Tshabela mo go Jehofa
“Jehofa, ke tshabetse mo go wena.”—PESALEMA 31:1, NW.
1. Pesalema 31 e bontsha jang tsholofelo ya gore Jehofa o kgona go nna botshabelo?
LENTSWE le le monate le opela kaga monna yo o itatlhelang mo go Jehofa, le mororo a lapile thata mo mogopolong le mo mmeleng. Mafoko a pina eo e e boitshepo a bolela gore tumelo e a fenya. Monna yono o sirelediwa ke diatla tse di ntseng di mo emetse tsa Mothatayotlhe kgatlhanong le babogisi ba ba mo setseng morago. “Jehofa, ke tshabetse mo go wena,” (NW) go rialo pesalema ya gagwe. “A ke se lesiwe ka tlhaywa ke ditlhoñ gopè; u nkgololè u le mo tshiamoñ ea gago.”—Pesalema 31:1.
2. (a) Re ka ikanya Jehofa gore e nne botshabelo jwa rona re ikaegile ka dipilara dife tse pedi? (b) Jehofa ke Modimo wa mofuta mang?
2 Mopesalema o na le botshabelo bo le bongwe fela—e leng jone jo bo molemo go gaisa! Le fa dilo tse dingwe di ka se tlhomamisege, mme ntlha eno yone e a sala: Jehofa ke botshabelo jwa gagwe, kago ya gagwe ya phemelo. O ikantse dipilara tse pedi tse a tlhomamisegang ka tsone. E nngwe ke tumelo ya gagwe, e Jehofa a se kitlang a mo tlhabisa ditlhong mo go yone, mme e nngwe, ke tshiamo ya ga Jehofa, e e rayang gore ga A kitla le ka motlha a latlhela motlhanka wa Gagwe ruri. Jehofa ga se Modimo o o tlhabisang batlhanka ba gagwe ba ba ikanyegang ditlhong; ga se mongwe yo o sa diragatseng dilo tse a di solofetsang. Go na le moo, ke Modimo wa boammaaruri yo o duelang ba ba mo ikanyang ka pelo yotlhe. Kwa bofelong, tumelo e tla duelwa! Ba tla gololwa!—Pesalema 31:5, 6.
3. Mopesalema o goletsa Jehofa jang?
3 Mopesalema o nonofa mo maikutlong fa a ntse a tlhama mmino wa gagwe o o yang kwa tlase go supa kutlobotlhoko le masetlapelo o bo o ya kwa godimo go supa tsholofelo. O goletsa Jehofa ka ntlha ya lorato lwa Gagwe lo lo ikanyegang. “A go bakwè Yehofa,” o opela jalo, “gonne o nchupeditse bopelonomi yoa gagwè yoa loratō yo bo gakgamatsañ mo motsiñ o o thata.”—Pesalema 31:21.
Setlhopha Se Segolo sa Baopedi ba Baboledi ba Bogosi
4, 5. (a) Ke setlhopha sefe se segolo sa baopedi se se bakang Jehofa gompieno, mme ba dirile seo jang mo ngwageng wa tirelo o o fetileng? (Bona tšhate e e mo ditsebeng 12-15.) (b) Palo ya ba ba neng ba tlile Segopotsong e bontsha jang gore go na le batho ba bangwe gape ba ba batlang go tsena mo setlhopheng sa baopedi ba baboledi ba Bogosi? (Bona tšhate.) (c) Ke setlhopha se se kana kang mo phuthegong ya lona se se ka nnang sa kgona go tsena mo setlhopheng sa baopedi?
