Itumeleng mo go Jehofa!

“Itumeleñ mo Moreneñ ka metlha eotlhe: ke tla ba ke re, Itumeleñ.”—BAFILIPI 4:4.

1. Ke ka ntlha yang fa re ka nna ra ipotsa gore Paulo o ne a raya eng fa a re Bakeresete ba itumele ka metlha yotlhe?

MO MALATSING ano, go bonala fa dilo tse di ka itumedisang motho di bonwa ka sewelo fela. Batho ba ba dirilweng ka lorole, le eleng Bakeresete ba boammaaruri, ba thulana le maemo a a hutsafatsang—a a jaaka go tlhoka ditiro, go nna le botsogo jo bo sa itumediseng, go swelwa ke baratiwa, mathata a a bakiwang ke go sa utlwane ka ntlha ya botho jo bo sa tshwaneng, kana go ganediwa ke maloko a a sa dumeleng a lelapa kana ditsala tsa bogologolo. Ka jalo re ka tlhaloganya jang kgakololo eno ya ga Paulo, ‘Itumeleng ka metlha yotlhe’? Fa go lejwa maemo a a sa itumediseng le a a botlhoko a rotlhe re tshwanelwang ke go a itshokela, a tota seno se ka ba sa kgonega? Go tlhatlhoba ditemana tse di dikologileng mafoko ano go tla re thusa go phepafatsa ntlha eno.

Itumeleng—Ka Ntlha Yang le Gone Jang?

2, 3. Boitumelo bo botlhokwa ka eng, jaaka fa go bontshitswe ke kgang ya ga Jesu le ya Baiseraele ba bogologolo?

² “Itumeleñ mo Moreneñ ka metlha eotlhe: ke tla ba ke re, Itumeleñ.” Seno se ka re gopotsa mafoko a a neng a lebisitswe kwa Baiseraeleng makgolo a dingwaga a ka nna 24 a a fetileng: “Boitumèlō yoa ga Yehofa ke thata ea lona,” kana go ya ka thanolo ya Moffatt: “Go itumela mo go Wa Bosakhutleng ke thata ya lona.” (Nehemia 8:10) Boitumelo bo fa maatla mme bo tshwana le kago e e thata e motho a ka yang kwa go yone gore a bone kgomotso le tshireletso. Boitumelo bo ne jwa nna le seabe mo go thuseng le ene monna yo o itekanetseng ebong Jesu gore a itshoke. “Eo e rileñ ka boitumèlō yo o bo beecweñ pele a ichokèla mokgōrō, a nyatsa ditlhoñ, me a dula kaha ntlheñ ea lecōgō ye legolo ya setulō sa Modimo sa bogosi.” (Bahebera 12:2) Go phepafetse gore, go kgona go itumela le mororo motho a na le mathata go botlhokwa gore a tle a bolokwe.

³ Pele ga fa Baiseraele ba tsena mo Lefatsheng Le Le Solofeditsweng, ba ne ba laelwa jaana: “O itumèlè mo molemoñ otlhe o Yehofa Modimo oa gago o o gu neileñ, oa ba oa o naea le ba kgotla ea gago, wèna, le Molefi, le moeñ eo o mo gare ga gago.” Go sa direle Jehofa ka boitumelo go ne go tla nna le diphelelo tse di botlhoko. “Diphucō tse cotlhe di tla tla mo go wèna, di tla gu kōnatèlèla, di gu chwara, u tsamaea u señwa . . . ka u se ka ua dihèla Yehofa Modimo oa gago ka boitumèlō, le ka boipelō yoa pelo, ka ntlha ya letlōtlō ya dilō cotlhe.”—Duteronome 26:11; 28:45-47.

4. Ke eng se se ka nnang sa baka gore re se ka ra itumela?

⁴ Ka jalo, go botlhokwa thata gore masalela a a tloditsweng a gompieno le ditsala tsa bone tsa “dinku di sele” ba itumele! (Yohane 10:16) Ka go boeletsa kgakololo ya gagwe, “ke tla ba ke re,” Paulo o ne a gatelela kafa go leng botlhokwa ka gone gore re itumelele gotlhe mo Jehofa a go re diretseng. A mme re a itumela? A kana re tsenelela thata mo ditirong tsa botshelo jwa letsatsi le letsatsi mo eleng gore ka dinako tse dingwe re lebala dilo di le dintsi tse di ka dirang gore re itumele? A mathata a rona a koelana mo e leng gore a re sira gore re se ka ra bona Bogosi le masego a jone? A re letla dilo tse dingwe—go tlola melao ya Modimo, go tlhokomologa melaometheo ya Modimo, kana go sa dire ditiro tsa Bokeresete—gore di re tseele boitumelo?

