Go Direla ka Boikanyegi mo Phuthegong ya ga Jehofa

“Mo go yo o ikanyegang o tla itshupa a le boikanyego.”—2 SAMUELE 22:26, NW.

1, 2. Ke dikai dingwe dife tsa boikanyegi tse rotlhe re ka di bonang mo phuthegong?

MAITSEBOA mangwe go setse go le bosigo thata mogolwane mongwe o baakanyetsa puo e a yang go e neela kwa pokanong ya Bokeresete. A ka rata go emisa mme a ikhutse; go na le gore a dire jalo, o tswelela pele go bereka, a batla dikai tsa Dikwalo le ditshwantsho tse di tla fitlhelelang dipelo le go kgothatsa letsomane. Mo go jone bosigo joo jwa dipokano, batsadi bangwe ba ba lapileng mo go yone phuthego eo ba ka rata go itumelela maitseboa kwa gae; go na le moo, ka bopelotelele ba baakanya bana ba bone gore ba ye dipokanong. Morago ga pokano, setlhopha sa Bakeresete se tlotla ka puo ya mogolwane yono. Kgaitsadi mongwe o raelesega go umaka gore ene mokaulengwe yono o kile a mo utlwisa botlhoko; go na le go dira jalo, o bua ka matlhagatlhaga ka dingwe tsa dintlha tse a di umakileng. A o bona selo se le sengwe se se golaganyang ditiragalo tseno?

² Selo se se di golaganyang ke boikanyegi. Mogolwane o dira ka boikanyegi go direla letsomane la Modimo; batsadi ba ya dipokanong tsa phuthego ka boikanyegi; kgaitsadi yoo o tshegetsa bagolwane ka boikanyegi. (Bahebera 10:24, 25; 13:17; 1 Petere 5:2) Ee, mo dikarolong tsotlhe tsa botshelo, re bona batho ba Modimo ba ititeile sehuba go direla ka boikanyegi mo phuthegong ya ga Jehofa.

3. Ke ka ntlha yang fa go le botlhokwa jaana gore re nne re ikanyega mo phuthegong ya ga Jehofa ya mo lefatsheng?

³ Fa Jehofa a leba mo lefatsheng leno le le bosula, o bona batho ba le mmalwa fela ba ba ikanyegang. (Mika 7:2) A bo pelo ya gagwe e tshwanetse ya bo e itumela jang ne fa a bona boikanyegi jwa batho ba gagwe! Ee, boikanyegi jwa gago bo a mo itumedisa. Le fa go ntse jalo, go galefisa Satane, motsuolodi wa ntlha, mme go mo supa e le moaki. (Diane 27:11; Johane 8:44) O lebelele gore Satane o tla leka go senya boikanyegi jwa gago mo go Jehofa le mo phuthegong ya Gagwe ya mo lefatsheng. Mma re sekaseke ditsela dingwe tse Satane a dirang seno ka tsone. Ka go dira jalo re ka kgona go bona botoka ka fa re ka nnang re ikanyega ka teng go fitlha kwa bokhutlong.—2 Bakorintha 2:11.

Go Tlhoma Mogopolo mo Bosaitekanelang go ka Senya Boikanyegi

4. (a) Ke ka ntlha yang fa go le motlhofo go tshwaya ba ba nang le maemo a taolo phoso? (b) Kora o ile a itshupa jang gore ga a ikanyege mo phuthegong ya ga Jehofa?

