Jehofa o Naya yo o Lapileng Maatla
“Ba ba lebelelang mo go Jehofa ba tlaa šafatsa thata ya bone; ba tlaa tlhatloga ka diphuka jaaka bontswi ba batona.”—ISAIA 40:31.
1, 2. Jehofa o neela batho ba ba mo ikanyang eng, mme jaanong re tla tlhatlhoba eng?
BONTSU ke dingwe tsa dinonyane tse di maatla thata mo loaping. Ba kgona go lelesela sekgala se setelele ba sa iteye diphuka tsa bone. E re ka a na le diphuka tse di ka nnang boleele jwa go feta dimetara tse pedi, “Kgosi ya Dinonyane,” ntsu yo o mmala wa gouta, ke “mongwe wa bontsu ba ba kgatlhang thata go gaisa ba bangwe botlhe; o kgona go fofa kwa godimo ga dithaba le dipoa, [o] kgona go fofa ka diura tse dintsi mo godimo ga mogolagang wa dithaba, a bo a tlhatloga ka go itsoketsa go fitlha a lebega jaaka lerothodi le lentshonyana mo loaping.”—The Audubon Society Encyclopedia of North American Birds.
2 Isaia o ne a kwala jaana a akantse kafa ntsu a kgonang go fofa ka teng: “[Jehofa] o naya [yo o lapileng maatla, NW] le ene yo o se nang thata o mo totisetse nonofo. Ba e leng makau ba tlaa idibala ba lapa, le makolwane a tlaa phuaganela ruri; mme ba ba lebelelang mo go Jehofa ba tlaa šafatsa thata ya bone; ba tlaa tlhatloga ka diphuka jaaka bontswi ba batona; ba tlaa siana ba sa lape; ba tlaa tsamaya ka dinao, ba sa idibale.” (Isaia 40:29-31) A bo go gomotsa jang ne go itse gore Jehofa o neela ba ba mo ikanyang maatla a gore ba tswelele pele, jaaka e kete o ba neela diphuka tse go lebegang di sa lape tsa ntsu yo o leleselang! Jaanong a ko o tlhatlhobe dingwe tsa dithulaganyo tseo a di dirileng gore a neele yo o lapileng maatla.
Maatla a Thapelo
3, 4. (a) Jesu o ne a rotloetsa barutwa ba gagwe gore ba dire eng? (b) Re ka solofela gore Jehofa a dire eng go araba dithapelo tsa rona?
3 Jesu o ne a rotloetsa balatedi ba gagwe gore “ba tshwanetse go rapela ka metlha yotlhe, ba sa ngosele.” (Luke 18:1) A ruri go bulela Jehofa dipelo tsa rona go ka re thusa go nna le maatla gape le go tila go tlogela fa mathata a botshelo a lebega a re fekeetsa? Ee, mme go na le dilo dingwe tse re tshwanetseng go nna re di gopotse.
4 Re tshwanetse go akanya dilo tsa mmatota malebana le se re solofelang gore Jehofa a se dire go araba dithapelo tsa rona. Mokeresete mongwe yo o neng a simolotse go tshwenyega fela thata mo maikutlong o ne a bolela jaana moragonyana: “Fela jaaka mo malwetseng a mangwe, Jehofa ga a dire dikgakgamatso mo metlheng eno. Mme lefa go ntse jalo gone o re thusa go itshoka le go fola go ya kafa go ka kgonegang ka gone mo tsamaisong eno.” O ne a oketsa jaana a tlhalosa lebaka la go bo dithapelo tsa gagwe di mo thusitse: “Ke ne ke kgona go kopa moya wa ga Jehofa o o boitshepo diura tse 24 ka letsatsi.” Ka jalo, Jehofa ga a re sireletse mo dikgatelelong tsa botshelo tse di ka re imelang, mme gone o “naya ba ba mo lopang Mowa o o Boitshepo.” (Luke 11:13; Pesalema 88:1-3) Moya oo o ka dira gore re kgone teko kana kgatelelo epe e re ka kopanang le yone. (1 Bakorinthe 10:13) Fa go tlhokega, o ka re naya “bogolo jo bo leng bogolo thata jwa nonofo” gore re itshoke go fitlha Bogosi jwa Modimo bo tlosa mathata otlhe a a tshwenyang mo lefatsheng le lesha le le setseng le le gaufi thata.—2 Bakorinthe 4:7.
