Ba ne Ba Dira go Rata ga Jehofa

Sekai sa go Intsha Setlhabelo Le sa Go Ikanyega ka Nitamo

FA E le ka molemi yo mmotlana yo o neng a bidiwa Elisha, se se simologileng e le letsatsi la ka metlha la go lema se ne sa fetoga letsatsi le le botlhokwa thata mo botshelong jwa gagwe. Fa a ntse a dira mo tshimong, Elisha o ne a etelwa ke Elija a sa lebelela, moporofeti yo mogolo thata wa Iseraele. ‘O ka tswa a mpatlela eng?’ Gongwe Elisha o ka tswa a ne a ipotsa jalo. O ne a se ka a letela karabo ka nako e telele. Elija o ne a latlhela seaparo sa gagwe kwa go Elisha, a supa gore letsatsi lengwe Elisha o tla nna motlhatlhami wa gagwe. Elisha ga a ka a tsaya taletso eno motlhofo fela. Ka bonako fela, o ne a tlogela tshimo ya gagwe a ya go nna modiredi wa ga Elija.—1 Dikgosi 19:19-21.

Dingwaga di ka nna thataro morago ga moo, go ne ga tla nako ya gore Elija a tsamaye. Pego ya go tsamaya ga gagwe e ntse e bidiwa “nngwe ya dipolelo tse di kgatlhang thata” mo Dikwalong Tsa Sehebera.

Elija o Ipaakanyetsa go Tsamaya

Elija o ne a eletsa go etela la bofelo kwa Bethele, Jeriko le kwa Joredane. Seno se ne se tla tlhoka gore a tsamaye dikilometara di le dintsi, mo gongwe a tsamaya mo dikarolong tsa dithaba tse di makgawekgawe. Mo karolong nngwe le nngwe ya loeto, Elija o ne a kgothaletsa Elisha gore a sale. Mme Elisha o ne a gatelela gore a tsamaye le mong wa gagwe go ya fela kwa bokhutlong jwa loeto.—2 Dikgosi 2:1, 2, 4, 6.

Fa ba le kwa Bethele le kwa Jeriko, “bomorwa baperofeti” ba ne ba tla kwa go Elisha.a “A o a itse fa Jehofa a tlaa tlosa mong wa gago mo tlhogong ya gago gompieno?” ba ne ba mmotsa jalo. O ne a araba jaana: “Ee, ke a itse, didimalang fela lona.”—2 Dikgosi 2:3, 5.

Go tswa foo Elija le Elisha ba ne ba ya kwa Nokeng ya Joredane. Fa ba goroga kwa Nokeng ya Joredane, Elija o ne a dira kgakgamatso fa barwa bangwe ba le 50 ba baporofeti ba ntse ba lebile ba le kgakala. “Elija a tsaya kobo ya gagwe a e menaganya, a fopha metsi, mme a kgaoganela kwano le kwa, mme bone boo babedi ba kgabaganya ba gata lefatshe le le omeletseng.”—2 Dikgosi 2:8.

Fa ba setse ba kgabagantse, Elija o ne a raya Elisha jaana: “Lopa se ke tlaa se go direlang, ke ise ke tlosiwe mo go wena.” Elisha o ne a kopa “dikabelo di le pedi” tsa moya wa ga Elija—e leng, karolo e e menaganeng gabedi e gantsi e neng e neelwa morwa wa leitibolo. Eleruri, Elisha o ne a tlotla Elija fela jaaka morwa wa leitibolo a ka tlotla rraagwe. Mo godimo ga moo, o ne a tlodiwa go nna motlhatlhami wa ga Elija gore a nne moporofeti wa ga Jehofa kwa Iseraele. Ka jalo kopo ya gagwe e ne e se ya bopelotshetlha kana e e sa tshwanelang. Le fa go ntse jalo, go itse gore ke Jehofa fela yo o ka arabang kopo eno, Elija o ne a araba jaana ka boikokobetso: “O lopile selo se se thata.” Morago ga moo o ne a oketsa jaana: “E tlaa re fa o mpona mogang ke tlosiwang mo go wena, go tlaa nna jalo mo go wena, mme e tlaa re fa o sa mpone, ga go ketla go nna jalo.”—2 Dikgosi 2:9, 10; Duteronome 21:17.

Kwantle ga pelaelo Elisha o ne a ititaya sehuba go feta pele gore a ngaparele mong wa gagwe. Morago ga moo, go ne ga bonala “kara ya molelo, le dipitse tsa molelo.” Fa pele fela ga matlho a ga Elisha a a tshogileng, Elija o ne a tsewa ke setsokotsane—a isiwa kwa lefelong le lengwe ka tsela ya kgakgamatso.b Elisha o ne a tsaya seaparo sa ga Elija mme a boela kwa lotshitshing lwa Noka ya Joredane. O ne a itaya metsi, a re: “Jehofa Modimo wa ga Elija o kae?” Metsi a kgaogana, a neela bosupi jo bo phepafetseng jwa gore Elisha o ne a tshegediwa ke Modimo jaaka motlhatlhami wa ga Elija.—2 Dikgosi 2:11-14.

Thuto mo go Rona

Fa Elisha a ne a lalediwa go ya go dira tirelo e e kgethegileng le Elija, o ne a tlogela tshimo ya gagwe ka bonako gore a ye go direla moporofeti yo mogolo wa Iseraele. Go bonala dingwe tsa ditiro tsa gagwe e ne e le tsa maemo a a kwa tlase, ka gonne o ne a itsiwe e le motho yo “o ne[ng] a tle a tlhapise Elija diatla.”c (2 Dikgosi 3:11) Le fa go ntse jalo, Elisha o ne a leba tiro ya gagwe e le tshiamelo, mme o ne a ema Elija nokeng ka boikanyegi jo bo nitameng.

Batlhanka ba le bantsi ba Modimo gompieno ba bontsha moya o o tshwanang wa go intsha setlhabelo. Ba bangwe ba tlogetse “masimo” a bone, ditiro tsa bone, gore ba ye go rera dikgang tse di molemo kwa ditshimong tse di kgakala kana go ya go direla e le maloko a lelapa la Bethele. Ba bangwe ba ya kwa dinageng tsa seeng go ya go dira ditiro tsa go aga tsa Mokgatlho. Ba le bantsi ba amogetse se se ka nnang sa tsewa e le ditiro tsa maemo a a kwa tlase. Le fa go ntse jalo, ga go ope yo o leng motlhanka wa ga Jehofa yo go ka tweng o dira tiro e e seng botlhokwa. Jehofa o anaanela botlhe ba ba mo direlang ka go rata, mme o tla segofatsa moya wa bone wa go intsha setlhabelo.—Mareko 10:29, 30.

Elisha o ne a ema Elija nokeng go ya kwa bokhutlong. O ne a gana go tlogela moporofeti yo mogolo yono, tota le fa a ne a neelwa sebaka sa go dira jalo. Kwantle ga pelaelo, botsala jo bogolo jo a neng a na le jone le Elija bo dirile gore lorato loo lwa boikanyegi jo bo nitameng lo itumedise. Gompieno, batlhanka ba Modimo ba gagamalela go nonotsha botsalano jwa bone le Modimo le go tsalana thata le badumedikabone. Kutlwano ya bone e kgolo e tla segofadiwa, ka gonne Baebele e bolela jaana ka Jehofa: “Mo go ba ba kutlwelo botlhoko o tlaa itshupa kutlwelo botlhoko.”—2 Samuele 22:26.

[Dintlha tse di kwa tlase]