Ke ka Ntlha Yang Fa go Na le go Itlhoboga Thata Jaana?

TSHOLOFELO ya botshelo jo bo botoka—kgabagare e diragaditswe! Batho ba bantsi ba ba neng ba nna kwa e neng e le Jeremane Botlhaba pele ba ne ba dumela seno fa Lebota la Berlin le ne le digwa ka November 1989. Lefa go ntse jalo, morago ga lobakanyana lo lo fetang ngwaga go le gonnye, ba ne ba ngongorega ka gore “ba fitlhela lefatshe la puso ya batho ka batho ya bokapitale le le makgwakgwa le le thata go tshela mo go lone, go feta botshelo jo ba neng ba bo tshela ba sireleditswe ke Lebota la Berlin.” Go ne ga felela jang? Ba ne ba lemoga gore ba ne ba tsieditswe mme go itlhoboga go ne ga oketsega.

Dintwa tsa selegae le tsa morafe di ka pateletsa batho go tlogela magae a bone go ya go batla tshireletsego, mme ke ba le mmalwa fela ba ba e bonang. Ba bangwe ba ka nna ba felela ba le gareng ga batho ba ba senang magae bao ba nnang mo mebileng ya ditoropo tse dikgolo. Mo dinageng tse dingwe bontsi bo felela bo le mo gare ga ditsamaiso tsa semolao tse di raraaneng. Ga ba kgone go nna le matlo ka gonne ga ba kgone go bona ditiro, ga ba kgone go bona tiro gonne ga ba na diaterese tsa matlo. Mekgatlho ya puso ya badiredisetšhaba e leka go thusa, mme go tsaya nako gore e rarabolole mathata ano. Ka jalo go tlalelwa le go itlhoboga go a simologa.

Go itlhoboga go dira gore basadi ba bantsi ba dire dilo tse di tsitsibanyang mmele. Mo pegong ya Women and Crime in the 1990s, motlhatlheledi wa molao Dr. Susan Edwards o tlhalosa jaana: “Go tsenelela ga basadi ba babotlana mo [boakeng] ka tlhamalalo go bakiwa ke go tlhoka madi, eseng gore ba palelwa ke go ikgalema kana ba dirwa ke mokgwa o ba godisitsweng ka one kwa gae.” Ka tsela e e tshwanang, makawana a a tlogelang magae go ya go batla tiro gantsi ga ba e bone. Ba bangwe ka ntlha ya go itlhoboga, ba felela e le ‘basimane ba ba hirwang,’ ke gore ba rekisa mebele ya bone mo basodomeng e le gore ba tle ba bone dijo le marobalo, mme ka jalo ba iphitlhela e le dingwe tsa dinokwane.

Dilo tse di botlhoko tse di diragalang mo dipolotiking, thubakanyo, mathata a tsa itsholelo, tsotlhe di ka oketsa go itlhoboga. Barutegi ba ba dirang ditiro tsa maemo a a kwa godimo le bone ba diragalelwa ke se se tshwanang fa ba ntse ba batla go nna ka metlha ba tshela matshelo a bone a a manobonobo mme kafa letlhakoreng le lengwe ba leka go lwa le mathata a a ntseng a oketsega a madi. Seno se felela ka eng? “Boikgagapèlèlō bo hetola motho eo o botlhale seeleele,” go ne ga bolela jalo Kgosi Solomone wa bogologolo!a (Moreri 7:7) Ke boammaaruri, go itlhoboga go dira gore ba bantsi ba leke go rarabolola mathata a bone ka tsela e e utlwisang botlhoko tota ka go ipolaya.

Tsela E E Feteletseng Thata ya go Rarabolola Seno

Melato e mentsi ya go ipolaya ga batho ba basha e bontsha gore gantsi go bakwa ke gore ba amiwa thata ke kgogodi eno ya go itlhoboga. Mokwadi wa makwalodikgang wa Moboritane o ne a botsa jaana: “Ke eng se tota se dirang gore mo metlheng eno ya rona basha ba dingwaga tsa bolesome ba itlhoboge thata jaana?” Fa a ntse a batlisisa ka bana ba ba fa gare ga dingwaga tse 8 le tse 16 ba ba neng ba robadiwa kwa dikokelong fa ba sena go leka go ipolaya ka botlhole, Dr. Eric Taylor wa Institute of Psychiatry ya kwa Lontone o bega jaana: “Selo se le sengwe se re neng ra se lemoga ke go bona palo ya bana ba ba neng ba itlhoboga ebile ba felelwa ke tsholofelo ka dilo.” Pego ya Boritane e supa makgetlo a go fopholediwang gore a ka nna 100 000 ngwaga le ngwaga a ba batho ba lekang go ipolaya ka go ja botlhole eleng seo tota ba supang ka sone gore ba tlhoka go thusiwa ka bonako.

Mokgatlho mongwe wa Boritane o o thusang batlhoki o ne wa simolola letsholo le le thusang batho ba ba feletsweng ke tsholofelo ka go ba sekegela tsebe. Ka tsela e e ntseng jalo, bagakolodi ba ne ba bolela gore ba ba naya “sengwe mo boemong jwa go ipolaya.” Lefa go ntse jalo ba a dumela gore ga ba kgone go rarabolola mathata a a dirang gore batho ba itlhoboge.

Selekanyo se batho ba ipolayang ka sone se supa “selekanyo sa go palelwa go nna botsalano le go palelwa go nna seoposengwe ga morafe,” go akgela jalo lokwalodikgang lwa The Sunday Correspondent. Ke ka ntlha yang fa selekanyo se batho ba ipolayang ka sone se le kwa godimo jaana gompieno? Lokwalodikgang lono lo ne lwa umaka “go tlhoka matlo, koketsego ya go nowa ga bojalwa, go nna mo kotsing ya go tsenwa ke Aids le go tswalwa ga dikokelo tsa bolwetsi jwa tlhogo” jaaka mabaka a a gogelang batho gore ba itlhoboge thata jaana mme ba swetse ka gore go ipolaya ke yone fela tharabololo ya mathata a bone.

A go na le tsholofelo ya gore go itlhoboga go ka fenngwa? Ee! “Lo lelalè, lo choletsè ditlhōgō tsa lona,” Jesu o ne a tlhaeletsa jalo a rotloetsa tota! (Luke 21:28) O ne a kaya eng? Ke eng se se ka solofelwang?

[Ntlha e e kwa tlase]