Lebaka La go Bo Bodumedi Jwa Lefatshe bo Tlile go Fela

“Tswang mo go ene lona batho ba me, gore lo se tlhakanele nae dibe tsa gagwe, le gore lo se bone dipetso tsa gagwe.”—TSHENOLO 18:4.

1. (a) Babilone o Mogolo o ole ka tsela efe? (b) Tiragalo eno e amile Basupi ba ga Jehofa jang?

BABILONE O MOGOLO o ole!” Ee, Jehofa o bona mmuso o mogolo wa bodumedi jwa maaka o ole. Fa e sa le o wa ka 1919, fa masalela a bomonnawe Keresete a ne a sa tlhole a tlhotlhelediwa ke Labokeresete, e leng karolo e e laolang thata ya Babilone wa masaitseweng. Ka ntlha ya seo, ba ntse ba gololesegile go tshwaya bodumedi jwa maaka diphoso le go itsise batho ka puso e e siameng ya Modimo ka Bogosi jwa ga Mesia. Mo lekgolong leno lotlhe la dingwaga, Basupi ba ba ikanyegang ba ga Jehofa ba ile ba senola mefuta e mentsintsi ya ditumelo tsa ga Satane, tse a di dirisitseng go tsietsa “lefatshe lotlhe.”—Tshenolo 12:9; 14:8; 18:2.

Babilone o Mogolo o Ole ka Tsela Efe?

2. Ditumelo tsa lefatshe di mo boemong bofe gompieno?

² Lefa go ntse jalo, motho mongwe o ka nna a botsa gore, ‘Ke go reng o bolela gore Babilone o ole, fa bodumedi bo lebega bo oketsega jaana mo dinageng di le dintsi?’ Bodumedi jwa Bokatoliki le Boiselamo bo na le badumedi ba ba fetang dimilione tse di sekete bongwe le bongwe. Boporotesetanta bo santse bo ntsifala kwa dinageng tsa Amerika, koo dikereke le matlo a kobamelo a ntseng a oketsega ka metlha. Dimilione tse di makgolokgolo tsa batho di latela dingwaokobamelo tsa Bobuda le Bohindu. Lefa go ntse jalo, bodumedi jono jotlhe bo tlhotlheletsa boitshwaro jwa dikete tseno tsa dimilione tsa batho ka tsela e e siameng go le kana kang? A bo thibetse Bakatoliki le Baporotesetanta gore ba se bolaane kwa Ireland Bokone? A bo leretse Bajuta le Bamoselema kagiso ya mmatota kwa Botlhabagare? A bo leretse Bahindu le Bamoselema kutlwano kwa India? A mme, bosheng jaana, bo thibetse kereke ya Ba-Orthodox ba Serbia, Bakatoliki ba Croatia le Bamoselema ba Bosnia gore ba se tswelele pele “go ganyaola merafe,” go thopa, go betelela le go bolaana? Gantsi bodumedi ke leina fela, seitshiro se se sesane jaaka kgapetla ya lee e e thubegang motlhofo fela.—Bagalatia 5:19-21; bapisa Jakobe 2:10, 11.

3. Ke ka ntlha yang fa bodumedi bo atlholwa ke Modimo?

³ Go ya ka tsela e Modimo a lebang dilo ka yone, lefa bodumedi bo tshegediwa ke bontsintsi jwa batho bo ka se fetole ntlha e le nngwe fela e e ka sekang ya tilwa—ya gore Modimo o atlhola bodumedi jotlhe. Babilone o Mogolo, jaaka go supilwe ke ditiro tse a di dirileng, o tshwanelwa ke go atlholwa ka tsela e e botlhoko ka gonne “dibe tsa gagwe di ile go fitlha le kwa legodimong, Modimo o gakologetswe maikepo a gagwe.” (Tshenolo 18:5) Hosea o ne a kwala jaana ka tsela ya boporofeti: “Gonne ba jala phefo, mme ba tlaa roba setsuatsue.” Bodumedi jotlhe jwa ga Satane jwa maaka mo lefatsheng lotlhe bo tla nyelediwa ka go bo bo sa ikanyega mo Modimong, mo loratong lwa gagwe, mo leineng la gagwe le mo go Morwawe.—Hosea 8:7; Bagalatia 6:7; 1 Johane 2:22, 23.

