Lebaka La go Bo Dikgakgamatso ka Botsone Fela di sa Age Tumelo

GO DUMELA ke go bona. Ke kafa batho ba le bantsi ba ikutlwang ka teng. Bangwe ba re ba ne ba tla dumela mo Modimong fa a ne a ka itshenola ka tsela nngwe ya kgakgamatso. Gongwe go ntse jalo, mme a tumelo e e ntseng jalo e dira gore motho a nne le tumelo ya mmatota?

Akanya ka Baiseraele e bong Kora, Dathane le Abirame. Baebele e bontsha gore ba ne ba bona dikgakgamatso tseno tse di boitshegang tse di tswang kwa Modimong ka matlho: dipetso tse di lesome tse di neng tsa wela Egepeto, go kgabaganya Lewatle le Lehibidu ga setšhaba sa Iseraele, le go fedisiwa ga Faro wa Egepeto le masole a gagwe. (Ekesodo 7:19–11:10; 12:29-32; Pesalema 136:15) Kora, Dathane le Abirame gape ba ne ba utlwa Jehofa a bua a le kwa legodimong kwa Thabeng ya Sinai. (Duteronome 4:11, 12) Lefa go ntse jalo, nakonyana fela morago ga dikgakgamatso tseno di diragetse, banna ba bararo bano ba ne ba tlhotlheletsa botsuolodi kgatlhanong le Jehofa le batlhanka ba gagwe ba ba tlhomilweng.—Dipalo 16:1-35; Pesalema 106:16-18.

Mo e ka nnang dingwaga tse 40 moragonyana, moporofeti mongwe yo o bidiwang Balaame le ene o ne a bona kgakgamatso. Tota le go tsereganya ga moengele ga go a ka ga mo thibela go ema le baba ba Modimo, Bamoabe. Go sa kgathalesege kgakgamatso eo, Baalame o ne a tswelela pele a nna kgatlhanong le Jehofa Modimo le batho ba Gagwe. (Dipalo 22:1-35; 2 Petere 2:15, 16) Lefa go ntse jalo, go tlhoka tumelo ga ga Balaame ga se sepe fa go bapisiwa le ga ga Jutase Isekariote. Le mororo e ne e le tsala e e atamalaneng thata le Jesu e bile a ile a bona ka matlho dikgakgamatso tse dintsi tse di sa tlwaelegang, Jutase o ne a oka Keresete ka dipapetlana di le masome a mararo tsa selefera.—Mathaio 26:14-16, 47-50; 27:3-5.

Baeteledipele ba bodumedi ba Bajuta le bone ba ne ba itse ka dikgakgamatso tse dintsi tsa ga Jesu. Fa a sena go tsosa Lasaro, ba bile ba dumela jaana: “Monna yo o dira ditshupo di le dintsi.” A mme go bona ga bone fa Lasaro a tshela jaanong go ne ga kokobatsa dipelo tsa bone mme ga dira gore ba nne le tumelo? Nnyaa, le e seng. Go na le moo, ba ne ba loga maano a go bolaya Jesu mmogo le Lasaro!—Johane 11:47-53; 12:10.

Tota le fa Modimo a ne a tsaya kgato ka boene go ne ga se ka ga dira gore banna ba ba bosula bano ba nne le tumelo. Mo lekgetlhong lengwe fa Jesu a ne a le mo mabaleng a tempele, o ne a rapelela kwa godimo jaana: “Rara, galaletsa leina la gago.” Jehofa o ne a araba jaana ka lentswe le le tswang kwa legodimong: “Ke le galaleditse, mme ke tlaa ba ke le galaletsa gape.” Lefa go ntse jalo, tiragalo eno ya kgakgamatso ga ya ka ya dira gore go nne le tumelo mo dipelong tsa ba ba neng ba le gone. Baebele e bolela jaana: “Le fa a ne a dirile ditshupo tse dintsi tse fa pele ga bone, ga ba a ka ba dumela mo go ene.”—Johane 12:28-30, 37; bapisa Baefeso 3:17.

