Tsela ya go Bona Tsholofelo mo Nakong ya Boitlhobogo
AO KO o akanye fela o diragalelwa ke dilo tse di latelang: Dithoto tsotlhe tsa gago di sentswe, o setse o le mohumanegi. Bana ba gago—boipelo jwa botshelo jwa gago—ba tlhokafetse. Molekane wa gago wa lenyalo le ene ga a go kgothatse. Botsogo jwa gago bo koafetse tota. Letsatsi lengwe le lengwe ke teko e e botlhoko thata mo go wena.
Fa o ne o ka nna le boemo jo bo ntseng jalo mo botshelong, a o ne o tla nna le lebaka la go tswelela o ntse o tshela? Kana a o ne o tla itlhoboga?
Matlhotlhapelo ano a a utlwisang botlhoko a a ntseng a tlhalosiwa ke dilo tsa mmatota tse di diragaletseng Jobe mo botshelong jwa gagwe, monna yo o neng a tshela mo metlheng ya Baebele. (Jobe, dikgaolo 1, 2) Jobe o ne a lela jaana, a tshwenyegile thata mo maikutlong: “Mowa wa me o tennwe ke botshelo jwa me.” O tshwanetse a bo a ne a batla go swa gore a kgone go ikhutsa. (Jobe 10:1; 14:13) Le fa go ntse jalo, go sa kgathalesege gore o ne a boga jalo, Jobe o ne a boloka bothokgami jwa gagwe mo Modimong. Ka jalo Jehofa “a segofatsa Jobe go ya kwa bokhutlong jwa gagwe bogolo go tshimologo ya gagwe.” Ka jalo, o ne a swa ka kagiso, “a tsofetse a le malatsi a a tletseng.”—Jobe 42:12, 17.
Jobe o ne a tlhoma sekao sa boitshoko seo go sa ntseng go buiwa ka sone le gompieno. Diteko tsa gagwe di ne tsa tokafatsa botho jwa gagwe mme tsa tlhotlheletsa ba bangwe go dira ditiro tse di molemo. (Jakobe 5:10, 11) Se se botlhokwa go feta tsotlhe, bothokgami jwa ga Jobe jo bo senang molato bo ne jwa ipedisa pelo ya ga Jehofa. (Diane 27:11) Ka gone, boemo jono jo bo utlwisang botlhoko kgabagare bo ne jwa fetoga go nna phenyo e e boitshegang ya bomodimo, ya tumelo, le ya bothokgami jo bo neng jwa tlisetsa Jobe masego mmogo le botlhe ba ba neng ba tlhotlhelediwa ke sekao sa gagwe.
Go Nna le Tsholofelo go sa Kgathalesege Diteko Tse di Farologaneng
O ka nna wa tlelwa ke diteko tse di tshwanang le tse di neng tsa tlela Jobe. Go latlhegelwa ke motho yo o mo ratang ka loso go ka tswa go dirile gore o sale o utlwile botlhoko thata mo maikutlong. Bolwetse jo bo botlhoko bo ka tswa bo dirile gore go tshela e nne teko e e botlhoko thata mo go wena. Tsela ya gago yotlhe ya botshelo e ka lebega e sentswe ke tlhalo e e utlwisang botlhoko. Go tlhoka madi go ka tswa go go tlogetse o le mohumanegi. O ka nna wa bo o bogisiwa botlhoko ke baganetsi ba kobamelo ya boammaaruri ba ba letlhoo. Go kgaratlha gore o itshokele diteko tsa gago go ka tswa go dirile gore o ikutlwe o se na tsholofelo epe ka isagwe.—1 Petere 1:6.
