha gore a oketse madi ao a a amogelang le go tokafatsa boemo kwa gagwe mo lefelong leo a berekang mo go lone e le gore a ke a tlhatlose boemo jwa lelapa mo morafeng. Kana mosadi a ka nna a leka ka natla go nna mmè yo o dirang ka katlego mo tirong ya boitshediso. Bana ba ka nna ba tlhotlhelediwa gore ba bone maemo a a kwa godimo go feta tekano kwa sekolong. Seno ke bothata segolo-bogolo mo merafeng eo e sa ntseng e tlhabologa koo ba le bantsi ba dumelang gone gore motho a ka tokafatsa botshelo jwa gagwe fela fa a na le thutego e e kwa godimo.
Morafe le one o ka gatelela motho gore a ikemisetse go rutega thata, go huma thata, le go nna le maemo a botumo le a go tlhotlheletsa ba bangwe. Katlego, eo gantsi e lekanyediwang ka madi a o nang nao, e ka nna ya gogela kwa goreng motho a nne le maemo, a bakiwe le go tlotliwa. Pegotseleganyo ya Nigeria ya Daily Times e ne ya bua jaana: “Go sa kgathalesege gore dinonofo tsa motho di siame go le kae kana di kgatlhisa go le kae, fa a sena madi, [batho] ba le bantsi ga ba mo tlotle lefa e le go mo amogela.”
Go ka Feleletsa ka Eng?
Katlego e e ntseng jalo ya lefatshe e ka lere boipelo bo se kae, mme akanya fela ka ditlamorago tseo e nnang te tsone. Mokwadi wa lekwalodikgang lengwe ebong Achike Okafo o ne a kwala jaana: “Malapa ao a iketlileng . . . a a thubega letsatsi le letsatsi, thata-thata e le ka ntlha ya madi le seo madi a ka se rekang . . . Tota le eleng banyalani bao ba santseng ba kgona go nna mmogo ga ba ke ba buisana ka ditshwanelego tsa bone jaaka batsadi . . . ka gonne botlhe ba tshwaregile thata mo go lelekiseng dilo tse di bonalang tse di tlisang katlego.” Mo godimo ga moo, go nna le bothata jwa bana bao ba latlhilweng bao ba retologelang mo go diriseng diokobatsi le mo bokebekweng kana ba ngwega mo gae, mme ditlamorago tsa seno e nna tse dikgolo thata.
Kgatelelo ya go batla go atlega e tlhotlheleditse batho bangwe bao ba ratang go tuma gore ba se ka ba ikanyega le gore ba nne le boitsholo jo bo sa siamang. Basadi ba basha ba ile ba dira papadi ka go tlhakanela dikobo e le gore ba ke ba bone dipholo tse di molemo tsa ditlhatlhobo le gore ba bone tiro. Tota le fa batho ba ba atlegileng bano ba bone katlego ya bone ka mokgwa o o slameng,ba la nna la lelana le go galetelwa ke bao ba sa atlegang kana ba ba fufegele gammogo le go lebana le boitimokanyi jwa “ditsala” tseo di gogelwang ke khumo le botumo. (Moreri 5:11) A tota seno ke katlego?
Mokwadi yo o botlhale wa Moreri mo Bibeleng o araba ka go re nnyaa. Morago ga gore a sekaseke khumo ya gagwe e kgolo, maatla a gagwe, le botumo jwa gagwe, a sena go lebelela le boipelo joo dilo tseno di bo lereng, o ne a konela ka gore tseno “e ne e le boithamakō le go belebetlèla phehō hèla.”—Moreri 2:3-11.
A seno se raya gore ditelekiso tsotlhe mo botshelong ke tsa lefela fela? Kana a go na le tekatekano nngwe eo e tshwanetseng eo batho ba ka nnang le yone fa ba ntse ba godisa tiro ya boitshediso eo e nang le matswela? Boitemogelo bo bontsha gore go bonala mokgele wa bone o o botlhokwa-tlhokwa o tla itshupa e le ofe?