Botlhokwa jwa Kobamelo ya ga Jehofa mo Matshelong a Rona
“Ke tlaa go baka ka malatsi otlhe; ke tlaa baka leina la gago ka bosakhutleng le ka bosaengkae.”—PESALEMA 145:2.
1. Jehofa o batla eng malebana le kobamelo?
“NNA, Jehofa Modimo wa gago, ke Modimo o o batlang go obamelwa o le osi.” (Ekesodo 20:5, NW) Moshe o ne a utlwa mafoko ao a ga Jehofa, mme morago o ne a a boeletsa fa a ne a bua le morafe wa Iseraele. (Duteronome 5:9, NW) Moshe o ne a sa belaele sepe gore Jehofa Modimo o ne a batla gore batlhanka ba Gagwe ba obamele Ene fela.
2, 3. (a) Ke eng se se neng sa bontsha Baiseraele gore se se neng sa diragala gaufi le Thaba ya Sinai se ne se sa tlwaelega? (b) Re tla tlhatlhoba dipotso dife malebana le mokgwa wa go obama wa Baiseraele le wa batlhanka ba Modimo gompieno?
2 Baiseraele le “bontsi jwa batho jo bo tlhakanyeng” jo bo neng bo tsamaile le bone fa ba tswa kwa Egepeto ba ne ba bona sengwe se se sa tlwaelegang fa ba ne ba thibeletse gaufi le Thaba ya Sinai. (Ekesodo 12:38) Se ne se sa tshwane gotlhelele le kobamelo ya medimo ya kwa Egepeto, e jaanong e neng e nyenyefaditswe ka dipetso tse di lesome. Fa Jehofa a ntse a ipontsha Moshe go ne ga diragala dilo tse di boifisang: modumo wa maru, dikgadima, le modumo o mogolo wa lonaka o o neng o dira gore bothibelelo jotlhe bo rorome. Go tswa foo go ne ga tla molelo le mosi fa thaba yotlhe yone e ntse e roroma. (Ekesodo 19:16-20; Bahebere 12:18-21) Fa Moiseraele ope fela a ne a tlhoka bosupi jo bo oketsegileng jwa gore go ne go diragala sengwe se se sa tlwaelegang, bo ne bo santse bo tla tla. Go ise go ye kae, Moshe o ne a fologa kwa thabeng a sena go neelwa sekaelo sa bobedi sa melao ke Modimo. Pego e e tlhotlheleditsweng e bolela gore, “letlalo la sefatlhogo sa [ga Moshe] la bo le phatsima; ka moo [batho] ba boifa go mo atamela.” Eleruri e ne e le tiragalo e e ka se lebalegeng, e e fetang dinonofo tsa batho!—Ekesodo 34:30.
3 Morafe oo wa Modimo wa tshwantshetso o ne o sa belaele sepe gore kobamelo ya ga Jehofa e ne e le botlhokwa go le kana kang. O ne a le Mogolodi wa bone. Ba ne ba tshela ka ntlha ya gagwe tota. Gape o ne a le Motlhomamelao wa bone. A mme gone ba ne ba tswelela pele ba tsaya kobamelo ya ga Jehofa e le yone e e botlhokwa go feta dilo tsotlhe? Mme go tweng ka batlhanka ba Modimo ba motlha wa gompieno? Kobamelo ya ga Jehofa e botlhokwa go le kana kang mo matshelong a bone?—Baroma 15:4.
Kafa Baiseraele Ba Neng Ba Obamela Jehofa Ka Gone
4. Bothibelelo jwa Baiseraele bo ne bo ntse jang ka nako ya fa ba ne ba le mo mosepeleng wa bone mo nageng, mme go ne go na le eng fa garegare ga bothibelelo?
4 Fa o ne o kile wa bona Baiseraele ba thibeletse kwa nageng o le kwa godimo, o ka bo o bone eng? Ditante tse dintsintsi di tlhomagantswe sentle ka thulaganyo, tse go nnang batho ba ka tswa ba le dimilione tse tharo kana go feta foo mo go tsone, ba beilwe ka ditlhopha tsa ditso tse tharo kafa bokone, borwa, botlhaba, le bophirima. Fa o ntse o atamela mme o leba sentle, gape o ne o tla lemoga setlhopha se sengwe gaufi thata le bogare jwa bothibelelo. Mo ditlhopheng tse dipotlana tseno tse nne tsa ditante, go ne go nna malapa a lotso lwa Lefi. Go ne go na le kago e e sa tshwaneng le epe fa garegare ga bothibelelo, mo lefelong le le neng le ageletswe ka lobotana lwa letsela. Yone e ne e le “mogope wa bophuthegelo” kana motlaagana o Baiseraele ba ba “pelo e e tlhalefileng” ba neng ba o agile ka polane ya ga Jehofa.—Dipalo 1:52, 53; 2:3, 10, 17, 18, 25; Ekesodo 35:10.