Go na le gore o itlhoboge, ipotse jaana, ‘Ke ka ntlha yang fa ke boga?’ O boga jaana gonne o tshela mo lefatsheng le le ‘namaletseng mo maatleng a yo o boikepo,’ Satane Diabolo. (1 Johane 5:19) Ka ntlha ya seno, mongwe le mongwe o a boga. Ka tsela nngwe rotlhe re amiwa ke letlhoo le le tlhotlhelediwang ke Diabolo malebana le molaetsa wa Bogosi, mafoko a ba bangwe a go tlhoka lorato, kana ditiro tse di tshosang tsa boitsholo jo e seng jwa bomodimo tse di dirwang gongwe le gongwe mo ‘dinakong tseno tsa mathata.’—2 Timotheo 3:1-5.
Fa o diragaletswe ke sengwe se se botlhoko mo botshelong jwa gago, o ka tswa o ne o le motswasetlhabelo wa “motlha le ditiragalo tse di sa lebelelwang.” (Moreri 9:11, NW) Kafa letlhakoreng le lengwe, ka dinako tse dingwe dilo ga di re tsamaele sentle mo botshelong ka ntlha ya boleo jo re bo ruileng. (Baroma 5:12) Le fa o ka tswa o dirile phoso e e masisi mme o ikwatlhaile le go batla thuso ya semoya, o se ka wa akanya gore Modimo o go latlhile. (Pesalema 103:10-14; Jakobe 5:13-15) O amega ka rona go feta le fa e le mang fela. (1 Petere 5:6, 7) O ka nna le tshepo ya gore “Jehofa o gaufi le ba ba pelo e phatlogileng, o boloka ba ba mowa o o ngomogileng.” (Pesalema 34:18) Go sa kgathalesege gore teko ya gago e hutsafatsa go le kana kang kgotsa e botlhoko go le kana kang, Jehofa a ka go naya botlhale jwa go lebana le yone. (Jakobe 1:5-8) Ka metlha gakologelwa gore Jehofa a ka kgona go fodisa dintho tsotlhe. Fa o amogelwa ke ene, ga go na sepe se se ka go thibelang go bona tuelo ya botshelo.—Baroma 8:38, 39.
A Diteko Di ka Re Naya Sengwe se se Molemo?
Go na le seane sa bogologolo se se reng, “Fa metsi a kgoberega, a a bo a kgoberegela gore kwa morago a itsheke.” Seno se raya fela gore go sa kgathalesege gore dilo di nna maswe go le kana kang o ka kgona go bona lebaka la go nna le tsholofelo. Boikaelelo jwa sengwe le sengwe se se kwadilweng mo Lefokong la Modimo ke gore “re nne le tsholofelo.” (Baroma 15:4) Go sa kgathalesege gore maemo a gago a botlhoko go le kae, ditsholofetso le melaometheo e e mo Baebeleng di ka tsosolosa boipelo le tsholofelo ya gago.
Dikwalo di bontsha gore ‘pitlagano ke ya nakwana e bile e motlhofo’ fa e bapisiwa le masego a a sa khutleng a a beetsweng bao ba ratang Modimo. (2 Bakorintha 4:16-18) Baebele gape e bontsha gore dinonofo tsa bomodimo tse re di tlhagolelang fa re le mo ditekong di botlhokwa thata go feta go tuma kana go nna le dikhumo. (1 Johane 2:15-17) Ka gone, go boga le gone go ka nna le matswela a a molemo. (Bahebera 5:8) Tota, go dirisa se o se ithutileng ka nako ya diteko go ka go tlisetsa masego a o sa a lebelelang.
Teko e e bokete e ka go dira gore o nne bonolo thata. O ka dumalana gore mo nakong e e fetileng, o ne o na le botho jo bo neng bo sera ba bangwe e bile bo kgoreletsa go gatela pele ga gago mo semoyeng. Gongwe e ne e le go itshepa mo go feteletseng. Morago ga go tlhokofadiwa ke masetlapelo mangwe, o ka lemoga ka bonako fela kafa o leng bokoa ka gone le kafa o tlhokang ba bangwe thata ka gone. Fa e le gore teko ya gago e go rutile thuto eo e bile o dirile diphetogo tse di tlhokegang, e go tswetse mosola.