5. (a) Gore dithapelo tsa rona di nne le matswela, go tlhokega dilo dife tse pedi? (b) Re ka rapela jang fa re lwantsha bokoa bongwe jwa nama? (c) Fa re rapela re sa ipone tsapa e bile re tlhomolola seo re se batlang, seo se tla bontsha Jehofa eng?
5 Lefa go ntse jalo, e le gore dithapelo tsa rona di nne le matswela, re tshwanetse go se ipone tsapa, le gone re tshwanetse go tlhomolola se re se batlang. (Baroma 12:12) Ka sekai, fa ka dinako tse dingwe o lapa ka gonne o lwantsha bokoa bongwe jwa nama, kwa tshimologong ya letsatsi lengwe le lengwe, kopa Jehofa gore a go thuse gore o se ka wa ineela mo bokoeng joo mo letsatsing leo. Rapela fela jalo letsatsi lotlhe le pele o robala bosigo bongwe le bongwe. Fa o ka boela morago, kopa Jehofa gore a go itshwarele, mme gape o bue le ene ka se se dirileng gore o boele morago le se o ka se dirang gore o tile maemo ao mo isagweng. Dithapelo tse di ntseng jalo tsa go sa ipone tsapa le tse di tlhomololang bothata di bontsha “Yo o utlwang thapelo” gore eleruri o eletsa ka pelo yotlhe gore o fenye ntwa.—Pesalema 65:2; Luke 11:5-13.
6. Ke ka ntlha yang fa re ka lebelela ka tshwanelo gore Jehofa a utlwe dithapelo tsa rona le fa re ka tswa re ikutlwa re sa tshwanele go ka rapela?
6 Lefa go ntse jalo, ka dinako tse dingwe, batho ba ba setseng ba lapile ba ka nna ba ikutlwa ba sa tshwanele go ka rapela. Mosadi mongwe wa Mokeresete yo o neng a ikutlwa jalo o ne a bolela jaana moragonyana: “Eo ke tsela e e kotsi thata ya go akanya ka gore seo se raya gore re iphile tiro ya go ikatlhola, mme ga se rona re tshwanetseng go atlhola.” Totatota, “Modimo ke moatlhodi ka osi.” (Pesalema 50:6) Baebele e re tlhomamisetsa gore lefa ‘dipelo tsa rona di ka re nyatsa . . . , Modimo o mogolo go feta dipelo tsa rona, mme o itse dilo tsotlhe.’ (1 Johane 3:20) A bo go gomotsa jang ne go itse gore fa re ikatlhola ka gore ga re tshwanele go ka rapela, Jehofa a ka nna a bo a sa re lebe jalo! O “itse dilo tsotlhe” kaga rona, go akaretsa le maemo mo botshelong jwa rona ao a ka tswang a dirile gore re ikutlwe re se botlhokwa jaana. (Pesalema 103:10-14) Boutlwelobotlhoko jwa gagwe le go tlhaloganya ga gagwe ka tsela e e boteng di mo tlhotlheletsa gore a utlwe dithapelo tse di tswang mo “[pelong] e e phatlogileng, e e ngomogileng.” (Pesalema 51:17) A ka gana jang go utlwa fa re kopa thuso mme e le ene a kgalang “le fa e le mang yo o thibelang go gala ga mohumanegi ditsebe tsa gagwe”?—Diane 21:13.