5. Ke ka ntlha yang fa motho yo o seng tekatekano a fitlhela go le thata gore a itumele?

⁵ “A go nna tekatekano ga lona go itsiwe ke batho botlhe. Morena o gaufi.” (Bafilipi 4:5, NW) Motho yo o seng tekatekano ga a kgone go itsetsepela. A ka nna a seka a tlhokomela botsogo jwa gagwe sentle, a dira gore mmele wa gagwe o wele dingalo go sa tlhokege kana gore a tlhobaele. Gongwe ga a ithuta go amogela gore ga a kgone go dira dilo dingwe le go tshela tumelanong le seo. A ka nna a itlhomela mekgele e e kwa godimo thata a bo a leka go e fitlhelela go sa kgathalesege gore seo se tla mo tlhoka eng. Kana a ka nna a dirisa dilo tse a sa kgoneng go di dira e le seipato sa gore a goge dinao kana a repise dilo. E re ka a sa itsetsepela e bile a se tekatekano, o fitlhela go le thata gore a itumele.

6. (a) Bakeresetekarona ba tshwanetse ba kgona go bona eng mo go rona, mme seno se tla diragala leng fela? (b) Mafoko a ga Paulo a a mo go 2 Bakorintha 1:24 le Baroma 14:4 a re thusa jang gore re nne tekatekano?

⁶ Lefa baganetsi ba ka re tsaya jaaka batho ba ba ilweng ke bodumedi kwa tlhogong, Bakeresetekarona ba tshwanetse gore ka dinako tsotlhe ba kgone go bona re le tekatekano. Mme ba tla dira jalo fa re ka nna tekatekano mme re sa solofele boitekanelo mo go rona kana mo go ba bangwe. Mo godimo ga tsotlhe, re tshwanetse ra tila go pega batho ba bangwe merwalo e e sa laolwang ka gope ke Lefoko la Modimo. Moaposetoloi Paulo o ne a re: “E be e se, go re, re na le borèna mo tumeloñ ea lona, me re [badirimmogo le lona go kokotletsa, NW] boitumèlō yoa lona.” (2 Bakorintha 1:24) Jaaka mongwe yo pele e neng e le Mofarasai, Paulo o ne a itse sentle gore melao e e gagametseng e e bewang ke ba ba mo taolong e bile ba patelela batho gore ba e latele e kgaupetsa boitumelo fa dikakantsho tse di mosola tse badirikamotho ba di mo neelang tsone di bo oketsa. Lebaka la go bo ‘Morena a le gaufi’ le tshwanetse la gopotsa motho yo o tekatekano gore ga re a tshwanela ‘go sekisa motlhanka wa yo mongwe. Go ema le go wa ga gagwe e ntse ke ga Morena wa gagwe.’—Baroma 14:4.

7, 8. Ke ka ntlha yang fa Bakeresete ba tshwanetse go solofela gore ba tla nna le mathata, lefa go ntse jalo ba ka kgona jang gore ba tswelele pele ba itumela?

⁷ “Lo se ka loa tlhobaediwa ke sepè; me mo diloñ cotlhe a ditōpō tsa lona di itsisiwè Modimo ka thapèlō le kokotlèlō, di na le tebogō.” (Bafilipi 4:6) Gompieno re mo ‘dipakeng tse di tlhokofatsang’ tse Paulo a neng a kwala kaga tsone. (2 Timotheo 3:1-5) Ka jalo Bakeresete ba tshwanetse ba lebelela gore ba tla lebana le mathata. Mafoko a ga Paulo a gore ‘itumeleng ka metlha yotlhe’ ga a bontshe gore Mokeresete a ka se ke gangwe le gape a ikutlwe a sena tsholofelo kana a kgobegile marapo. Mo kgannyeng ya ga Paulo ka namana, o ne a bolela jaana ka tsela e e utlwalang: “Rea pitlèlèlwa ka ntlha cotlhe, leha go nntse yalo ga rea pitlagana; rea akabadiwa, leha go nntse yalo e be e se mo go re tlhobosañ. Rea khukhèlwa, leha go nntse yalo ga rea latlhwa; re thubanyediwa ha hatshe, leha go nntse yalo ga rea senyèga.” (2 Bakorintha 4:8, 9) Lefa go ntse jalo, go itumela ga Mokeresete go a ritibatsa mme kgabagare go fenye dinakwana tsa go tlhobaela le go utlwa botlhoko. Go re fa maatla a re a tlhokang gore re nne re gatela pele, le ka motlha re sa lebale mabaka a mantsi a a ka dirang gore re itumele.