4 Gompieno, mafoko a pesalema eo a boile gape a na le bokao jo bongwe. Dipina tsa go baka Jehofa ga di kake tsa kgaodiwa ke moganetsi ope yo o boikepo, masetlapelo a tlholego, kana mathata ape a ikonomi; eleruri, bopelonomi jwa ga Jehofa jwa lorato e nnile jo bo molemolemo mo bathong ba gagwe. Mo lefatsheng lotlhe mo ngwageng o o fetileng wa tirelo, setlhopha se segolo sa baopedi, se se neng sa nna le tlhora ya ba le 4 709 889 mo dinageng di le 231, se ne sa opela molaetsa wa Bogosi jwa Modimo. Puso ya ga Jehofa ya selegodimo ka Keresete Jesu ke botshabelo jo bo se kitlang bo ba swabisa. Ngogola, baboledi bano ba Bogosi go tswa mo diphuthegong di le 73 070 ba ne ba dira tiro ya go rera ka diura tse fa di feletse di tshwarang 1 057 341 972. Seno se ile sa felela ka gore batho ba le 296 004 ba bontshe boineelo jwa bone go Modimo ka go kolobediwa ka metsi. Mme a bo batho botlhe ba ba neng ba le kwa Kopanong ya Merafe Yotlhe ya Thuto ya Bomodimo e e neng e tshwaretswe kwa Kiev, kwa Ukraine, ka August o o sa tswang go feta ba ne ba itumela thata jang ne. Ba ne ba bona tiragalo e e tlhomologileng go di gaisa tsotlhe, ba bona Bakeresete ba boammaaruri ba kolobediwa ka palo e kgolo go gaisa tsotlhe tse go kileng ga kwalwa kaga tsone! Jaaka fa go boleletswe pele mo go Isaia 54:2, 3, batho ba Modimo ba oketsega ka dipalo tse dikgolo fela thata.
5 Lefa go ntse jalo, batho ba bangwe gape ba ba batlang go nna babusiwa ba Bogosi jwa Modimo ba emetse go tsena mo setlhopheng sa baopedi. Ngogola, kwa Segopotsong sa loso lwa ga Jesu go ne go tlile batho ba palo e e gakgamatsang ba le 11 865 765. Go solofelwa gore mo ngwageng ono wa tirelo ba le bantsi ba batho bano ba tla tshwanelega go ka opela pina ya Bogosi ka ntlo le ntlo. A bo tsholofelo eo e tshwanetse ya bo e kgopisa mmaba wa boammaaruri fela thata jang ne, Satane Diabolo!—Tshenolō 12:12, 17.
6, 7. Tlhalosa kafa Jehofa a ileng a thusa monna mongwe yo o kgatlhegang ka gone gore a fenye go tlhorontshiwa ke badimona.
6 Satane o tla leka go thibela ba bangwe gore ba se ka ba oketsa setlhopha se segolo seo sa baopedi ka mantswe a bone. Ka sekai, kwa Thailand baboledi ba kopana le batho ba palo e e oketsegang ya batho ba ba tshwenngwang ke badimona. Lefa go ntse jalo, batho ba le bantsi ba ba dipelo di ikanyegang ba ile ba gololwa ka thuso ya ga Jehofa. E ne ya re monna mongwe a sena go ya kwa ngakeng e e loang e le fela ka gonne a batla go bona, monna yo a simolola go tlhorontshiwa ke badimona dingwaga di le lesome. O ne a leka go ikgolola mo go bone a thusiwa ke moruti, mme lefa go ntse jalo a se ka a bona botoka bope. Modihedi mongwe wa nako e e tletseng wa mongwe wa Basupi ba ga Jehofa o ne a simolola go ithuta Bibela le monna yo mme a mo ruta go tswa mo Bibeleng gore tsela e le yosi fela e a ka ikgololang ka yone mo taolong ya badimona ke efe—go nna le kitso e e tlhomameng kaga boammaaruri, go ikanya Jehofa Modimo, le go mo kokotlela ka thapelo.—1 Bakorintha 2:5; Bafilipi 4:6, 7; 1 Timotheo 2:3, 4.
7 Mo bosigong jwa fa ba sena go nna le motlotlo ono, monna yoo o ne a nna le toro e mo go yone rraagwe yo o tlhokafetseng a neng a mo tshosetsa ka go re fa a sa boele mo go buisaneng le badimo o tla mo tlisetsa kotsi. Lelapa la gagwe le ne la simolola go boga. E re ka a ne a sa batle go tshikinngwa, monna yono o ne a tswelela pele le dithuto tsa gagwe tsa Bibela a ba a simolola go nna gone kwa dipokanong. Mo go nngwe ya dithuto tseo, mmulatsela o ne a tlhalosa gore ka dinako tse dingwe dilo tse di dirisiwang mo dingwaokobamelong tsa bodimona di neela badimona sebaka sa gore ba tshwenye batho ba ba lekang go ikgolola mo go bone. Monna yono o ne a gakologelwa gore o na le mahura mangwe a a kileng a ne a a dirisa jaaka pheko. Jaanong o ne a lemoga gore o ne a tshwanetse go a latlha. Fa e sale a a latlha, ga a ise a tlhole a tshwenngwa gape ke meya e e bosula. (Bapisa Baefesia 6:13; Yakobe 4:7, 8.) Ene le mosadi wa gagwe ba tsweletse sentle ka thuto ya bone e bile ba nna gone kwa dipokanong ka metlha gore ba laiwe go tswa mo Bibeleng.
