Botshelo le Bodihedi tsa ga Jesu

Jesu o Ruta Kwa Jeriko

GO ISE go e kae Jesu le bontsintsi jwa batho ba ba tsamayang le ene ba goroga kwa Jeriko, eo e leng motsemogolo o o ka nnang sekgala sa loeto lwa letsatsi go tswa Jerusalema. Go lebega Jeriko e le motsemogolo o o gabedi, motsemogolo wa bogologolo wa Bajuda o kilometara le sephatlo go tswa kwa motsemogolong o mosha wa Baroma. Jaaka bontsintsi jwa batho ba tswa ka motse wa bogologolo mme ba atamela motse o mosha, difofu tse pedi tsa bakopi di utlwa modumo ono. Mongwe wa bone leina la gagwe ke Baratimaio.

Fa ba utlwalela gore Jesu o a feta, Baratimaio le tsala ya gagwe ba simolola go goa ba re: “Morèna, Morwa Dafide, re utlwèlè botlhoko.” Fa bontsintsi jono jwa batho bo ba kgalema ka bogale gore ba didimale, ba goela le eleng kwa godimo ka mantswe a a tsholetsegileng ba re: “Re utlwèlè botlhoko, Morwa Dafide.”

Fa a utlwa seno, Jesu o a ema. O kopa ba ba nang nae gore ba bitse ba ba goang. Batho bano ba ya kwa bakoping bano ba difofu mme ba raya mongwe wa bone ba re: “Nametsèga tlhè; nanoga, oa gu bitsa.” A itumetse fela thata, monna yo o foufetseng yono o latlha kobo ya gagwe ya kafa ntle, o ema ka dinao, mme o ya kwa go Jesu.

“Lo rata ka lo dihèla eñ?” Jesu o botsa banna ba babedi bao.

“A matlhō a rona a houhololwè,” ba a kopa.

A ba tlhomogela pelo, Jesu o ama matlho a bone. Go ya ka pego ya ga Mareko, Jesu o raya yo mongwe a re: “Tsamaea; tumèlō ea gago e gu hodisitse.” Ka bonako fela bakopi ba ba foufetseng bano ba a bona, mme ga go belaetse gore ba ne ba simolola go galaletsa Modimo ka bobedi jwa bone. Fa batho botlhe ba bona se se diragetseng, le bone ba galaletsa Modimo. Kwantle ga tiego, Baratimaio le tsala ya gagwe ba simolola go sala Jesu morago.

Fa Jesu a feta mo Jeriko, bontsintsi joo jwa batho bo a oketsega. Mongwe le mongwe o batla go bona motho yo o foufolotseng banna ba difofu. Batho ba kgobokanela Jesu mo ba mo pitlaganyetsang, mme go felela ka gore bangwe ba palelwe ke go mmona. Gareng ga bano go na le Sakaio, mokgethisi yo mogolo mo Jeriko le mo tikologong. O mokhutshwane thata mo a sa kgoneng go bona se se diragalang.

Jalo Sakaio o sianela kwa pele a bo a palama setlhare sa mosekamore mo tseleng eo Jesu a tsamayang ka yone. Go tswa kwa godimo koo, o kgona go bona sengwe le sengwe. Jaaka bontsintsi joo jwa batho bo atamela, Jesu o bitsa jaana a lebile mo setlhareng: “Sakaio, akoha u hologè: gonne ke na le go tlhōla kwa tluñ ea gago gompiyeno.”

Sakaio o fologa a itumetse mme o sianela kwa ntlong ya gagwe go baakanyetsa moeng yono wa gagwe yo o tlhomologileng. Mme fa batho ba bona se se diragalang, botlhe ba simolola go ngongorega. Ba bona go sa tshwanela gore Jesu a ka etela monna yo o ntseng jalo. Kana, Sakaio o ne a humile ka ntlha ya go tsaya madi ka bonokwane mo tirong ya gagwe ya bokgethisi.

Batho ba le bantsi ba sala Jesu morago, mme fa a tsena mo ntlong ya ga Sakaio ba ngongorega ka go re: “O ile go tlhōla kwa go oo ra monna eo e leñ moleohi.” Lefa go le jalo, Jesu o bona Sakaio a ka ikotlhaya. Mme Jesu o nepile, ka gonne Sakaio o a ema a bo a bua jaana: “Bōna, Morèna, bontlhañwe yoa dilō tsa me ke bo naea bahumanegi; me ha ke tseetse moñwe selō señwe ka patikō, ke mo rebolèla di le nnè.”

Sakaio o supa gore o ikotlhaile ka mmatota ka go naya bahumanegi bontlhanngwe jwa dilo tsa gagwe le go dirisa bontlhanngwe jwa tsone go duela ba a ba tsieditseng. Go lebega gore a ka kgona go itse gore o ba kolota bokae ka direkoto tsa gagwe tsa makgetho. Jalo o ikana gore o tla ba busetsa go menagane ganè, go dumalana le molao wa Modimo o o reng: ‘Fa monna a ka utswa nku, o tshwanetse go duela ka di le nnè tsa letsomane la gagwe.’

Jesu o itumelela tsela eo Sakaio a solofetsang go kgaoganya dithoto tsa gagwe ka yone, ka go bo O bolela jaana: “Gompiyeno polokō e tsile mo tluñ e, ka gonne le èna ke morwa Aberahame. Gonne Morwa Motho o tsile go batla le go boloka se se neñ se latlhegile.”

Bosheng jaana, Jesu o ne a file setshwantsho sa boemo ‘jwa tse di latlhegileng’ ka polelo ya morwa wa sesinyi. Jaanong re na le sekai sa mmatota sa yo a neng a latlhegile yo jaanong a bonweng. Le eleng lefa baeteledipele ba bodumedi le balatedi ba bone ba ngongola le go ngongorega ka go etela ga ga Jesu batho ba ba tshwanang le Sakaio, Jesu o tswelela pele go batla le go tsosolosa barwa bano ba ba latlhegileng ba ga Aberahame. Mathaio 20:29-34; Mareko 10:46-52; Luke 18:35–19:10; Ekesodo 22:1.

◆ Go lebega Jesu a kopana le bakopi ba difofu fa kae, mme o ba direla eng?

◆ Sakaio ke mang, mme ke ka ntlhayang fa a palama setlhare?

◆ Sakaio o bontsha jang gore o ikotlhaile?

◆ Ke eng seo re ka se ithutang go tswa go ka moo Jesu a neng a tshwara Sakaio ka gone?