Tumelo ya Gago E Ka Lekwa Fa Ba Bangwe ba Atlega

PELO ya motho yo o siameng e ka lekwa fa a atlega. Go leka go atlega mo go boneng dithoto go ka dira gore o latlhegelwe ke tumelo. (1 Timotheo 6:9, 10) Go atlega gape go ka leka tumelo ka tsela e nngwe gape. Fa motho mongwe yo o siameng a bona batho ba bantsi ba ba sa siamang ba atlega mo go boneng dithoto fa ene a sotlega, a ka nna a raelega gore a tseye tsela e e seng ya bomodimo. Aitsane, seno se ile sa dira gore batlhanka ba bangwe ba ga Jehofa ba belaele gore a ruri go botlhokwa go tshela ka bothokgami!

Seno se ne sa diragalela Molefi yo e neng e le moopedi ebong Asafe ka nako ya fa Dafide a ne a busa kwa Iseraele. Asafe o ne a tlhama dipesalema tse di neng di dirisiwa ke botlhe mo kobamelong. O ne a dira le Hemane le Jeduthune, gape o ne a perofesa, a baka Jehofa Modimo le go mo leboga ka diletso tsa dipina. (1 Ditihalō 25:1; 2 Ditihalō 29:30) Lefa Asafe a ne a na le tshiamelo eo, Pesalema 73 e bontsha gore go atlega ga batho ba ba boikepo mo go boneng dithoto go ne go leka tumelo ya gagwe thata.

Boikutlo Jo Bo Kotsi jwa ga Asafe

“Rure Modimo o molemō go Iseraela, eboñ go ba ba itshekileñ mo peduñ. Me kaga me, dinaō tsa me di batlile go ea, dikgatō tsa me tsa batla go rèlèla.” (Pesalema 73:1, 2) Ka mafoko ano, Asafe o ne a dumela gore Jehofa o ne a direla morafe wa Iseraele molemo. Segolobogolo mo go ba ba “itshekileñ mo peduñ,” gonne ba ne ba eletsa go ineela ka botlalo mo Modimong mme ba tlotlomatse leina le le boitshepo. Fa re na le boikutlo joo, re tla galaletsa Jehofa ka go bua sentle ka ene le eleng lefa go atlega ga baikepi kana boemo bope fela bo dira gore re lekwe.—Pesalema 145:1, 2.

Le mororo Asafe a ne a itse gore Jehofa o molemo, dinao tsa gagwe di ne tsa batla di fapoga tsela e e siameng. Go ne go ntse jaaka ekete di ne di thelela mo dikgapetleng tsa metsi mo lobelong lwa sekgala se seleele. Ke eng se se neng se koafaditse tumelo ya gagwe? O ne a tlhalosa jaana: “Gonne, e rile ke bōna letlhōgōnōlō ya baitelaganyi ka nna pelotshètlha kaga bōnè baikepi. Ka gonne ga go na dipitlaganō mo loshuñ lwa bōnè: me [mpa ya bone e nonne, NW]. Ga ba mo tlaleloñ yaka batho ba bañwe; le gōna ga ba chwenyege yaka batho ba bañwe.”—Pesalema 73:3-5.

Go atlega ga batho ba ba sa siamang mo go boneng dithoto go ne ga dira gore Asafe a ba eletse. Ba ne ba lebega ba na le kagiso, le mororo ba ne ba kgobokanya dithoto tsa bone ka bonokwane. (Bapisa Pesalema 37:1.) Le mororo ditiro tsa bone di ne di le bosula, ba ne ba lebega ba sireletsegile fa o ba leba. Ebu, go ne go lebega ekete ba swa fela ba sa utlwa botlhoko bope! Ka dinako tse dingwe ba ne ba swa fela ka kagiso ebile ba sa tshwenngwe ke sepe, ba sa lemoge gore ba tlhoka sepe semoyeng. (Mathaio 5:3) Kafa letlhakoreng le lengwe, bangwe ba batlhanka ba Modimo ba tshwerwe ke malwetsi a a botlhoko ebile ba a swa, lefa go ntse jalo, o a ba tshegetsa, ebile ba na le tsholofelo e e itumedisang ya gore ba tla tsosiwa mo baswing.—Pesalema 43:1-3; Yohane 5:28, 29.

