Tsamayang Jaaka Badirimmogo mo Boammaaruring

Dintlhakgolo tsa Yohane wa Bobedi le wa Boraro

KITSO ya boammaaruri ke lotshwao lo lo tlhaolang baobamedi ba ga Jehofa. (Yohane 8:31, 32; 17:17) Go tlhokega gore motho a sepele mo boammaaruring jwa Modimo gore a bone poloko. Mme batlhanka ba Modimo ba tshwanetse go nna badirimmogo mo boammaaruring.

Lokwalo lwa bobedi le lwa boraro lwa ga moaposetoloi Johane di bua ka go “tsamaea mo boamarureñ.” (2 Yohane 4, 3 Yohane 3, 4) Gape Yohane wa Boraro e kgothaletsa gore re dirisane mmogo jaaka “badihi mmōgō mo boamarureñ.” (3 Yohane 5-8) Ka fa go lebegang ka teng, dikwalo tseno ka bobedi di ne tsa kwalelwa kwa Efeso kana gaufi le gone mo e ka nnang ka 98 C.E. Mme seo di se bolelang se ka solegela batho ba ga Jehofa molemo gompieno.

Johane wa Bobedi e Gatelela Boammaaruri

Sa ntlha lokwalo lwa Johane wa Bobedi lo ne lwa gatelela boammaaruri le lorato lwa ba lwa ntsha tlhagiso kgatlhanong le “moganetsa Keresete.” (Ditemana 1-7) Lokwalo lono lo ne lo kwaletswe “mohumagadi eo o moitshenkedwi,” yo gongwe e neng e le motho yo o rileng. Mme fa e le gore le ne le romelwa kwa phuthegong, “bana” ba gagwe e ne e le Bakeresete ba ba tsetsweng ka moya bao ba ‘kgethetsweng’ botshelo jwa selegodimo ke Modimo. (Baroma 8:16, 17; Bafilipi 3:12-14) Johane o ne a itumelela gore batho bangwe ba ne ba “tsamaea mo boamarureñ” mme ka gone ba ganana le botenegi. Lefa go le jalo, ba ne ba tshwanetse go itisa mo go “moganetsa Keresete” yo o ganelang gore Jesu o ne a tla a le mo nameng. Basupi ba ga Jehofa gompieno ba utlwa ditlhagiso tsa go nna jalo kgatlhanong le botenegi.

Morago ga foo Johane o ne a neela kgakololo malebana le go dirisana le batenegi mme go tswa foo a digela ka seo e neng e le keletso ya gagwe le ditumediso. (Ditemana 8-13) Ka ditiro tse di tshwanang le go rera, ene le ba bangwe ba nnile le maungo ao a ileng a felela ka gore bao a ba romeletseng lokwalo lwa gagwe ba sokologe. Ba ne ba tla ‘amogela tuelo’ fela fa ba ne ba ka ‘ipona’ semoyeng, seo go bonalang se ne se akaretsa “serwalō” seo se beetsweng batlodiwa ba ba ikanyegang. (2 Timotheo 4:7, 8) Fa motho mongwe yo o neng a sa ‘nnela ruri mo loratong lwa ga Keresete’ a ne a tla kwa go bone, ba ne ba sa tshwanela ‘go mo amogela mo magaeng a bone le ka motlha lefa e le go mo dumedisa’ e le gore ba tile go tlhakanela le ene mo ‘ditirong tse di bosula’ tsa gagwe. Morago ga a sena go bolela gore o solofela gore o tla tla go bua le badumedikaene bao ba lebane difatlhogo, Johane o digela ka ditumediso.

Yohane wa Boraro e Gatelela Tirisanommogo

Lokwalo lwa Yohane wa Boraro le ne le kwaletswe Gaio mme sa ntlha le lemotsha seo a neng a se direla baobamedikaene. (Ditemana 1-8) Gaio o ne a “tsamaea mo boamarureñ” ka go dumalana le setlhopha sotlhe sa dithuto tsa Bokeresete. Gape o ne a “diha tihō ea boikañō” ka go thusa bakaulengwe ba ba etang. Johane o ne a kwala jaana: “Re chwanetse go gorosa ka pula ba ba nntseñ yalo, gore re tlè re nnè badihi mmōgō le boamarure.” Basupi ba ga Jehofa ba bontsha balebedi ba ba etang gompieno kamogelobaeng e e tshwanang.

Morago ga a sena go tshwantshanya boitshwaro jo bo maswe jwa ga Dioterefese le jwa ga Demeterio, Johane o digela lokwalo lwa gagwe. (Ditemana 9-14) Dioterefese yo o neng a rata go galalediwa o ne a seka a bontsha Johane tlotlo epe a bo a leka go leleka bao ba amogelang bakaulengwe sentle mo phuthegong. Lefa go le jalo, go ne go na le motho mongwe yo o neng a bidiwa Demeterio yo o neng a umakiwa fa a le sekao se se molemo. Johane o ne a solofela go bona Gaio mo nakong e khutshwane a bo a digela ka ditumediso a bile a eletsa gore ekete Gaio o ka ipelela kagiso.

[Box/​Picture on page 30]

Ka Pampiri, Pene, le Inki: Johane o ne a eletsa go etela “mohumagadi eo o moitshenkedwi” le “bana” ba gagwe go na le go ba kwalela dilo di le dintsi “ka pampiri le inke.” Go na le go tswelela a kwalela Gaio “ka inke le pènè,” moaposetoloi yoo gape o ne a lebeletse go mmona gape mo nakong e khutshwane. (2 Yohane 1, 12; 3 Yohane 1, 13, 14) Lefoko la Segerika le le ranotsweng ka go re “pènè” (kaʹla·mos) le lebisa go lotlhaka mme le ka nna la ranolwa ka gore “lotlhaka lo lo kwalang.” Mo Bagerikeng le Baroma, pene ya lotlhaka e ne e le motsu ebile e phatlotswe jaaka dipene tse di lohala tse di neng tsa nna teng moragonyana. Lefoko la Segerika meʹlan, le le ranotsweng ka gore “inke,” ke mofuta o o sa kayeng bong wa letlhalosi la bonna meʹlas, le le rayang “bontsho.” Mo diinkeng tsa bogologolo, mmala wa tsone e ne e le wa bontsho jwa magala—e ka ne e le mosidi wa mofuta mongwe o o neng o tserwe mo lookwaneng lo lo shang kana dikgong, kana magala a a dirilweng ka dilo tsa merogo kana tsa diphologolo. Gantsi, diinki di ne di bolokiwa e le dipapetlana tse di omeletseng tse ditelele kana tsa seka dikuku. Pampiri ya metlha eo e ne e le e tshesane eo e neng e dirwa diphate ka lodi lwa setlhare sa koma. Bakeresete ba pele ba ne ba dirisa pampiri ya go nna jalo go kwala dikwalo, memeno, le dibuka tsa bogologolo.