8, 9. Baboledi bangwe ba Bogosi ba ile ba fenya dikgoreletsi dife tse dingwe?
8 Dikgoreletsi tse dingwe di ka nna tsa dira gore modumo wa mafoko a a molemo o se ka wa utlwala. E re ka go na le boemo jo bo sa itumediseng tota jwa ikonomi kwa Ghana, badiri ba ile ba ntshiwa mo ditirong. Ditlhwatlhwa tsa dilo tsa go itshedisa di ile tsa ya kwa godimo fela thata, mme seo se dira gore go nne bokete tota go nna le dilo di sekae fela tse di tlhokwang mo botshelong. Batho ba ga Jehofa ba ntse ba kgona jang? Ka go ikanya Jehofa, eseng bone ka bobone. Ka sekai, ka letsatsi lengwe monna mongwe o ne a tlogela enfelopo e e tswetsweng mo tafoleng e e mo phaposing ya go amogela baeng ya ofisi ya lekala. Enfelopo eo e ne e na le $200 (R660), kana tuelo e e leng yone e e kwa tlasetlase e e letlelelwang ya dikgwedi tse tharo. Enfelopo eo e ne e tswa kwa go mongwe yo o neng a sa ikwala leina, mme sephuthelwana sa yone se ne se na le mafoko a a reng: “Ke ne ke latlhegetswe ke tiro, mme Jehofa o mphile e nngwe. Ke a mo leboga le Morwawe, Keresete Jesu. Ke tsentse le moneelonyana o o tla thusang go anamisa mafoko a a molemo a Bogosi bokhutlo bo ise bo tle.”—Bapisa 2 Bakorintha 9:11.
9 Go nna gone mo dipokanong go thusa go thapisa ba ba tsenang mo setlhopheng se segolo sa baopedi ba ba opelelang Jehofa dipako. (Bapisa Pesalema 22:22.) Ka jalo, kwa karolong e e kafa borwa ya Honduras, go na le phuthego koo e e bidiwang El Jordán. Setlhotshwana seno se kgethegile ka eng? Ka go nna gone ka metlha mo dipokanong. Mo baboleding ba teng ba ba 19, ba le 12 ba tshwanelwa ke go kgabaganya noka e kgolo gore ba nne gone kwa dipokanong beke le beke. Seno ga se bothata jo bogolo fa dipula di sa ne, ka gonne ba ka kgabaganya noka eno ka go gata maje. Lefa go ntse jalo, fa dipula di na, ga go nne jalo. Se pele e neng e le metsinyana fela a a elelang koo se fetoga bobidibidi jwa metsi a a tsamayang a gogola sengwe le sengwe se se gaufi le one. Gore ba fenye sekgoreletsi seno, bakaulengwe le bokgaitsadi ba tshwanetse gore ba bo ba itse go thuma sentle. Pele ba kgabaganya, ba tsenya diaparo tse ba tla di aparang kwa dipokanong mo teng ga tina (bata ya tshipi) ba bo ba e tswala ka polaseteke. Yo o nonofileng thata mo go bano ba ba itseng go thuma o dirisa tina eno go tshwaya fa a tsamayang teng a ba a etelela setlhopha pele go kgabaganya noka. Fa ba setse ba kgabagantse sentle, ba a iphimola, ba apara, ba bo ba goroga kwa Holong ya Bogosi ba itumetse e bile ba le phepaphepa!—Pesalema 40:9.
Kago ya Phemelo E Re Ka Nnang mo go Yone
10. Ke ka ntlha yang fa re ka ya kwa go Jehofa ka dinako tsa mathata?
10 Lefa e le gore o tlhasetswe ka tlhamalalo ke badimona kana o ikutlwa o gateletswe mo maikutlong ka ntlha ya dilo tse dingwe, Jehofa a ka nna lefika la gago. Mmitse ka thapelo. O reetsa ka kelotlhoko le fa selelo sa batho ba gagwe se ka utlwala se le kwa tlase jang. Mopesalema o ne a fitlhela seo se le boammaaruri a bo a kwala jaana: “Ntlhwaèla tsèbè; u nkgololè ka bonakō: u nnè lehika ye le thata mo go nna, ntlo ea phemèlō go mpoloka. Gonne wèna u lehika ya me, le kagō ea me ea phemèlō; ke gōna ka ntlha ea leina ya gago, u nkgōgè, u bo u ntsamaisè. Mphamola mo lotloeñ lo ba lo mpeetseñ ka bosaitsiweñ, gonne ke wèna kagō ea me ea phemèlō.”—Pesalema 31:2-4.
