Thekololo E E Ntshediwang Ba Bantsi

KA MARCH 31, 1970, sefofane sa jete se ne sa gapiwa ka dikgoka gaufi le Thaba ya Fuji kwa Japane, Maloko a le robonngwe a setlhopha sa Japanese Red Army Faction a ne a tsaya bapalami ba ba fetang 120 mmogo le bao ba dirang mo sefofaneng jaaka batshwarakananyo mme ba pateletsa gore ba isiwe kwa Korea Bokone ba babalasegile.

Fa sefofane se kotama kwa Seoul, kwa Repaboliking ya Korea, motlatsatona ya dipalangwa wa Mojapane Shinjiro Yamamura o ne a ithaopela go baya botshelo jwa gagwe mo kotsing mo boemong jwa batshwarwa. Ereka ba ne ba dumela go mo tsaya gore ba se ka ba tlhaselwa, ba ba neng ba pateleditse sefofane go ema bano ba ne ba golola batshwarakananyo botlhe kwa ntle ga ba ba neng ba dira mo sefofaneng. Ba ne ba tloga ka sefofane ba ya kwa Pyongyang, koo ba neng ba ineela mo balaoding ba Korea Bokone. Moragonyana Rre Yamamura le mokgweetsi wa sefofane ba ne ba boela kwa Japane ba sa utlwisiwa botlhoko gope.

Mo kgannyeng eno, motho a le mongwe o ne a rekolola matshelo a batshwarakananyo ba le 120. Seno se re thusa go lemoga kafa motho a le mongwe a ka kgonang go ntsha botshelo jwa gagwe go rekolola batho ba bantsi ka teng. Mme gore re tlhaloganye thuto ya Bibela e e kaga thekololo, re tshwanetse go sekaseka kgang eno ka botlalo.

Lebaka le lengwe ke gore, re tshwanetse go ithuta ka botlalo gore boleo bo simologile kae. “Ke gōna, yaka boleo bo tsenye mo lehatshiñ ka motho a le moñwe hèla, le losho ka boleo, me yalo losho lwa hetèla mo bathuñ botlhe, ka botlhe ba leohile,” Bibela e tlhalosa jalo. (Baroma 5:12) Seno se ne sa diragala jang? Motho yo o umakiwang foo e ne e le Adame, motho wa ntlha go bopiwa. O ka nna wa bala pego ya hisitori ya gagwe le se se neng sa dira gore a tlogele ka boomo go boloka taolo ya Modimo. Kgang eno e fitlhelwa mo dikgaolong tsa ntlha tse tharo tsa buka ya Bibela ya Genesise.

Pego eo e senola gore go ne go na le motlhotlheletsi yo o sa bonaleng fa Adame a ne a leofa la ntlha. Go kgotsofatsa keletso ya gagwe ya go batla go laola, motlhotlheletsi yono o ne a loga maano a gore a laole Adame le bana botlhe ba a neng a ka nna le bone. Motlhotlheletsi yono e ne e le Satane Diabolo. Gape o bidiwa “nōga ea bogologolo” ka gonne o ne a dirisa noga go dira gore Adame a leofe. (Tshenolō 12:9) Lefa gone Mmopi yo o lorato a ne a boleletse Adame gore a Mo letle gore a mo tlhophele se se molemo le se se bosula, noga e ne ya tsietsa mosadi wa ga Adame ebong Efe, gore le ene a se ka a utlwa Modimo. Morago e ne ya raela monna wa gagwe gore a se ka a utlwa. Ka go dira jalo, Adame o ne a bolela gore a ka ipusa kwantle ga go kaelwa ke Modimo, ka jalo a leofa fela ka boomo, mme o ne a kgona go naya bana ba gagwe mofuta one oo wa botshelo.

Re santse re boga ka ntlha ya matswela a seo. Jang? Ke boammaaruri gore Mmopi o buile ka tlhamalalo gore fa Adame le Efa ba ne ba ka itlhophela go se utlwe, ba ne ba tla swa. Ka jalo, Adame o ne a rekisa batho botlhe mo bokgobeng jwa boleo le loso fa a ne a leofa.—Genesise 2:17; 3:1-7.

Batho ba ne ba gololwa jang mo boemong jono jwa boleo? Jesu Keresete o ne a tla mo lefatsheng “go ntsha botshelō yoa gagwè go nna thèkololō ea batho ba le bantsi,” mme seno se ne sa bula tsela ya go rekolola batho.—Mathaio 20:28.

Go Bipa le go Golola

Bibela e bontsha gore go gololwa ga batho go ne go ama dikgato tse pedi: (1) go reka gape (2) le go golola. Mokanoki wa Bibela Albert Barnes o ne a kwala mabapi le lefoko la Segerika (lyʹtron) leo le ranotsweng jaaka “thekololo,” a re: “Lefoko thekololo tota le raya tlhwatlhwa e e duelwang go golola batshwarwa. Kwa ntweng, fa magolelwa a tshwerwe ke baba ba one, madi a a batliwang gore ba tle ba gololwe a bidiwa thekololo; ke gore ke tsela eo ba gololwang ka yone. Ka jalo sengwe le sengwe se se gololang motho mo kwatlhaong, kana mo go bogisiweng, kana mo boleong, se bidiwa thekololo.”

