Pego ya Baboledi ba Bogosi

Go Dira Tshimo E E kwa Thoko kwa Paraguay go Nna le Matswela

LEKALA la kwa Paraguay la Mokgatlho wa Watch Tower le itse sentle gore mafoko a a molemo a Bogosi a tlhoka go rerwa mo tshimong yotlhe ya lone. (Ditihō 1:8) Eno ke nako ya gore batho botlhe ba ithute kaga Bogosi le gore ba direle Jehofa pele a nyeletsa tsamaiso eno e e boikepo ka “sepitla se segolo” se se tlang. (Mathaio 24:21, 22) Maitemogelo a a latelang a bontsha gore ke eng seo se dirwang go thusa batho ba ba mo ditshimong tse di sa abiwang. Lekala leo le bega jaana:

Go ne ga dirwa dithulaganyo tsa gore tshimo yotlhe e e sa abiwang e dirwe ke babulatsela ba ba kgethegileng ba nakwana. Mo dikgweding tsa November go ya kwa go January wa ngwaga wa tirelo wa 1990, bakaulengwe le bokgaitsadi ba le 39 ba ne ba dira ditshimo di le lekgolo tsa ditoropo le ditorotswana tseo di iseng di nne le baboledi ba Bogosi. Ba ne ba kgona go tsamaisa dibuka di le 6 119, dibukana di le 4 262, le dimakasine di le 5 144. Tiro eno e felela ka gore go bopiwe ditlhopha tse disha tsa baboledi.

◻ Mosadi mongwe o ne a amogela buka ya O Ka Tshelela Ruri mo Lefatsheng la Paradaise e tsamaisiwa ke kgaitsadi mongwe wa mmulatsela yo o neng a dira tshimo e e sa abiwang. Mmulatsela o ne a akantsha gore a ithute Bibela le ene, mme o ne a dumela a itumetse. Fa mmulatsela a boa, o ne a fitlhela a sa emelwa ke mmè yoo fela mme gape le ke monna wa gagwe le bana ba bone ba ba some. Fa a ba etela gape, lelapa leno mmogo le ditsala tsa bone le baagelani ba bone ba ne ba emetse thuto eno ya Bibela! Mmè yono o ne a ba laleditse, a ba bolelela gore thuto ya teng e ne e le molemo thata le gore tsholofelo le masego tseo Jehofa a di neelang di a gakgamatsa. Mafoko ano a ne a le masha mo ditsebeng tsa gagwe, ka jalo o ne a akanya gore baagelani ba gagwe le ditsala tsa gagwe le bone ba tshwanetse go utlwa mafoko ano a a molemo.

Nako le nako fa mmulatsela yono a ne a tshwere thuto, go ne go tla batho ba le bantsi mo eleng gore go ne go lebega ekete ke phuthego e potlana. Batho bano ba ba kgatlhegang ba ne ba botsa dipotso di le dintsi ebile ba nna le seabe mo thutong. Fa mmulatsela a ne a tlhalosa gore ene le bao a neng a tsamaya le bone ba ne ba tla tshwanelwa ke go fudugela kwa lefelong le lengwe fa tshimo e fela, mmè yoo o ne a tshwenyega mme a mmotsa gore jaanong ba ne ba tla sala le mang. Go ne ga dirwa dithulaganyo le bakaulengwe ba ba mo phuthegong e e fa gaufi gore ba tswelele pele ba ithuta le bone. Jaanong go abetswe babulatsela ba ba kgethegileng gore ba ye go thusa batho bano ba ba kgatlhegang, ba seka dinku.

◻ E ne ya re fa kgaitsadi mongwe wa mmulatsela a tsamaya ka ntlo le ntlo mo tshimong e nngwe e e sa abiwang, o ne a kopana le monna mongwe yo o neng a rekile buka ya Boamarure jo bo Isang Botshelong jo Bosakhutleng dingwaga di ka nna some pele ga foo. Fa esale go tloga ka nako eo o ne a se ka a tlhola a kopana le Basupi ba ga Jehofa gape. Lefa go ntse jalo, o ne a itse gore Jehofa, yo a neng a mmitsa Jehofa wa mashomoshomo, ke ene fela Modimo wa boammaaruri le gore ke Ene fela yo o tshwanetseng go obamelwa. O ne a tlhola a bolelela mongwe le mongwe yo a neng a mo itse kaga Jehofa, a sa kgothadiwa ke ope gore a dire jalo. Ebile tota, o ne a tsamaya sekgala sa dikilometara di le tharo beke le beke a etela banyalani bangwe go ya go bua le bone kaga Modimo ka gonne, jaaka a ne a bolela, ‘Fa nka emisa go nna ke ba etela, ba tla lebala Jehofa.’ Kwantle ga banyalani bano, go ne go na le batho ba bangwe gape ba ka nna some bao ba neng ba batla thuto ya Bibela—fela ka gonne motho yono yo o kgatlhegang a ne a ba reretse.

Sengwe se se kgatlhang ke gore, e ne e rile malatsinyana a sekae fela pele a etelwa ke mmulatsela yono, ene monna yo o ne a ganne go letla moruti wa lefelo leo le bao ba neng ba mo setse morago gore ba tsene mo ntlung ba tshotse setshwantsho sa lekgarebane, a ba bolelela gore o ne a sa dumele mo ditshwantshong. Moruti o ne a gakala. Monna yono o ne a lala a rapela Jehofa jone bosigo joo gore a mo thuse. Ka jalo akanya fela gore o ne a itumetse go le kana kang fa mmulatsela a mo etela! Ba ne ba dira dithulaganyo gone fela foo tsa gore ba nne le thuto e e rulagantsweng sentle ya Bibela, mme monna yono o ntse o tswelela pele go kopanela le phuthego ya bolegodimo.

Eleruri, Jehofa o segofatsa tiro ya go phutha batho kwa Paraguay jaaka fa bakaulengwe ba leka go neela bosupi ka botlalo mo ditshimong tseno tse di sa abiwang.—Mathaio 24:14.