⁸ Fa go tsoga mathata, go sa kgathalesege gore ke a mofuta ofe, Mokeresete yo o itumetseng o kopa Jehofa ka thapelo le ka boikokobetso gore a mo thuse. Ga a ineele gore a tlhobaele mo go feteletseng. Fa a sena go dira se ene tota a ka kgonang go se dira go rarabolola bothata, o tlogelela Jehofa se se tla diragalang, go dumelana le taletso eno: “Latlhèla morwalō oa gago mo go Yehofa, me o tla gu kokotletsa.” Go ntse go le jalo, Mokeresete o tswelela pele a lebogela Jehofa go bo A le molemo jaana.—Pesalema 55:22; bona gape le Mathaio 6:25-34.

9. Go itse boammaaruri go neela motho kagiso ya mogopolo jang, mme seno se ama Mokeresete jang ka tsela e e molemo?

⁹ “Kagishō ea Modimo e e hetañ tlhaloganyō eotlhe, e tla dibèlèla dipelo tsa lona le megopolō ea lona mo go Keresete Yesu.” (Bafilipi 4:7) Go nna le kitso ka boammaaruri jwa Bibela go golola mogopolo wa Mokeresete mo maakeng mme go mo thusa gore a tlhagolele ditsela tse di siameng tsa go akanya. (2 Timotheo 1:13) Ka jalo o thusiwa gore a tile boitshwaro jo bo phoso kana jwa boeleele jo bo ka dirang gore a se ka a agisana le ba bangwe. Mo boemong jwa gore a utlwisiwe botlhoko ke go sa tshwarwe sentle le ke boikepo, o ikanya Jehofa gore a rarabolole mathata a batho a dirisa Bogosi. Kagiso e e ntseng jalo ya mogopolo e sireletsa pelo ya gagwe, e dira gore a nne a na le maitlhomo a a siameng, mme e kaela dikakanyo tsa gagwe mo tseleng ya tshiamo. Maitlhomo a a itshekileng le dikakanyo tse di siameng, le tsone di neela mabaka a mantsi a gore motho a itumele, go sa kgathalesege mathata le dikgatelelo tse di tlisiwang ke lefatshe le le tletseng tlhakatlhakano.

10. Boitumelo jwa boammaaruri bo ka bonwa fela ka go bua kana go akanya kaga eng?

¹⁰ “Sa bohèlō, ba ga echo, dilō cotlhe tsa boamarure, dilō cotlhe tse di chwanetseñ go tlotlwa, dilō cotlhe tse di itshekileñ, dilō cotlhe tse di ratègañ, dilō cotlhe tse di bolèlwañ ka molemō; ha go na le molemō moñwe, me ha go na le pakō, lo gopolè dilō tse.” (Bafilipi 4:8) Mokeresete ga a natefelwe ke go bua kana go akanya kaga dilo tse di maswe. Seno se raya gore a ka se ipelele bontsi jwa boitlosobodutu jo bo ntshiwang ke lefatshe. Ga go na ope yo o ka tswelelang pele a na le boitumelo jwa Bokeresete fa a tlatsa mogopolo wa gagwe le pelo ya gagwe ka maaka, puo ya dinyana, le dikgang tse di sa siamang, tsa boitsholo jo bo sa siamang, tse di senang molemo ope, tse di ilegang, le tse di makgapha. Fa go buiwa fela ka tlhamalalo, ga go na ope yo o ka bonang boitumelo jwa boammaaruri ka go tlatsa mogopolo le pelo ya gagwe ka leswe. Mo lefatsheng la ga Satane le le bosula, a bo go kgothatsa jang ne go itse gore Bakeresete ba na le dilo tse dintsi jaana tse di molemo tse ba ka buang le go tlotla ka tsone!