Ee, “sengwe le sengwe se se gololang motho” se ka bidiwa lyʹtron. Ka jalo lefoko leno la Segerika le gatelela tsela kana mokgwa wa go golola.a

Moaposetoloi Paulo o ne a dirisa lefoko le le kayang se se tshwanang eleng an·tiʹly·tron go gatelela botlhokwa jwa tlhwatlhwa e e neng e duelwa jaaka thekololo. O ne a kwala mo go 1 Timotheo 2:6, gore ‘Jesu o intshitse’ jaaka “thèkololō ea botlhe.” Greek and English Lexicon to the New Testament e e kwadilweng ke Parkhurst e akgela jaana: “E kaya ka tshwanelo tlhwatlhwa e batshwarwa ba rekololwang mo mmabeng ka yone; ebile e kaya mofuta wa go ananya o mo go one botshelo jwa motho bo rekololwang ka botshelo jwa yo mongwe.” Fano go gatelelwa gore tlhwatlhwa e e duelwang ya thekololo e tshwanetse ya tshwanela sentle kana e nne le maatla a a ka ntshang matswela a a batliwang. Setlhabelo se se rekololang sa ga Jesu se ka tsewa gore ke “thekololo e e tshwanelang tota” jang?

Thekololo E E Tshwanelang Tota

Adame o rekisitse batho botlhe, mmogo le rona, mo boleong le mo losong. O ne a duela tlhwatlhwa kana molato o a neng a o atlholetswe ka botshelo jwa gagwe jo bo itekanetseng, le nonofo ya go tshelela ruri. Go bipa seno, botshelo jo bongwe jo bo itekanetseng jwa motho bo ne bo tshwanela gore bo duele seno jaaka thekololo e e tshwanelang tota. Lefa go ntse jalo, go ne go sena ope yo o tshotsweng ke motho yo o sa itekanelang yo a neng a ka ntsha botshelo jo tota e leng jwa motho jo bo itekanetseng. (Yobe 14:4; Pesalema 51:5) Lefa go ntse jalo, Modimo ka botlhale jo e leng jwa gagwe, o ne a bula tsela eo e gololang mo pitlaganong eo. O ne a tsaya botshelo jo bo itekanetseng jwa Morwawe yo o tsetsweng a le esi go tswa kwa legodimong a bo tsenya mo popelong ya lekgarebane, a letla gore a tsholwe jaaka motho yo o itekanetseng. (Luke 1:30-38; Yohane 3:16-18) Thuto eno ya gore Jesu o tshotswe ke lekgarebane, ga se kgannyana fela e e tlhamilweng ka leano la go tlotlomatsa mosimolodi wa bodumedi bongwe. Go na le moo, e tlhalosa kgato e e botlhokwa e Modimo o e tsereng go ntsha thekololo.

Jesu o ne a tshwanelwa ke gore a nne le leina le lentle ka dinako tsotlhe fa a ne a le mo lefatsheng gore a kgone go ntsha thekololo. O ne a kgona. Morago o ne a swa loso lwa go intsha setlhabelo. Ka tsela eno, Jesu o ne a duela tlhwatlhwa ya botshelo jwa gagwe jo bo itekanetseng go rekolola batho. (1 Petere 1:19) Ka jalo, re ka bua ka tlhomamo fela gore “moñwe o shwetse botlhe.” (2 Bakorintha 5:14) Ee, “yaka botlhe ba shwa ka Adame, go nntse yalo botlhe ba tla tshedisiwa ka Keresete.”—1 Bakorintha 15:22.

Motho A le Mongwe O Ntshediwa Ba Bantsi

Mo kgannyeng ya go faposiwa ga sefofane e e umakilweng kwa tshimologong, batshwarakananyo ba ne ba sena tsela e ba ka ikgololang ka yone, lefa ba ne ba ka tswa ba humile. Go ne go tlhokega thuso e nngwe e e kwa thoko, mme monna yo a neng a ba intshetsa o ne a tshwanelwa ke go tshwanelega ka ditsela dingwe. Go a tshwana le ka setlhabelo se se neng se tlhokega go rekolola batho lefa gone sone e ne e le ka tsela e kgolwane. Mopesalema o ne a kwala jaana: ‘Mo go ba ba . . . belafalang ka bontsi jwa dikhumo tsa bone; Ga go na ope yo o ka rekololang ngwana wa ga rraagwe ka gope, lefa e le go mo ntshetsa serekololo go se naya Modimo, (gonne thekololo ya moya wa bone e topo e e thata, mme e na le go tlhobogwa ka bosakhutleng).’ (Pesalema 49:6-8) Tota ruri, batho ba ne ba tlhoka thuso e e tswang koo. Botshelo jwa motho a le mongwe bo ne bo ka kgona go rekolola batho botlhe fela fa motho yoo a ne a tshwanelega mo dilong tse di neng di batlega gore dilekanyo tsa Modimo tsa tshiamo di lekalekane. Jesu Keresete e ne e le ene motho yo o itekanetseng yo a neng a fitlhelela dilo tse di tlhokegang tseno.