Go tweng fa e le gore mo nakong e e fetileng bangwe ba ne ba go fitlhela go le thata go dirisana le wena ka gonne o ne o sa kgone go laola maikutlo a gago? Seno se ka tswa se go baketse mathata a botsogo. (Diane 14:29, 30) Le fa go ntse jalo, gone jaanong, boemo bo ka tswa bo le botoka thata ka gonne o ikaegile ka moya wa Modimo gore o go thuse go bontsha boikgapo.—Bagalatia 5:22, 23.
Jaaka ba bangwe, gongwe nako nngwe o ne o se na kutlwelobotlhoko ya go tlhomogela ba ba dirang phoso pelo. Mme fa wena ka bowena o nna mo boemong jo mo go jone o batlang thata go utlwelwa botlhoko, ga go na pelaelo epe gore o simolola jaanong o batla go utlwela ba bangwe botlhoko fela thata. Maikutlo a go utlwelwa botlhoko, kamego, le bopelotlhomogi tse o neng wa di bontshiwa di go dirile gore o lemoge gore o tshwanetse go bontsha badiraphoso ba ba ikwatlhaileng dinonofo tse di tshwanang. Fa botlhoko jo o bo utlwileng bo go tlhotlheleditse gore o baakanye makoa ano mo bothong jwa gago, he seno ke molemo o o o boneng go tswa mo dilong tse di go diragaletseng. O ithutile gore “kutlwelobotlhoko e kgana ka phenyo e kganela katlholo.”—Jakobe 2:13; Mathaio 5:7.
Go tweng fa e le gore go otlhaiwa ke phuthego ya Bokeresete go dirile gore o latlhegelwe ke ditshiamelo tse di rategang le ke go tlotlwa ke ba bangwe? O se ka wa itlhoboga. Kotlhao e thusa gore phuthego e nne e le phepa, mme maikaelelo a yone a akaretsa go tsosa modiraphoso semoyeng. Boammaaruri ke gore “ga go [kotlhao] epe e mo nakong eno e bonalang e ipedisa, mme e a hutsafatsa; lefa go ntse jalo morago ga moo ba ba thapisitsweng ka yone e ba ungwele leungo la kagiso, e leng, tshiamo.” (Bahebera 12:11) Le fa go otlhaiwa go ka tswa go utlwisa botlhoko thata, ga go dire gore motho yo ka boikokobetso a ikwatlhaileng a sale a se na tsholofelo. Kgosi ya bogologolo ya Iseraele e bong Dafite o ne a otlhaiwa botlhoko tota ka ntlha ya go dira phoso, mme o ne a ikwatlhaya a bo kgabagare a akgolwa ka mo go kgethegileng jaaka monna wa tumelo e e tlhomologileng.—2 Samuele 12:7-12; Pesalema 32:5; Bahebera 11:32-34.
Teko e ka ama fela thata tsela e o lebang dilo ka yone. Mo nakong e e fetileng, o ka tswa o ne o tlhomile mogopolo wa gago thata mo mekgeleng ya go bona dikhumo le mo go fitlheleleng dilo tse di neng di dira gore o tseelwe kwa godimo o bo o nne le maemo a a kwa godimo mo setšhabeng mo lefatsheng leno. Gongwe teko ya go tlhoka madi kana ya go latlhegelwa ke dithoto e dirile gore o tlhome mogopolo wa gago mo dilong tse di botlhokwa segolo. (Bapisa Bafilipi 1:10.) Jaanong o a lemoga gore dilo tse di botlhokwa tsa semoya le go nna le mekgele mo tirelong e e boitshepo ke tsone fela dilo tse di ka go tlisetsang boipelo jwa mmatota le kgotsofalo e e nnelang ruri.