Lorato Lwa Bokaulengwe
7. (a) Thulaganyo e nngwe e Jehofa a e dirileng go re thusa go nna le maatla gape ke efe? (b) Re ka nonotshiwa ke go itse eng kaga bokaulengwe jwa rona?
7 Thulaganyo e nngwe e Jehofa a e dirileng go re thusa go nna le maatla gape ke bokaulengwe jwa rona jwa Bokeresete. A bo e le tshiamelo e e tlhwatlhwakgolo jang ne go nna karolo ya lelapa la mo lefatsheng lotlhe la bakaulengwe le bokgaitsadi! (1 Petere 2:17) Fa mathata a botshelo a re imela, lorato lwa bakaulengwe ba rona lo ka re thusa gore re nne le maatla gape. Jang? Go itse fela gore ga se rona fela re lebaneng le dikgwetlho tse di tshwenyang go ka re nonotsha. Kwantle ga pelaelo bangwe ba bakaulengwe le bokgaitsadi ba rona ba ile ba lebana le dikgatelelo le diteko tse di tshwanang le tsa rona ba bo ba ikutlwa fela jaaka rona. (1 Petere 5:9) Go a kgothatsa go itse gore se se re diragalelang se tlwaelegile le maikutlo a rona a tlwaelegile.
8. (a) Ke dikai dife tse di bontshang kafa bokaulengwe jwa rona bo ka re neelang thuso le kgomotso tseo re di tlhokang thata ka teng? (b) Wena ka namana o kile wa thusiwa kana wa gomodiwa jang ke ‘tsala ya boammaaruri’?
8 Mo bakaulengweng ba ba lorato re ka fitlhela ‘ditsala tsa boammaaruri’ tseo, fa re na le pitlagano, di ka re neelang thuso le kgomotso tseo re di tlhokang thata. (Diane 17:17) Gantsi go tlhokega mafoko a bopelontle fela kana ditiro tse di bontshang go amega. Mokeresete mongwe yo o neng a lwa le go ikutlwa a sena mosola o gakologelwa jaana: “Go ne go na le ditsala tse di neng di a tle di mpolelele dilo tse ke leng molemo mo go tsone gore di nthuse go fenya dikakanyo tse di kgobang marapo tse ke neng ke na le tsone.” (Diane 15:23) Morago ga loso lwa morwadie yo mmotlana, kgaitsadi mongwe la ntlha o ne a fitlhela go le thata go opela dipina tsa Bogosi kwa dipokanong tsa phuthego, bogolo jang dipina tse di umakang tsogo. O gakologelwa jaana: “Nako nngwe kgaitsadi yo o neng a ntse mo ditilong tse dingwe o ne a mpona ke lela. O ne a tla fa go nna, a baya letsogo la gagwe mo godimo ga magetla a me, mme a opela pina yotlhe le nna. Ke ne ka ikutlwa ke rata bakaulengwe le bokgaitsadi thata e bile ke itumela thata gore re ne re tshwanetse go ya kwa dipokanong, ke lemoga gore ke gone koo re ka bonang thuso teng, gone kwa Holong ya Bogosi.”
9, 10. (a) Re ka tlatseletsa jang gore bokaulengwe jwa rona bo nne lorato? (b) Ke bomang segolobogolo bao ba tlhokang botsalano jo bo kgothatsang? (c) Re ka dira eng go thusa batho ba ba tlhokang go kgothadiwa?
