Ditshwantsho Go Tswa Lefatsheng Le Le Solofeditsweng

Go Ya Kwa Shilo—Bana Ba Ba Siameng le Ba Ba Bosula

FA O akanya ka ditoropo tse dikgolo, ditoropo, kana mafelo a Lefatshe Le Le Solofeditsweng, a o gopola ka banna le basadi bangwe ba ba neng ba itsege? Go ka tswa go ntse jalo, ka gonne dipego tse dintsi tsa Bibela di bua ka bagolo. Mme go tweng ka bana mo nakong ya bogologolo? A o kgona go ba tshwantsha mo tlhaloganyong?

Go bona dilo jaaka go tlhalositswe fa godimo go ka re thusa go tlhoma mogopolo mo dipegong tse go nang le basha mo go tsone, bangwe ba bone e ne e le dikai tse di molemo mo Bakereseteng mme ba bangwe ba bone e ne e le dikai tsa tlhagiso. Go bonala sentle gore thabana e e kgolokwe e e mo bogareng ke setsha sa Shilo.a

O tshwanetse wa bo o gopola sentle gore e ne ya re fa Baiseraele ba ne ba tsena mo Lefatsheng Le Le Solofeditsweng, ba ne ba baya pele motlaagana wa Modimo kwa Gilegala gaufi le Jeriko. (Yoshue 4:19) Mme fa naga e ne e kgaoganngwa, mogope ono o o boitshepo—e leng lefelo le Baiseraele ba neng ba obamelela mo go lone—o ne wa fudusetswa kwano mo Shilo. (Yoshue 18:1) E ne e le bokgakala jwa dikilomitara di le 30 kwa bokone jwa Jerusalema mo kgaolong ya dithaba ya kwa Eferaima. Banna le basadi ba ba tswang kwa dikarolong tsotlhe tsa Iseraele ba ne ba tsaya loeto go ya kwa Shilo; ditlhopha tsa batho di ne di ka nna tsa kokoana mo mogogorong o o neng o le kwa borwa jwa kwa motlaagana o ne o tshwanetse go ema teng. (Yoshue 22:12) A o ka tshwantsha mo mogopolong wa gago bana ba tla mo lefelong leno?

Bangwe ba ne ba tla koo. Yo e neng e le sekao se se tlhomologileng thata se re tshwanetseng go itse ka sone e ne e le Samuele yo mmotlana. Batsadi ba gagwe, Elekana le Hana, ba ne ba nna kwa toropong e e neng e le kwa godimo ga dithaba go ela kwa bophirima. Ngwaga le ngwaga ba ne ba tsaya loeto go tla mo lefelong leno, ka gongwe ba ne ba tlisa bana ba bangwe ba mosadi yo mongwe wa ga Elekana. Kgabagare Jehofa o ne a segofatsa Hana ka ngwana wa mosimane, yo o neng a newa leina la Samuele. Fa nako e ntse e ya batsadi ba gagwe ba ne ba mo tlisa mo Shilo gore a tle go nna teng e le gore a tle a direle kwa motlaaganeng le moperisiti yo mogolo Eli.—1 Samuele 1:1–2:11.

Go ne go na le ditironyana tse mosimanyana a neng a di dira letsatsi le letsatsi kwa ntlong ya Modimo, mme o tshwanetse a bo a ne a na le ditshono tse dintsi tsa go tsaya loeto lwa go tlhatloga dithabana tse di neng di le gaufi. (1 Samuele 3:1, 15) Tse dingwe tsa tsone di ne di tlhomagane ebile di tletse ka ditlhare tsa motlhware, jaaka fa re bona mo setshwantshong se se mo tsebeng 9. Ela tlhoko letlapa le lennye e leng tora ya tebelo. Borrapolasa kana badisa ba ba neng ba le kwa ntle ga motse ba ne ba dirisa tora ya tebelo e e ntseng jalo go lebelela naga, mme o ka akanya ka Samuele yo mmotlana le ene a palama go tla go lebelela. (Bapisa 2 Ditihalō 20:24.) Leno e ne e tla bo e le lefelo le lentle leo go neng go lebelelwa diphologolo tsa naga go tswa mo go lone.