Mabaka A Mantsintsi A A Ka Dirang Gore Re Itumele

11. (a) Ke eng se se tshwanelang gore le ka motlha se se tsewe motlhofo, mme ka ntlha yang? (b) Go nna teng kwa kopanong ya ditšhabatšhaba go ne ga ama mongwe yo o neng a tlile kopanong le mosadi wa gagwe jang?

¹¹ Fa re bua ka dilo tse di ka dirang gore re itumele, a re se lebaleng bokaulengwe jwa rona jwa ditšhaba tsotlhe. (1 Petere 2:17) Fa ditlhopha tsa lefatshe tsa ditšhaba le merafe e e farologaneng di ntse di itaana ka noga e utlwa, batho ba Modimo ba ntse ba kitlana le go feta pele ba kitlanngwa ke lorato. Kutlwano ya bone e bonala segolobogolo kwa dikopanong tsa Ditšhabatšhaba. Mongwe yo o neng a ile kopanong kwa Kiev, kwa Ukraine, ka 1993, a tswa kwa United States o ne a kwala jaana: “Dikeledi tsa boitumelo, matlho a a bontshang boipelo, go tlamparelana ga ba le bantsi jaaka batho ba lelapa le le lengwe fela, le go dumedisana ga ditlhopha go kgabaganya lebala la metshameko di tshotse mekgele ya mebalabala le disakatuku go ne go bontsha gore tota ba utlwana ka tsela ya puso ya Modimo. Dipelo tsa rona di ikgantsha tota ka se Jehofa a se dirileng ka kgakgamatso mo bokaulengweng jwa lefatshe lotlhe. Seno se amile nna le mosadi wa me fela thata mme se okeditse tumelo ya rona.”

12. Isaia 60:22 e ntse e diragadiwa jang fa pele ga matlho a rona?

¹² A bo go nonotsha tumelo ya Bakeresete gompieno thata jang ne go bona boperofeti jwa Bibela bo diragadiwa fa pele ga matlho a bone! Ka sekai, akanyetsa mafoko a Isaia 60:22: “Eo monnye o tla tla a nna makgolo a le shomè, le eo mmōtlana a nna morahe o o thata: Nna Yehofa ke tla go akohisa mo motlheñ oa gōna.” Fa Bogosi bo ne bo tsalwa ka 1914, batho ba le 5 100 fela—yo monnye—ba ne ba rera ka tlhagafalo. Mme lefa go ntse jalo mo dingwageng tse tlhano tse di fetileng, bogolo jwa bokaulengwe jwa lefatshe lotlhe bo ile jwa oketsega ka kakaretso mo e ka nnang ka go kolobediwa ga Basupi ba basha ba le 5 628 beke le beke! Ka 1993, go ne ga fitlhelelwa tlhora ya badihedi ba ba tlhagafetseng ba le 4 709 889. A ko o akanye fela! Seno se raya gore “eo monnye” wa 1914 tota o gaufi le go nna “makgolo a le shomè”!

13. (a) Go ntse go diragala eng fa esale ka 1914? (b) Basupi ba ga Jehofa ba latela molaomotheo wa mafoko a ga Paulo a a mo go 2 Bakorintha 9:7 jang?

¹³ Fa e sale ka 1914 Kgosi e e leng Mesia e ile ya tswa e ya go fenya mo gare ga baba ba yone. Puso ya gagwe e ile ya tshegediwa ke balatedi ba ba dirang ka pelo e e ratang ba ba dirisang nako, maatla, le madi go tsweledisapele tiro ya go rera mo lefatsheng lotlhe mmogo le letsholo la go aga mo ditšhabeng tsotlhe. (Pesalema 110:2, 3) Basupi ba ga Jehofa ba a itumela ka gonne go ntshiwa meneelo ya madi go dira gore ditiro tseno di wediwe, lefa madi a umakwa sewelo fela kwa dipokanong tsa bone.a (Bapisa 1 Ditihalō 29:9.) Bakeresete ba boammaaruri ga ba tlhoke go kgotlediwa gore ba ntshe meneelo; ba go tsaya e le tshiamelo gore ba tshegetse Kgosi ya bone ka selekanyo se maemo a bone a ba letlang ka sone, mongwe le mongwe “kaha o ikaeletseñ mo peduñ ea gagwè ka gōna; e señ ka go ñōñōrèga, leha e le ka patèlèlō.”—2 Bakorintha 9:7.