9 Gone ke boammaaruri, mongwe le mongwe wa rona o na le boikarabelo jwa go tsenya letsogo gore bokaulengwe jwa rona jwa Bokeresete bo nne lorato. Ka jalo, dipelo tsa rona di tshwanetse tsa ‘pitlologa’ gore di akaretse bakaulengwe le bokgaitsadi ba rona botlhe. (2 Bakorinthe 6:13) A bo batho ba ba lapileng ba ka utlwa botlhoko jang ne fa ba utlwa lorato lwa bokaulengwe lo tsidifetse kafa go bone! Lefa go ntse jalo, Bakeresete bangwe ba bolela gore ba a tle ba ikutlwe ba jewa ke bodutu e bile ba tlhokomologilwe. Kgaitsadi mongwe yo monna wa gagwe a leng kgatlhanong le boammaaruri o ne a ikuela jaana: “Ke mang yo o sa eletseng le yo o sa tlhokeng botsala jo bo agelelang, go kgothadiwa, le botsalano jo bo lorato? Tsweetswee gakololang bakaulengwe ba rona le bokgaitsadi gore re a ba tlhoka!” Ee, batho ba ba nang le maemo a a ba imelang mo botshelong—ba ba nyalaneng le batho ba ba sa dumeleng, batsadi ba ba senang yo ba nyalaneng le ene, batho ba ba nang le malwetse a a masisi, batho ba ba godileng, le ba bangwe—ke bone bao segolobogolo ba tlhokang botsalano jo bo kgothatsang. A bangwe ba rona ba tlhoka go gakololwa ka seo?
10 Re ka thusa ka go dira eng? A re pitlologeng mo loratong lwa rona. Fa re laletsa batho, re se ka ra lebala bao ba tlhokang go kgothadiwa. (Luke 14:12-14; Bahebere 13:2) Go na le go tsaya fela gore maemo a bone a tla dira gore ba se ka ba amogela taletso, ke eng o sa ba laletse fela? O bo o letla gore ba dire tshwetso. Lefa ba sa kgone go amogela taletso, kwantle ga pelaelo go tla ba kgothatsa go itse gore bangwe ba akantse ka bone. E ka nna ya bo e le sone se ba se tlhokang tota gore ba nne le maatla gape.
11. Batho ba ba imelwang ba ka tlhoka go thusiwa ka ditsela dife?
11 Batho ba ba imetsweng ke mathata ba ka nna ba tlhoka thuso ka ditsela tse dingwe. Ka sekai mmè yo o senang molekane, a ka nna a tlhoka mokaulengwe yo o godileng gore a bontshe morwawe yo o senang rraagwe kgatlhego. (Jakobe 1:27) Mokaulengwe kana kgaitsadi yo o nang le bothata jo bogolo jwa botsogo a ka nna a tlhoka go thusiwa go reka kwa mabenkeleng kana go dira ditiro tsa mo gae. Mongwe yo o godileng a ka nna a eletsa go etelwa kana a tlhoka go thusiwa gore a ye mo bodireding jwa tshimo. Fa thuso eo e tswelela pele e tlhokega ka lobaka lo lotelele, seo se ‘leka bopeloephepa jwa lorato lwa rona’ tota. (2 Bakorinthe 8:8) Mo boemong jwa go ikgogona mo bathong ba ba tlhokang thuso ka ntlha ya nako le maiteko a a tlhokegang go ba thusa, e kete re ka fenya go lekwa ga lorato lwa Bokeresete ka go amega le go thusa ba bangwe fa ba tlhoka thuso.
Maatla a Lefoko la Modimo
12. Lefoko la Modimo le re thusa jang gore re nne le maatla gape?
12 Motho yo o tlogelang go ja, go ise go ye kae o tla felelwa ke nonofo, kana maatla. Ka jalo, tsela e nngwe e Jehofa a re fang maatla ka yone gore re tswelele pele ke ka go tlhomamisa gore re neelwa dijo tse di lekaneng tsa semoya. (Isaia 65:13, 14) O re neetse dijo dife tsa semoya? Mo godimo ga dilo tsotlhe, o re neetse Lefoko la gagwe, Baebele. (Mathaio 4:4; bapisa Bahebere 4:12.) E ka re thusa jang gore re nne le maatla gape? Fa dikgatelelo le mathata a re nang le one di simolola go re feletsa nonofo, re ka nonotshiwa ke go bala kaga maikutlo le mathata a mmatota ao banna le basadi ba ba ikanyegang ba motlha wa Baebele ba neng ba na le one. Lefa ba ne ba le dikao tse di tlhomologileng tsa bothokgami, e ne e le batho ba “maikutlo a a tshwanang le a rona.” (Jakobe 5:17; Ditiro 14:15) Ba ne ba lebana le diteko le dikgatelelo tse di tshwanang le tsa rona. Sekaseka dikai tse dingwe.
