Boloka Bothokgami Mme o Tshele!
“ITATOLE Modimo, mme o swe!” Tsebe e e ka fa ntle ya makasine ono wa rona e supa setshwantsho sa mosadi wa ga Jobe, yo o neng a mo tlhasela ka mafoko ao. Seo se diragetse dingwaga tse di ka nnang 3 600 tse di fetileng. Mme go tla go fitlha gompieno, go tlhaselwa ka mafoko jalo ga motlhanka yo o ikanyegang yoo wa Modimo, go supa kgang e batho ba lebaneng le yone. Jobe yo o ikanyegang o ne a latlhegetswe thata—leruo la gagwe, legae la gagwe, bana ba gagwe ba ba lesome. Jaanong o ne a tshwerwe ke bolwetsi jo bo sa foleng jo bo neng bo mo leka fela thata. Lebaka e ne e le eng? Mmaba yo mogolo wa Modimo le motho, Satane Diabolo, o ne a tsweledisa kgwetlho ya gore motho ga a kake a boloka bothokgami mo Modimong fa a lekwa thata.—Jobe 1:11, 12; 2:4, 5, 9, 10.
Gompieno, fela jaaka mo motlheng wa ga Jobe, “lefatshe lotlhe le namaletse fa tlase ga yo o bosula,” Satane Diabolo. (1 Johane 5:19) Eleruri, seo se boammaaruri le go feta gompieno ka gore jaanong ‘ene yo o bidiwang Diabolo le Satane, motsietsi wa lefatshe lotlhe,’ o kobilwe kwa legodimong a kobelwa mo lefatsheng. (Tshenolo 12:9) Seno ke sone se dirileng gore go nne le masetlapelo a a kanakana a a tlhasetseng batho mo motlheng ono wa rona. Ntwa ya ntlha ya lefatshe, e e neng ya simolola ka 1914, e ne e tshwaya “tshimologo ya botlhoko jwa pelega” jo bo ileng jwa tswelela go tla go fitlha mo lekgolong leno la bo20 la dingwaga.—Mathaio 24:7, 8.
Mo lefatsheng leno le le bosula, le le senyegileng a o a tle o ikutlwe o sa tlhole o kgona go itshoka? A o a tle o ipotse gore, ‘lebaka la go bo o tshela ke eng?’ Jobe o ka tswa a ne a ikutlwa jalo, mme ga a ka a tlogela go dumela mo Modimong le mororo a ne a dira diphoso. O ne a supa gore o ititeile sehuba ka go bua jaana: “Ga nketla ke itlosa thokgamo ya me go ba ke tla ke swa!” O ne a tshepa gore Modimo o ne a tla ‘itse gore o thokgame.’—Jobe 27:5; 31:6.
Jesu Keresete, Morwa Modimo, le ene o ne a tshwanela go itshokela diteko fa a ne a le mono lefatsheng. Satane o ne a tlhasela Jesu ka ditsela tse di farologaneng. O ne a dirisa dilo tsa senama tse Jesu a neng a di tlhoka mme a mo leka gore O ikaegile go le kana kang ka Lefoko la Modimo, jaaka a ne a dira kwa thabeng e a neng a mo raela kwa go yone. (Mathaio 4:1-11) O ne a tshwenya Jesu ka go dira gore bakwadi ba batenegi le Bafarisai mmogo le batho ba ba neng ba ba tsieditse ba mmogise, ba mo pege molato wa go tlhapatsa ba bo ba loge leano la go mmolaya. (Luke 5:21; Johane 5:16-18; 10:36-39; 11:57) Ba ne ba tshwere Jesu makgwakgwa thata go gaisa jaaka bagomotsi ba bararo ba maaka ba ne ba tshwere Jobe.—Jobe 16:2; 19:1, 2.
Fa nako e Jesu a neng a tlile go lekwa thata ka yone e atamela, o ne a bolelela barutwa ba gagwe jaana kwa tshimong ya Gethesemane: “Mowa wa me o hutsafetse thata, e le mo go isang losong fela.” Morago ga foo “a wela ka sefatlhego fa fatshe, a rapela a re: ‘Rra we, fa go ka nna jalo, a senwelo se, se mphete, lefa go ntse jalo, e seng kafa go rateng ga me, e leng kafa go rateng ga gago.’” La bofelo, fa a le mo koteng ya pogisetso, Jesu o ne a diragatsa boperofeti jo bo mo go Pesalema 22:1, ka go tlhaeletsa jaana: “Modimo wa me, Modimo wa me, o ntatlhetseng?” Mme gone kwa bofelong Jehofa ga a ka a latlha Jesu gonne Jesu o ne a thokgame ka botlalo mo go Ene, a tlhomela Bakeresete botlhe ba boammaaruri sekao se se molemo go se sala morago. Jehofa o ne a duelela Jesu go boloka bothokgami ga gagwe ka go mo tsosa le go mo goleletsa kwa magodimong a a kwa godimodimo. (Mathaio 26:38, 39; 27:46; Ditiro 2:32-36; 5:30; 1 Petere 2:21) Modimo o tla duela botlhe ba le bone ba thokgameng mo go ene.
Bothokgami jwa ga Jesu ga bo a araba fela ka mo go feletseng kgwetlho ya ga Satane, mme o ne a ntsha botshelo jwa gagwe jo bo itekanetseng, setlhabelo seo batho ba ba thokgameng ba ka bonang botshelo jo bo sa khutleng mo motheong wa sone, jaaka thekololo. (Mathaio 20:28) La ntlha, Jesu o phutha “letsomanyane” la ba ba tloditsweng ba ba tla nnang baruaboswa mmogo le ene mo Bogosing jwa legodimo. (Luke 12:32) Morago ga se, ba “boidiidi jo bogolo” ba phuthelwa go falola “sepitla se segolo” gore ba rue botshelo jo bo sa khutleng mo Bogosing jwa Modimo mo lefatsheng.—Tshenolo 7:9, 14-17.
Jobe yo o bolokileng bothokgami o tla nna gareng ga dimilione tse di diketekete tsa baswi ba ba tla tsosediwang go nna karolo ya mokgatlho wa “lefatshe le leša” la kagiso. (2 Petere 3:13; Johane 5:28, 29) Jaaka go bontshitswe mo setshwantshong se se mo tsebeng e e ka fa morago ya makasine wa rona, Jobe o ne a duelelwa bothokgami jwa gagwe mo motlheng wa gagwe fa Jehofa “a segofatsa Jobe go ya kwa bokhutlong jwa gagwe bogolo go tshimologo ya gagwe.” O ne a nonofile semoyeng ka gore “ga a ka a leofa ka molomo wa gagwe.” Modimo o ne a mo okeletsa botshelo ka dingwaga tse 140. Fa e le ka dithoto, o ne a fa Jobe dilo tse a neng a na le tsone pele di menagane gabedi, mme Jobe a “nna le bana ba basimane ba supa le basetsana ba le bararo,” basetsana ba teng ba tsewa ba le bantle thata mo nageng eo yotlhe. (Jobe 2:10; 42:12-17) Mme go atlega gono gotlhe go ne go supa fela masego a babolokabothokgami ba tla a ipelelang mo ‘lefatsheng le lesha’ la Paradaise. Le wena o ka bona boipelo joo, jaaka go tla tlhalosiwa mo ditsebeng tse di latelang!
[Setshwantsho mo go tsebe 4]
Jesu o ne a tlhoma sekao se se molemo jaaka mmolokabothokgami