Ke ka Ntlha Yang fa Rotlhe re Tshwanetse go Baka Modimo?

HALELUJA! Lefoko leno le itsiwe ke bontsi jwa batho ba ba tsenang kereke ba Labokeresete. Bangwe ba bone ba le biletsa kwa godimo ka nako ya ditirelo tsa bone tsa Sontaga. Lefa go ntse jalo, ke ba le ba kae ba ba itseng gore tota lefoko leno le kaya eng? Tota e bile, ke lefoko la Sehebera le le kayang “Bakang Ja!” Ke tsela e e itumedisang le e e phepafetseng ya go boka Mmopi, yo leina la gagwe e leng Jehofa.a

Lefoko le le reng “Haleluja” le bonala thata mo Baebeleng. Ka ntlha yang? Ka gonne go na le mabaka a le mantsi a go baka Modimo. Ja (e leng Jehofa) ke Mmopi le Motshegetsi wa lobopo lotlhe. (Pesalema 147:4, 5; 148:3-6) O ne a simolola go dira tikologo e e neng e siametse gore go tshelwe mo go yone mo lefatsheng. (Pesalema 147:8, 9; 148:7-10) Mme o kgatlhegela batho fela thata. Fa re dira thato ya gagwe, o a re segofatsa le go re tshegetsa mo botshelong jono a bo a re neela tsholofelo e e tlhomameng ya botshelo jo bo botoka jo bo tlang. (Pesalema 148:11-14) Ke Ja (Jehofa) yo o neng a tlhotlheletsa gore go kwalwe mafoko ano: “Basiami ba tlaa rua lefatshe, ba tlaa aga mo go lone ka bosakhutleng.”—Pesalema 37:29.

Ka gone, tlhagiso eno e lebisitswe kwa bathong botlhe: “Haleluja!” “Bakang Ja, lona batho!” (Pesalema 104:35; ntlhanyana e e kwa tlase ya NW) Lefa go ntse jalo, ka maswabi, ga se mongwe le mongwe yo o batlang go arabela mo go seo. Gompieno, batho ba a boga. Batho ba le bantsi ba bolawa ke tlala, malwetse, kana go gatelelwa. Batho ba le bantsi ba hutsafetse thata ka ntlha ya go dirisa diokobatsi ka tsela e e sa tshwanelang kana ka ntlha ya bojalwa kana ka ntlha ya diphelelo tsa boitsholo jo bo sa siamang kana botsuolodi. A go na le lebaka la go bo batho bao ba tshwanetse go baka Modimo?

‘Ke Jehofa Fela Yo o Ka Nneelang Tsholofelo’

Ee, le teng. Jehofa o laletsa mongwe le mongwe a sa tlhaole gore a mo itse, a ithute go dira thato ya gagwe, le go itumelela masego a a dirang gore batho ba batle go mmaka. Mme batho ba le bantsi ba arabela mo go seo. Tsaya ka sekai, Adriana kwa Guatemala. Fa Adriana a ne a le dingwaga di le supa, mmaagwe o ne a tlhokafala. Ka bonako fela morago ga moo rraagwe o ne a mo tlogela a le nosi. Fa a ne a na le dingwaga di le lesome, o ne a simolola go bereka gore a itshedise. E re ka mmaagwe Adriana a ne a mmolelela gore a direle Modimo le kereke, o ne a ya kwa ditlhopheng tse di farologaneng tsa Katoliki, mme ka nako ya fa a le dingwaga di le 12, o ne a itlhoboga, mme a inaakanya le digopa tsa mo mebileng. O ne a simolola go goga, go dirisa diokobatsi le go utswa. Ke ka ntlha yang fa mosetsanyana yo o ntseng jalo a batla go baka Modimo?