14. Go bonetse boemo bofe mo bathong ba Modimo fa esale ka 1919, mme jwa ba neela lebaka lefe la gore ba itumele?

¹⁴ Go busediwa ga kobamelo ya boammaaruri mo bathong ba Modimo mo go neng go boleletswe pele go ile ga felela ka gore go bopiwe paradaise ya semoya. Fa e sale ka 1919 e ile ya tswelela pele ka go atolosa melelwane ya yone. (Pesalema 14:7; Isaia 52:9, 10) Seno se feletse ka eng? Bakeresete ba boammaaruri ba na le “boitumèlō le boipelō.” (Isaia 51:11) Maungo a a molemo a a tlhagang ka ntlha ya seno ke bosupi jwa se moya o o boitshepo wa Modimo o kgonang go se fitlhelela ka batho ba ba sa itekanelang. Kgalaletso le tlotlo yotlhe e ya kwa go Jehofa, mme lefa go ntse jalo go ne go ka nna le tshiamelo efe e e botoka go na le go fetoga modirimmogo le Modimo? (1 Bakorintha 3:9) Jehofa o na le maatla a magolo mo e leng gore fa go tlhokega, a ka dira gore maje a bolele molaetsa wa boammaaruri. Lefa go ntse jalo, o bone go tshwanela gore a se ka a dirisa mokgwa oo, mme go na le moo a tlhotlheletse dibopiwa tse di ratang tse di dirilweng ka lorole gore di dire thato ya gagwe.—Luke 19:40.

15. (a) Ke ditiragalo dife tsa motlha wa segompieno tse re di tlhomileng matlho ka kelotlhoko? (b) Re lebeletse pele go bona tiragalo efe ka boitumelo?

¹⁵ Batlhanka ba ga Jehofa jaanong ba lebeletse ditiragalo tsa lefatshe ka tshisimogo, e re ka di amana le boperofeti jo bo tlhomologileng jwa Bibela. Ditšhaba di leka ka natla yotlhe go fitlhelela kagiso e e nnelang ruri—mme di a palelwa. Ditiragalo di ba pateletsa gore ba kope lekgotla la Ditšhaba tse di Kopaneng gore le tseye kgato mo dikarolong tsa lefatshe tse di atisang go nna le mathata. (Tshenolō 13:15-17) Go ntse go le jalo, batho ba Modimo ba setse ba lebile pele ka tlhoafalo e kgolo kwa go nngwe ya ditiragalo tse di itumedisang thata tse di kileng tsa nna, e e ntseng e atamela letsatsi le letsatsi. “A re itumeleñ, a re ipeleñ thata, a re o galaletseñ: gonne nyalō ea Kwana e hitlhile, le mosadi oa gagwè o ipaakantse.”—Tshenolō 19:7.

Go Rera—A Ke Morwalo kana Ke Boitumelo?

16. Tshwantsha kafa go sa direng se Mokeresete a se ithutileng go ka dirang gore a se ka a itumela ka gone.

¹⁶ “Dilō tse lo di ithutileñ, loa ba loa di amogèla, loa ba loa di utlwa, loa ba loa di bōna mo go nna, dilō tseuō, lo di dihè; me Modimo oa kagishō o tla nna le lona.” (Bafilipi 4:9) Bakeresete ba ka lebelela gore ba tla bona tshegofatso ya Modimo ka go dirisa se ba se ithutileng. Sengwe sa botlhokwa go gaisa tsotlhe tse ba di ithutileng ke kafa go leng botlhokwa ka gone gore ba rerele ba bangwe mafoko a a molemo. Tota gone, ke mang yo o neng a ka nna le kagiso ya mogopolo kana a itumela fa a tshwere ka tlhaa molaetsa o a ka bong a o bolelela batho ba ba dipelo di ikanyegang ba matshelo a bone a ikaegileng ka gore ba a utlwe?—Esekiele 3:17-21; 1 Bakorintha 9:16; 1 Timotheo 4:16.