⁴ Fa mokaulengwe a na le boemo jwa boikarabelo, diphoso tsa gagwe di ka bonala thata. A bo go le motlhofo jang ne go bona ‘lotlhaka lo lo mo leitlhong la mokaulengwe wa rona re itlhokomolosa tlhomeso e e mo matlhong a rona’! (Mathaio 7:1-5) Le fa go ntse jalo, go akanya thata ka diphoso, go ka dira gore go nne le go sa ikanyege. Go tshwantsha, akanya ka pharologano e e leng fa gare ga Kora le Dafite. Kora o ne a na le maikarabelo a mantsi, mme gongwe o ne a ikanyega ka dingwaga di le dintsi, mme le fa go ntse jalo, o ne a simolola go ikgodisa. O ne a simolola go tenegela bolaodi jwa ga Moshe le Arone, ba e neng e le bontsalagwe. Le fa Moshe e ne e le monna yo o boikokobetso thata go gaisa banna botlhe, go bonala fa Kora a ile a simolola go mo tshwaya diphoso. O tshwanetse a bo a ile a bona diphoso mo go Moshe. Le fa go ntse jalo, diphoso tseo, di ne di sa neye Kora tshwanelo ya go se ikanyege mo phuthegong ya ga Jehofa. O ne a nyelediwa mme a tswa mo phuthegong.—Dipalo 12:3; 16:11, 31-33.

5. Ke eng se se neng sa dira gore Dafite a ikutlwe a raelesega go tsogologela Saulo?

⁵ Dafite ka fa letlhakoreng le lengwe, o ne a direla ka fa tlase ga Kgosi Saulo. Saulo yo o kileng a bo a le kgosi e e siameng, o ne a setse a le bosula. Dafite o ne a tlhoka tumelo, boitshoko, tota le botswerere gore a falole tlhaselo ya ga Saulo yo o lefufa. Le fa go ntse jalo, fa Dafite a ne a nna le sebaka sa go ipusolosetsa, o ne a re ‘go ka se ka ga nna jalo go ya ka Jehofa,’ gore a dire tiro ya go sa ikanyegeng kgatlhanong le mongwe yo Jehofa a mo tloditseng.—1 Samuele 26:11.

6. Tota le fa re ka lemoga makoa le diphoso mo bagolwaneng, ke eng se le ka motlha re sa tshwanelang go se dira?

⁶ Fa go bonala bangwe ba ba re eteletseng pele ba dira phoso mo ditshwetsong tsa bone, ba bua mafoko a a utlwisang botlhoko, kana go bonala ba rata ba bangwe go gaisa ba bangwe, a re tla ngongorega ka bone, gongwe re dira gore go nne le moya wa go tshwaya diphoso mo phuthegong? A re tla tlogela go tla dipokanong tsa Bokeresete go supa gore re a ngongorega? Tota re ka se dire jalo! Jaaka Dafite, le ka motlha re ka se ka ra letla diphoso tsa motho yo mongwe go re tlhotlheletsa gore re se ka ra ikanyega mo go Jehofa le phuthego ya gagwe!—Pesalema 119:165.

7. Ke ditiro dingwe dife tse di bosula tse di ileng tsa simololwa go dirwa malebana le tempele e e kwa Jerusalema, mme Jesu o ne a ikutlwa jang ka seno?

⁷ Sekao se segolo go gaisa mo bathong ba ba ikanyegang e ne e le Jesu Keresete, yo o tlhalosiwang ka tsela ya boporofeti e le “moikanyegi” wa ga Jehofa. (Pesalema 16:10, NW) Tsela e e bosula e tempele e ne e dirisiwa ka yone kwa Jerusalema e tshwanetse ya bo e ne e dira gore go nne thata go ikanyega. Jesu o ne a itse gore tiro ya moperesiti yo mogolo le ditlhabelo di ne di tshwantshetsa bodiredi jwa gagwe le loso lwa gagwe lwa setlhabelo, e bile o ne a itse gore go botlhokwa jang gore batho ba ithute mo dilong tseno. Ka jalo o ne a galefile thata ka kgalefo e e siameng fa a ne a bona gore tempele e dirilwe “logaga lwa dithukuthi.” Ka taolo e a e neilweng ke Modimo, o ne a tsaya kgato gabedi go e phepafatsa.a—Mathaio 21:12, 13; Johane 2:15-17.

8. (a) Jesu o ne a supa jang boikanyegi mo dithulaganyong tsa tempele? (b) Re ka bontsha jang gore re itumelela go direla Jehofa le phuthego ya gagwe e e phepa?