Jehofa Modimo o ne a baakanyetsa gore batho ba gololesege ka go duela thekololo ka Jesu Keresete. Mme lefa go ntse jalo Modimo o ne o dirile go le gontsi. O atlholetse Satane Diabolo loso, ene yo o digetseng batho mo boleong. (Tshenolō 12:7-9) Jehofa o tla tloga a golega yo o molato yono mme labofelo o tlile go dira go ya kafa a mo atlhotseng ka teng ka go mo ‘latlhela mo bodibeng jwa molelo le sulefura,’ seo se tshwantshetsang go senngwa ka bosakhutleng. (Tshenolō 20:1-3, 7-10, 14) Batho ba tla itumelela go gololwa eseng fela mo dikgoleng tsa boleo le loso mme gape le mo tlhotlheletsong ya ga Satane ka jaana dibopiwa tse di bosula tseno tsa moya di tla bo di nyeleditswe, le thekololo e tla bo e dirilwe gore e solegele molemo. Ka ntlha ya gore ba tla bo ba golotswe ebile ba bone le melemo ya setlhabelo sa thekololo sa ga Keresete ka botlalo, batho ba ba kutlo ba tla tswelela ba itekanela gape.

Thulaganyo ya Thekololo le Wena

Bontsi jwa batho ba ba kwa dinageng tsa Botlhaba ba ile ba anaanela se Modimo o se ba diretseng thata, fa ba sena go ithuta ka setlhabelo se se rekololang sa ga Jesu Keresete. Kazuo ke mongwe wa bone. O ne a rata thata go goga seela se se tlhaolosang pente. O ne a tlhola a senya dikoloi tsa gagwe gore di sale di sena mosola ka ntlha ya go kgweetsa a tagilwe ke sone selo seno. Ditsala tsa gagwe tse tharo di ne tsa ipolaya fa ba sena go lemoga gore ba ne ba sentse boitekanelo jwa bone. Kazuo le ene o ne a leka go ipolaya. Kwa morago o ne a simolola go ithuta Bibela. Ereka a ne a tlhotlhelediwa ke boammaaruri jo a bo ithutileng, o ne a ikaelela go fetola botshelo jwa gagwe. O ne a kgaratlha gore a tlogele mokgwa wa go koafatsa mmele wa gagwe ka seela seno se se tlhaolosang pente, mme gantsi o ne a palelwa. O ne a lebanwe ke bothata jwa go lwa le dilo tse a neng a eletsa go di dira tsa senama, le go lwa ka thata go dira se se molemo. O ne a ikutlwa a itumetse jang ne fa a bona a kgona go rapela Modimo gore o mo itshwarele ditlolo tsa gagwe ka ntlha ya molemo wa setlhabelo sa ga Jesu Keresete! Ka go rapela le ka go thusiwa ke ditsala tsa Bakeresete, Kazuo o ne a kgona go fenya mokgwa wa gagwe o o maswe mme jaanong o direla Jehofa jaaka motlhanka yo o itumetseng yo o nang le segakolodi se se phepa.

A o gopola Chisako yo go builweng ka ene mo setlhogong se se fetileng? Le ene o ne a kgona go tlhaloganya selo se se molemo seno se re se neilweng ebong thekololo ka go ithuta Bibela. O ne a ikutlwa a tlhotlheletsega thata fa a sena go itse gore Modimo o ntshitse Morwa wa one go rekolola batho mo boleong. Chisako o ne a neela Jehofa botshelo jwa gagwe. Le eleng jaanong a ntse a na le dingwaga di le 77 o senya diura tse di ka nnang 90 kgwedi le kgwedi a bolelela ba bangwe ka lorato lo logolo lwa ga Jehofa le ka bopelonomi jwa gagwe jo bo sa re tshwanelang jo a bo re bontshang.

Ka yone thekololo Modimo o tla bula tsela gore batho ba bone kgololesego ya boammaaruri ba bo ba gololesege mo boleong le mo losong. Isagwe e e botlhokwa ya botshelo jo bo sa khutleng e tla bonwa ke bao ba amogelang setlhabelo se se rekololang sa ga Jesu Keresete. Tsweetswee, ikopanye le Basupi ba ga Jehofa mme o itlhatlhobele ka bowena gore o ka bona jang boitumelo jwa go gololesega mo boleong le mo losong ka thulaganyo e e molemo ya thekololo.

[Ntlha e e kwa tlase]

[Motswedi wa Setshwantsho mo go tsebe 5]

Courtesy of the Mainichi Shimbun