Mogoloe Adriana o ne a simolola go ithuta Baebele le Basupi ba ga Jehofa, mme Adriana o ne a mo tshega. Morago ga moo mmamogoloabone o ne a tlhokafala. Kwa phitlhong ya ga mmamogoloagwe, Adriana o ne a na le dipotso tse di mo tshwenyang thata. Mmamogoloagwe o ile kae? A o ne a le kwa legodimong? A o ile kwa diheleng tse di tukang molelo? O ne a tlhakane tlhogo tota, mme Adriana o ne a ya kwa kerekeng e e kwa mabitleng go ya go rapela a kopa thuso, a dirisa leina la Modimo Jehofa, fela jaaka mogoloe a ile a mo ruta.

Go ise go ye kae o ne a setse a ithuta Baebele le Basupi ba ga Jehofa e bile a nna gone kwa dipokanong tsa bone tsa Bokeresete. Seno se ne sa mo dira gore a lebe botshelo ka tsela e nngwe e ntšha, mme ka bopelokgale o ne a tlogela go nna ditsala le digopa tsa mo mebileng. Adriana, yo gone jaanong a leng mo dingwageng tsa bo20, o bolela jaana: “Ke go rata Jehofa fela mo go dirileng gore ke tlogele tsela eo e e sa siamang ya botshelo. Ke Jehofa fela ka kutlwelobotlhoko ya gagwe e kgolo yo o ka nneelang tsholofelo ya botshelo jo bo sa khutleng.” Go sa kgathalesege gore Adriana o simolotse botshelo ka tsela e e bokete jang, o na le mabaka a a molemolemo a go baka Modimo.

Go begilwe ka seemo sengwe se se neng se sa solofetse kwa Ukraine. Monna mongwe o dutse mo kgolegelong o letetse go bolawa. A o ikutlwela botlhoko? A o tshwenyegile thata mo maikutlong? Nnyaa, ga a nna jalo. Fa a se na go buisana le Basupi ba ga Jehofa bosheng jaana e bile a se na go bona kitso ya ga Jehofa, o ne a ba kopa gore ba buisane le mmaagwe. Gone jaanong o a ba kwalela ka gonne a utlwile gore ba diragaditse kopo ya gagwe. O bolela jaana: “Ke leboga go bo lo ne lwa etela mmè. E ne e le tsone dikgang tse di monate thata tse ke neng ka di amogela ngogola.”

O kwala jaana fa a bua ka ene le ka ba ba nnang le ene mo seleng: “Jaanong re dumela mo Modimong e bile re leka go dira go dumalana le tumelo ya rona.” O konela lekwalo la gagwe jaana: “Re leboga go bo lo re thusitse go ithuta se lorato e leng sone le go nna le tumelo. Fa nka tshela, le nna ke tla lo thusa. Re leboga Modimo go bo lo le teng le go bo lo thusa ba bangwe gore ba rate Modimo le go mo dumela.” Monna yono o ne a dira boikuelo malebana le katlholo ya gagwe ya loso. Mme lefa a ka bolawa kana a nna dingwaga di le dintsi mo kgolegelong, go phepafetse gore o na le lebaka le le utlwalang la go baka Modimo.

‘Lefa Gone ke le Sefofu, ke Kgona go Bona’

Jaanong akanya ka mosetsana mongwe yo o mo dingwageng tsa bolesome yo o tlhaga yo o nnang sefofu fela ka tshoganetso. Ke seo se neng sa diragalela Gloria, yo o nnang kwa Argentina. Ka tshoganetso fela Gloria o ne a nna sefofu fa a ne a le dingwaga di le 19, mme ga a ise a ko a tlhola a bona gape. Fa a le dingwaga di le 29 o ne a dira bonyatsi le monna mongwe mme go ise go ye kae o ne a ithwala. Jaanong o ne a ikutlwa e kete botshelo jwa gagwe bo ne bo na le bokao. Mme fa a ne a tlhokafalelwa ke ngwana, o ne a simolola go ipotsa dipotso. O ne a ipotsa gore, ‘Ke ka ntlha yang fa se se ntiragalela? Ke eng se ke se dirileng? A tota Modimo o gone?’