Batho ba bantsi ba ba boikepo ga ba na mathata ape a boitekanelo a a ba kgoreletsang gore ba itumelele dijo tse dintsi tse ba nang natso. “Mpa ya bone e nonne,” e kima. Mo godimo ga moo, “ga ba mo tlaleloñ yaka batho ba bañwe,” gonne go farologana le batho ba bangwe, ba bona dilo tse ba di tlhokang mo botshelong motlhofo fela. Asafe o ne a swetsa ka gore baikepi “ga ba chwenyege yaka batho ba bañwe.” Ebile ba falola diteko tse batho ba ba boifang Modimo ba lekwang ka tsone ka gonne ba ba umakilweng morago bano ba ngaparela melao e e siameng ya ga Jehofa mo lefatsheng le le boikepo leno la ga Satane.—1 Yohane 5:19.

Asafe o ne a tswelela a bolela jaana ka baikepi gonne ba tswelela ba atlega: “Ke gōna ka mo, bokgodishō bo ba rarileñ yaka dibaga mo thamuñ: go thubaka go ba apesitse yaka kobō. Matlhō a bōnè a rotologile ka mononō; ba na le mo go hetañ keleco ea pelo. Baa shotla, me ba bue patikō ba le mo boshuleñ: ba bue ka boikganchō. Ba nyunyubetsa magodimo; loleme loa bōnè lo ralale lehatshe.”—Pesalema 73:6-9.

Badirabosula ba apara boikgogomoso jaaka “dibaga,” ka jalo ditiro tsa bone tse di bosula di dintsi mo e leng gore ‘di ba apesitse jaaka kobo.’ Ba sotla ba bangwe ka mafoko gonne ba ititeile sehuba gore ba tla tswelela ka tsela ya bone. Matlho a baikepi ga a wela ka ntlha ya go bolawa ke tlala mme ‘a rotogile ke monono,’ a eme ka ntlha ya go nona ka ntlha ya go ja bobe. (Diane 23:20) Maano a bone a atlega mo e leng gore ‘a feta keletso ya dipelo tsa bone.’ Ba bua ka go tsietsa ga bone ka boikgogomoso, “ka boikgancho.” Aitsane, ‘ba nyunyubetsa magodimo le loleme lwa bone lo ralala lefatshe’! Ba nyatsa mongwe le mongwe yo o kwa legodimong kana mo lefatsheng, ba sotla batho le go tlhapatsa Modimo.

Go bonala gore Asafe e ne e se ene fela yo a neng a amiwa botlhoko ke se a neng a se bona. O ne a bolela jaana: “Ke gōna ka mouō batho ba ga gabō ba tleñ ba boèle ha: me metse a senwèlō se se tletseñ a gopiwe ke bōnè. Me ba re, Modimo o itse yañ? Me a go na le kicō mo Mogodimodimoñ?” (Pesalema 73:10, 11) Temana ya Sehebera e ka nna ya tswa e kaya gore ereka baikepi ba lebega ba atlega, bangwe ba batho ba Modimo ba ka nna le maikutlo a a phoso ba bo ba bolela jaana: ‘Modimo ga o itse se se diragalang ebile ga o kitla o otlhaya baikepi.’ Kafa letlhakoreng le lengwe, go bona batho ba ba boikepo ba bo dira ba sa diragalelwe ke sepe go tshwana le go nwa motswako o o galakang, o o dirang gore batho ba ba siameng ba botse jaana: ‘Go tla jang gore Modimo o tlogelele dilo jaana? A ga a bone gore go diragala eng?’