11. Tlhalosa gore ke ka ntlha yang fa kago ya ga Jehofa ya phemelo e se lefelo la go nna mo go lone ka nakwana fela.
11 Jehofa ga a re neele fela botshabelo jwa nakwana mme o re neela kago ya phemelo e e ka se tlhaselweng e re ka nnang mo go yone re sireletsegile. Tsela e a etelelang le go kaela batho ba gagwe ka yone ga e a swabisa batho ba gagwe. Maatla a Modimo a tla dira gore maano otlhe a ga Satane le lesomo la gagwe a se ka a nna le mosola. (Baefesia 6:10, 11) Fa re ntse re ikanya Jehofa ka pelo yotlhe o tla re ntsha mo serung sa ga Satane. (2 Petere 2:9) Mo dingwageng tse nne tse di fetileng, tiro ya go rera ya Basupi ba ga Jehofa e ile ya simologa sentle kwa dinageng di ka nna 35. Gape, mo dikarolong tsa lefatshe tse kwa go tsone maemo a loago, a ikonomi, kana a polotiki a kgoreletsang go rerwa ga mafoko a a molemo, batho bangwe ba sekadinku ba fudugetse kwa mafelong a ba ka fitlhelelwang motlhofo kwa go one. Lengwe la mafelo ao ke Japane.
12. Mmulatsela mongwe kwa Japane o ne a dira jang gore Jehofa e nne kago ya gagwe ya phemelo?
12 Badiri ba ba tlileng go dira ka nakwana ba ba tswang kwa moseja ga mawatle ba ntse ba thelegela kwa Japane, mme go tlhomilwe diphuthego di le dintsi tsa dipuo tse e seng tsa lefelo leo. Boitemogelo jwa mokaulengwe mongwe yo o neng a le mo phuthegong ya Sejapane bo bontsha kafa tshimo eno ya dipuo tsa seeng e ungwang sentle ka gone. O ne a batla go ya go direla kwa go tlhokegang badiri ba ba oketsegileng gone. Lefa go ntse jalo, o ne a setse a tshwara dithuto tsa Bibela di le lesome kwa a neng a le gone. Mongwe wa ditsala tsa gagwe o ne a bua a tshameka a re: “Fa o ka ya kwa go tlhokegang badiri ba ba oketsegileng gone, o tla tshwanelwa ke go tshwara dithuto tsa Bibela di le 20 koo!” O ne a abelwa go ya go direla kwa Hiroshima a ba a ya teng. Lefa go ntse jalo, morago ga dikgwedi di le nne, o ne a na le thuto ya Bibela e le nngwe fela. Letsatsi lengwe o ne a etela monna mongwe yo o tswang kwa Brazil yo o neng a bua Sepotokise fela. E re ka mokaulengwe a ne a sa kgone go buisana le monna yono, o ne a reka buka e e rutang Sepotokise. Fa a sena go ithuta mafoko mangwe a a motlhofo a a ka tlotlang ka one, o ne a etela monna yono gape. Fa mokaulengwe yo a mo dumedisa ka puo ya Sepotokise, o ne a gakgamala, mme a mmulela kgoro ka monyenyo o mogolo a ba a mo laletsa gore a tsene. O ne a simolola thuto ya Bibela. Go ise go ye kae mokaulengwe yono o ne a tshwara dithuto di le 22, di le 14 ka Sepotokise, di le 6 ka Sepanishe, le tse 2 ka Sejapane!