⁸ Le fa go ntse jalo, Jesu o ne a tshegetsa thulaganyo ya tempele ka boikanyegi. Go tloga ka nako ya fa a ne a sa le ngwana, o ne a ya kwa meletlong ya tempele mme gantsi o ne a ruta teng. O bile a duela le lekgetho la tempele—le mororo tota a ne a sa patelesege go go dira. (Mathaio 17:24-27) Jesu o ne a akgola motlholagadi yo o humanegileng go bo a ile a latlhela “gotlhe mo a tshelang ka gone” mo letloleng la tempele la matlotlo. Ka bonako morago ga foo, Jehofa o ne a latlha tempele eo. Mme go fitlha ka nako eo, Jesu o ne a ikanyega mo go yone. (Mareko 12:41-44; Mathaio 23:38) Phuthego ya Modimo ya lefatshe gompieno e kgolo thata go na le tsamaiso ya Sejuda le tempele ya yone. Gone ke boammaaruri, ga e a itekanela; ke ka lebaka leo go dirwang diphetogo ka dinako tse dingwe. Mme ga e a tlala ka bosula e bile Jehofa Modimo a ka se ka a e emisetsa ka e nngwe. Le ka motlha re se ka ra letla gore bosaitekanelang jo re bo bonang mo go yone bo re kgopise kana bo dire gore re nne le moya wa go tshwaya diphoso le go ngongorega. Go na le moo, a re etse boikanyegi jwa ga Jesu Keresete.—1 Petere 2:21.

Bosaitekanelang Jwa Rona ka Borona

9, 10. (a) Tsamaiso ya dilo ya ga Satane e dirisa jang bosaitekanelang jwa rona go re tlhotlheletsa gore re se ka ra ikanyega mo boitshwarong? (b) Motho yo o dirileng boleo jo bo masisi o tshwanetse go dira eng?

⁹ Satane gape o leka go tlhotlheletsa go sa ikanyegeng ka go dirisa bosaitekanelang jwa rona ka tsela e e sa siamang. Tsamaiso ya gagwe ya dilo e dirisa bokoa jwa rona go re raela go dira dilo tse di sa siamang mo matlhong a ga Jehofa. Ka maswabi, ngwaga mongwe le mongwe diketekete di ineela go dira boitsholo jo bo sa siamang. Ba bangwe ba tswakanya go sa ikanyege gono ka go tshela ka bolotsana, ba tswelela pele ba dira bosula fa ka nako e e tshwanang ba itira e kete e sa ntse e le Bakeresete ba ba ikanyegang. Fa mosadi mongwe yo mosha a tsibogela metseletsele ya ditlhogo tse di malebana le kgang eno tsa “Basha ba Botsa Jaana . . .” mo makasineng wa Tsogang! o ne a kwala jaana: “Ditlhogo tseo di ne di tlhalosa tsela e ke neng ke tshela ka yone.” Mo sephiring, o ne a nna le botsalano le basha ba ba sa rateng Jehofa. Matswela e nnile afe? O kwala jaana: “Botshelo jwa me bo ne jwa nnela maswe le go feta, mme ke ne ka tshwarega mo boitsholong jo bo sa siamang mme ka tshwanelwa ke go kgalemelwa. Kamano ya me le Jehofa e ne ya senyega, mme batsadi ba me le bagolwane ba ne ba sa tlhole ba ntshepa.”b

¹⁰ Mosadi yo mosha yono o ne a thusiwa ke bagolwane mme a boa a direla Jehofa ka boikanyegi. Le fa go ntse jalo, ka maswabi, bontsi bo nna le ditlamorago tse di botlhoko thata, mme bangwe ga ba boele mo phuthegong. A bo go le molemo thata jang ne go ikanyega le go gana go raelwa ke lefatshe le le boikepo leno! Tsaya tsia ditlhagiso tse di mo dimakasineng tsa Tora ya Tebelo le Tsogang! tse di buang ka dikgang tse di malebana le go tsalana le batho ba lefatshe le boitlosobodutu jo bo sa siamang. E kete le ka motlha o se ka wa wela mo boitshwarong jwa go sa ikanyege. Mme fa go ka direga, le ka motlha o se ka wa itira se o seng sone. (Pesalema 26:4) Go na le moo, kopa thuso. Batsadi ba Bakeresete le bagolwane ba foo go go thusa.—Jakobe 5:14.