O Tshwanetse go Tlhopha

4, 5. (a) Re tshela mo maemong a a ntseng jang gompieno? (b) Re tshwanetse go araba dipotso dife?

⁴ Re tshela mo karolong ya bofelo ya ‘metlha ya bofelo,’ mme rona re le Bakeresete ba boammaaruri re lwele go falola “dipaka tse di tlhokofatsang” tseno. (2 Timotheo 3:1-5) Bakeresete ba boammaaruri ke baagi ba nakwana fela mo lefatsheng la ga Satane, le tota le senolang botho jwa gagwe jo bo bosula jwa gore ke mmolai, moaki le mosebi. (Johane 8:44; 1 Petere 2:11, 12; Tshenolo 12:10) Re tshela le batho ba ba dirang thubakanyo, ba ba boferefere, ba ba tsietsang, ba ba dirang ditiro tse di seng kafa molaong le ba ba nang le boitsholo jo bo sa siamang gotlhelele. Maitsholo a mantle a ile a tlhokomologiwa. Seemo seo se ka tlhalosiwa ka gore ke go rata menate ka tsela e e feteletseng le go ikgatlhegela. Mme mo mabakeng a le mantsi baruti ba mpampetsa boitsholo jo bo sa siamang ka go tsaya motlhofo tsela e Baebele e kgalang bosotoma ka phepafalo, kgokafalo le boaka ka yone. Ka gone potso ke gore, A o tshegetsa kobamelo ya maaka le go e mpampetsa, kana o mo kobamelong ya boammaaruri ka matlhagatlhaga?—Lefitiko 18:22; 20:13; Baroma 1:26, 27; 1 Bakorinthe 6:9-11.

⁵ Gone jaanong ke nako ya go kgaoganya. Ka gone, go na le lebaka le legolo la go farologanya kobamelo ya maaka le ya boammaaruri. Ke eng gape se batho ba bodumedi jwa Labokeresete ba se dirileng se se dirang gore ba nne molato jaana?—Malaki 3:18; Johane 4:23, 24.

Bodumedi Jwa Maaka bo Pegwa Molato

6. Labokeresete ga a ikanyega mo Bogosing jwa Modimo jang?

⁶ Le mororo dimilione tsa batho tse di mo go Labokeresete di rapela Thapelo ya Morena gangwe le gape, e mo go yone ba rapelang gore Bogosi jwa Modimo bo tle, ba ntse ba tshegetsa thata mofuta mongwe le mongwe wa bopolotiki, ba sa tshegetse puso eo ya Modimo. Makgolokgolo a dingwaga a a fetileng “dikgosana” tsa Kereke ya Katoliki, tse di jaaka Bakadinale Richelieu, Mazarin le Wolsey, le bone ba ne ba nna boradipolotiki, le matona a puso.

7. Basupi ba ga Jehofa ba ne ba senola baruti ba Labokeresete jang mo dingwageng tse di fetang 50 tse di fetileng?

⁷ Dingwaga tse di fetang 50 tse di fetileng, Basupi ba ga Jehofa ba ne ba senola Labokeresete gore o inaakantse le dipolotiki mo bukaneng e e nang le setlhogo se se reng Religion Reaps the Whirlwind.a Se se neng sa buiwa ka nako eo se tlhotlheletsa ka tsela e e tshwanang le gompieno: “Go tlhotlhomisiwa thata ga boitshwaro jwa baruti ba bodumedi ba ditumelo tsotlhe go tla senola gore baeteledipele ba bodumedi jwa ‘Labokeresete’ jotlhe ba na le seabe thata mo dipolotiking tsa ‘lefatshe leno la gompieno le le bosula’ e bile ba itshunya nko mo dikgannyeng tsa lone.” Ka nako eo Basupi ba ne ba kgala Mopapa Pius XII thata ka go bo a ne a ikgolaganya le Hitler wa Bonasi (1933) le Franco wa Mofasisi (1941), le ka go bo a ne a ananya baemedi ba dinaga le setšhaba se se borumolang thata sa Japane ka March 1942, dikgwedi di sekaenyana fela morago ga tlhaselo e e tumileng ya kwa Pearl Harbor. Mopapa o ne a palelwa ke go tlhwaela tsebe tlhagiso eno ya ga Jakobe: “Baakafadi ke lona, a ga lo itse fa botsalano jwa lefatshe e le bobaba mo Modimong? Ke gone, yo o ratang go nna tsala ya lefatshe, o itira mmaba wa Modimo.”—Jakobe 4:4.