Ka nako eno, Basupi ba ga Jehofa ba babedi ba ne ba tla kwa ntlong ya gagwe. O ne a simolola go ithuta Baebele le go itse tsholofetso ya yone ya gore mo lefatsheng le lesha, difofu di tla bona gape. (Isaia 35:5) A bo Gloria a na le tsholofelo e e molemolemo jang ne! O ne a itumetse thata, segolobogolo fa monna wa gagwe a ne a dumela go kwadisa lenyalo la bone kafa molaong. Morago ga moo monna wa gagwe o ne a diragalelwa ke kotsi mme a nna segole, se se neng se nna fela mo setulong sa digole. Gompieno mosadi yono yo o sefofu o tshwanetse go dira ka natla gore ba itshedise. Mo godimo ga moo, o dira ditiro tsotlhe tsa mo gae, mmogo le go tlhokomela monna wa gagwe fela thata. Lefa go ntse jalo Gloria o baka Jehofa! O ithuta Baebele ya Mokwalo wa Difofu a thusiwa ke bakaulengwe le bokgaitsadi ba gagwe ba Bakeresete, e bile o kgothadiwa thata ke dipokano tsa Bokeresete kwa Holong ya Bogosi. O bolela jaana: “Go thata go tlhalosa seno, mme lefa gone ke le sefofu, go ntse jaaka e kete ke kgona go bona.”

Ka dinako tse dingwe batho ba bogisediwa go bo ba baka Modimo. Mosadi mongwe kwa Croatia o ne a itumela fa a ne a ithuta ka ga Modimo, mme monna wa gagwe o ne a ganetsa tumelo ya gagwe e ntšha a bo a mo tlogela, a bo a tsamaya le morwadiabone yo o neng a na le ngwaga o le mongwe fela. Kwa tshimologong o ne a kgobegile marapo tota ka a ne a nna mo mebileng, a tlogetswe ke monna le ba lelapa, a se na legae, a se na tiro, kana tota le gone a se na ngwana. Mme go rata Modimo go ne ga mo tshegetsa, le mororo a ne a sa kopane thata le morwadie go fitlha ngwana a setse a godile. Mosadi yono o ne a bone ‘perela e e tlhwatlhwa kgolo’ mme a sa batle e mo latlhegela. (Mathaio 13:45, 46) O ne a kgona jang go nna a itumetse mo dinakong tseno tsa mathata? O bolela jaana: “Boitumelo ke loungo lwa moya wa Modimo. Le ka tlhagolelwa go sa kgathalesege maemo a a kwa ntle, fela jaaka dimela di ka kgona go gola mo lefelong le le khurumeditsweng go sa kgathalesege gore maemo a bosa a ntse jang kwa ntle ga lone.”

Kwa Finland, Markus wa dingwaga di le thataro o ne a fitlhelwa a na le bolwetse jo bo sa foleng jwa mesifa. Go ise go ye kae o ne a dirisa setulo sa digole. Dingwaga di sekae moragonyana, mmaagwe o ne a mo isa kwa lelokong lengwe la kereke ya Pentekosete le le neng le tumile thata ka gore le fodisa batho ba ba lwalang. Mme o ne a se ka a fola ka tsela ya kgakgamatso. Ka jalo Markus o ne a sa tlhole a kgatlhegela Modimo mme a ithuta dithuto tsa saense le ditiro tse dingwe tsa lefatshe. Mme mo e ka nnang dingwaga tse tlhano tse di fetileng, mosadi mongwe yo o neng a dirisa setulo sa digole yo o neng a tsamaya le lekawana lengwe ba ne ba tsena kwa ntlong e Markus a nnang mo go yone. E ne e le Basupi ba ga Jehofa. Markus jaanong o ne a sa tlhole a dumela mo Modimong, mme o ne a se ka a gana fa ba ne ba re ba tlotla ka bodumedi a bo a re ba tsene.