11. Ke ka ntlha yang fa go le phoso go itsaya re le batho ba ba bosula thata, mme ke sekai sefe sa Baebele se se ka re thusang go baakanya pono eo ya rona?

¹¹ Go sa itekanela ga rona go ka re tsenya mo kotsing ka tsela e nngwe. Batho bangwe ba ba sa ikanyegeng ba tlogela go leka go itumedisa Jehofa. Gakologelwa, Dafite o ne a dira maleo a a masisi. Le fa go ntse jalo, nako e telele morago ga loso lwa ga Dafite, Jehofa o ne a mo gakologelwa e le motlhanka yo o ikanyegang. (Bahebera 11:32; 12:1) Ka ntlha yang? Ka gonne le ka motlha ga a ise a ko a tlogele go leka go itumedisa Jehofa. Diane 24:16 e bolela jaana: “Motho yo o siameng o ka wa gasupa, mme a tsoge gape.” Ee ruri, fa re wela mo maleong a a seng masisi—ee kgapetsakgapetsa—ka ntlha ya bokoa bongwe jo re bo lwantshang, re ka nna ra bo re sa ntse re le batho ba ba siameng mo matlhong a ga Jehofa fa re tswelela pele re ‘tsoga gape’—ke gore, fa re ikwatlhaya ka boammaaruri le go boa re dira ka boikanyegi.—Bapisa 2 Bakorintha 2:7.

Ela Tlhoko Ditsela Tse di Bofitlha Tsa go sa Ikanyege!

12. Mo kgannyeng ya Bafarasai, go akanya gore ba tshwanetse go boloka molao ka go gagamatsa dilo go ne ga dira jang gore ba nne batho ba ba sa ikanyegeng?

¹² Go sa ikanyege go tla gape ka ditsela tse di bofitlha. Go ka nna ga lebega e le boikanyegi! Ka sekai, gongwe Bafarasai ba motlha wa ga Jesu ba ne ba akanya gore ba ikanyega thata.c Mme ba ne ba sa kgone go bona pharologanyo fa gare ga go nna motho yo o ikanyegang le go nna motho yo o tshegetsang melao e e dirilweng ke batho, ka gonne ba ne ba gagamatsa dilo e bile ba tshwaya diphoso thata. (Bapisa Moreri 7:16.) Ka go dira jalo totatota ba ne ba sa ikanyege—mo bathong ba ba neng ba tshwanetse gore ba ba direle, mo boikaelelong jwa Molao o ba neng ba bolela gore ba a o ruta le mo go Jehofa ka boene. Go farologana le seo, Jesu o ne a ikanyega mo boikaelelong jwa Molao, jo bo neng bo theilwe mo loratong. Ka go dira jalo o ne a aga batho le go ba kgothatsa, fela jaaka boporofeti kaga Mesia bo ne bo boleletse pele.—Isaia 42:3; 50:4; 61:1, 2.

13. (a) Batsadi ba Bakeresete ba ka tlhoka boikanyegi jang? (b) Ke ka ntlha yang fa batsadi ba tshwanetse go tila go nna bogale thata, go tshwaya diphoso kana go se nne le maikutlo a a siameng fa ba otlhaya bana ba bone?

¹³ Bakeresete ba ba nang le maemo mangwe a taolo ba solegelwa molemo thata ke sekao sa ga Jesu malebana le seno. Ka sekai, batsadi ba ba ikanyegang ba itse gore ba tshwanetse go tlhamalatsa bana ba bone. (Diane 13:24) Le fa go ntse jalo ba ela tlhoko gore ga ba gakatse bana ba bone ka go ba otlhaya botlhoko thata ka bogale kana ka go nnela go ba tshwaya diphoso. Bana ba ba akanyang gore le ka motlha ba ka se ka ba itumedisa batsadi ba bone kana ba ba akanyang gore go bonala fa kobamelo ya batsadi ba bone e dira gore ba ba bone diphoso le go ba tshwaya diphoso ba ka nna ba kotlomana pelo, mme ka ntlha ya seo, ba feleletse ba tlogetse tumelo ya boammaaruri.—Bakolosa 3:21.