Asafe o ne a bolela jaana fa a ne a bapisa maemo a gagwe le a baikepi: “Bōna, bauō ke baikepi; me ereka ba nntse ba le mo boiketloñ ka metlha eotlhe, boo ba totèlwa ke dikhumō. Rure ke ntlahaleditse pelo ea me lehèla, ka ba ka tlhapa diatla tsa me mo go senañ molato; Gonne ke nntse ke chwenyèga ka letsatsi yeotlhe, ka oatlhaiwa ka meshō eotlhe.” (Pesalema 73:12-14) Asafe o ne a ikutlwa gore ga go thuse sepe go tshela botshelo jo bo senang matsoketsane. Batho ba ba boikepo ba ne ba atlega, “ba totèlwa ke dikhumō” tse ba neng ba di bona ka bonokwane. Ba ne ba lebega ba sa otlhaelwe molato o o masisi thata, mme Asafe o ne a tshwenyega “letsatsi yeotlhe”—go tloga fa a tsoga go fitlha fa a ya go robala. O ne a ikutlwa gore Jehofa o ne a mmontsha diphoso tsa gagwe moso mongwe le mongwe. Ereka Asafe a ne a bona seno se sa siama, tumelo ya gagwe e ne e lekwa thata.

Go Fetola Tsela ya go Akanya

Kgabagare Asafe o ne a bolela jaana fa a ne a lemoga gore tsela e a neng a akanya ka yone e phoso: “Ha nkabo ke rile ke tla bua yalo; bōna, nkabo ke dihetse bana ba losika loa gago ka boherehere. E rile ke akanya, go re, go mo nka go itse yañ, ga nna tapishō e e botlhoko mo go nna; Ka tla ka tsamaea ka tsèna mo heloñ ga boitshèpō ga Modimo, me ka akanya bohèlèlō yoa bōnè. Rure u ba baea mo marelediñ; u ba digèla mo tshenyegoñ. Ana ba kile ba senyèga yañ ka ponyō ea leitlhō hèla! ba yegetse rure ka dithèrègō. Yaka tōrō ha motho a kubuga; le wèna Yehofa, ha u kubuga, u tla nyatsa sechwanō sa bōnè yalo.”—Pesalema 73:15-20.

Go molemo ka gore Asafe ga a ka a tsholetsa lentswe a ngongorega, ka go bo go bolela fa pele ga batho gore ga go thuse sepe go direla Jehofa go ne go ka nna ga kgoba maloko a lelapa la gagwe a e leng baobamedi marapo kana ga koafatsa tumelo ya bone. Abo go ne go le botoka jang ne go didimala fela jaaka Asafe a ne a dira! O ne a ya kwa tempeleng ya Modimo gore a kgone go bona gore ke ka ntlha yang go ne go lebega ekete baikepi ba dira bosula fela ba sa diragalelwe ke sepe fa ba ba siameng ba sotlega. Lefelo leo le ne la thusa Asafe gore a tlhatlhanye a ritibetse a na le baobamedi ba ga Jehofa, mme tsela e a neng a akanya ka yone e ne ya fetoga. Ka jalo, gompieno fa re tseanngwa ke se re se bonang, a re direng se se tshwanang re batleng dikarabo tsa dipotso tsa rona ka go kopana le batho ba Modimo go na le go nnela kwa thoko re le esi.—Diane 18:1.

Asafe o ne a lemoga gore Modimo o beile baikepi “mo marelediñ.” Ba mo kotsing ya loso gonne matshelo a bone a ikaegile fela ka dithoto. Gone mme, ba ne ba tlile go swa fa ba tsofala, mme khumo ya bone e ba e boneng ka boferefere e ne e ka se ka ya sireletsa matshelo a bone. (Pesalema 49:6-12) Go atlega ga bone go ne go tla feta jaaka toro e e fetang ka bonako. Ba ka nna ba sekisediwa ditiro tsa bone le pele ba tsofala fa ba ntse ba roba se ba se jalang. (Bagalatia 6:7) Ereka ba ne ba furaletse Ene yoo a neng a ka kgona go ba thusa, ga go na ope yo o ka ba thusang, ga ba na tsholofelo epe. Fa Jehofa a tsaya kgato kgatlhanong le bone, o tla leba “sechwanō” sa bone—boikgogomoso le maemo a bone—ka kilo.