5. Tiro ya motlaagana e ne e le eng kwa Iseraele?
5 Nako le nako fa ba ne ba thibelela ka makgetlho a ka nna 40 mo mosepeleng wa bone wa kwa nageng, Baiseraele ba ne ba tlhoma motlaagana, mme e ne e nna one selo sa konokono mo bothibelelong jwa bone. (Dipalo, kgaolo 33) Go a tshwanela he, go bo Baebele e tlhalosa Jehofa gore o ne a nna le batho ba gagwe mo garegare ga bothibelelo jwa bone. Kgalalelo ya gagwe e ne e tlala mo motlaaganeng otlhe. (Ekesodo 29:43-46; 40:34; Dipalo 5:3; 11:20; 16:3) Buka ya Our Living Bible e akgela jaana: “Ntlo eno ya kobamelo e e neng e kgona go fudusiwa e ne e le ya botlhokwa fela thata, e re ka e ne e le lefelo la bokopanelo la bodumedi la ditso tseno. Ka jalo e ne e dira gore ba nne ba kitlane mo dingwageng tse ditelele tsa go kgarakgatshega mo nageng mme seo se ne se dira gore ba kgone go dira dilo ba le seoposengwe.” Mo godimo ga moo, motlaagana o ne o thusa go gopotsa Baiseraele ka metlha gore kobamelo ya bone go Mmopi wa bone e ne e le yone ya botlhokwatlhokwa mo matshelong a bone.
6, 7. Motlaagana o ne wa emisediwa ke kago efe ya kobamelo, mme morafe wa Iseraele o ne o e dirisa jang?
6 Fa Baiseraele ba sena go goroga mo Lefatsheng le le Solofeditsweng, motlaagana o ne wa tswelela pele e le wa konokono mo kobamelong ya Baiseraele. (Jošua 18:1; 1 Samuele 1:3) Fa nako e ntse e ya, Kgosi Dafide o ne a akantsha gore go agiwe kago e e neng e tla nnela ruri. Eno e ne ya nna tempele, eo e neng ya agiwa moragonyana ke morwawe ebong Solomone. (2 Samuele 7:1-10) Ka nako ya fa e ne e neelwa go ne ga kotama leru mo kagong eno go supa gore Jehofa o a e amogela. Solomone o ne a rapela jaana: “Ruri ke go agetse ntlo ya go nnwa, felo ga gago go nna bonno jwa gago ka bosakhutleng.” (1 Dikgosi 8:12, 13; 2 Ditirafalo 6:2) Tempele e e neng e sa tswa go agiwa jaanong e ne ya nna yone lefelo la konokono le morafe o neng o le dirisetsa kobamelo.
7 Banna botlhe ba Baiseraele ba ne ba tlhatlogela kwa Jerusalema gararo ka ngwaga, ba ya meletlong ya boitumelo kwa tempeleng go supa gore ba ne ba amogela masego a Modimo. Go a tshwanela he go bo dikopano tseno di ne di bidiwa “mediro e e tlhomilweng ya ga Jehofa,” di lebisitse tlhokomelo mo kobamelong ya Modimo. (Lefitiko 23:2, 4) Basadi ba ba ineetseng ba ne ba tsamaya mmogo le maloko a mangwe a lelapa.—1 Samuele 1:3-7; Luke 2:41-44.
