Ba ne Ba Dira go Rata ga Jehofa

Petere o Rera ka Pentekosete

E NE e le moso o o monate wa dikgakologo ka ngwaga wa 33 C.E. Go ne go rena moya wa boitumelo! Boidiidi jwa Bajuta le basokologi ba ba itumetseng ba ne ba tletse mo mebileng ya Jerusalema. Ba ne ba tswa kwa mafelong a a tshwanang le Elame, Mesopotamia, Kapatokia, Egepeto le Roma. A bo go ne go kgatlha jang ne go ba bona ba apere diaparo tsa bone tsa setso le go ba utlwa ba bua ka dipuo tsa bone tse di farologaneng! Ba bangwe ba ne ba tsamaile dikilometara di ka nna dikete tse pedi gore ba nne gone mo tiragalong e e kgethegileng eno. E ne e le eng? Pentekosete—moletlo o o itumedisang wa Bajuta o o neng o supa bofelo jwa thobo ya barele.—Lefitiko 23:15-21.

Mosi o ne o kua go tswa mo ditlhabelong tse di neng di le mo aletareng ya tempele, mme Balefi ba ne ba opela Hallel (Dipesalema 113 go ya go 118). Pele fela ga 9:00 a.m., go ne ga diragala sengwe se se gakgamatsang. Go ne ga utlwala go tswa kwa legodimong “mosumo . . . e kete wa sefefo se segolo se se tsubutlang.” O ne wa tlala ka ntlo e mo go yone go neng go phuthegetse barutwa ba ga Jesu Keresete ba ba ka nang 120. Pego ya Dikwalo e bolela jaana: “Ga bonala mo go bone diteme tse di patologanang, e kete tsa molelo; mme wa nna mo go mongwe le mongwe wa bone. Mme botlhe ba tladiwa Mowa o o boitshepo, ba simolola go bua ka dipuo di sele, ka fa Mowa o ba neelang molomo ka teng.”—Ditiro 2:1-4.

Mongwe le Mongwe o Utlwa Puo ya Gagwe

Go ise go ye kae barutwa ba le bantsi ba ne ba tswa mo ntlong. Se se gakgamatsang ke gore ba ne ba kgona go bua ka dipuo tse di farologaneng tsa boidiidi! A o ko o akanye fela gore moeti yo o tswang kwa Peresia le Moegepeto ba ne ba gakgamala jang fa mongwe le mongwe a ne a utlwa puo ya bone e buiwa ke Bagalilea. Ka mo go utlwalang, boidiidi joo bo ne bo gakgametse. “Kana mo go kayang?” ba botsa jalo. Bangwe ba ne ba simolola go sotla barutwa ba re: “Ba kgotshe bojalwa jo bo serobo.”—Ditiro 2:12, 13.

Morago ga foo moaposetoloi Petere o ne a ema a bua le boidiidi. O ne a tlhalosa gore neo e e gakgamatsang eno ya diteme e ne e le go diragadiwa ga tsholofetso ya Modimo e e neng ya tla ka moporofeti Joele e e reng: “Ke tlaa gorometsa Mowa wa me mo nameng yotlhe.” (Ditiro 2:14-21; Joele 2:28-32) Ee, Modimo o ne a sa tswa go tshololela moya wa gagwe mo barutweng ba ga Jesu. Seno e ne e le sesupo se se phepafetseng sa gore Jesu o tsositswe mo baswing le gore jaanong o kwa legodimong kafa letsogong le legolo la Modimo. Petere o ne a bolela jaana: “Ke gone a botlhe ba ntlo ya Iseraele ba itsetse ruri, fa Modimo o mo dirile Morena le Keresete, e bong ene Jesu yo lo mmapotseng.”—Ditiro 2:22-36.

Bareetsi ba ne ba itshwara jang? Pego e bolela gore ba ne “ba tlhabega mo pelong” mme “ba raya Petere le baaposetole ba bangwe ba re: ‘Bakaulengwe, re tlaa dirang?’” Petere o ne a araba ka gore: “Ikwatlhaeng, mongwe le mongwe wa lona a [kolobediwe].” Mo e ka nnang batho ba le 3 000 ba ile ba dira fela jalo! Morago ga moo “ba nnela ruri mo thutong . . . [ya] baaposetole.”—Ditiro 2:37-42.

Ka go bua ka nako e e kgethegileng eno, Petere o ne a dirisa sekopololo sa ntlha sa “dikopololo tsa bogosi jwa legodimo” tse Jesu a neng a solofetsa gore o tla di mo naya. (Mathaio 16:19) Dikopololo tseno di ile tsa dira gore ditlhopha tse di farologaneng tsa batho di nne le ditshiamelo tse di kgethegileng. Sekopololo seno sa ntlha se ile sa dira gore Bajuta ba kgone go nna Bakeresete ba ba tloditsweng ka moya. Moragonyana, sekopololo sa bobedi le sa boraro se ile sa dira gore Basamaria le Baditšhaba le bone ba nne le tshono eno ka go latelana ga bone.—Ditiro 8:14-17; 10:44-48.

Dithuto Tse re di Ithutang

Le mororo boidiidi jwa Bajuta le basokologi e ne e le bone ba ba neng ba ikarabelela loso lwa Morwa Modimo jaaka setlhopha, Petere o ne a bua le bone ka tlotlo, a ba bitsa “bakaulengwe.” (Ditiro 2:29) Mokgele wa gagwe e ne e le go dira gore ba ikwatlhaye, e seng go ba kgala. Ka jalo, tsela e a neng a bua le bone ka yone e ne e siame. O ne a tlhalosa mabaka mme a bo a tshegetsa dintlha tsa gagwe ka go nopola mo Dikwalong.

Batho ba ba rerang mafoko a a molemo gompieno ba tla bo ba dira sentle fa ba ka latela sekao sa ga Petere. Ba tshwanetse go leka go utlwana le bareetsi ba bone mme morago ga foo ba bo ba fetolana le bone ka botswerere go tswa mo Dikwalong. Fa boammaaruri jwa Baebele bo tlhalosiwa ka tsela e e siameng, batho ba ba dipelo tse di siameng ba tla tsaya kgato.—Ditiro 13:48.

Tlhoafalo le bopelokgale jwa ga Petere ka letsatsi la Pentekosete bo farologana thata le nako ya fa a ne a itatola Jesu mo e ka nnang dibeke tse supa pele ga foo. Ka nako eo, Petere o ne a koafaditswe ke go boifa batho. (Mathaio 26:69-75) Mme Jesu o ne a rapelela Petere. (Luke 22:31, 32) Kwantle ga pelaelo, go bonala ga ga Jesu mo go Petere morago ga tsogo ya gagwe go tshwanetse ga bo go ile ga nonotsha moaposetoloi yono. (1 Bakorinthe 15:5) Ka ntlha ya seo, tumelo ya ga Petere ga e a ka ya koafala. Ka nako e khutshwane fela, o ne a rera ka bopelokgale. Ka jalo, ga a ka a rera fela ka Pentekosete mme o ne a dira jalo botshelo jwa gagwe jotlhe.

Go tweng fa le rona re ka dira phoso e e tshwanang le ya ga Petere? A re ikwatlhayeng, re rapelele boitshwarelo, mme re tseye dikgato tsa go bona thuso ya semoya. (Jakobe 5:14-16) He re ka tswelela pele re tlhatswegile pelo gore tirelo ya rona e e boitshepo e amogelwa ke Rrarona yo o pelotlhomogi wa selegodimo e bong Jehofa.—Ekesodo 34:6.