Ga o Ne o Batla go e Fosa!
GO FOSA eng? Kopano ya Kgaolo ya Basupi ba ga Jehofa ya “Barongwa ba Kagiso ya Bomodimo” e e ntseng e atamela ka bofefo! Mo mafelong a le mantsi kopano e tla simolola ka nako ya 9:30 ka Labotlhano mo mosong ka thulaganyo ya mmino. Fa o sena go reetsa dipotsolotso tse di nonotshang tumelo mo karolong e e reng “Go Utlwa Bareri ba ba Tlhoafetseng ba Kagiso,” o tla itumelela puo e e kgothatsang e e reng “Modimo o Batla Gore re Dire Eng?”
Puo e e tlhomologileng ka Labotlhano thapama e tla bo e le ya setlhogo e e tlhotlheletsang e e reng “Seabe sa Rona Jaaka Barongwa ba Kagiso ya Bomodimo.” Go tswa foo karolo e e reng “Go Thusa Batho ba Bangwe go Ithuta Dilo Tse Modimo a Batlang Gore re di Dire” e tla re neela dikakantsho tse di malebana le kafa re ka rutang batho ba ba sa tswang go kopanela ka teng. Yone e tla latelwa ke simphosiamo se se tshwanelang nako e re leng mo go yone se se reng “Tlhokomelang Dirai Tse di Fitlhegileng Tsa Boitlosobodutu.” Thulaganyo ya Labotlhano e tla konela ka puo e e reng “Ganetsa Diabolo—Se Letle go Fekeediwa” le e e reng “Go Boloka Bothokgami Jwa Lefoko la Modimo ka Boikanyegi.”
Thulaganyo ya Matlhatso mo mosong e tla otlelela kafa tiro ya go dira barutwa e leng botlhokwa ka teng mo simphosiamong se se kgaogantsweng ka dikarolo di le tharo se se reng “Barongwa ba ba Lereng Mafoko a a Molemo a Kagiso.” Thulaganyo eno e tla konela ka puo e e reng “Go Aba ka Boitumelo mo Mokgatlhong wa ga Jehofa” le ya “Botshelo le Kagiso ka Boineelo le Kolobetso,” mme morago ga moo go tla nna le sebaka sa gore barutwa ba basha ba kolobediwe.
Puo ya Matlhatso thapama e e reng “Utlwa Mogopolo wa ga Jehofa Malebana le Dikgang Tse” e tla araba potso e e jaaka ‘A Bakeresete ba na le seabe mo tirong ya go kgaoganya gompieno?’ le e e reng ‘Kgopolo e e mo Baebeleng ya reng malebana le go atlholelwa loso?’ Gape o tla itumelela simphosiamo se se omosang maikutlo se se kgaogantsweng ka dikarolo di le pedi se se reng “Modimo wa Kagiso O a Go Tlhokomela” mme segolobogolo puo e e konelang e e reng “Latelelang Kagiso ya Bomodimo mo Botshelong Jwa Lelapa.”
Thulaganyo ya Sontaga mo mosong e tla nna le simphosiamo se se kgaogantsweng ka dikarolo di le tharo se se reng “Go Supa Gore Mofuta o o Siameng wa Barongwa ke Ofe” le puo e e reng “Reetsa Lefoko la Modimo O bo O le Ikobele.” Thulaganyo ya mo mosong e tla konela ka terama ya moaparo wa segologolo le wa segompieno e e tla bontshang dilo tsa botlhokwa tse re di ithutang mo polelong ya Baebele ya ga Moatlhodi Giteone.
Karolo ya pele e e tlhomologileng ya thulaganyo ya bofelo ya kopano ka Sontaga thapama e tla bo e le puo ya phatlalatsa e e nang le setlhogo se se reng “Ga ba Ga Tla ga Nna Kagiso ya Boammaaruri!—Go Tswa Motsweding Ofe?” Kwa bokhutlong, puo e e rotloetsang e e reng “Go Gatela Pele Jaaka Barongwa ba Kagiso ya Bomodimo” ke yone e tla konelang kopano.
Dira dithulaganyo gone jaanong gore o nne teng. Gore o itse ka lefelo le le gaufi le legae la gago, etela kwa Holong ya Bogosi ya Basupi ba ga Jehofa kana o kwalele bagatisi ba makasine ono.