Dipotso Tse Di Tswang go Babadi
A re tshwanetse ra tlhaloganya gore go ya ka Yobe 1:8 ka nako ya fa Jobe a ne a tshela, e ne e le ene fela motho yo o neng a ikanyega go Jehofa?
Nnyaa. Tshwetso eo ga e tshegediwe ke Yobe 1:8, e e reng:
“Yehofa a raea Satane, a re, A u nntse u tlhokometse motlhanka oa me, Yobe? ka gonne ga go na opè eo o chwanañ naè mo lehatshiñ, e le monna eo o itekanetseñ, eo o siameñ, motho eo o boihañ Modimo, me a tshaba boshula.” Modimo o ne wa tlhalosa se se tshwanang gape mo go Yobe 2:3, fa a ne a botsa Satane a re: “A u nntse u tlhokometse motlhanka oa me Yobe? ka gonne ga go na opè eo o chwanañ naè mo lehatshiñ, e le monna eo o itekanetseñ, eo o thōkgameñ, a boiha Modimo, a tshaba boshula.”
Lokwalo lwa Yobe ka bolone lo bontsha gore Jobe e ne e se ene fela motho yo o neng a tshela ka nako eo yo Modimo a neng a mo amogela e le yo o ikanyegang. Go simolola ka kgaolo 32, re bala kaga Elihu. Lefa e ne e le lekawana, Elihu o ne a baakanya tsela e e phoso eo Jobe a neng a leba dilo ka yone mme a tlotlomatsa Modimo wa boammaaruri.—Yobe 32:6–33:6, 31-33; 35:1–36:2.
Ka jalo, kakgelo ya Modimo ya gore ‘go ne go sena ope yo o tshwanang le Jobe mo lefatsheng’ e tshwanetse ya bo e raya gore Jobe o ne a tlhomologile tota jaaka monna yo o siameng. Jobe o tshwanetse a bo a tshedile mo lobakeng lwa nako lwa fa Josefa a sena go swela kwa Egepeto mme e le pele Moshe a simolola go direla jaaka moperofeti wa Modimo. Ka yone nako eo Baiseraele ba le bantsi ba ne ba nna kwa Egepeto. Ga go na lebaka lepe le le ka dirang gore re akanye gore botlhe ba ne ba sa ikanyege ebile ba sa amogelwe ke Modimo; gongwe go ne go na le ba le bantsi bao ba neng ba ikanya Jehofa. (Ekesodo 2:1-10; Bahebera 11:23) Lefa go ntse jalo, go ne go sena ope mo go bone yo o neng a na le boemo jo bo kwa godimo jaaka Josefa, ebile baobamedi bao ba ne ba sa tlhomologa fa go tliwa mo kobamelong ya boammaaruri, jaaka Moshe a ne a tsile go nna fa a goga morafe wa Iseraele gore o tswe mo Egepeto.
Lefa go ntse jalo, monna mongwe yo o neng a thokgame ka tsela e e tlhomologileng o ne a nna kwa lefelong lengwe le sele. “Go kile ga ne go le monna moñwe mo lehatshiñ ya Usa, eo leina ya gagwè go no go twe Yobe; me monna eouō o na a itekanetse, a le thōkgamō, e le motho eo o boihañ Modimo, a tshaba boshula.”—Yobe 1:1.
Ka jalo Jehofa o ne a ka umaka Jobe jaaka sekao se se bonalang sentle kana se se tlhomologileng sa go dumela le go ineela ka pelo yotlhe. Ka tsela e e tshwanang, bakwadi ba Bibela eleng Esekiele le Jakobe ba ne ba bua kaga Jobe e le mongwe yo o tlhomang sekao sa tshiamo le boitshoko.—Esekiele 14:14; Yakobe 5:11.