Pego ya Baboledi ba Bogosi
Go Rera Mafoko A A Molemo kwa “Sekhutloñ sa Lehatshe”
“ME Mahoko a a Molemō a, a bogosi, a tla rèrwa mo lehatshiñ yeotlhe, go nna chupō mo merahiñ eotlhe; hoñ ke gōna bokhutlō bo tla tlañ.” Ke seo Jesu a neng a se bolelela barutwa ba gagwe pele fela ga loso lwa gagwe. Gape o ne a bolela jaana ka bonako fela fa a sena go tsosiwa mo baswing: “Lo tla nna Bashupi ba me mo Yerusalema, le mo lehatshiñ yeotlhe ya Yudea le ya Samaria, le go ea hèla kwa sekhutloñ sa lehatshe.” (Mathaio 24:14; Ditihō 1:8) Boperofeti jono gompieno bo diragadiwa mo dinageng tse di fetang 200, go akaretsa le naga ya Amerika Borwa, eleng Peru.
Basupi ba ba fetang 32 000 ba rera mafoko a a molemo mo nageng e ntle eno, mme tshimo ya bone eleruri e akaretsa dikarolo tse di kwa kgakala tsa lefatshe: Andes e e kwa godimodimo, e bogodimo jwa yone bo fitlhang go dimetara di le 4 000 le di le 4 500, gape le dikgwa tse di mogote tsa Amazon, koo batho ba kgonwang go fitlhelelwa fela ka mekorwana e e tsamayang mo dinokeng. Lekala la Peru le bega jaana:
◻ “Re na le babulatsela ba ba kgethegileng ba le robedi ba ba neetsweng mekoro e mebedi e mennye e e bidiwang lanchas, kwa lefelong la dikgwa. Mekorwana eno e kgapha metsi a a ka nnang [dimetera di le 0,3] fela, ka jalo ba ile ba kgona go isa mafoko a a molemo kwa mafelong a mantsi a masha ba tsamaya mo dinokaneng tse dinnye. Go fitlha jaanong, bakaulengwe ba ba dirisang mekorwana eno ba ile ba tsamaisa dikete tse di makgolokgolo tsa dimakasine, dibuka le Dibibela mo Peruvian Amazon Valley yotlhe. Seno ka tlhamamalo fela se ne sa felela ka gore go tlhomiwe diphuthego tse disha tse nnè, mmogo le ditlhopha di le tlhano tse di kwa thoko tseo di begang tirelo ya tsone ebile di tshwara dipokano. Go solofelwa gore ditlhopha tseno di tla tloga di nna diphuthego.”
◻ Toropo nngwe e ne ya tlhagoga go dikologa seteišane sa go pompa sa mosele wa ole wa Trans-Andes, mosele oo o tsamaisang ole go tswa mo dikgweng go ralala Andes e e kwa godimo go fitlha kwa lotshitshing lo lo kafa bophirima. Ka ntlha ya go bo e na le badiri ba ba dirang mo meseleng eno, toropo eno e ne e na le matlo a borekisetso jwa bojalwa a le 20 mme e ile ya itsiwe jaaka lefelo le go nowang bojalwa thata kwa go lone le go ijesa monate. Lefa go ntse jalo, fa babulatsela ba ba kgethegileng ba sena go neela bosupi ka botlalo, bontsi bo ile jwa arabela molaetsa wa Bogosi, mme jaanong go na le matlo a manè fela a borekisetso jwa bojalwa mo toropong eno! Go ne ga tla batho ba le 189 kwa puong ya phatlalatsa mo loetong lwa bosheng lwa molebedi yo o etang. Jaanong go na le setlhopha sa baboledi ba le 7 mo toropong eno le batho ba ba fetang 45 ba ba tlang mo dipokanong tsotlhe. Se tshwanetse go nna phuthego ka bonako fela ka tshegofatso ya ga Jehofa.
◻ Monna mongwe yo o dingwaga di 29 yo o mo go nngwe ya diphuthego di le 221 mo motsemoshateng wa Peru, ebong Lima, o ne a bolela kafa a boneng boammaaruri ka gone. O ne a tlogetse sekolo fa a na le dingwaga di le 13, mme o ne a kopanela le setlhopha sa dinokwane mme a simolola tiro ya go lwa, go dirisa diokobatsi le boitsholo jo bo sa siamang jwa tlhakanelodikobo. O ne a simolola go nna le mathata a tlhaloganyo fa a sena go wetsa dingwaga tse pedi mo tirong e e patelediwang ya bosole. Morago, ka 1983, kgaitsadi mongwe yo o ikokobeditseng, yo o boingotlo o ne a kopana nae mo tirong ya bodihedi jwa gagwe jwa ka ntlo le ntlo. E ne e le la ntlha a utlwa ka lefatshe le lesha le le nang le lorato le kagiso. Go ne ga simololwa thuto ya Bibela mme o ne a kgona go fenya ditiro tsa gagwe tse di bosula ka thuso ya phuthego le maatla a ga Jehofa. O ne a kolobediwa ka 1986 mme jaanong ke motlhanka wa bodihedi mo phuthegong.
Ka boammaaruri, mafoko a ga Jesu a gore Bogosi bo rerwe “go ea hèla kwa sekhutloñ sa lehatshe” a a diragadiwa kwa Peru mme matswela a one a molemo tota, ka a solegela batho ba le bantsi ba mo nageng eo molemo ba ba bolailweng ke tlala le lenyora la boammaaruri.