Lebaka La go Bo Dikgakgamatso di sa Dira Gore ba Nne le Tumelo

Ke jang batho ba ka tlhokang tumelo go le kana kana le mororo go na le dikgakgamatso? Go bonala fa go gana Jesu ga baeteledipele ba bodumedi ba Bajuta e le selo se se akabatsang le go feta ka gore fa o akanya gore ka yone nako eo fa a ne a simolola bodiredi jwa gagwe, Bajuta botlhe ba ne ba le “mo tebelelong” ya ga “Keresete,” kana Mesia. (Luke 3:15) Lefa go ntse jalo, bothata e ne e le gore ditebelelo tseo e ne e le eng. Mokwadi wa dikishinare W. E. Vine o nopola mokanoki mongwe yo o itsegeng thata wa Baebele a bolela gore Bajuta ba ne ba gagamaletse mogopolo wa go bona Mesia yo o neng a tla ba naya “phenyo ya nakwana” le “khumo.” Ke gone ka moo ba neng ba sa kgone go amogela Jesu wa Nasarethe yo o ikokobeditseng, yo o se nang seabe mo dipolotiking, yo o neng a tlhagelela fa gare ga bone e le Mesia wa boammaaruri ka 29 C.E. Baeteledipele ba bodumedi gape ba ne ba tshaba gore dithuto tsa ga Jesu di ne di tla tlhakatlhakanya seemo se se neng se rena koo go tsenya boemo jwa bone jo bo kwa godimo mo kotsing. (Johane 11:48) Dikgopolo tse ba neng ba na le tsone le bopelotshetlha jwa bone di ne tsa ba foufatsa gore ba se ka ba tlhaloganya bokao jwa dikgakgamatso tsa ga Jesu.

Baeteledipele ba bodumedi ba Bajuta le ba bangwe moragonyana ba ne ba gana bosupi jo bo gakgamatsang jwa gore balatedi ba ga Jesu ba ne ba amogelwa ke Modimo. Ka sekai, fa baaposetoloi ba gagwe ba ne ba fodisa monna mongwe yo e neng e le segole fa e sa le a tsholwa, maloko a a galefileng a kgotlatshekelokgolo ya Sejuta ba ne ba botsa jaana: “Banna ba, re tlaa ba dirang? Gonne le gale go a bonala mo bathong botlhe ba ba agileng mo Jerusalema, fa tiro e e gakgamatsang e e tumo kgolo e dirilwe ke bone; ga re ka ke ra go latola. A re ba kgalemeleng gore ba se tlhole ba bua le motho ope mo ineng le, gore selo se, se se anamele mo bathong.” (Ditiro 3:1-8; 4:13-17) Ka mo go phepafetseng, kgakgamatso e ntle eno ga ya ka ya aga kana ya dira gore banna bao ba nne le tumelo mo dipelong tsa bone.

Boikgodiso, mabela le bopelotshetlha ke dilo tse di tlhotlheletsang batho ba le bantsi go thatafatsa dipelo tsa bone. Go bonala go ne go ntse jalo ka Kora, Dathane le Abirame, ba ba umakilweng kwa tshimologong. Lefufa, poifo le mekgwa e mengwe e mentsi e e utlwisang botlhoko e ile ya kgoreletsa ba bangwe. Le rona re gakololwa ka baengele ba ba neng ba se kutlo, badimona, ba ba neng ba na le tshiamelo ya go bona sefatlhego sa Modimo. (Mathaio 18:10) Ba ne ba sa belaele gore Modimo o teng. Totatota, “mewa e e maswe le yone e a dumela, mme e tsitsibane fela e rorome.” (Jakobe 2:19) Lefa go ntse jalo, ga ba na tumelo mo Modimong.