Go Rera ka Tsholofelo
13. Ke ka ntlha yang fa ope a sa tshwanela go leka go re tlhotlheletsa go direla Jehofa ka go re tlhabisa ditlhong?
13 Batho ba ga Jehofa ba opela pina ya Bogosi ka tsholofelo ba na le tumelo e e tletseng ya gore Jehofa ke botshabelo jwa bone. (Pesalema 31:14) Ga ba na go tlhabiwa ke ditlhong—Jehofa ga a na go ba isa kwa tlase, ka gonne o tla diragatsa lefoko la gagwe. (Pesalema 31:17) Diabolo le bapati ba gagwe ba badimona ba tla tlhabiwa ke ditlhong. E re ka batho ba ga Jehofa ba romilwe go rera molaetsa o o senang sepe se se tlhabisang ditlhong, ga ba rere ka gonne batho ba bangwe ba dira gore ba tlhabiwe ke ditlhong. Eo ga se yone tsela e Jehofa lefa e le Morwawe a tlhotlheletsang batho gore ba Mo obamele ka yone. Fa dipelo tsa batho di tletse ka tumelo le go anaanela bomolemo le bopelonomi jwa lorato jwa ga Jehofa, go siama ga dipelo tsa bone ke gone go tlhotlheletsang melomo ya bone gore e bue. (Luke 6:45) Ka jalo, nako nngwe le nngwe e re e dirisang mo tirelong kgwedi le kgwedi, e siame, ga e tlhabise ditlhong, bogolo jang fa e le gore ke gone gotlhe mo re ka go kgonang. A Jesu le Rraagwe ga ba a ka ba itumelela thata lemmenyana la motlholagadi?—Luke 21:1-4.
14. O ka akgela jang malebana le tiro ya bobulatsela? (Bona le tšhate.)
14 Baboledi ba ba ntseng ba oketsega ka palo ba obamela ka pelo yotlhe ka go direla jaaka babulatsela—ngwaga o o fetileng ba ne ba tshwara tlhora ya ba le 890 231! Fa ba ka tswelela pele ba oketsega fela jaaka ngogola, palo eno e ka nna ya feta 1 000 000. Boitemogelo jo bo latelang bo bontsha kafa kgaitsadi mongwe kwa Nigeria a ileng a tsenela bobulatsela ka gone. O kwala jaana: “Fa ke tloga ke fetsa sekolo se segolwane, ke ne ka ya go thusa go apeela ba ba neng ba tlile sekolong sa babulatsela sa Basupi ba ga Jehofa. Ke ne ka kopana le bokgaitsadi ba le babedi koo ba ba neng ba feta mmemogolo ka dingwaga. Fa ke sena go utlwa gore e ne e le babulatsela e bile ba tlile sekolong, ke ne ka ipotsa jaana, ‘Fa e le gore batho ba babedi bano ba kgona go bula tsela, nna ke thibelwa ke eng?’ Ka jalo e ne ya re ke sena go fetsa sekolo, le nna ka nna mmulatsela wa ka metlha.”
15. Go neela bosupi jo bo sa rulaganyediwang go ka dira jang gore go kgonege gore ba bangwe ba tshabele mo go Jehofa?
15 Ga se batho botlhe ba ba ka kgonang go bula tsela, mme botlhe ba ka kgona go neela bosupi. Kgaitsadi mongwe kwa Belgium wa dingwaga tse 82 o ne a ya go reka nama. O ne a lemoga gore mosadi wa mong wa marekisetso a nama o ne a tshwenyegile thata ka ntlha ya mathata a tsa polotiki a a neng a sa tswa go runya. Ka jalo fa kgaitsadi a duela o ne a isa le pampitshana e e reng Basupi ba ga Jehofa Ba Dumela Eng? fa a isa madi. Fa kgaitsadi a boela kwa lebenkeleng, mosadi wa mong wa marekisetso a nama o ne a mmotsa a sa okaoke gore Bibela ya reng malebana le go ka nna gone ga ntwa ya boraro ya lefatshe. Kgaitsadi o ne a mo tlisetsa buka ya Kagiso ya Boammaaruri le Polokesego—O Ka Di Bona Jang? Malatsi a sekae moragonyana, fa kgaitsadi yono yo o godileng a tsena mo lebenkeleng, mosadi wa mong wa marekisetso a nama o ne a batla go mmotsa dipotso tse dingwe gape. Kgaitsadi o ne a tlhomogela mosadi yo pelo eleruri; o ne a bona gore tota o tshwanetse go mo tshwarela thuto ya Bibela, mme o ne a e amogela. Jaanong mosadi wa mong wa marekisetso a nama o batla go kolobediwa. Mong wa marekisetso a nama ene? O ne a bala pampitshana e bile le ene o ithuta Bibela jaanong.