8. Pesalema 84:1-12 e supela jang kafa go obamela Jehofa go leng botlhokwa ka gone?
8 Bakwadi ba ba tlhotlheleditsweng ba Dipesalema ba ne ba bolela ka mafoko a a tlhalosang kafa kobamelo e neng e le botlhokwa thata mo matshelong a bone ka gone. Bomorwa Kora ba ne ba opela ba re: “Ana metlaagana ya gago e mentlentle jang, wena Jehofa wa masomosomo!” Kwantle ga pelaelo ba ne ba sa bake kago fela e e tlwaelegileng. Go na le moo, ba ne ba tsholetsa mantswe a bone ba baka Jehofa Modimo ka go re: “Pelo ya me le nama ya me di kurueletsa Modimo o o tshedileng.” Balefi ba ne ba itumedisiwa thata ke tirelo ya bone. “Go sego ba ba agileng mo ntlong ya gago,” ba ne ba rialo. “Ba tlaa fela ba ntse ba go baka.” E bile, tota Baiseraele botlhe ba ne ba ka opela jaana: “Go sego motho yo thata ya gagwe e leng mo go wena; yo ditsela tse di yang Sione di leng mo pelong ya gagwe. . . . Ba etla ba tlhomagantse thata le thata; mongwe le mongwe wa bone o ya go bonala fa pele ga Modimo mo Sione.” Lefa mosepele wa Moiseraele wa go ya Jerusalema o ne o ka tswa o le motelele e bile o lapisa, o ne a nonofa gape fa a tsena kwa motsengmogolo. Pelo ya gagwe e ne e itumela thata fa a ntse a baka tshiamelo e a nang le yone ya go obamela Jehofa: “Gonne letsatsi le le lengwe fela mo malwapeng a gago, le gaisa malatsi a a makgolo a le some. Ke rata ka nna molebedi wa kgoro mo ntlong ya Modimo bogolo go go aga mo megopeng ya boikepo. . . . Jehofa wa masomosomo, go sego motho yo o ikantseng mo go wena.” Mafoko a a ntseng jalo a bontsha kafa Baiseraele bao ba neng ba tseela kobamelo ya ga Jehofa kwa godimo ka gone.—Pesalema 84:1-12.
9. Morafe wa Iseraele o ne wa diragalelwa ke eng fa o ne o sa beye kobamelo ya ga Jehofa kwa pele?
9 Ka maswabi, Baiseraele ga ba a ka ba tswelela pele ba beile kobamelo ya boammaaruri kwa pele. Ba ne ba letla gore go ikobela medimo ya maaka go fokotse tlhagafalo ya bone go Jehofa. Seo se ne sa felela ka gore Jehofa a ba neele baba ba bone, a ba letla gore ba tsewe ba isiwe botshwarwa kwa Babilone. Fa ba ne ba busediwa kwa nagagaeng ya bone morago ga dingwaga tse 70, Jehofa o ne a neela Baiseraele dikgakololo tse di kgothatsang tsa baperofeti ba ba ikanyegang Hagai, Sekaria, le Malaki. Moperesite Esere le Mmusi Nehemia ba ne ba rotloetsa batho ba Modimo gore ba age tempele sesha ba bo ba rulaganye kobamelo ya boammaaruri mo go yone gape. Mme lefa go ntse jalo fa makgolo a dingwaga a ntse a feta, setšhaba seno se ne sa boa sa tseela kobamelo ya boammaaruri kwa tlase.
Go Tlhagafalela Kobamelo ya Boammaaruri mo Lekgolong la Ntlha la Dingwaga
10, 11. Go obamela Jehofa go ne go le botlhokwa go le kana kang mo matshelong a batho ba ba ikanyegang fa Jesu a ne a le mo lefatsheng?
10 Go tswa foo, Mesia o ne a tla, ka nako e Jehofa a neng a e tlhomile. Batho ba ba ikanyegang ba ne ba solofetse go bolokwa ke Jehofa. (Luke 2:25; 3:15) Efangele ya ga Luke e tlhalosa ka tlhamalalo gore Ana wa dingwaga tse 84 e ne e le motlholagadi “yo o sa tlogeleng tempele, a direla Modimo ka go ikitsa go ja le ka mekokotlelo bosigo le motshegare.”—Luke 2:37.
11 Jesu o ne a re: “Sejo sa me ke go dira go rata ga yo o nthomileng, le go wetsa tiro ya gagwe.” (Johane 4:34) Gakologelwa gore Jesu o ne a itshwara jang fa a ne a buisana le batho ba ba neng ba ananya madi kwa tempeleng. O ne a pitikolola ditafole tsa bone le ditilo tsa ba ba neng ba rekisa maphoi. Mareko o anela jaana: “[Jesu] a se ka a leseletsa motho ope go ralala tempele a tshotse sejana. Mme a ruta, a ba raya a re: ‘A ga go a kwalwa ga twe: “Ntlo ya me e tlaa bidiwa Ntlo ya thapelelo ya merafe yotlhe”? Mme lona lo e ntshitse mongobo wa dinokwane.’” (Mareko 11:15-17) Ee, Jesu o ne a sa letle lefa e le gone gore ope a tlhabanyetse go ralala lelwapa la tempele a tshotse dilwana a di isa kwa karolong e nngwe ya motse. Ditiro tsa ga Jesu di ne di gatelela kakgelo e a neng a e neetse pelenyana ga foo: “Batlang pele bogosi jwa [Modimo] le tshiamo ya gagwe; mme dilo tsotlhe tse lo tlaa di okelediwa.” (Mathaio 6:33) Jesu o re tlogeletse sekao se sentle thata sa go neela Jehofa kobamelo a le esi. Eleruri o ne a dira seo a neng a se ruta.—1 Petere 2:21.