14. Badisa ba Bakeresete ba ka itshupa jang ba ikanyega mo letsomaneng le ba le direlang?

¹⁴ Ka mo go tshwanang, bagolwane ba Bakeresete le balebedi ba ba etang ba ela tlhoko mathata le dikotsi tse letsomane le lebaneng le tsone. Ka e le badisa ba ba ikanyegang, ba neela kgakololo fa e tlhokega, ba tlhomamisa gore ba na le mabaka otlhe pele mme ba nna kelotlhoko go thaya se ba se buang mo Baebeleng le mo dikgatisong tsa Mokgatlho. (Pesalema 119:105; Diane 18:13) Ba itse gape gore, dinku di ikantse bone gore ba ba neye dijo tse di agang tsa semoya. Ka jalo ba batla go etsa Jesu Keresete, Modisa yo o Molemo. Ba direla dinku ka boikanyegi beke nngwe le nngwe kwa dipokanong tsa Bokeresete—e seng ka go di tshwaya diphoso mme go na le moo, ka go di aga le go nonotsha tumelo ya tsone.—Mathaio 20:28; Baefeso 4:11, 12; Bahebera 13:20, 21.

15. Bangwe mo lekgolong la ntlha la dingwaga ba ile ba supa jang boikanyegi jo bo sa tshwanelang?

¹⁵ Tsela e nngwe e e bofitlha ya go sa ikanyegeng ke go ikanyega ka tsela e e sa tshwanelang. Boikanyegi jwa boammaaruri jo Baebele e buang ka jone ga bo letle gore re ineele thata mo go sepe go feta ka fa re ikanyegang mo go Jehofa Modimo ka teng. Bajuda ba le bantsi ba lekgolo la ntlha la dingwaga ba ne ba ngaparetse Molao wa ga Moshe le tsamaiso ya dilo ya Sejuda ka botlhogoethata. Le fa go ntse jalo e ne e setse e le nako ya ga Jehofa ya gore a tlose masego a gagwe mo setšhabeng se se tsuologang seo mme a a neye Iseraele wa semoya. Ke ba sekaenyana fela ba ba neng ba ikanyega mo go Jehofa ba ba neng ba amogela phetogo e e botlhokwa eno. Tota le fa gare ga Bakeresete ba boammaaruri, babueledi ba tsamaiso ya tumelo ya Sejuda ba ne ba tatalalela go boela kwa “dilong tse di bokoa le tsa lehumanyana tsa tshimologo” tsa Molao wa ga Moshe tse di diragaditsweng mo go Keresete.—Bagalatia 4:9; 5:6-12; Bafilipi 3:2, 3.

16. Batlhanka ba ga Jehofa ba ba ikanyegang ba arabela jang fa go dirwa diphetogo?

¹⁶ Go farologana le seo, batho ba ga Jehofa ba motlha wa segompieno ba itshupile ba ikanyega mo dinakong tsa diphetogo. Fa lesedi la boammaaruri jo bo senotsweng le ntse le phatsimela kwa pele, go dirwa diphetogo. (Diane 4:18) Bosheng jaana “motlhanka yo o boikanngo le yo o bonokopela” o re thusitse go tokafatsa tsela e ka yone re tlhaloganyang lefoko “losika” le le umakilweng mo go Mathaio 24:34, mmogo le nako ya go atlholwa ga “dinku” le “dipodi” e e umakiwang mo go Mathaio 25:31-46 le tsela e re lebang ditiro dingwe tsa tirelosetšhaba ka teng. (Mathaio 24:45) Kwantle ga pelaelo batenegi bangwe ba ne ba tla itumela thata fa bontsi jwa Basupi ba ga Jehofa ba ne ba ka ngaparela thata tsela e pele re neng re tlhaloganya dilo ka yone malebana le dikgang dingwe mme ba gana go gatela pele. Ga go na sepe se se ntseng jalo se se ileng sa diragala. Ka ntlha yang? Batho ba ga Jehofa ba a ikanyega.