13. Ke dikai dife tsa Dikwalo tse di bontshang gore banna le basadi ba ba ikanyegang ba motlha wa Baebele ba ne ba na le maikutlo le maitemogelo a a tshwanang thata le a rona?
13 Lefa tlhogo ya lotso e bong Aberahame a ne a dumela mo tsogong, o ne a hutsafala thata fa mosadi wa gagwe a ne a tlhokafala. (Genesise 23:2; bapisa Bahebere 11:8-10, 17-19.) Dafite yo o neng a ikwatlhaya o ne a akanya gore dibe tsa gagwe di ne di dirile gore a se ka a tshwanela go direla Jehofa. (Pesalema 51:11) Moshe o ne a ikutlwa a tlhaela. (Ekesodo 4:10) Epaferodito o ne a hutsafala fa go itsege gore bolwetse jo bo botlhoko bo ne bo dirile gore a fokotse seabe sa gagwe mo ‘tirong ya ga Keresete.’ (Bafilipi 2:25-30) Paulo o ne a tshwanelwa ke go lwa le nama e e lemaletseng go dira boleo. (Baroma 7:21-25) Euodia le Senthuke, bokgaitsadi ba babedi ba ba tloditsweng ba phuthego ya Filipi, go bonala ba ne ba na le bothata jwa go dirisana mmogo. (Bafilipi 1:1; 4:2, 3) A bo go kgothatsa jang ne go itse gore batho bano ba ba ikanyegang ba ne ba na le maikutlo le maitemogelo a a tshwanang le a rona mme ga ba a ka ba tlogela! Jehofa le ene ga a ka a ba tlhoboga.
14. (a) Jehofa o dirisitse eng go re thusa gore re nonotshiwe ke Lefoko la gagwe? (b) Ke ka ntlha yang fa dikwalopaka tsa Tora ya Tebelo le Tsogang! di nnile tsa nna le ditlhogo tse di buang ka dikgang tse di amang loago, lelapa, le maikutlo?
14 Go re thusa gore re inonotshe ka Lefoko la gagwe, Jehofa o dirisa setlhopha sa motlhanka yo o boikanngo le yo o botlhale go re neela “dijo ka dipaka tse e leng tsone” ka metlha. (Mathaio 24:45) Motlhanka yo o boikanngo ga a bolo go dirisa dikwalopaka tsa Tora ya Tebelo le Tsogang! go sireletsa boammaaruri jwa Baebele le go bolela gore Bogosi jwa Modimo ke jone fela jo batho ba ka solofelang mo go jone. Segolobogolo mo masomeng a sekae a dingwaga a a sa tswang go feta, dikwalopaka tseno di ntse di na le ditlhogo tse di tshwanelang sentle tsa Dikwalo malebana le mathata a loago, a lelapa, le a maikutlo ao tota le bangwe ba batho ba Modimo ba nang le one. Tshedimosetso e e ntseng jalo e gatiseditswe boikaelelo bofe? Kwantle ga pelaelo e gatiseditswe go thusa batho ba ba nang le mathata ano gore ba nonotshiwe le go kgothadiwa ke Lefoko la Modimo. Mme gape ditlhogo tse di ntseng jalo di re thusa rotlhe gore re kgone go tlhaloganya botoka se bangwe ba bakaulengwe le bokgaitsadi ba rona ba ka tswang ba lebane le sone. Ka jalo re kgona go utlwa botoka mafoko ano a ga Paulo: “Nametsang ba ba lapang pelo, pepetletsang ba ba bokoa, lo nne pelotelele mo go botlhe.”—1 Bathesalonika 5:14.