8. Kereke ya Roma Katoliki e inaakantse le dipolotiki jang gompieno?

⁸ Seemo se ntse jang gompieno? Bomopapa ba santse ba inaakantse le dipolotiki, ba dirisa baruti ba bone mmogo le baemedi ba bone ba e seng baruti. Bomopapa ba bosheng jaana ba ne ba bontsha gore ba amogela lekgotla la Ditšhaba Tse di Kopaneng ka go buisa dikokoano tsa lekgotla leno le le itiretsweng ke batho ba leka go tlisa kagiso ya lefatshe. Kgatiso ya bosheng jaana ya L’Osservatore Romano, e leng lokwalodikgang lwa puso lwa Vatican, e ne ya itsise gore baemedi ba dinaga di sele ba le supa ba basha ba ba tlhomilweng, e leng “baemedi kwa Ofising ya Mopapa,” ba ne ba neela “Rara yo o Boitshepo” makwalo a bone a itshupo. A o ka akanya fela Jesu le Petere ba na le seabe mo go ananyeng baemedi ba dinaga jalo? Jesu o ne a gana Bajuta ba mo dira kgosi mme o ne a bolela gore Bogosi jwa gagwe e ne e se jwa lefatshe leno.—Johane 6:15; 18:36.

9. Ke ka ntlha yang fa re ka bolela gore ditumelo tsa Porotesetanta ga di botoka go feta bangwekabone ba Bakatoliki?

⁹ A baeteledipele ba Porotesetanta ba botoka go gaisa bangwekabone ba Bakatoliki? Kwa United States, batho ba le bantsi ba ba tshegetsang ditumelo tsa Boporotesetanta, le tsa Ba-Mormon ba itsiwe ba inaakantse le bopolotiki ka tsela e e rileng. Lekgotla la Christian Coalition le inaakantse thata le bopolotiki kwa United States. Baruti ba bangwe ba Porotesetanta ba tsene thata mo boemong jo bo farologaneng jwa bopolotiki. Ka dinako tse dingwe go lebalwa gore kwa United States, babueledi ba bopolotiki ba ba jaaka Pat Robertson le Jesse Jackson le bone ke “Baruti,” kana e ne e le bone, fela jaaka leloko lengwe la Palamente ya Boritane e bong Ian Paisley wa kwa Ireland Bokone. Tota ba ntsha mabaka afe go supa fa maemo a bone a siame?—Ditiro 10:34, 35; Bagalatia 2:6.

10. Ke mafoko afe a a phepafetseng a a neng a buiwa ka 1944?

¹⁰ Jaaka bukana ya Religion Reaps the Whirlwind e ne ya botsa ka 1944, le rona jaanong re a botsa ka mo go tshwanang: “A mokgatlho ope fela o o tsenang mo ditumalanong le mebuso ya lefatshe mme o itshunya nko mo dikgannyeng tsa bopolotiki tsa lefatshe leno, o ipatlela gore o solegelwe molemo le go sirelediwa ke lefatshe leno . . . o ka nna phuthego ya Modimo kana wa emela Jesu Keresete mo lefatsheng? . . . Ka mo go bonalang ka teng, badumedi botlhe ba ba nang le mekgele e e tshwanang le magosi a lefatshe leno ba ka se emele bogosi jwa Modimo ka Keresete Jesu.”