17. Batho ba re ba ratang ba ka leka jang boikanyegi jwa rona ka dinako tse dingwe?

¹⁷ Le fa go ntse jalo, kgang ya go ikanyega ka tsela e e sa tshwanelang e ka re ama motho ka namana. Fa tsala nngwe e o e ratang thata kana tota le e leng mongwe mo lelapeng a tlola melaometheo ya Baebele, re ka ikutlwa re sa itse gore re direng malebana le boikanyegi jwa rona. Ka tlholego fela, re ikutlwa re ikanyega mo go ba malapa a rona. Mme le ka motlha ga re a tshwanela go letla go ineela jalo mo go bone go feta go ikanyega ga rona mo go Jehofa! (Bapisa 1 Samuele 23:16-18.) E bile re ka se thuse badirabosula go fitlha boleo jo bo masisi e bile re ka se ka ra ema le bone kgatlhanong le mogolwane yo o lekang go ‘ba lolamisa ka moya wa bori.’ (Bagalatia 6:1) Go dira jalo e tla bo e le go se ikanyege mo go Jehofa, phuthego ya gagwe le mo mothong yoo yo re mo ratang. Kana e bile, go thibela moleofi go bona kgalemelo e a e tlhokang go tshwana le go mo thibela go bona lorato lwa ga Jehofa. (Bahebera 12:5-7) Gakologelwa gape gore, “Ditlhabo tse di ntshitsweng ke tsala di boikanngo.” (Diane 27:6) Kgakololo e e tlhamaletseng e e lorato e e theilweng mo Lefokong la Modimo e ka nna ya nyenyefatsa seriti sa motho yo re mo ratang yo o dirileng phoso, le fa go ntse jalo kgabagare e ka nna ya namola botshelo jwa gagwe!

Boikanyegi bo Itshokela Pogiso

18, 19. (a) Ahabe o ne a batla eng mo go Nabothe, mme ke ka ntlha yang fa Nabothe a ile a gana? (b) A boikanyegi jwa ga Nabothe bo ne bo tshwanela se se mo diragaletseng? Tlhalosa.

¹⁸ Ka dinako tse dingwe Satane o tlhasela boikanyegi jwa rona ka tlhamalalo. Akanya ka kgang ya ga Nabothe. Fa Kgosi Ahabe a ne a mo pateletsa go rekisa tshimo ya gagwe ya mofine, o ne a araba jaana: “A golo mo, Jehofa a go nkiletse, fa nka go naya boswa jwa borraetsho.” (1 Dikgosi 21:3) Nabothe o ne a sa nne tlhogoethata; o ne a ikanyega. Molao wa ga Moshe o ne o laela gore go se ka ga nna le Moiseraele ope yo o rekisetsang naga ya boswa ruri. (Lefitiko 25:23-28) Kwantle ga pelaelo Nabothe o ne a itse gore kgosi e e bosula eno e ka nna ya mmolaya, ka gonne Ahabe o ne a setse a letleletse mosadi wa gagwe, Jesebele, gore a bolaye baporofeti ba le bantsi ba ga Jehofa! Le fa go ntse jalo, Nabothe o ne a ema a nitame.—1 Dikgosi 18:4.

¹⁹ Ka dinako tse dingwe boikanyegi bo tlhoka motho mo gontsi. Jesebele o ne a loga maano a go dira gore go bonale e kete Nabothe o dirile tlolomolao nngwe e gone a neng a sa e dira a thusiwa ke ‘banna bangwe ba diramatla.’ Ka ntlha ya seo, ene le barwa ba gagwe ba ne ba bolawa. (1 Dikgosi 21:7-16; 2 Dikgosi 9:26) A seo se kaya gore boikanyegi jwa ga Nabothe e ne e le jo bo sa tshwanelang? Nnyaa! Nabothe ke mongwe wa banna le basadi ba bantsi ba ba ikanyegang ba ba ‘tshelang’ gone jaanong mo mogopolong wa ga Jehofa, ba robetse ka pabalesego mo lebitleng go fitlha ka nako ya tsogo ya baswi.—Luke 20:38; Ditiro 24:15.

