‘A Modimo o Ntsaya ke le Botlhokwa?’

“AKE Botlhokwa? A Modimo o a Amega?” Setlhogo sengwe sa dikgang se se neng se le mo makasineng wa Christianity Today se ne sa balega ka tsela eo. Mokwadi wa kgang eo e bong Philip Yancey o bolela jaana: “Ke ntse ke kwala ka bothata jwa go utlwa botlhoko mo bontsing jwa nako ya fa ke ntse ke dira tiro ya me ya bokwadi. Ke ipotsa dipotso tse di tshwanang gangwe le gape, jaaka e kete ke kgoma ntho ya bogologolo e e sa foleng gotlhelele. Ke reetsa babadi ba dibuka tsa me, mme dipolelo tsa bone tse di utlwisang botlhoko di supela gore dipelaelo tsa me di boammaaruri.”

Gongwe le wena o kile wa ipotsa gore a Modimo o kgatlhegela botshelo jwa gago. Aha, o ka tswa o tlwaetse lokwalo lwa Johane 3:16, lo lo bontshang gore “Modimo o ratile lefatshe mo go kalokalo, wa ntsha Morwa one yo o tsetsweng a le esi.” Kana o ka tswa o badile Mathaio 20:28, e e bolelang gore Jesu o ne a tla “go ntsha botshelo jwa gagwe go nna thekololo ya batho ba le bantsi.” Lefa go ntse jalo o ka ipotsa gore, ‘A Modimo o a mpona? A o amega ka nna jaaka motho ka bongwe?’ Go na le lebaka le le utlwalang la go dumela gore o a amega, jaaka re tla bona.