Moya wa Bodumedi Jwa Maaka wa ga Kaine

11. Bodumedi jwa maaka bo latetse sekao sa ga Kaine ka tsela efe?

¹¹ Mo hisitoring yotlhe, bodumedi jwa maaka bo ntse bo bontsha moya wa ga Kaine wa mmolai, yo o neng a bolaya morwarraagwe e bong Abele. “Bana ba Modimo ba farologanyesega ka mokgwa o le bana ba diabolo; yo o sa direng tshiamo ga se wa Modimo, le ene yo o sa rateng mogagabo. Gonne e ke yone taetso e lo sa leng lo e utlwa mo tshimologong, gore re ratane. Re se ka ra nna jaaka Kaine a nna wa yo o bosula, a bolaya monnawe. Mme o mmolaetseng? E ne e le ka go bo ditiro tsa gagwe di le bosula, mme tsa ga monnawe di siame.” E re ka Kaine a ne a fufegela kobamelo ya morwarraagwe e e neng e itshekile le e Modimo a neng a e amogela, o ne a nna thubakanyo—e leng mokgwa wa bofelo o o dirwang ke batho ba ba ka sekang ba tlhalosa ditiro tsa bone.—1 Johane 3:10-12.

12. Go na le bosupi bofe jo bo bontshang gore bodumedi bo inaakantse le dintwa le dikgotlhang?

¹² A mabaka a tshegetsa mafoko ano a a pegang bodumedi jwa maaka molato? Mo bukeng ya Preachers Present Arms, mokwadi wa yone o ne a bolela jaana: “Mo hisitoring ya mekgwa ya botshelo, . . . go ntse go kopane batlhabani ba le babedi ba dirile kgolagano mmogo. Bone ke ntwa le bodumedi. Mme mo ditumelong tsotlhe tse dikgolo tsa lefatshe, . . . ga go ope yo o neng a ineela mo [ntweng] thata jaana go gaisa [Labokeresete].” Mo dingwageng tse di fetileng, lokwalodikgang lwa The Sun lwa Vancouver, Canada, lo ne lwa bolela jaana: “Gongwe ke bokoa jwa bodumedi jotlhe jo bo rulagantsweng jwa gore kereke e latela folaga ya setšhaba . . . Ke ntwa efe e e neng ya lowa e mo go yone go neng ga se ka ga bolelwa gore Modimo o ba ema nokeng mo matlhakoreng oomabedi?” O ka tswa o bone bosupi jwa seno mo kerekeng ya mo lefelong la lona. Gantsi thata difolaga tsa setšhaba di kgabisa aletare. O akanya gore Jesu o ne a tla gwantela folaga efe? Mafoko a gagwe a ntse a goelediwa go feta makgolokgolo a dingwaga: “Bogosi jwa me ga se jwa lefatshe leno”!—Johane 18:36.

13. (a) Bodumedi jwa maaka bo paletswe ka tsela efe mo Afrika? (b) Jesu o ne a naya letshwao lefe le le tlhaolang Bakeresete?

¹³ Ditumelo tsa Labokeresete ga di a ruta matsomane a tsone boammaaruri jwa lorato lwa bokaulengwe lwa mmatota. Go na le moo, di letlelela bosetšhaba, bomorafe le dikgotlhang tsa setso gore di kgaoganye maloko a tsone. Dipego di bontsha gore baruti ba Katoliki le ba Anglican ba nnile le seabe mo dikgaoganong tse di neng tsa baka kganyailo ya merafe kwa Rwanda. Lokwalodikgang lwa The New York Times lo ne lwa bega jaana: “Dipolaano tsa kwa Rwanda di dirile gore Baroma Katoliki ba le bantsi gone koo ba ikutlwe ba tsieditswe ke ditlhopha tsa baruti ba kereke eo. Gantsi kereke e ne e kgaoganye ka ditso, Bahutu ba le kafa letlhakoreng le lengwe, Batutsi ba le kafa go le lengwe.” Lone lokwalodikgang loo lo ne lwa nopola moruti wa kereke ya Maryknoll a bolela jaana: “Kereke e paletswe mo go tlhabisang ditlhong tota kwa Rwanda ka 1994. Barwanda ba le bantsi ka tsela nngwe ba tlhobogile kereke. Ga ba sa tlhole ba dumela mo go yone.” A bo seo se farologane jang ne le mafoko ano a ga Jesu: “Batho botlhe ba tlaa itse fa lo le barutwa ba me ka mo, fa lo ratana.”—Johane 13:35.