Moragonyana, banyalani bangwe ba ne ba mo etela, mme go ne ga simololwa thuto ya Baebele. Kgabagare, maatla a boammaaruri jwa Baebele a ne a fetola tsela e Markus a neng a leba dilo ka yone, mme o ne a lemoga gore go sa kgathalesege bogole jwa gagwe, tota o ne a na le mabaka a go baka Modimo. O ne a bolela jaana: “Ke itumetse thata ka gonne ke bone boammaaruri le phuthego e Jehofa a e dirisang. Botshelo jwa me jaanong bo a bonala gore bo ya kae e bile bo na le bokao. Nku e nngwe e e neng e latlhegile e bonwe mme ga e batle go tlogela letsomane la ga Jehofa!”—Bapisa Mathaio 10:6.

A Rotlhe re ‘Bakeng Ja’

Ano ke maitemogelo a sekae mo go a mantsintsi a go ka buiwang ka one go bontsha gore batho gompieno ba na le lebaka le le utlwalang la go baka Modimo, go sa kgathalesege maemo a bone. Moaposetoloi Paulo o ne a tlhalosa seno jaana: “Poifomodimo e molemo ka ga dilo tsotlhe, ka e na le tsholofetso ka ga botshelo jwa gompieno, le ka ga jone jo bo tlaa tlang.” (1 Timotheo 4:8) Fa re dira thato ya Modimo, o tla diragatsa “tsholofetso ka ga botshelo jwa gompieno.” Gone mme, mo tsamaisong eno ya dilo a ka se dire gore bahumanegi ba hume kana ba ba lwalang ba itekanele. Mme o naya batho ba ba mo direlang moya wa gagwe e le gore ba itumele le go kgotsofala go sa kgathalesege maemo a bone a a kwa ntle. Ee, tota le “ka ga botshelo jwa gompieno,” balwetse, ba ba gateletsweng, le bahumanegi ba ka nna le lebaka le le utlwalang la go baka Modimo.

Mme re ka reng ka botshelo “jo bo tlaa tlang”? Ebu, go akanya fela ka jone go tshwanetse ga re dira gore re bake Modimo ka matlhagatlhaga a magolo! Re a itumela fa re akanya ka nako ya fa lehuma le tla bo le seyo; fa “monni wa gona [a se] ketla a re: ‘Ke a bobola’”; le fa Jehofa Modimo a “tlaa phimola dikeledi tsotlhe mo matlhong a bone; [go se] ketla go tlhola go le loso; le gone [go se] ketla go tlhola go le bohutsana, le fa e le selelo, le fa e le botlhoko; dilo tsa pele di fetetse ruri.” (Isaia 33:24; Tshenolo 21:3, 4; Pesalema 72:16) O leba jang ditsholofetso tseno tse di tswang kwa Modimong?

Lekawana lengwe kwa El Salvador le ne la amogela pampitshana ya Baebele e e neng e tlhalosa dingwe tsa dilo tseno. O ne a raya Mosupi yo o neng a mo e neela a re, “Mma, se se bolelwang ke pampitshana eno go thata go se dumela.” Batho ba le bantsi ba arabela ka tsela eo. Lefa go ntse jalo, tseno ke ditsholofetso tsa Ene yo o bopileng lobopo, yo o neng a dira gore go nne le medikologo ya lefatshe la rona ka tsela ya tlholego, e bile e le yo o thusang bahumanegi le balwetse gore ba itumele. Re ka dumela se a se bolelang. Lekawana le le umakilweng fa godimo le ne la ithuta Baebele le Basupi ba ga Jehofa mme a fitlhela seno se le boammaaruri. Fa o ise o simolole go ithuta, re go kgothaletsa go dira se se tshwanang. Ka gone he, e kete o ka nna teng fa tsamaiso eno ya gompieno ya dilo e setse e fetile, le fa popo yotlhe e goeletsa mmogo jaana: “Haleluja!” “Bakang Ja, lona batho!”—Pesalema 112:1; 135:1, bapisa NW.

[Ntlha e e kwa tlase]

[Setshwantsho mo go tsebe 5]

E kete o ka nna teng fa popo yotlhe e goeletsa mmogo jaana: “Haleluja!”