Go Kgaola Motho—A ke Thulaganyo e e Lorato?
“O BOITSHEPO, o boitshepo, o boitshepo, Morena Modimo, Mothatayotlhe.” (Tshenolo 4:8) Go dumalana le tlhaloso eo, Jehofa ke Motswedi wa ditaolo tse di boitshepo. Di tlhalosiwa mo “dikwalong tse di boitshepo,” mme Bakeresete ba patelesega go sala dikaelo tseno morago. Totatota, ba tshwanetse go tila go dira sepe fela se se leswe mo matlhong a ga Jehofa.—2 Timotheo 3:15; Isaia 52:11.
Baebele e laela jaana ka phepafalo: “Jaaka yo o lo biditseng a le boitshepo, le lona lo nne boitshepo mo go tsheleng gongwe le gongwe gotlhe ga lona; ka go kwadilwe ga twe: “Lo nne boitshepo; gonne nna ke boitshepo.” (1 Petere 1:15, 16) Fa e sale phuthego ya Bokeresete e simolola go nna teng makgolo a a 19 a dingwaga a a fetileng, Bakeresete ba boammaaruri ba ile ba lwa ka thata go e sireletsa kgatlhanong le leswe la semoya le la boitsholo.—Juta 3.
Lebaka La go Bo Tshireletso e Tlhokega
Batlhanka botlhe ba ga Jehofa ba lebana le kgwetlho ya go nna ba le phepa mo boitsholong le mo semoyeng. Ka maikaelelo ao, go tshwanetse ga emelanwa le baba ba bararo ba ba maatla—Satane, lefatshe la gagwe le go lemalela go leofa ga rona ga nama. (Baroma 5:12; 2 Bakorinthe 2:11; 1 Johane 5:19) Lefatshe la ga Satane le tla go raela gore o se ka wa itshola sentle, le tla go gwetlha gore o dire dilo ka tsela eo le di dirang ka teng gape le tla go solofetsa dikhumo, go tuma, maemo, go itsege le maatla. Mme batho ba ba ikemiseditseng go sala kobamelo e e itshekileng morago ba gana se Satane a se ba nayang mme ba nna ba sa “mathwa gope ke lefatshe.” Ka ntlha yang? Ka gore ba batla go nna ka fa tlase ga tshireletso e e lorato ya mokgatlho wa ga Jehofa o o phepa.—Jakobe 1:27; 1 Johane 2:15-17.
Jehofa o rulaganyeditse gore leloko lengwe le lengwe la phuthego ya Bokeresete le le ka welang mo dithaelong tsa ga Satane ka ntlha ya bokoa jo batho ba bo ruileng le bone thuso. Go tlhomilwe bagolwane ba ba tshwanelegang semoyeng gore ba sireletse phuthego le go thusa batho ba ba dirang diphoso gore ba ikwatlhaele boleo jwa bone mme ba dire diphetogo tse di tlhokegang gore ba tle ba boele mo boemong jo bo siameng. Mokeresete mongwe le mongwe yo o ka dirang sengwe se se phoso o tshwanetse go thusiwa ka bopelotelele gore a ikwatlhaye a bo a fetole ditsela tsa gagwe.—Bagalatia 6:1, 2; Jakobe 5:13-16.
Tsela e go Kgaola Motho go Leng Lorato ka Gone
Batlhanka ba ba kolobeditsweng ba ga Jehofa ba ba dirang boikepo ka bomo mme ba gana go fetoga ba tshwanetse go tsewa jaaka ba ba sa ikwatlhayeng mme ka jalo ba sa tshwanele bokopano jwa Bokeresete. (Bapisa 1 Johane 2:19.) Batho ba mofuta oo ga ba kake ba letlelelwa go nna mo phuthegong e e phepa ya Bokeresete mme ka tsela e e ntseng jalo ba e kgotlela. Ba tshwanetse go lelekiwa.
Go supa gore go leleka ba ba dirang boikepo go siame go ka tshwantshiwa ka seemo se se latelang: Ka ntlha ya koketsego ya ditlhaselo le bokebekwa kgatlhanong le baithuti, dikolo tse dingwe di batla gore “bana ba sekolo ba ba dirisang dibetsa kgotsa ba ba tshosetsang go di dirisa ba lelekelwe ruri,” go bega jalo The Globe and Mail, e e leng lokwalopaka lwa kwa Toronto, kwa Canada. Ba lelekelwa go sireletsa baithuti ba ba batlang go solegelwa molemo ke lenaneo la thuto ba sa amiwe ke ditiro tsa thubakanyo.