14. Ke ditiro dife tsa boitshwaro tse ditumelo tse dikgolo tse e seng tsa Bokeresete di di dirang gompieno?

¹⁴ Ditumelo tse dingwe tse dikgolo tsa Babilone o Mogolo ga di a tlhoma sekao se se botoka. Dipolaano tse di setlhogo tsa 1947, fa India e ne e kgaoganngwa, di bontsha gore ditumelo tse dikgolo tsa gone koo ga di a ruta batho ba tsone go itshokelana. Thubakanyo e e tletsetletseng e e ntseng e tswelela pele kwa India e bontsha gore bontsi jwa batho ga ba a fetoga. Ga go gakgamatse go bo makasine wa India Today o ne wa konela jaana: “Bokebekwa jo bo fitlhegileng bo ntse bo dirwa ka leina la bodumedi. . . . Bo letlelela thubakanyo e kgolo mme ke maatla a a senyang tota.”

“Boemo jo bo Gakgamatsang Tota”

15. Bodumedi bo mo seemong sefe kwa dinageng tsa bophirima?

¹⁵ Tota le baakgedi ba e seng ba bodumedi ba lemogile gore bodumedi bo paletswe ke go kgotsofatsa batho, go ruta mekgwa e mentle ya boammaaruri, le go thibela mekgwa ya go itlhokomolosa bodumedi. Mo bukeng ya Out of Control ya ga Zbigniew Brzezinski yo pele e neng e le mogakolodi wa pabalesego ya setšhaba kwa United States, o ne a kwala jaana: “Ke boemo jo bo gakgamatsang tota gore phenyo e kgolo thata ka kgang ya gore ‘Modimo o sule’ ga e a diragala mo dinageng tse di busiwang ke Ba-Marxist . . . mme e diragetse kwa ditšhabeng tsa Bophirima tsa temokerasi, tse di ntseng di tsenya go sa kgathalele melaometheo mo ditsong tsa tsone. Kwa ditšhabeng tseo, ntlha ke gore bodumedi bo emisitse go tlhotlheletsa batho fela thata.” O ne a tswelela pele jaana: “Tsela e bodumedi bo laolang setso sa Yuropa ka yone e setse e fokotsegile fela thata, mme Yuropa gompieno—go gaisa le Amerika tota—e setse e fetogile setšhaba se e seng sa bodumedi.”

16, 17. (a) Ke kgakololo efe e Jesu a e neetseng malebana le baruti ba motlha wa gagwe? (b) Ke molaomotheo ofe o o siameng o Jesu a neng a o gatelela malebana le maungo?

¹⁶ Ke eng se Jesu a neng a se bolela malebana le baruti ba Bajuta ba mo motlheng wa gagwe? “Bakwadi le Bafarisai ba dutse mo setulong sa ga Moše [gore ba rute Torah, Molao]. Ke gone tsotlhe tse ba di lo rayang, lo di dire, lo di tlhokomele; mme lo se ka lwa dira ka fa ditirong tsa bone; gonne ba tle ba bue, mme ba se ke ba dire.” Ee, boitimokanyi jwa bodumedi ga se gone bo simologang.—Mathaio 23:2, 3.

¹⁷ Bodumedi jwa maaka bo latolwa ke maungo a jone. Molao o o neng wa newa ke Jesu o mosola fela thata: “Setlhare sengwe le sengwe se se molemo se ungwa loungo lo lo molemo; mme setlhare se se bosula se ungwa loungo lo lo bosula. Setlhare se se molemo ga se ka ke sa ungwa loungo lo lo bosula, le gone setlhare se se bosula ga se ka ke sa ungwa loungo lo lo molemo. Setlhare sengwe le sengwe se se sa ungweng loungo lo lo molemo se a rengwa, se latlhelwe mo molelong. Ke gone lo tlaa ba itse ka loungo lwa bone.”—Mathaio 7:17-20.

18. Labokeresete o tshwanetse go ka bo a ile a boloka maloko a gagwe a le phepa jang?

¹⁸ Fa ditumelo tsa Labokeresete di ne di ka tlhomama gore di dirise kotlhao ya Bokeresete ya go kgaola, kana ya go sa buise motho, e le ka ntlha ya ditiro tsotlhe tse di bosula tse di dirwang ke batho ba ba bolelang gore ke maloko a tsone, ke eng se se neng se tla diragala? Ke eng se se neng se tla diragalela baaki ba ba sa sokologeng, bagokafadi, diaka, basotoma, batsietsi, dikebekwa, barekisi ba diokobatsi le ba di ba tshwakgolang, le maloko a bokebekwa jo bo rerilweng? Kwantle ga pelaelo, maungo a a bodileng a Labokeresete a dira gore a tshwanelwe fela ke go nyelediwa ke Modimo.—1 Bakorinthe 5:9-13; 2 Johane 10, 11.