Bokao Jwa Tumelo ya Boammaaruri

Go nna le tumelo go feta go dumela fela. Gape ke selo se se fetang boikutlo bongwe jwa nakwana jo motho a nnang le jone ka ntlha ya kgakgamatso nngwe. Bahebere 11:1 e bolela jaana: “Jaana tumelo ke go ikanya ka ga dilo tse di solofelwang, ke tlhomamiso ka ga dilo tse di sa bonweng.” Motho yo o nang le tumelo o tlhatswegile pelo tota gore sengwe le sengwe se Jehofa Modimo a se solofetsang se tshwana fela le gore se setse se diragetse. Mo godimo ga moo, bosupi jo bo sa kakeng jwa ganediwa jwa dilo tse di sa bonaleng bo maatla jaana mo e leng gore go twe tumelo e tshwana le jone. Ee, tumelo e theilwe mo bosuping. Mme mo nakong e e fetileng, dikgakgamatso di ne di le botlhokwa thata go tlhagolela tumelo kana go e aga. Ditshupo tse Jesu a neng a di dira di ile tsa tlhatswa ba bangwe pelo gore e ne e le Mesia yo o solofeditsweng. (Mathaio 8:16, 17; Bahebere 2:2-4) Ka mo go tshwanang, dineo tse di ntseng jalo tsa moya o o boitshepo wa Modimo, kana maatla a a dirang, tse di ntseng jaaka go fodisa ka tsela ya kgakgamatso le go bua ka diteme di ne di supa gore Jehofa o ne a sa tlhole a amogela Bajuta mme o ne a amogela phuthego ya Bokeresete, e e tlhomilweng ke Morwawe e bong Jesu Keresete.—1 Bakorinthe 12:7-11.

Gareng ga dineo tsa moya e ne e le bokgoni jwa go porofeta. Fa batho bangwe ba ba sa dumeleng ba bona kgakgamatso eno, bangwe ba ne ba tlhotlheletsega go obamela Jehofa, ba bolela jaana: “Modimo o . . . mo go lona ruri.” (1 Bakorinthe 14:22-25) Lefa go ntse jalo, e ne e se boikaelelo jwa ga Jehofa Modimo gore dikgakgamatso e nne selo sa botlhokwa mo kobamelong ya Bokeresete. Ka ntlha ya seo, moaposetoloi Paulo o ne a kwala jaana: “Le fa go na le diperofeso, di tlaa khutlisiwa; le fa go le dipuo, di tlaa fela.” (1 Bakorinthe 13:8) Ka mo go bonalang dineo tseno di ile tsa fela fa baaposetoloi ba swa mmogo le bao ba di boneng ka bone.

Jalo he, a batho ba tla tlogelwa ba se na se se ka ba thusang go nna le tumelo? Nnyaa, ka gonne Paulo o ne a bolela jaana: “[Modimo] wa se ka wa nna fela o se na sesupo, ka o ne o ntse o dira molemo, wa lo nesetsa dipula tse di tswang mo legodimong, wa lo naya metlha ya maungo, wa tlatsa pelo tsa lona ka dijo le boitumelo.” (Ditiro 14:17) Eleruri, mo bathong ba ba dipelo tse di ikanyegang le ba ba iketleeditseng go bula megopolo le dipelo tsa bone go amogela bosupi jo re bo bonang, “dilo tse di sa bonaleng tsa one [Jehofa Modimo], e bong nonofo ya one e e sa khutleng, le bomodimo jwa one, di sa le di bonala sentle gale mo tlholegong ya lefatshe, ka di lemogwa ka dilo tse di dirilweng; jalo batho bao [ba ba ganang Modimo] ba bo ba se na seipato.”—Baroma 1:20.

Go tlhokega se se fetang go dumela fela gore Modimo o teng. Paulo o ne a kgothatsa jaana: “Lo se ka lwa bopega jaaka lefatshe leno; mme lo fetolwe ke bošafatso jwa pelo tsa lona, gore lo lemoge mo e leng go rata ga Modimo, mo go molemo, le mo go lebosegang, le mo go itekanetseng.” (Baroma 12:2) Seno se ka dirwa ka go ithuta Dikwalo ka tlhoafalo o thusiwa ke dikgatiso tsa Bokeresete, tse di ntseng jaaka makasine ono. Tumelo e e theilweng mo kitsong e e tlhomameng ya Lefoko la Modimo Baebele, ga e bokoa kana go reketla. Batho ba ba lemogileng gore thato ya Modimo ke eng mme ba e dira ka tumelo ba direla Modimo tirelo e e boitshepo.—Baroma 12:1.