Ke ka ntlha yang fa go leleka modiraphoso yo o sa ikwatlhayeng mo phuthegong e le go supa lorato? Go dira jalo go supa go rata Jehofa le ditsela tsa gagwe. (Pesalema 97:10) Kgato eno e supegetsa ba ba mo tseleng e e siameng lorato ka gore e tlosa motho yo o ka ba tlhotlheletsang go dira bosula. Gape e sireletsa boitsheko jwa phuthego. (1 Bakorinthe 5:1-13) Fa boitsholo jo bo maswe thata kgotsa leswe la semoya di ne di ka letlelelwa mo phuthegong, e ne e tla kgotlelega mme e ne e tla se ke e tshwanele sentle go ka direla Jehofa yo o boitshepo, tirelo e e boitshepo. Mo godimo ga moo, go lelekiwa ga modiraphoso go ka nna ga mo thusa gore a lemoge bomasisi jwa phoso e a e dirileng, a ikwatlhaye mme a dire diphetogo tse di tlhokegang mme ka jalo a amogelwe gape mo phuthegong.
Matswela a Teng Mo go Ba Bangwe
Fa leloko lengwe la phuthego le dira boleo bongwe jo bo masisi, jaaka boaka, ga le ipedise pelo ya ga Jehofa. (Diane 27:11) Mokeresete mongwe le mongwe yo o ineelang mo boitsholong jo bo sa siamang jwa tlhakanelodikobo totatota ga a akanye jaaka Josefe a ne a akanya fa mosadi wa ga Potifare a ne a leka go mo dira gore a tlhakanele dikobo le ene. Josefe o ne a arabela ka gore: “Bosula jo bogolo jo ke ka bo dira jang, ke leofela Modimo?” (Genesise 39:6-12) Josefe o ne a tlotla ditaolo tse di boitshepo tsa ga Jehofa mme a tshaba mo tiragalong eo. Mo letlhakoreng le lengwe, go lebega moakafadi a sena lorato lo lo nonofileng mo Modimong gore a ithibe mo go kgotsofatseng keletso ya gagwe ya nama.—Bagalatia 5:19-21.
Motho yo o kolobeditsweng yo o tlolang ditaolo tsa Modimo ga a supe gore o amega ka bohutsana le tshenyo tse a tla di bakelang ba losika lwa gagwe ba ba dumelang. Ba bangwe ba utlwa botlhoko jo ba sa kgoneng go bo itshokela thata mo maikutlong. Mosadi mongwe wa Mokeresete o ne a bua jaana ka kutlobotlhoko fa a sena go lemoga gore morwawe o ne a na le boitsholo jo bo sa siamang: “Fa e le gore go na le bakaulengwe le bokgaitsadi ba ba tlhaloganyang, go lebega e le ba sekaenyana fela ba go lebegang ba tlhaloganya gore re utlwile botlhoko e bile re hutsafetse go le kana kang. . . . Re remegile ditokololo.” Batho ba ka nna ba simolola go belaela boikanyegi jwa lelapa lotlhe. Ba lelapa ba ba ikanyegang ba ka nna ba tshwenyega thata mo maikutlong mme ba ipona molato. Ka jalo, mokgwa o o bosula wa modiraphoso o tlisa bohutsana mo lapeng.
Go Thusa ba Lelapa ka Tsela e e Lorato
Bakeresete ba ba ikanyegang ba malapa a batho ba ba lelekilweng ba tshwanetse go gakologelwa gore go kgaola motho ke tshireletso e bile ke go supa lorato. Go dirwa maiteko otlhe a a ka kgonegang go thusa motho yo o dirileng phoso. Mme fa a itshupa a sa ikobele Modimo mme a nna tlhogoethata a sa ikwatlhae, phuthego e tlhoka go sirelediwa mme ga go na ka tsela epe e sele fa e se go dira jaaka Lefoko la Modimo le laela: “Tlosang motho yo o bosula mo gare ga lona.” (1 Bakorinthe 5:13) Jaaka Mosupi mongwe a ne a bua: “go kgaola motho ke kgang ya go ikanyega mo go Jehofa.”
Fa mongwe mo lapeng a kgaolwa, ba losika ba e leng Bakeresete ba utlwa botlhoko. Ka jalo, bagolwane ba ba tlhomilweng ba tshwanetse go dira gotlhe mo ba ka go kgonang go ba lapolosa semoyeng. (1 Bathesalonika 5:14) Bagolwane ba ka ba rapelela le go rapela le bone. Gantsi go etela Bakeresete ba ba ikanyegang bano le go tlotla le bone ka dilo tse di agang tsa Dikwalo go a kgonega. Badisa ba letsomane ba tshwanetse go dirisa sebaka sengwe le sengwe se se ba bulegelang go nonotsha batho bano ba ba rategang semoyeng pele ga dipokano tsa Bokeresete le morago ga tsone. Ba ka fiwa kgothatso e e oketsegileng ka go tsamaya le bone mo bodireding jwa tshimo. (Baroma 1:11, 12) Badisa ba semoya ba tshwanetse go bontsha batlhanka ba ba ikanyegang bano ba ga Jehofa lorato le tlhokomelo tse di ba tshwanelang.—1 Bathesalonika 2:7, 8.