Bagolwane ba e Leng “Boipoteletso mo Phefong”
15. Isaia o ne a perofeta eng kaga batho ba e leng bagolwane, mme seno se ba neela boikarabelo bofe?
15 Jehofa o re neetse sengwe gape se se ka re thusang fa re lapa—bagolwane ba phuthego. Moperofeti Isaia o ne a kwala jaana kaga bone: “[Mongwe le mongwe wa bone, NW] o tlaa nna jaaka boipoteletso mo phefong, le boitekeletso mo ledimong; jaaka dinoka tsa metsi mo sekakeng, jaaka moriti wa lefika le legolo mo nageng e e lapisang.” (Isaia 32:1, 2) Ka gone, bagolwane ba na le boikarabelo jwa go diragatsa se Jehofa a se boleletseng pele kaga bone. Ba tshwanetse go “nna” metswedi ya kgomotso le tapologo mo go ba bangwe le gone ba iketleeletse go “tswelela pele ba rwala merwalo [kana, “dilo tse di tshwenyang”; ka tlhamalalo, “dilo tse di bokete”] ya ba bangwe.” (Bagalatia 6:2, NW; bona le ntlhanyana e e kwa tlase.) Seno ba ka se dira jang?
16. Bagolwane ba ka dira eng go thusa motho yo o ikutlwang a sa tshwanele go rapela?
16 Jaaka go setse go umakilwe, ka dinako dingwe motho yo o lapileng o ka nna a ikutlwa a sa tshwanele go ka rapela. Bagolwane ba ka dira eng? Ba ka rapela le motho yoo le go mo rapelela. (Jakobe 5:14) Fa e ka re motho yo o lapileng a ntse a reeditse, ga kopiwa Jehofa gore a mo thuse go tlhaloganya kafa ene Jehofa le ba bangwe ba mo ratang ka teng, seo se ka mo gomotsa tota. Go utlwa thapelo ya mogolwane e e tswang mo pelong go ka thusa go nonotsha tsholofelo ya motho yo o tshwenyegileng. A ka nna a thusiwa go akanya gore fa bagolwane ba tlhomamisa gore Jehofa o tla araba dithapelo tse a di rapelelwang, le ene a ka tlhomamisa seo.
17. Ke eng fa bagolwane ba tshwanetse go nna bareetsi ba ba pelotlhomogi?
17 Jakobe 1:19 ya re: “A motho mongwe le mongwe a nne bonako go utlwa, le bonya go bua.” Gore bagolwane ba kgone go thusa batho ba ba lapileng gore ba nonofe gape, ba tshwanetse go nna bareetsi ba ba pelotlhomogi. Mo mabakeng a mangwe, maloko a phuthego a ka nna a bo a lwantsha mathata kana dikgatelelo tse di ka se kang tsa rarabololwa mo tsamaisong eno ya dilo. Fa go ntse jalo, se ba ka se tlhokang ga se tharabololo e e ka “baakanyang” bothata jwa bone mme ba ka tlhoka fela go bua le motho yo o kgonang go reetsa—mongwe yo o se ketlang a ba bolelela kafa ba tshwanetseng go ikutlwa ka teng mme a tla ba reetsa a sa ba tshwayatshwaye diphoso.—Luke 6:37; Baroma 14:13.
18, 19. (a) Go nna bofefo go reetsa go ka thusa mogolwane jang gore a tile go dira morwalo wa yo o lapileng gore o nne bokete le go feta pele? (b) Fa bagolwane ba bontsha ‘bopelotlhomogi’ diphelelo e nna dife?