Go Dumela Lefa o sa Bone

Moaposetoloi Thomase o ne a na le bothata jwa go dumela gore Jesu o tsositswe mo baswing. Thomase o ne a bolela jaana: “Fa ke sa bone dintho tsa dimapo mo diatleng tsa gagwe, ka tsenya monwana wa me mo dinthong tsa dimapo, ka ba ka tsenya seatla sa me mo lotlhakoreng lwa gagwe, ga nketla ke dumela.” Moragonyana fa Jesu a fetola mmele wa gagwe gore e nne o o supang dintho tsa papolo ya gagwe, Thomase o ne a arabela sentle mo kgakgamatsong eno. Lefa go ntse jalo, Jesu o ne a bolela jaana: “Go sego ba ba sa bonang, le fa go ntse jalo ba dumetse.”—Johane 20:25-29.

Gompieno, dimilione tsa Basupi ba ga Jehofa di “sepela ka tumelo, e seng ka pono.” (2 Bakorinthe 5:7) Le mororo ba ile ba se ka ba bona dikgakgamatso tse di kwadilweng mo Baebeleng, ba dumela ka botlalo gore di diragetse. Basupi ba na le tumelo mo Modimong le mo Lefokong la gagwe. Ka thuso ya moya wa gagwe, ba kgona go tlhaloganya dithuto tsa Baebele le setlhogo sa yone se segolo—go tlotlomadiwa ga bolaodi jwa ga Jehofa Modimo ka Bogosi jwa gagwe jwa selegodimo. (Mathaio 6:9, 10; 2 Timotheo 3:16, 17) Bakeresete bano ba mmatota ba solegelwa molemo thata ke go dirisa kgakololo e e botlhale ya Baebele mo botshelong. (Pesalema 119:105; Isaia 48:17, 18) Ba amogela bosupi jo bo ka se kang jwa ganediwa jwa gore boporofeti jwa Baebele bo supa gore re tshela mo “metlheng ya bofelo,” mme ba na le tumelo ya gore lefatshe le lesha le le solofeditsweng la Modimo le gaufi. (2 Timotheo 3:1-5; Mathaio 24:3-14; 2 Petere 3:13) Mo go bone ke boitumelo gore ba bolelele ba bangwe ka kitso ya Modimo. (Diane 2:1-5) Ba itse gore ke fela ka go ithuta Dikwalo batho ba ba batlang Modimo ba ka mmonang ka boammaaruri.—Ditiro 17:26, 27.

A o gakologelwa Albert, yo o neng a umakiwa mo setlhogong se se fetileng? Fa malatsi a le mmalwa a sena go feta thapelo ya gagwe ya go bona kgakgamatso e ise e arabiwe, o ne a etelwa ke mongwe wa Basupi ba ga Jehofa, yo e neng e le mosadi mongwe yo o setseng a tsofetse yo o neng a mo tlogelela dikgatiso tse di theilweng mo Baebeleng. Morago ga moo, Albert o ne a amogela thuto ya legae ya Baebele ya mahala. Fa a ntse a tlwaelana le molaetsa wa Baebele, go kgobega marapo ga gagwe go ne ga fetoga go nna boitumelo. O ne a simolola go lemoga gore kgabagare o bone Modimo.

Dikwalo di kgothatsa jaana: “Batlang Jehofa a sa ntse a ka bonwa; mmitseng a sa ntse a le gaufi.” (Isaia 55:6) O ka dira seno, e seng ka go leta kgakgamatso nngwe ya motlha wa segompieno go tswa kwa Modimong, mme ka go nna le kitso e e tlhomameng ya Lefoko la gagwe. Seno se botlhokwa, ka gonne dikgakgamatso ka botsone fela ga di age tumelo.

[Setshwantsho mo go tsebe 5]

Tota le go tsosiwa ga ga Lasaro ka tsela e e gakgamatsang ga go a ka ga tlhotlheletsa baba ba ga Jesu gore ba nne le tumelo

[Ditshwantsho mo go tsebe 7]

Tumelo e theilwe mo kitsong e e tlhomameng ya Baebele