Disa Kafa O Ikutlwang ka Teng

Asafe o ne a dumela jaana gonne a se kile a ikutlwa sentle ka se a neng a se bona: “Gonne pelo ea me e ne e le botlhoko, me ka tlhaywa tlhaywa mo diphiloñ tsa me: Ka bo ke le popegō ea sehōlōhōlō hèla mo go nntseñ yana, ke sena kicō; ka nna yaka phōlōhōlō hèla ha pele ga gago. Leha go nntse yalo ke nntse ke na nau ka metlha eotlhe: u nntse u chwere seatla sa me se segolo. U tla nkètèlèla pele ka kgakololō ea gago, me morago u tla nkamogèla mo kgalaleloñ.”—Pesalema 73:21-24.

Go akanya thata ka go atlega mo go boneng dithoto ga baikepi le go sotlega ga basiami go ka utlwisa pelo ya motho botlhoko ga bo ga mo gakatsa. Mo teng ga gagwe—mo diphilong tsa gagwe—go tlhakatlhakanngwa ga ga Asafe ke boemo jono go ne go mo utlwisa botlhoko thata. Go ya kafa Jehofa a neng a mo leba ka teng, o ne a tshwana le phologolo e e sa akanyeng e e dirang dilo fela go ya kafa e ikutlwang ka teng mo mmeleng. Lefa go ntse jalo, Asafe ‘o ne a na le Modimo ka metlha, mme a tshwere seatla sa gagwe se segolo.’ Fa re akanya dilo tse di phoso mme re bo re senka kgakololo ya ga Jehofa jaaka Asafe a ne a dira, Modimo o tla re tshwara ka letsogo, a re tshegetsa le go re etelela pele. (Bapisa Yeremia 10:23.) Re ka itumela mo isagweng fela fa re dirisa kgakololo ya gagwe. Re ka nna ra tlontlololwa ka dinako tse dingwe, mme Jehofa o tla fetola dilo, ‘a re amogela mo kgalalelong,’ kana a re tlotlomatsa.

Asafe o ne a oketsa jaana a anaanela kafa go leng botlhokwa ka teng go ikaega ka Jehofa: “Nama ea me [ea] hèla, le pelo ea me: me Modimo ke thata ea pelo ea me, le kabèlō ea me ka bosakhutleñ. Gonne, bōna, ba ba leñ kgakala nau ba tla nyèlèla: u sentsè botlhe ba ba gu tlogèlañ ba ea boakeñ. Me mo go nna go molemō go atamèla Modimo: ke dihile Yehofa, Modimo, botshabèlō yoa me, gore ke tlè ke bolèlè kaga ditihō tsa gago cotlhe hèla.”—Pesalema 73:25-28.

Fela jaaka Asafe, ga go na ope fa e se Jehofa 1fela yoo re ka ikaegang ka ene gore a re sireletse a bo a re gomotse. (2 Bakorintha 1:3, 4) Ka jalo go na le gore re eletse dikhumo tsa motho ope fela mo lefatsheng, a re direleng Modimo mme re ipolokele dikhumo kwa legodimong. (Mathaio 6:19, 20) Re tshwanetse ra itumelela go nna re amogelwa ke Jehofa go feta dilo tsotlhe. Le eleng lefa mebele ya rona le dipelo tsa rona di ka se kgone, o tla re nonotsha a bo a nonotshe dipelo tsa rona gore re se ka ra latlhegelwa ke tsholofelo ebile o tla re kgothatsa fa re tshwenyegile. Go atamalana le Jehofa ke selo se se tlhwatlhwakgolo thata. Go latlhegelwa ke gone go tla felela ka masetlapelo mo go botlhe ba ba mo latlhang. Ka gone, jaaka Asafe a re boelaneng le Modimo mme re latlhele matshwenyego otlhe a rona mo go ene. (1 Petere 5:6, 7) Seno se dira gore re itekanele semoyeng mme se re tlhotlheletsa gore re bolelele ba bangwe ka ditiro tse di molemo tsa ga Jehofa.