18 Bagolwane, go nna bofefo go reetsa go tla lo thusa go tila go dira gore morwalo wa yo o lapileng o nne bokete thata lo sa ikaelela. Ka sekai, fa mokaulengwe kana kgaitsadi a sa ya dipokanong dingwe kana a boetse morago mo bodireding jwa tshimo, a tota o tlhoka go gakololwa gore a dire mo go oketsegileng mo bodireding kana gore a nne teng kwa dipokanong ka metlha? Gongwe. A mme o itse mabaka otlhe? A o ka tswa a na le mathata a a oketsegang a botsogo? A maikarabelo a lelapa a fetogile bosheng jaana? A go na le maemo a mangwe kana dikgatelelo tse di mo imelang? Gakologelwa, motho yono a ka tswa a setse a ikutlwa a le molato thata ka gonne a sa kgone go dira mo go oketsegileng.
19 Ka jalo, o ka thusa mokaulengwe kana kgaitsadi yoo jang? Pele o dira ditshwetso le go neela kgakololo, reetsa! (Diane 18:13) Dirisa dipotso tse di fatang maikutlo gore o ‘ge’ maikutlo a pelo ya motho yoo. (Diane 20:5) O se ka wa tlhokomologa maikutlo ano—a tseye tsia. Motho yo o lapileng a ka nna a tlhoka go tlhomamisediwa gore Jehofa o amega ka rona e bile o tlhaloganya gore ka dinako tse dingwe maemo a rona a ka re kgoreletsa. (1 Petere 5:7) Fa bagolwane ba le “pelotlhomogi” jalo, batho ba ba lapileng ba ‘tlaa bonela mewa ya bone tapologo.’ (1 Petere 3:8; Mathaio 11:28-30) Fa ba sena go bona tapologo eo, ga ba ketla ba tlhoka go bolelelwa gore ba dire mo go oketsegileng; dipelo tsa bone di tla ba tlhotlheletsa gore ba dire gotlhe mo tota ba ka go kgonang mo tirelong ya ga Jehofa.—Bapisa 2 Bakorinthe 8:12; 9:7.
20. E re ka losika lo lo boikepo lo setse lo le gaufi thata le go fela, re tshwanetse ra ititaya sehuba go dira eng?
20 Eleruri re tshela mo nakong e e bokete thata ya hisitori yotlhe ya motho. Dikgatelelo tsa go tshela mo lefatsheng la ga Satane di ntse di oketsega fa re ntse re ya kwa pele mo motlheng wa bokhutlo. Gakologelwa, jaaka tau e e tsomang, Diabolo o leta gore re lape re bo re tlogele gore a kgone go re sola molemo a re tlhasele motlhofo fela. A bo re ka itumela jang ne go bo Jehofa a neela yo o lapileng maatla! E kete re ka dirisa ka botlalo dilo tseo a di re neelang go re fa maatla a gore re tswelele pele, jaaka e kete o re neela diphuka tse di maatla tsa ntsu yo o fofelang kwa godimo. E re ka go setse go le gaufi jaana gore losika lo lo boikepo lono lo fele, jaanong ga se nako ya gore re ka tlogela go taboga lobelo lwa rona lo lo re isang kwa mokgeleng—botshelo jo bo sa khutleng.—Bahebere 12:1.
Karabo ya Gago ya Reng?
◻ Re ka lebelela gore Jehofa a dire eng go araba dithapelo tsa rona?
◻ Bokaulengwe jwa rona jwa Bokeresete bo ka re neela maatla jang?
◻ Lefoko la Modimo le re thusa jang gore re nne le maatla gape?
◻ Bagolwane ba ka dira eng go thusa ba ba lapileng gore ba nne le maatla gape?
[Setshwantsho mo go tsebe 17]
Fa re laletsa batho, re se ka ra lebala ba ba tlhokang go kgothadiwa
[Setshwantsho mo go tsebe 18]
Bagolwane ba ka kopa Jehofa gore a thuse ba ba lapileng gore ba tlhaloganye kafa ba ratiwang thata ka gone