Basupi ba ga Jehofa go Dikologa Lefatshe—Zambia
ZAMBIA ke naga e e sephara e e ikgarileng mo borwabogare jwa Afrika, e e nang le dipoa tse di nang le dithotana tse di mo godimo ga setlhaba se segolo se se bogodimo jwa dimetara di le 1 200. Mo bokonebotlhaba, go na le Dithaba tsa Muchinga tse di boleele jwa dimetara di le 2 100. Noka e kgolo ya Zambezi e e kgatlhang thata, e e kgaphaselang ka namane e tona ya modumo gaufi le Victoria Falls e e tumileng thata, ke yone molelwane o o ka fa borwa wa naga eno e e dikaganyeditsweng ke dinaga tse dingwe. Go na le mefuta e le mentsi e e farologaneng ya batho, e e nang le ditlhopha tsa setso tse di farologaneng di le 70. Go na le dipuo di le robedi tse di buiwang thata koo, mme go na le tse dingwe gape tse dintsi.
Ka 1911 go ne ga anama puo e nngwe gape e e sa tshwaneng le tse dingwe mo Zambia. Baeng bangwe ba ne ba tla ka dikhopi tsa Studies in the Scriptures, mme Basupi ba ga Jehofa go simolola foo ba ne ba ikaelela go anamisa “puo e e itshekileng” ya boammaaruri jwa Baebele mo Zambia. (Sefania 3:9) Sengwe sa dilo tse di gwetlhang thata koo ke ditumelo tse di seng ka fa dikwalong tse di malebana le boemo jwa baswi. Fa batho ba ithuta boammaaruri mme ba bona ka fa ditumelabotlhodi di ba dirileng batlhanka ka teng, ba a gololesega!—Johane 8:32.
Ka sekai, kgaitsadi mongwe yo o ikanyegang o bega jaana: “Fa malome a sena go tlhokafala ka tshoganetso, mmè, yo e neng e le leloko le le ikanyegang la United Church ya Zambia, o ne a remega ditokololo. Morago ga tsamaiso ya phitlho e e tsereng sebaka sa beke, ke ne ka boela kwa gae go ya go mo tlhola go bona gore o ne a tsogile jang. Fa ke goroga, ke ne ka fitlhela go na le monnamogolo mongwe mo ntlung, mme fa a sena go tsamaya ke ne ka botsa mmemogolo gore e ne e le mang. O ne a nthaya a re ke ngaka ya setso. Mme o ne a ikaeletse go mo thapa gore a busolose loso lwa ga kgaitsadie gore moya wa gagwe o tle o ikhutse. O ne a dumela gore mo nakong eo o ne o ‘kaila fela mo sebakeng,’ go ya ka fa tlhalosong ya gagwe.
“Mmemogolo o ne a tswelela go tlhalosa gore go bo ke etile go ne go le molemo ka gore lelapa le ne le batla madi a go duela ngaka ya setso. O ne a nkopa gore le nna ke ntshe madi mangwe, mme ke ne ka tlhalosa ka botlhale gore jaaka Mokeresete, ke ne ke ka se kgone go nna le seabe. Ke ne ka mo tlhalosetsa go tswa mo go Pesalema 146:4, e e bontshang gore baswi ga ba itse sepe—ka jalo ga go na moya ope o o ‘kailang fela mo sebakeng.’ Gape re ne ra bala Baroma 12:19, e e tlhalosang gore pusoloso ke ya ga Jehofa mme ga se ya rona. Morago ga moo, ke ne ka bolelela mmè ka tsholofelo ya tsogo ya baswi e Jesu a buileng ka yone, jaaka go kwadilwe mo go Johane 5:28, 29. O ne a kgatlhiwa thata ke tumelo ya me e e tiileng mo ditsholofetsong tsa Modimo. O ne a simolola go ithuta le Mosupi mongwe mme a gatelapele fela thata ka bofefo. O ne a kgaogana gotlhelele le bodumedi jwa gagwe jwa pele mme a supa boineelo jwa gagwe go Modimo ka kolobetso. Jaanong ke mongwe wa Basupi ba ga Jehofa.”
Kgaitsadi yo mongwe o bega jaana: “Ke ne ka ya kwa phitlhong ya ga mmamalome. Fa ke tsena teng, ke ne ka fitlhela malome le ntsalake ba tshwerwe ke tlala. Ba ne ba ise ba je sepe e sa le ka letsatsi le mmamalome a tlhokafetseng ka lone. Fa ke ne ke ba botsa lebaka, ba ne ba nthaya ba re, go ya ka fa ngwaong, ga ba letlelelwe gore ba gotse molelo ba apeye. Ke ne ka ba raya ka re ke tla apaya mme ba bangwe mo lapeng ba ne ba tshoga gore fa ke ne ke sa dire ka fa ngwaong eno ya boheitane, batho ba ne ba tlile go tsenwa botlhe!
“Ke ne ka tlhalosa gore jaaka mongwe wa Basupi ba ga Jehofa, ke utlwa se Baebele e se bolelang mo go Lefitiko 18:30 mme ka jalo ga ke dire dilo ka fa dingwaong tse di seng kafa dikwalong. Ke ne ka ba bontsha boroutšhara ya Meya ya Batho ba ba Suleng. Go tswa foo, botlhe ba ne ba wela makgwafo mme jalo ka tswelela ka go apeela malome le batho botlhe. Ba losika lwa moswi ba ne ba amiwa ke bopelokgale jwa me mme ba dumela go tswelela pele ba ithuta Baebele. E setse e le baboledi ba ba sa kolobediwang mme lelapa lotlhe le solofela go kolobediwa mo bogaufing.”
A bo re itumela jang ne fa puo e e itshekileng ya boammaaruri e fedisa maaka a a tlhakanyang tlhogo a bodumedi, segolobogolo megopolo e e ngaparetsweng thata e e tsenyang batho ba ba sa itseng sepe mo bokgobeng! Ka tshegofatso ya ga Jehofa, puo e e itshekileng e a anama mo Zambia, fela jaaka go ntse go ralala lefatshe lotlhe.—2 Bakorinthe 10:4.
[Lebokoso mo go tsebe 9]
PEGO YA NAGA
Ngwaga wa Tirelo wa 1994
TLHORA YA PALO YA BA BA NEELANG BOSUPI: 82 926
KABALANO: Mosupi a le 1 mo bathong ba le 107
PALO YA BA BA NENG BA LE TENG KWA SEGOPOTSONG: 363 372
PALOGARE YA BABOLEDI BA E LENG BABULATSELA: 10 713
PALOGARE YA DITHUTO TSA BAEBELE 108 948
PALO YA BA BA KOLOBEDITSWENG 3 552
PALO YA DIPHUTHEGO: 2 027
OFISI YA LEKALA: LUSAKA
[Setshwantsho mo go tsebe 9]
Dikago tsa lekala la Watch Tower ka kwantle ga Lusaka
[Setshwantsho mo go tsebe 9]
Go rera mo Shimabala, mo borwa jwa Lusaka