12. Barutwa ba ga Jesu ba ne ba bontsha jang kafa ba tsayang go obamela Jehofa go le botlhokwa ka gone?
12 Gape Jesu o ne a tlhomela barutwa ba gagwe sekao se ba neng ba ka se latela ka tsela e a neng a diragatsa thomo ya gagwe ka yone ya gore a golole Bajuta ba ba ikanyegang ba ba neng ba gateletswe, a ba golola mo mekgweleong ya mekgwa ya bodumedi jwa maaka. (Luke 4:18) Bakeresete ba bogologolo ba ne ba bolela se se ratwang ke Jehofa ka bopelokgale malebana le Morena wa bone yo o tsositsweng ba dira jalo ka go utlwa taelo ya ga Jesu ya gore ba dire barutwa le go ba kolobetsa. Jehofa o ne a itumelela thata gore ba bo ba tsaya go Mo obamela e le ga botlhokwa. Ka jalo, moengele wa Modimo ka boene o ne a golola baaposetoloi ba ba neng ba tshwerwe ebong Petere le Johane ka kgakgamatso mme a ba laela a re: “Tsamayang, lo ye go ema lo bue le batho mo tempeleng mafoko otlhe a Botshelo jo.” E re ka ba ne ba tlhagafetse gape, ba ne ba dira fela jalo. Letsatsi le letsatsi, kwa tempeleng e e kwa Jerusalema mmogo le ka ntlo le ntlo “ba se ka ba bakela go ruta le go rera Jesu, fa e le Keresete.”—Ditiro 1:8; 4:29, 30; 5:20, 42; Mathaio 28:19, 20.
13, 14. (a) Fa e sale ka nako ya Bakeresete ba bogologolo, Satane o ntse a leka go dira batlhanka ba Modimo eng? (b) Batlhanka ba Modimo ba ba ikanyegang ba ile ba tswelela pele ba dira eng?
13 Fa tiro ya bone e ntse e tswelela pele e ganediwa, Modimo o ne a kaela batlhanka ba gagwe ba ba ikanyegang gore ba kwale kgakololo e e mo nakong. “Latlhela[ng] tlhobaelo yotlhe ya lona mo go [Jehofa], ka o a lo babalela,” go ne ga kwala jalo Petere morago fela ga 60 C.E. “Lo nne lo ikgape, lo nne tiso: mmaba wa lona, diabolo, o potologa jaaka tau e e dumang, a batla yo o ka mo kometsang. Lo emalane nae lo nitame mo tumelong ya lona, lo ntse lo itse fa tsone dipogiso tseo di dirafalela bakaulengwe ba lona ba ba mo lefatsheng.” Kwantle ga pelaelo Bakeresete ba bogologolo ba ne ba kgothadiwa ke mafoko ao. Ba ne ba itse gore fa ba sena go boga go le gonnye, Modimo o ne a tla wetsa go ba thapisa. (1 Petere 5:7-10) Mo metlheng eo ya bofelo ya tsamaiso ya Sejuta ya dilo, Bakeresete ba boammaaruri ba ne ba tlotlomatsa kobamelo e e lorato ya ga Jehofa go feta pele.—Bakolosa 1:23.
14 Go ne ga diragala selo se moaposetoloi Paulo a neng a se boleletse pele, botenegi, go katoga bodumedi jwa boammaaruri. (Ditiro 20:29, 30; 2 Bathesalonia 2:3) Bosupi jwa mo masomeng a bofelo a lekgolo la ntlha la dingwaga bo supela seno thata. (1 Johane 2:18, 19) Satane o ne a atlega go jala Bakeresete ba e seng bone mo go ba boammaaruri, a dira gore go nne thata go tlhaola “mohoka” ono mo Bakereseteng ba sekamabele. Lefa go ntse jalo, fa makgolo a dingwaga a ntse a feta, batho bangwe ba ile ba baya kobamelo ya Modimo kwa pele, lefa seno se ne se tsenya matshelo a bone mo kotsing. Mme Modimo ga a ka a kokoanya batlhanka ba gagwe gape gore ba goletse kobamelo ya boammaaruri go fitlha mo masomeng a bofelo a dingwaga tsa “metlha ya Baditšhaba.”—Mathaio 13:24-30, 36-43; Luke 21:24.