19. Ke dilo dife tse di neng tsa dumelwa malebana le baeteledipele ba bodumedi?

¹⁹ Bagogi ba Kereke ya Presbyterian kwa United States ba ne ba dumela jaana: “Re lebane le boemo jo bo tshosang thata jo bogolo le diphelelo tsa jone tse di tshosang. . . . Diperesente tse di fa gare ga 10 le 23 tsa baruti mo ditšhabeng tsotlhe di tseneletse mo boitshwarong jo bo sa siamang kana di tlhakanetse dikobo le maloko a kereke, ba ba thusiwang ke kereke, bahiriwa, jalo le jalo.” Rakgwebo mongwe wa United States o ne a sobokanya ntlha eno sentle jaana: “Ditsamaiso tsa bodumedi di paletswe ke go lere mekgwa e mentle ya boitsholo mo hisitoring ya bone, mme mo mabakeng a le mantsi, e nnile tsone tse di bakang bothata.”

20, 21. (a) Jesu le Paulo ba ne ba kgala boitimokanyi jang? (b) Ke dipotso dife tse di santseng di tlhoka gore di arabiwe?

²⁰ Lebaka la go bo Jesu a ne a kgala boitimokanyi jwa bodumedi le a tshwana le la gompieno fela jaaka go ne go ntse mo motlheng wa gagwe: “Baitimokanyi ke lona, Isaia o boletse sentle ka ga lona a re: ‘Tšhaba e, e ntlotla ka dipounama; mme dipelo tsa bone di kgakala le nna. Ba nkobamelela lefela, ka e a tle e re ba ruta, dithuto tsa bone e be e le dipolelo tsa batho fela.’” (Mathaio 15:7-9) Gape mafoko a ga Paulo a a neng a a kwalela Tito a tlhalosa seemo sa rona sa gompieno: “Ba re ba itse Modimo; mme ba o itatole ka ditiro tsa bone, ka ba le makgapha, ba le kgopo, ba tlhobosegile ka ga tiro nngwe le nngwe e e molemo.”—Tito 1:16.

²¹ Jesu o ne a bolela gore fa sefofu se goga sefofu se sengwe, di tla wela mo kgatamping mmogo. (Mathaio 15:14) A o batla go nyelediwa le Babilone o Mogolo? Kana a o batla go tsamaya mo ditseleng tse di tlhamaletseng o ntse o butse matlho le go ipelela masego a ga Jehofa? Gone jaanong re lebanwe ke dipotso tseno: Ke bodumedi bofe, fa e le gore bo teng, jo bo ungwang maungo a Modimo? Re ka tlhaola jang kobamelo ya boammaaruri e e amogelwang ke Modimo?—Pesalema 119:105.

[Ntlha e e kwa tlase]

A o a Gakologelwa?

◻ Modimo o leba Babilone o Mogolo jang gompieno?

◻ Bodumedi jwa maaka bo pegwa molato wa eng?

◻ Bodumedi jwa maaka bo bontshitse moya wa ga Kaine jang?

◻ Ke molaomotheo ofe o Jesu a neng a o gatelela malebana le go atlhola bodumedi bope fela?

[Setshwantsho mo go tsebe 13]

Mo hisitoring yotlhe baeteledipele ba bodumedi ba ne ba itshunya nko mo dipolotiking

[Ditshwantsho mo go tsebe 15]

Mokadinale Mazarin

Mokadinale Richelieu

Mokadinale Wolsey

Gape baruti bano e ne e le boradipolotiki ba ba nonofileng

[Motswedi wa Setshwantsho]

Cardinal Mazarin and Cardinal Richelieu: From the book Ridpath’s History of the World (Vol. VI and Vol. V respectively). Cardinal Wolsey: From the book The History of Protestantism (Vol. I).