‘Letlotlo la Bomolemo’
16. Jehofa o beetse batho ba gagwe letlotlo la bomolemo kwa thoko jang?
16 Mo metlheng eno ya bofelo e e tletseng matshwenyego, a Jehofa ga a ka a supetsa ba ba tshabetseng mo go ene ‘bopelonomi jwa lorato jo bo gakgamatsang’? Jaaka rre yo o lorato, yo o sireletsang, Jehofa o beetse kwa thoko letlotlo la bomolemo a le beela bana ba gagwe ba ba mo lefatsheng. O ntse a ba itumedisa fela thata fa pele ga botlhe ba ba lebeletseng, fela jaaka mopesalema a bolela jaana: “Ana molemō oa gago o mogolo yañ, o u o beetseñ ba ba gu boihañ, o u o dihetseñ ba ba ikanyañ mo go wèna, ha pele ga bana ba batho!”—Pesalema 31:19, 21.
17-19. Kwa Ghana, fa rre mongwe yo o godileng a ne a kwadisa lenyalo la gagwe kafa molaong, seo se ne sa felela ka molemo ofe?
17 Ka jalo, batho ba lefatshe ba iponela ka matlho kafa batho ba ba obamelang Jehofa ba ikanyegang ka gone, mme ba gakgamale. Ka sekai, kwa Ghana monna mongwe wa dingwaga tse 96 o ne a ya kwa ofising ya mokwadisi wa manyalo a kopa gore a kwadise lenyalo la gagwe morago ga a sena go fetsa dingwaga tse 70 a nyetse fela ka tsela ya setso. Mokwadisi o ne a gakgamala tota a ba a mmotsa a re: “A ruri o tlhomamisa gore o batla go dira jalo? O le kana?”
18 Monna o ne a tlhalosa ka go re: “Ke batla go nna mongwe wa Basupi ba ga Jehofa ke bo ke nne le seabe mo tirong e e botlhokwa go gaisa tsotlhe lefatshe le ise le fele—tiro ya go rera mafoko a a molemo a Bogosi jwa Modimo. Tiro eno e fa botshelo jo bo sa khutleng. Basupi ba ga Jehofa ba utlwa melao yotlhe ya lefatshe, go akaretsa molao wa gore go kwadisiwe manyalo. Ka jalo tsweetswee a ko o nkwadisetse lenyalo la me.” Mokwadise o ne a sala a akabetse e bile a sena kgang. O ne a le kwadisa, mme rre yono yo o godileng o ne a tsamaya a itumeletse gore jaanong o ne a le mo lenyalong le le kwadisitsweng kafa molaong.—Bapisa Baroma 12:2.
19 Morago ga moo, mokwadisi yo wa manyalo o ne a tlhatlhanya ka dilo tse a neng a di utlwile. “Basupi ba ga Jehofa . . . tiro e e botlhokwa go gaisa tsotlhe . . . bofelo jwa lefatshe . . . Bogosi jwa Modimo . . . botshelo jo bo sa khutleng.” E re ka a ne a gakgamaletse gore dilo tse tsotlhe di kaya eng mo botshelong jwa monna wa dingwaga tse 96, o ne a swetsa ka gore a senke Basupi gore a batlisise thata ka kgang eno. O ne a amogela thuto ya legae ya Bibela a ba a gatela pele ka bofefo. Gompieno, mokwadisi yo wa manyalo ke Mosupi yo o kolobeditsweng. Ka jalo, fa re utlwa Jehofa le mo dilong tse bangwe ba ka di lebang e le dilo tse dipotlana, go ka felela go re tswetse molemo o mogolo fela thata mmogo le ba ba lebeletseng tsela e re itshwarang ka yone.—Bapisa 1 Petere 2:12.