Kobamelo ya ga Jehofa E A Golediwa Gompieno
15. Boperofeti jwa ga Isaia 2:2-4 le Mika 4:1-4 bo ntse bo diragadiwa jang fa esale ka 1919?
15 Ka 1919, Jehofa o ne a neela masalela a batlodiwa maatla a gore ba neele bosupi ka bopelokgale mo lefatsheng lotlhe mme seo se tlotlomaditse kobamelo ya Modimo wa boammaaruri. Fa e sale ka “dinku di sele” tsa tshwantshetso di simolola go thelegela ka 1935 go ya pele, palo ya batho ba ba tlhatlogang ka tsela ya semoya ba tlhatlogela kwa “thabeng ya ga Jehofa” e ntse e gola e bo e gola. Ka ngwaga wa tirelo wa 1993, Basupi ba ga Jehofa ba le 4 709 889 ba ne ba mmaka ka go laletsa ba bangwe gore ba kopanele mo kobamelong ya gagwe e e tlotlometseng. A bo seno se farologane thata jang ne le boemo jo bo makgapha jwa “makhubu” a mmusomogolo wa lefatshe wa bodumedi jwa maaka jo bo makgaoganyane, segolo bogolo Labokeresete!—Johane 10:16; Isaia 2:2-4; Mika 4:1-4.
16. Batlhanka botlhe ba Modimo ba tshwanetse go dira eng malebana le se se boleletsweng pele mo go Isaia 2:10-22?
16 Batho ba ba setseng bodumedi jwa maaka morago ba leba dikereke tsa bone le dikereke tse dikgolo le eleng baruti ba bone e le ba ba ‘kwa godimo,’ ba ba neela maina le tlotlo tsa maemo a a kwa godimo. Mme lefa go ntse jalo ela tlhoko gore Isaia o ne a bolelela eng pele: “Matlho a motho o a kadileng a tlaa bokaladiwa, le bopelompe jwa batho bo tlaa obiwa, mme mo letsatsing leo go tlaa godisiwa Jehofa a le esi fela.” Se se tla diragala leng? Mo sepitleng se segolo se se ntseng se atamela ka bonako se ka nako ya sone “medimo ya disetwa e tlaa fetela[ng] ruri.” E re ka nako eo e e boifisang e setse e le gaufi, batlhanka botlhe ba Modimo ba tlhoka go tlhatlhoba ka masisi gore kobamelo ya ga Jehofa e botlhokwa go le kana kang mo matshelong a bone.—Isaia 2:10-22.
17. Batlhanka ba ga Jehofa gompieno ba bontsha jang gore ba tsaya kobamelo ya ga Jehofa e le botlhokwa go feta dilo tsotlhe?
17 Basupi ba ga Jehofa botlhe jaaka e le bakaulengwe ba ditšhabatšhaba ba itsege ka tlhoafalo ya bone ya go rera ka Bogosi. Kobamelo ya bone ga se bodumedi jwa go ikgolola fela, jo bo dirwang mo e ka nnang ura e le nngwe fela ka beke. Nnyaa, ke tsela ya bone ya botshelo jotlhe. (Pesalema 145:2) Eleruri, ngwaga o o fetileng Basupi ba feta 620 000 ba ne ba rulaganya mabaka a bone gore ba nne le seabe mo bodireding jwa Bokeresete ka nako e e tletseng. Kwantle ga pelaelo ba bangwe ga ba tlhokomologe kobamelo ya bone go Jehofa. Ke sengwe se ba buang ka sone thata mo metlotlong ya bone ya letsatsi le letsatsi le mo tirong ya bone ya go rera phatlalatsa, le fa dilo tse ba tshwanetseng go di dira mo malapeng a bone di tlhoka gore ba bereke ka thata kwa ditirong tsa boitshediso.
18, 19. Ntsha dikai tse di kgothatsang tse o ka tswang o di bone ka go bala dipolelo tsa matshelo a Basupi.
