Go Bolokiwa ka Nako ya Masetlapelo — LAEBORARI YA MO INTERNET

Go Bolokiwa ka Nako ya Masetlapelo

LEBENKELE le legolo la matlhatlaganyane a matlhano kwa Seoul kwa Korea, le ne la phutlhama ka tshoganyetso, batho ba le makgolokgolo ba gaelelwa mo teng! Badiri ba ba namolang batho ba ne ba dira bosigo le motshegare go boloka matshelo a mantsi ka mo ba ka kgonang ka teng. Fa matsatsi a ntse a feta, kgonego ya gore go bonwe batho bape ba ba oketsegileng ba ba tla falolang ba ba neng ba katetswe ka fa tlase ga mokoa wa semente le ditshipi e ne ya simolola go fokotsega.

Fa go ne go sa tlhole go na le tsholofelo epe ka batho ba ba sa ntseng ba tla falola, go ne ga diragala sengwe se se gakgamatsang. Go ne ga utlwala selelo se se bokoa, se se hutsafatsang ka fa tlase ga thuthubudu eo. Banamodi ba ne ba epa ka matlhagatlhaga ka matsogo a bone go ntsha mosadi mongwe wa dingwaga tse 19 yo o neng a fitlhilwe a ntse a tshela ka sebaka sa malatsi a le 16. Kgorwana ya lefiti e e neng e ole e ne e mo sireleditse gore a se ka a welwa ke ditone tsa semente. Le mororo a ne a latlhegetswe ke metsi a mantsi e bile a segegile, o ne a falotse loso!

Mo malatsing ano, ga go na le kgwedi epe e e fetang go se na dipego tsa masetlapelo mangwe, e ka tswa e le thoromo ya lefatshe, sefefo se se bogale, go runya ga lekgwamolelo, kotsi, kana leuba. Mme dimilione tsa batho tse di ratang dikgang di kgatlhwa ke go utlwa ka ditiro tsa namolo le kafa batho ba falotseng ka teng. Le fa go ntse jalo, tlhagiso e e malebana le masetlapelo a a tlang—a a fetang le fa e le afe mo hisitoring ya batho—e ile ya itlhokomolosiwa ke ba le bantsi. (Mathaio 24:21) Baebele e tlhalosa tiragalo e e tlang eno ka mafoko ano: “Bonang, bosula bo tlaa tsamaya bo tlhomagantse merafe, mme go tlaa tsosiwa ledimo le legolo le le tswang kwa dikhutlong tsa lefatshe. Babolaiwa ba ga Jehofa ba tlaa fitlhelwa mo motlheng oo, mo sekhutlong sengwe sa lefatshe, go ya sekhutlong se sengwe sa lefatshe; ga ba ketla ba lelelwa, le fa e le go phuthwa, le fa e le go fitlhwa; ba tlaa nna letshotelo fela mo godimo ga mmu.”—Jeremia 25:32, 33.

A mafoko a a tsitlisang marapo ruri! Mme go farologana le masetlapelo a tlholego le dikotsi, masetlapelo ano a ka se ka a bolaya mongwe le mongwe fela. Tota e bile, poloko—poloko ya gago—e ka kgonega!

Nako ya go Potlaka

Go tlhaloganya kgang eno ka botlalo, motho o tshwanetse gore a tlhaloganye gore ke ka ntlha yang fa tota masetlapelo ano a lefatshe lotlhe a tla diragala. Totatota, ke yone fela tharabololo ya mmatota ya mathata a batho. Ke batho ba sekae fela gompieno ba ba ikutlwang ba sireletsegile e bile ba babalesegile. Le mororo saense e dirile maiteko a magolo, malwetse a a tshwaetsanang a ntse a tswelela go bolaya baagi ba lefatshe. Batho ba ba diketekete ba bolawa ke dintwa tse di ileng tsa nna teng ka ntlha ya dikgotlhang tsa bodumedi, tsa setso le tsa bopolotiki. Leuba le oketsa bohutsana jwa banna, basadi le bana ba ba se nang molato. Go senyega ga boitsholo go koafatsa motheo wa setšhaba; tota le bana ba senyegile.

Boporofeti jwa Baebele jo bo kwadilweng dingwaga di le 1900 tse di fetileng bo tlhalosa boemo jwa rona ka tlhomamo e e gakgamatsang. Bo bolela jaana: “Lo tshwanetse go lemoga gore mo malatsing a bofelo dinako di tla bo di le kotsi thata.”—2 Timotheo 3:1, The New Testament in Modern English, ka J. B. Phillips; bapisa Mathaio 24:3-22.

A go bonala go utlwala mo go wena gore Modimo o o lorato a ka itlhokomolosa mathata a rona? Baebele e bolela jaana: “Ene yo eleng Mmopi wa magodimo‚ ke ene Modimo wa boammaaruri‚ Motlhodi wa lefatshe e bile e le Modiri wa lone‚ . . . yo o sa le bopelang lefela fela‚ [o le tlholetse] le eleng gore go agiwe mo go lone.” (Isaia 45:18, NW) Ee, go na le gore a letlelele gore polanete e ntle eno e senngwe le gore baagi ba yone ba nyelele, Modimo o tla tsaya kgato. Potso ke gore, O tla dira seo jang?

Itshenkele Botshelo!

Baebele e araba jaana mo go Pesalema 92:7: “E re baikepi ba tswetswena jaaka bojang, le badira tshiamololo botlhe ba kgaba; e be e le gore ba nyelediwe ruri.” Tsela e Modimo a tla rarabololang mathata a lefatshe ka yone ke ka go tlosa boikepo ka bojone. Se se itumedisang ke gore, seno ga se reye gore batho botlhe ba tshwanetse go tlosiwa. Pesalema 37:34 e re tlhomamisetsa jaana: “Lebelela mo go Jehofa, o bo o tshware tsela ya gagwe, mme o tlaa go goletsa go tla o rua lefatshe; e tlaa re mogang baikepi ba kgaolwang, o tlaa go bona.”

Mafoko ano a supa gore go na le tshono ya go bolokiwa mo masetlapelong ano a magolo go feta otlhe a a tla tlelang batho. Modimo o dirile gore re itlhophele. Mafoko a Moshe a ileng a kgothatsa Baiseraele ka one fa ba ne ba ipaakanyetsa go tsena mo Nageng e e Solofeditsweng a dira fela jalo le mo go rona gompieno: “Ke beile botshelo le loso fa pele ga gago, tshegofatso le phutso; ke gone itshenkele botshelo, gore o tshele, wena le losika lwa gago.” (Duteronome 30:19) Mme tota motho a “itshenkele botshelo” jang gore a bolokiwe? Poloko ya boammaaruri e kaya eng tota?

[Motswedi wa Setshwantsho mo go tsebe 2]

[Motswedi wa Setshwantsho mo go tsebe 3]

Yunhap News Agency/Sipa Press