Ikanye Jehofa
Go direla Jehofa tirelo e e boitshepo go ka felela ka gore o bogisiwe ke ba ba ganetsang tumelo ya gago ya Bokeresete. O ka ikutlwa o gateletswe thata ka ntlha ya teko eno, mme e ka go solegela molemo. Teko eno e ka nonotsha tumelo ya gago. Mo godimo ga moo, ba bangwe ba ba bogisiwang ba ka kgothadiwa le go nonotshiwa ke go bona boitshoko jwa gago. Basupi ba ba iponelang boitsholo jwa gago jo bo molemo ka matlho ba ka nna ba tlhotlheletsega go galaletsa Modimo. Le e leng ba ba go ganetsang ba ka nna ba tlhabiwa ke ditlhong mme ba lemoga ditiro tsa gago tse di molemo!—1 Petere 2:12; 3:16.
Go tila go itlhoboga fa o bogisiwa, o tlhoka go ikanya Jehofa. Lefoko la gagwe le bontsha gore go gololwa mo tekong ruri go tla tla, mme go ka nna ga se tle ka bonako jaaka o ne o lebeletse. Fa o sa ntse o go letile, ‘o se ka wa lesa go dira se se siameng.’ (2 Bathesalonika 3:13) Nna o ntse o batla ditsela tsa go emelana le diteko le go di itshokela. Le e leng fa go lebega go se na tsholofelo, “latlhela morwalo wa gago mo go Jehofa, mme o tlaa go kokotletsa; ga a ketla a leseletsa mosiami gope go tshikinngwa.” (Pesalema 55:22) Go na le go nnela go ikutlwela botlhoko, akanya kafa o leng lesego ka gone go bo o itse Jehofa, go nna fa gare ga batho ba gagwe, le go nna le tsholofelo ya botshelo jo bo sa khutleng.—Johane 3:16, 36.
Boloka mogopolo wa gago o tsepamisitswe mo dilong tsa botlhokwa. Letsatsi le letsatsi atamela Jehofa ka thapelo, o mo kope nonofo ya gore o kgone go itshoka. (Bafilipi 4:6, 7, 13) O se ka wa akanya ka go ipusolosetsa mo go ba ba dirang gore o boge. Tlogelela dilo mo diatleng tsa ga Jehofa. (Baroma 12:19) Nna o ntse o batla ditsela tse o ka tokafatsang botho jwa gago ka tsone, o tlhagolela dinonofo tsa Bokeresete. (2 Petere 1:5-8) Anaanela sengwe le sengwe se ba bangwe ba se go direlang, go akaretsa le bagolwane bao ka lorato ba tlhokomelang dilo tse o di tlhokang mo semoyeng. (Bahebera 13:7, 17) Ikanyege mo Modimong, mme o nne o lebile kwa mokgeleng wa botshelo, o na le tsholofelo ya gore le e leng loso ga lo kitla lo go o amoga.—Johane 5:28, 29; 17:3.
Fa e le gore gone jaanong o utlwile botlhoko thata kana o mo ditekong tse di botlhoko thata, “ikanye Jehofa ka pelo yotlhe ya gago,” mme khutsafalo le mathata a gago di tla tseelwa sebaka ke boipelo jo bogolo. (Diane 3:5, 6; Johane 16:20) Go boga ga gago go tla tseelwa sebaka ke boitumelo fa Modimo a go segofatsa jaaka fa a dirile ka Jobe. Dipogo tsa gompieno jaana ga se sepe fa di bapisiwa le tuelo e o tla nnang nayo. (Bapisa Baroma 8:18.) Go itshoka ga gago ka boikanyego go ka kgothatsa ba bangwe e bile go ka go thusa go tlhagolela dinonofo tse dintle tsa Bokeresete tse di dirwang ke “botho jo bosha.” (Baefeso 4:23, 24; Bakolosa 3:10, 12-14) Ka jalo, he, kgothadiwa ke kgakololo e e botlhale ya ga moaposetoloi Petere e e reng: “Le ba ba bogang tumalanong le thato ya Modimo a ba nne ba neele Motlhodi yo o boikanngo meya ya bone fa ba ntse ba dira molemo.”—1 Petere 4:19.
[Setshwantsho mo go tsebe 23]
Tshwana le Jobe. Le ka motlha se latlhegelwe ke tsholofelo
[Setshwantsho mo go tsebe 24]
Ikanye Jehofa ka pelo yotlhe ya gago