Nna O Ntse O Ikanyega mo go Jehofa

Asafe o ne a tshwenyega gonne a ne a bone batho ba ba bosula ba atlega kwa Iseraele, eleng naga ya gaabo. Mo gare ga batho ba ba ikanyegang ba ga Jehofa go ne go na le “baikepi” ba ba neng ba ikgodisa, ba ikgogomosa, ba dira thubakanyo, ba sotla, ba tsietsa, le bao ba neng ba re Modimo ga o itse sepe se ba se dirang. (Pesalema 73:1-11) A tlhagiso ruri! Re tshwanetse go tila go supa mekgwa e e tshwanang le boikgogomoso, thubakanyo, go sotla, le boferefere fa re batla go itumedisa Jehofa. Fela jaaka Asafe, ekete batlhanka botlhe ba ga Jehofa ba ka ‘ya kwa felong ga boitshepo ga Modimo’ ka go kopana ka metlha le baobamedi ba Gagwe ba ba ikanyegang. Eleruri, a botlhe ba ba ratang Jehofa ba ‘atamele Modimo,’ ba ikaege ka ene gore a ba tshegetse fa ba boga, go sa kgathalesege gore ba bangwe ba ka reng kana ba ka dira eng.—Pesalema 73:12-28; 3 Yohane 1-10.

Ke boammaaruri gore tumelo ya rona, fela jaaka ya ga Asafe, e ka lekwa thata fa re bona badirabosula ba atlega mo go boneng dithoto. Lefa go ntse jalo, re ka itshokela teko eno fa re neela matshelo a rona mo tirelong ya ga Jehofa. Re tla duelwa fa re dira seno gonne ‘Modimo ga o tshiamololo go re, a ka lebala tiro ya rona le go rata leina la one go re go bontshang.’ (Bahebera 6:10) Diteko tsa rona di tla nna ‘motlhofo le tsa lobakanyana’ fa di bapisiwa le tuelo. (2 Bakorintha 4:17) Le eleng go boga ka dingwaga di le 70 kana 80 fela go tshwana le mohemo fela o o fetang mo dipounameng fa go bapisiwa le botshelo jo bo sa khutleng jo bo itumedisang jo Jehofa a bo solofeditseng batlhanka ba gagwe ba ba ikanyegang.—Pesalema 90:9, 10.

A le ka motlha re se ka ra letla go atlega mo go boneng dithoto ga baikepi fa go bapisiwa le go boga ga rona ka ntlha ya tshiamo go re thibele go supa tumelo e e leng leungo la moya o o boitshepo wa Modimo. (Bagalatia 5:22, 23; 1 Petere 3:13, 14) Satane o tla itumela fa re ka etsa baikepi, ba gantsi ba atlegang gonne ba sa kaelwe ke melaometheo epe. Go na le moo, a re tlotleng leina la ga Jehofa ka go sa ineele fa re raelwa gore re tlogele melao e e siameng. (Sefania 2:3) A re se ka ra ngomoga pelo fa baikepi ba atlega, ka go bo, gone tota, se ba ka se bonang fela ke dithoto. Mme molemo wa tsone ke eng? Ga o kake wa bo wa di bapisa le letlotlo la semoya le le bonwang ke ba ba dumelang mo go Jehofa Morena le Molaodi.