17. Ke ka ntlha yang fa tiro ya rona ya go rera e tshwanetse gore ka metlha e re itumedise?

¹⁷ A bo go itumedisa jang ne go bona batho ba sekadinku ba ba ratang go ithuta kaga Jehofa! Eleruri, bao ba direlang ka maitlhomo a a tshwanetseng ka metlha ba tla fitlhela tirelo ya Bogosi e itumedisa. Seno ke ka gonne lebaka la konokono la go nna Mosupi wa ga Jehofa ke go baka leina la Gagwe le go goletsa boemo jwa Gagwe jaaka Mmusi Mogodimodimo. (1 Ditihalō 16:31) Motho yo o lemogang ntlha eno o tla itumela fela lefa batho ka go tlhoka botlhale ba gana mafoko a a molemo ao a a tlisang. O itse gore go rerela batho ba ba sa dumeleng nako nngwe go tla fela; go bakiwa ga leina la ga Jehofa go tla tswelela ka bosakhutleng.

18. Ke eng se se rotloetsang Mokeresete gore a dire thato ya ga Jehofa?

¹⁸ Bodumedi jwa boammaaruri bo tlhotlheletsa batho ba ba mo go jone gore ba dire dilo tse di batliwang ke Jehofa, e se ka gonne ba tshwanetse go di dira, mme e le ka gonne ba batla go di dira. (Pesalema 40:8; Yohane 4:34) Batho ba le bantsi ba fitlhela go le thata go tlhaloganya seno. Mmè mongwe o kile a raya Mosupi mongwe yo o neng a mo etetse a re: “Wa itse, ke tshwanetse go go akgola. Tota nna nka se ka ka tsamaya ka ntlo le ntlo ke rera kaga bodumedi jwa me jaaka wena o dira jaana.” Mosupi o ne a araba jaana a nyenya: “Ke tlhaloganya gore o ikutlwa jang. Pele ke nna Mosupi wa ga Jehofa, lefa go ne go ka nna jang, ke ne ke ka se ke ke tsamaye ke bua le batho ba bangwe kaga bodumedi. Mme jaanong ke batla go dira jalo.” Mmè yo o ne a akanya ka nakwana a bo a swetsa ka go re: “Go bonala sentle gore go na le sengwe se bodumedi jwa gago bo thusang ka sone mme se seyo mo go jwa me. Gongwe go tla re ke leke go tlhotlhomisa.”

19. Ke ka ntlha yang fa jaanong e le nako ya go itumela go feta lefa e le leng pele?

¹⁹ Temana ya ngwaga wa 1994, e e beilweng ka tsela e e bonalang sentle mo Diholong tsa rona tsa Bogosi, ka metlha e re gakolola jaana: “Ikanyè Yehofa ka pelo eotlhe ea gago.” (Diane 3:5) A go ne go ka nna le lebaka le lengwe le le ka re itumedisang go feta go kgona go ikanya Jehofa, kago ya phemelo e re tshabelang mo go yone? Pesalema 64:10 e tlhalosa jaana: “Basiami ba tla itumèla mo go Yehofa, ba tla ikanya mo go èna.” Eno ga se nako ya go okaoka kana go ineela. Kgwedi nngwe le nngwe fa e feta e re atametsa gaufiufi le se tota batlhanka ba ga Jehofa ba ntseng ba eletsa go se bona fa e sale mo metlheng ya ga Abele. Jaanong ke nako ya gore re ikanye Jehofa ka pelo yotlhe ya rona, re itse gore le ka motlha ga re ise re ko re nne le mabaka a mantsi jaana a a dirang gore re itumele!

[Ntlha e e kwa tlase]

O Ne O Ka Araba Jang?

◻ Go ya ka Nehemia 8:10, ke ka ntlha yang fa re tshwanetse go itumela?

◻ Duteronome 26:11 le 28:45-47 di bontsha jang kafa go leng botlhokwa ka gone gore re itumele?

◻ Bafilipi 4:4-9 e ka re thusa jang gore re itumele ka metlha?

◻ Temana ya ngwaga wa 1994 e re fa lebaka lefe la gore re itumele?

[Setshwantsho mo go tsebe 16]

Basupi ba Ba-Russia le ba Bajeremane ba itumelela go nna karolo ya bokaulengwe jwa lefatshe lotlhe

[Setshwantsho mo go tsebe 17]

Go abela ba bangwe boammaaruri go a itumedisa