20. Tsholofelo e ka re thusa jang go boloka boikanyegi jwa rona?

²⁰ Batho ba ba ikanyegang ba ga Jehofa gompieno ba na le tsholofelo eo. Re a itse gore go ikanyega ga rona go ka re tlhoka mo gontsi thata mo lefatsheng leno gompieno. Jesu Keresete o ne a latlhegelwa ke botshelo jwa gagwe ka ntlha ya boikanyegi jwa gagwe, mme o ne a bolelela balatedi ba gagwe gore le bone ba tla tshwarwa fela jalo. (Johane 15:20) Fela jaaka tsholofelo ya gagwe ka isagwe e ne ya mo nonotsha, fela jalo le ya rona e a re nonotsha. (Bahebera 12:2) Ka jalo re ka nna re ikanyega le fa re lebane le mefuta yotlhe ya pogiso.

21. Ke dilo dife tse Jehofa a di solofetsang baikanyegi ba gagwe?

²¹ Ke boammaaruri gore, ke ba sekae fela mo go rona gompieno ba boikanyegi jwa bone bo tlhaselwang jalo ka tlhamalalo. Mme batho ba Modimo ba ka nna ba lebana le pogiso e kgolo pele ga bokhutlo bo tla. Re ka tlhomamisa jang gore re boloke boikanyegi jwa rona? Ka go nna re ikanyega gone jaanong. Jehofa o re neile tiro e kgolo—go rera le go ruta ka Bogosi jwa gagwe. E kete re ka nna re ikanyega mo tirong e e botlhokwa eno. (1 Bakorintha 15:58) Fa re gana go letla bosaitekanelang jwa batho go senya boikanyegi jwa rona mo go Jehofa le mo phuthegong ya gagwe le fa re itisa kgatlhanong le mefuta e e bofitlha ya go sa ikanyege e e jaaka go ikanyega go go sa tshwanelang, he re tla bo re ipaakantse sentle fa go ka direga gore boikanyegi jwa rona bo lekiwe thata. Le fa go ntse jalo, e kete re ka tlhomamisega ka metlha gore Jehofa o tla nna a ntse a ikanyega mo batlhankeng ba gagwe ba ba ikanyegang. (2 Samuele 22:26, NW) Ee, o tla sireletsa baikanyegi ba gagwe!—Pesalema 97:10, NW.

[Dintlha tse di kwa tlase]

O ne O Tla Araba Jang?

◻ Re ka tila jang go letla gore bosaitekanelang jwa ba bangwe bo dire gore re se ka ra ikanyega?

◻ Bosaitekanelang jwa rona ka borona bo ka dira jang gore re itshware ka tsela e e sa ikanyegeng?

◻ Re ka lwantsha jang tlwaelo ya go ikanyega ka tsela e e sa tshwanelang?

◻ Ke eng se se tla re thusang go boloka boikanyegi jwa rona tota le ka dinako tsa pogiso?

[Lebokoso mo go tsebe 9]

Go Direla ka Boikanyegi kwa Bethele

“A dilo tsotlhe di diragale ka mokgwa o montle le ka thulaganyo.” Moaposetoloi Paulo o ne a kwala jalo. (1 Bakorintha 14:40) Paulo o ne a itse gore, se se ka thusang gore phuthego e dire sentle, go ne go tla tlhokega “thulaganyo.” Ka mo go tshwanang le gompieno, bagolwane ba tshwanetse go dira ditshwetso mo dilong dingwe, tse di jaaka go abela maloko a phuthego mafelo a a farologaneng a thuto ya buka, go rulaganya dipokano tsa tirelo ya tshimo le go tlhokomela gore tshimo e dirwa ka botlalo. Dithulaganyo tse di ntseng jalo di ka nna tsa leka boikanyegi jwa motho. Ga se ditaelo tse di tlhotlheleditsweng ke Modimo, e bile di ka se ka tsa kgotsofatsa keletso ya motho mongwe le mongwe.