Boleo jwa motho ga se lebaka le le ka dirang gore batho bape fela ba ba ikanyegang mo go Jehofa ba ba mo lapeng la gaabo motho yoo, ba tlhokomologiwe. Kgosi e e bosula ya Iseraele, Saule, o ne a ganwa ke Modimo, mme Dafite ga a ka a letla gore seo se kgoreletse tsela e a neng a rata morwa Saule, e bong Jonathane, ka yone. E bile tota, kamano ya ga Dafite le Jonathane e ne ya nonofa thata. (1 Samuele 15:22, 23; 18:1-3; 20:41) Ka jalo batho botlhe ba ba mo phuthegong ba tshwanetse go ema nokeng le go bontsha lorato mo Bakereseteng ba ba masika a bone ba leofetseng Jehofa.
A bo go tlhokomologa batho ba ba pelonomi bano kgotsa go ba tlhokela maitseo go tla bo go sa supe lorato jang ne! Ba lelapa ba ba ikanyegang ba tlhoka go kgothadiwa ka tsela e e kgethegileng. Ba ka nna ba ikutlwa ba bolaiwa ke bodutu mme ba fitlhela seemo sa bone se ba ketefalela. Gongwe o ka nna wa abalana le bone dikgang dingwe tse di monate tsa semoya kgotsa maitemogelo a a agang ka mogala. Fa motho yo o lelekilweng a araba mogala, kopa fela go bua le Mokeresete wa losika. O ka nna wa laletsa maloko a a ikanyegang a lelapa le le ntseng jalo go tla mo kokoanong kgotsa go tla go ja dijo mo lapeng la gago. Fa o kopana le bone o ile go reka, o ka nna wa dirisa sebaka seo gore le nne le bokopano jo bo agang. Gakologelwa gore Bakeresete ba ba ikanyegang ba ba nang le ba losika ba ba kgaotsweng ba santse ba le karolo ya mokgatlho wa ga Jehofa o o phepa. Go ka nna motlhofo gore ba ikutlwe ba le nosi e bile ba kgobegile marapo. Ka jalo, nna o ntse o tlhokometse gore o ba bontsha bopelonomi le lorato. Tswelela go direla ‘botlhe ba ntlo ya tumelo molemo.’—Bagalatia 6:10.
Anaanela se Jehofa a se Rulaganyeditseng
A bo re ka lebogela go bo Jehofa Modimo a amega ka mongwe le mongwe wa baobamedi ba gagwe mo lelapeng la lefatshe ka bophara. O rulaganyeditse ka lorato ka mokgatlho wa gagwe gore re thusiwe go tsamaya fa pele ga gagwe ka tshiamo. Lefa mongwe mo lapeng a leofa ka bomo a bo a tshwanela go lelekiwa mo phuthegong, o ka boela fa a ikwatlhaya ka boammaaruri. Seno se tshwantshiwa ke sekai se se latelang:
Bagolwane ba ne ba lekile go thusa motho yo re tla mmitsang Anna, mme lefa go ntse jalo o ne a goga, a nwa le go dirisa diokobatsi. O ne a sa ikwatlhaye mme o ne a se ka a nna mo phuthegong. Lefa go ntse jalo, e ne ya re go ise go e kgakala, Anna a simolola go tlhoafalela bokopano jo bo lorato jwa phuthego ya ga Jehofa e e phepa mme a mo rapela gore a mo thuse. O dumalana gore o ne a ise a tlhaloganye ka botlalo gore bagolwane ba amega go le kana kang ka batho ba ba tswang mo tseleng. Anna o ne a simolola go tla dipokanong gape, mme seno sa gogela kwa goreng a ikwatlhae. Morago ga seo, o ne a amogelwa gape mo phuthegong e e lorato e e sireletsang. Anna o boetse gape, o ngaparetse melao ya ga Jehofa e e kwa godimo ya boitsholo. O lebogela lorato lo a lo bontshitsweng ke bagolwane e bile o akgela jaana: “Ga o itse gore dikgatiso tsa Bokeresete di nthusitse go le kanakang. Ruri Jehofa o tlhokomela sentle gore re nna le dilo tse re di tlhokang.”
Ee, Modimo o rulaganyeditse gore ba ba lelekilweng mo phuthegong mme e bo e re moragonyana ba ikwatlhaya, ba kgone go boela. Re lemogile gore le gone go kgaola motho ka bogone ke thulaganyo ya lorato. Mme a bo go le botoka thata jang ne go tila go diragalelwa ke tiragalo e e utlwisang botlhoko eno ka go ngaparela ditsela tsa tshiamo tsa Modimo wa rona yo o boitshepo ka metlha! E ke te re ka nna re ntse re anaanela tshiamelo ya go baka Jehofa re le karolo ya mokgatlho wa gagwe o o phepa, o o lorato le o o sireletsang ka metlha.
[Setshwantsho mo go tsebe 26]
A o bontsha ba ba ikanyegang ba masika a batho ba lelekilweng mo phuthegong lorato?