Ka nako eo, go ne go na le ditlhare tse dintsi go na le gompieno, le e leng dikgwa tse diphologolo tsa naga di neng di kaila mo go tsone. (Yoshue 17:15, 18) Re itse seno go tswa mo go seo se neng sa diragala fa Elisha e ne e nna moperofeti wa Modimo yo o botlhokwa. Elisha o ne a tshotse loeto go tswa kwa Jeriko go ya kwa Betheela, ka jalo o ne a le mo lefelong leno, dikilomitara tse di ka nnang 16 go ya kwa borwa jwa Shilo. Batho ba Betheela ba ne ba tla mo tshola jang koo e neng ya nna lefelo la go obamela namane ya gouda? (1 Dikgosi 12:27-33; 2 Dikgosi 10:29) Go bonala sentle gore bagolo ba lefelo leo ba ne ba le kgatlhanong le moperofeti wa ga Jehofa, le tsela e ba neng ba itshwara ka yone e tshwanetse ya bo e ne e tshwaeditse bana ba bone.

Dikgosi tsa bobedi 2:23, 24 e re bolelela gore lesomo la basha le ne la sotla moperofeti wa Modimo le re: “Tlhatloga logatadima! tlhatloga logatadima!” Elisha le ene ka go tshwana o ne a “ba hutsa mo ineñ ya ga Yehofa. Me ga cwa dibera tse di namagadi di le pedi mo sekgweñ, me tsa gagola bana ba le mashomè manè le bobedi mo go bōnè.” Dibera tse di ntseng jalo tse di borokwa tsa kwa Siria di ne di ka galefa thata fa di ne di tshoganyeditswe kana fa go ne go bonala ekete bana ba tsone ba tshosediwa ke sengwe. (2 Samuele 17:8; Diane 17:12; 28:15) Modimo o ne a di dirisa go diragatsa dikatlholo tsa gagwe kgatlhanong le bao ba neng ba nyatsa baemedi ba gagwe ka ditsela tsotlhe mme ka tsela e e ntseng jalo ba ne ba nyatsa Jehofa ka boene.

Lebaka la go bo ngwana yoo a ne a ka nna a kopana le diphologolo tse di ntseng jalo tsa naga mo dithabeng tse di neng di dikologile Shilo le tshwanetse go re thusa go anaanela thata tumelo e batsadi ba ga Samuele ba e bontshitseng ka go mo tlisa gore a tle go direla mo motlaaganeng.

Go ne go na le moobamedi yo mongwe wa boammaaruri yo o neng a bontsha tumelo le boineelo tse di tshwanang—Moatlhodi Jefetha. O ne a nna mo lefatsheng la Gileada la dithaba ka fa botlhaba jwa Joredane. Ereka a ne a tlhoafaletse gore Jehofa a mo thuse gore a fenye baba ba Baamona, Jefetha o ne a ikana gore lefa e le mang yo o tla mo kgatlhantshang pele a tswa mo ntlong ya gagwe o tla mo isa go nna setlhabelo sa ga Jehofa. Ngwana wa gagwe wa kgarebana e ne ya nna ene yo o neng a dira jalo. Ka jalo o ne a tlisa ngwana wa gagwe yo o esi mo felong ga boitshepo ga Modimo kwa Shilo, koo a neng a nna gone le go direla ka boikanyegi ka dingwaga di le dintsi.—Baatlhodi 11:30-40.

Go ineela ka boikanyego goo Samuele le morwadia Jefetha ba go supileng mo lefelong la Shilo eleruri ke selo se se molemo se se farologaneng gotlhelele le seo diganana tse 42 di se dirileng ka go sotla moperofeti wa ga Jehofa mo kgaolong yone eo.—Bapisa 1 Bakorintha 10:6, 11.

[Ntlha e e kwa tlase]

[Motswedi wa Setshwantsho mo go tsebe 8]

Pictorial Archive (Near Eastern History) Est.

[Motswedi wa Setshwantsho mo go tsebe 9]

Pictorial Archive (Near Eastern History) Est.

[Motswedi wa Setshwantsho mo go tsebe 9]

Safari Zoo, Ramat-Gan, Tel Aviv