A ka dinako tse dingwe o go fitlhela e le kgwetlho go ikanyega mo dithulaganyong dingwe tse di dirwang mo phuthegong ya Bokeresete? Fa go ntse jalo, o ka nna wa thusiwa ke sekao sa Bethele. Leina Bethele, le e leng lefoko la Sehebera le le rayang “Ntlo ya Modimo,” le reeletswe makala otlhe a a 104 a Mokgatlho wa Watch Tower, go akaretsa le ntlokgolo ya United States.* Baithaopi ba ba nnang kwa Bethele le go dira gone ba batla gore mafelo ano a supe go tlotla le go sisimoga Jehofa. Go dira seno go tlhokega gore mongwe le mongwe a ikanyege.

Gantsi batho ba ba etelang kwa Bethele ba akgela ka thulaganyo le bophepa jo ba bo bonang koo. Badiri ba gone ba dira dilo ka thulaganyo e bile ba itumetse; mokgwa wa bone wa go bua le maitseo a bone, tota le tsela e ba lebegang ka yone e supa gore ke Bakeresete ba ba godileng ba ba nang le segakolodi se se thapisitsweng ka Baebele. Maloko otlhe a lelapa la Bethele a ikobela melao ya Lefoko la Modimo ka boikanyegi.

Mo godimo ga moo, Setlhopha se se Laolang se ba naya bukana e e nang le setlhogo se se reng Dwelling Together in Unity, e e tlhalosang dithulaganyo dingwe tse di tlhokegang mo lelapeng le legolo jalo gore le dire sentle mmogo. (Pesalema 133:1) Ka sekai, e bua ka bonno, dijo, bophepa, moaparo le go ipaakanya le dilo tse dingwe tse di tshwanang le tseo. Maloko a lelapa la Bethele a ema dithulaganyo tse di ntseng jalo nokeng le go di tshegetsa ka boikanyegi, tota le fa ba rata dilo tse di farologaneng le tseo. Ba tsaya bukana eno, e le dikaelo tse di kwadilweng go ba thusa le go dira gore go nne le kutlwano, e seng e le melao le ditao tse di gagamatsang dilo thata. Balebedi ba dira ka boikanyegi tumalanong le dithulaganyo tseno tse di theilweng mo Baebeleng, mme ba di dirisa ka tsela e e siameng go aga le go kgothatsa lelapa la Bethele gore le tswelele pele ka tirelo ya lone e e boitshepo ya Bethele.

* Meago eno ya feketiri, ofisi le ya manno, ga e emele tempele e kgolo ya semoya ya Modimo kana ntlo ya gagwe. Tempele ya Modimo ya semoya ke thulaganyo ya gagwe ya kobamelo e e itshekileng. (Mika 4:1) Ka jalo, ga e emelwe ke kago nngwe mo lefatsheng.

[Lebokoso mo go tsebe 10]

Motho yo o Bolokang Boikanyegi Le yo O Gagamalelang go Tshegetsa Molao

Bogologolo ka 1916 Encyclopædia of Religion and Ethics e ile ya bolela gore “pharologano eno fa gare ga motho yo o bolokang boikanyegi le yo o gagamalelang go tshegetsa molao e ka bonwa ka dinako tsotlhe le mo mafelong otlhe.” E ne ya tlhalosa jaana: “Motho yo o gagamalelang go tshegetsa molao o dira se a se bolelelwang, ga a tlole melao epe; o tshegetsa se se kwadilweng ka boikanyegi. Motho yo o bolokang boikanyegi ene o dira seno mme . . . go ka lebelelwa gape mo gontsi mo go ene, o tlhoma mogopolo wa gagwe otlhe mo tirong ya gagwe, o dira gore maikutlo a gagwe a dumalane le boikaelelo jwa se a se dirang.” Moragonyana, yone buka eno e ne ya bolela jaana: “Go ikanyega go feta go utlwa molao fela. . . . Motho yo o ikanyegang o farologanngwa le motho yo o utlwang molao ka gonne ene o dira seo ka pelo le ka tlhaloganyo ya gagwe yotlhe . . . Ga a leofe ka boomo ka go dira sengwe, ka go se dire sengwe, kana go itlhokomolosa.”