20. Kwa Myanmar, go ikanyega ga kgaitsadi mongwe yo mmotlana go ne ga felela jang ka gore go neelwe bosupi sentle?
20 Batho ba ba godileng ba ba letlileng gore boammaaruri bo fetole matshelo a bone gore e nne batho ba ba ikanyegang ba tlhomela basha sekao se se molemo mo lefatsheng leno le le tletseng go sa ikanyege. Kgaitsadi yo e leng mongwe wa basha bao o nna kwa Myanmar. O tswa mo lelapeng le le humanegileng le le itshotlegelang la bana ba le lesome. Rre wa lelapa, yo o mo pensheneng, ke mmulatsela wa ka metlha. Letsatsi lengwe fa kgaitsadi yo a le kwa sekolong, o ne a sela reng ya teemane, mme a e isa go morutabana wa gagwe ka yone nako eo. Fa dithuto di simologa letsatsi le le latelang, morutabana o ne a bolelela mophato kafa reng eno e bonweng ka gone mme a e isa gore e busediwe kwa go mong wa yone. Go tswa foo o ne a kopa kgaitsadi yono yo mmotlana gore a eme fa pele ga tlelase yotlhe a ba a tlhalose gore ke ka ntlha yang fa a dirile jalo, a itse gore bana ba bangwe bone ba ne ba ka nna ba e itseela. Kgaitsadi o ne a tlhalosa gore ke mongwe wa Basupi ba ga Jehofa le gore Modimo wa gagwe ga a batle bogodu kana go sa ikanyege ga mofuta ope fela. Sekolo sotlhe se ne sa utlwa ka kgang eno, mme seno se ne sa neela kgaitsadi yo mmotlana yono sebaka se sentle sa gore a neele bosupi go barutabana mmogo le baithuti.
21. Fa batho ba basha ba ntse ba ikanya Jehofa, boitsholo jwa bone bo mo ama jang?
21 Kwa Belgium morutabana mongwe o ne a bolelela tlelase mafoko a a kgatlhang kaga Basupi ba ga Jehofa. O ne a etse tlhoko tsela e mongwe wa baithuti ba gagwe a neng a itshwara ka yone, yo le ene e neng e le kgaitsadi yo mmotlana, a bo a re: “Jaanong ke ikutlwa ka tsela e nngwe ka Basupi ba ga Jehofa. Ka ntlha ya letlhoo ke ne ke ntse ke akanya gore ke bone batho ba ba neng ba ka se ke ba itshoke go feta botlhe. Ba itshupile e le bone ba itshokang go feta botlhe, mme ba sa tlole melao ya bone.” Ngwaga le ngwaga barutabana ba atswa baithuti ba bone ba ba dirileng sentle go gaisa ba bangwe. Nngwe ya dikatso tseo ke ya go boloka melao ya boitshwaro. Dingwaga di le tharo ka go latelana, mo mephatong e meraro e e kwa godimo morutabana yo o ne a atswa bana ba Basupi ba ga Jehofa. Gantsi go direga jalo ka ba ba tshepileng Jehofa ka boikanyegi.—Pesalema 31:23.
22. Pesalema 31 e konela jang go bontsha phenyo, mme seo se re thusa jang mo metlheng eno ya bofelo jwa tsamaiso eno ya dilo?
22 Pesalema 31 e goeletsa ka konelo ya phenyo: “Nnañ thata, me a dipelo tsa lona di natlahalè lona lotlhe ba lo sholohèlañ mo go Yehofa.” (Pesalema 31:24) Ka jalo, fa re ntse re atamela metlha ya bokhutlo jwa tsamaiso e e boikepo ya ga Satane, Jehofa ga a kake a re tlogela, mme o tla re atamela fela thata a bo a re fe maatla a gagwe. Jehofa o a ikanyega mme ga a ke a swabisa. Ke botshabelo jwa rona; ke tora ya rona.—Diane 18:10.
A O A Gakologelwa?
◻ Ke ka ntlha yang fa re ka tshabela mo go Jehofa ka tsholofelo?
◻ Go na le bosupi bofe jwa gore go na le setlhopha se segolo sa baopedi ba ba opelang dipako tsa Bogosi ka bopelokgale?
◻ Ke ka ntlha yang fa re ka tlhomamisa gore letloa la ga Satane ga le na go tswa seru mo bathong ba ga Jehofa?
◻ Jehofa o beetse batho ba ba tshabelang mo go ene letlotlo lefe kwa thoko?
[Tšhate mo go tsebe 12-15]
PEGO YA BASUPI BA GA JEHOFA LEFATSHE KA BOPHARA YA NGWAGA WA TIRELO WA 1993
(See bound volume)
[Ditshwantsho mo go tsebe 16, 17]
Batho ba ba tshabelang mo go Jehofa ba bopa setlhopha se segolo sa baopedi ba baboledi ba Bogosi—ba le 4 709 889!
1. Senegal
2. Brazil
3. Chile
4. Bolivia