18 Dipego tsa matshelo a Basupi tse di gatisitsweng go Tora ya Tebelo di neela lesedi tota ka ditsela tse di farologaneng tse bakaulengwe le bokgaitsadi ba ileng ba baya kobamelo ya ga Jehofa kwa pele mo matshelong a bone ka tsone. Kgaitsadi mongwe yo mmotlana yo o neng a neela Jehofa botshelo jwa gagwe a na le dingwaga tse thataro o ne a itlhomela mokgele wa go direla jaaka morongwa. Lona bakaulengwe le bokgaitsadi ba basha, lo ka tlhopha mokgele ofe o o tla lo thusang gore lo boloke kobamelo ya ga Jehofa e le ya botlhokwa mo matshelong a lona?—Bona setlhogo se se reng “Go Batla go Fitlhelela Mokgele O Ke O Tlhomileng Ke Na Le Dingwaga Tse Thataro,” mo go Tora ya Tebelo ya March 1, 1992, ditsebe 26-30.
19 Kgaitsadi mongwe yo mogolwane wa motlholagadi o re tlhometse sekao se sengwe se se molemo sa go tsaya kobamelo ya ga Jehofa e le botlhokwa kafa go tshwanetseng ka teng. O ne a kgothadiwa thata gore a itshoke ke batho bao a neng a ba thusitse go ithuta boammaaruri. Ba ne ba le “lelapa” la gagwe. (Mareko 3:31-35) Fa o iphitlhela o le mo seemong se se tshwanang le seo, a o tla amogela kemonokeng le thuso ya ba basha ba ba mo phuthegong? (Tsweetswee ela tlhoko kafa Kgaitsadi Winifred Remmie a neng a itlhalosa ka gone mo setlhogong se se reng “Ke Ne Ka Tsaya Kgato ka Nako ya Thobo,” seo se gatisitsweng go Tora ya Tebelo ya July 1, 1992, ditsebe 21-3.) Lona batlhanka ba nako e e tletseng, bontshang gore tota kobamelo ya ga Jehofa e tla pele mo matshelong a lona ka go direla ka boikokobetso kwa lo abetsweng teng, lo latela kaelo ya puso ya Modimo ka go rata. (Tsweetswee ela tlhoko sekao sa ga Mokaulengwe Roy Ryan, jaaka se anelwa mo setlhogong se se reng “Go Nna O Kgomaretse Phuthego ya Modimo,” go Tora ya Tebelo ya December 1, 1991, ditsebe 24-7.) Gakologelwa gore fa re baya go obamela Jehofa kwa pele, re tlhomamisega gore o tla re tlhokomela. Ga go tlhokege gore re tlhobaele ka gore dilo tse re di tlhokang mo botshelong di tla tswa kae. Maitemogelo a Bokgaitsadi Olive le Sonia Springate a bontsha seno.—Bona setlhogo se se reng “Re Ile Ra Batla Bogosi Pele,” se se go Tora ya Tebelo ya February 1, 1994, ditsebe 20-5.
20. Ke dipotso dife tse di tshwanetseng tse jaanong re ka di ipotsang?
20 Ka jalo, a mongwe le mongwe wa rona ga a a tshwanela go ipotsa dipotso tse di fatang maikutlo? Go obamela Jehofa go botlhokwa go le kana kang mo botshelong jwa me? A ke tshela go dumelana le boineelo jwa me jwa gore ke tla dira gotlhe mo ke ka go kgonang gore ke dire thato ya Modimo? Ke ka tokafatsa mo dikarolong dife tsa botshelo? Fa re sekaseka setlhogo se se latelang ka kelotlhoko, re tla nna le sebaka sa go akanya kafa re dirisang dilo tse re nang le tsone ka teng go dumelana le se re tlhophileng gore e nne sone sa botlhokwatlhokwa mo botshelong—go obamela Jehofa Morena Mogodimodimo, Rraarona yo o lorato.—Moreri 12:13; 2 Bakorinthe 13:5.
Fa Re Boeletsa
◻ Jehofa o batla eng malebana le kobamelo?
◻ Motlaagana o ne o gopotsa eng?
◻ Ke bomang ba ba neng ba tlhoma dikao tse di tlhomologileng tsa go tlhagafalela kobamelo ya boammaaruri mo lekgolong la ntlha la dingwaga C.E., mme ba ne ba dira seo jang?
◻ Kobamelo ya ga Jehofa e ile ya golediwa jang fa esale go tloga ka 1919?