Leina le le Lebisang Kwa Tumelong ya Boammaaruri

MOSADI mongwe o ne a raya mongwe wa Basupi ba ga Jehofa a re: “Ga lo dumele mo go Jesu le mo mading a gagwe a a rekololang.” Monna mongwe ene o ne a oketsa a re: “Lo ipitsa Basupi ba ga Jehofa, nna ke mosupi wa ga Jesu.”

Batho ba le bantsi ba akanya gore Basupi ba ga Jehofa ga ba dumele mo go Jesu kana gore ga ba mo tlotlomatse ka tsela e e tshwanetseng. Mme gone, a go boammaaruri?

Ke boammaaruri gore Basupi ba ga Jehofa ba tlotla leina la Modimo e bong Jehofa thata.a Itamar, Mosupi mongwe wa kwa Brazil o gakologelwa jaana: “Botshelo jwa me bo ile jwa fetoga gotlhelele fa ke ne ke ithuta leina la Modimo. E ne ya re fa ke bala ka lone la ntlha, go ne ga nna jaaka e kete ke tsoga mo borokong jo bogolo. Leina Jehofa le ne la nkama maikutlo le go ntlhotlheletsa thata; le ile la ama pelo ya me thata.” Le fa go ntse jalo, o oketsa jaana: “Le Jesu ke mo rata mo go maswe.”

Ee, Basupi ba ga Jehofa ba a itse gore ba tshwanetse go dumela “mo leineng la Morwa Modimo,” e bong Jesu gore ba tle ba bone botshelo jo bo sa khutleng. (1 Johane 5:13) Mme gone, mafoko a a reng ‘mo leineng la ga Jesu’ a kaya eng?

Se Leina la ga Jesu le se Emelang

Mafoko “mo leineng la ga Jesu” le a mangwe a a tshwanang le one a fitlhelwa go ralala Dikwalo Tsa Segerika Tsa Bokeresete, kana “Tesetamente e Ntšha.” Tota e bile, lefoko “leina” le tlhaga ka makgetlo a a fetang 80, fa go buiwa ka Jesu mme le tlhaga ka makgetlo a ka nna 30 mo bukeng ya Ditiro e le nosi. Bakeresete ba lekgolo la ntlha la dingwaga ba ne ba kolobetsa mo leineng la ga Jesu, ba fodisa mo leineng la gagwe, ba ruta mo leineng la gagwe, ba bitsa leina la gagwe, ba bogisediwa leina la gagwe le go galaletsa leina la gagwe.—Ditiro 2:38; 3:16; 5:28; 9:14, 16; 19:17.

Go ya ka dikishenare nngwe ya Baebele, lefoko la Segerika le le ranolwang e le “leina” gantsi le dirisiwa mo Baebeleng “go tlhalosa sotlhe se leina le se kayang, taolo, botho, maemo, bogolo, maatla, molemo, jalo le jalo, sengwe le sengwe fela se leina le se akaretsang.” Ka jalo, leina la ga Jesu le emela maemo a magolo le a a tlotlegang a Jehofa Modimo a mo neileng one. Jesu ka boene o ne a bolela jaana: “Taolo yotlhe ke e neilwe kwa legodimong le mo lefatsheng.” (Mathaio 28:18) Morago ga gore Petere le Johane ba fodise monna yo o neng a golafetse, baeteledipele ba bodumedi ba Bajuda ba ne ba ba botsa jaana: “Lo dirile seno ka maatla afe kgotsa mo leineng la ga mang?” Ka bopelokgale Petere o ne a bontsha go nna le tumelo mo taolong le mo maatleng a leina la ga Jesu ka go ba bolelela gore e ne e le mo “leineng la ga Jesu Keresete Monasaretha, . . . ke ka yono go bo monna yono a eme fano fa pele ga lona a itekanetse sentle.”—Ditiro 3:1-10; 4:5-10.

Go Dumela mo Leineng la ga Jesu Kana la ga Kaesare?

Le fa go ntse jalo, ga go kitla go nna motlhofo go ipolela fa o na le tumelo e e ntseng jalo mo leineng la ga Jesu. Go ntse fela jaaka Jesu a ile a bolelela pele gore barutwa ba gagwe ba ne ba tla ‘tlhoiwa ke merafe yotlhe ka ntlha ya leina la gagwe.’ (Mathaio 24:9) Ka ntlha yang? Ka gonne leina la ga Jesu le emela maemo a gagwe a go nna Mmusi yo o tlhomilweng wa Modimo, Kgosi ya dikgosi, e ditšhaba tsotlhe di tshwanetseng go e ikobela, e leng selo se di sa se direng kana di sa batleng go se dira.—Pesalema 2:1-7.

Baeteledipele ba bodumedi ba motlha wa ga Jesu le bone ba ne ba sa batle go ikobela Jesu. Ba ne ba re: “Ga re na kgosi epe fa e se Kaesare,” ka go rialo ba ne ba gana Morwa Modimo. (Johane 19:13-15) Go na le moo, ba ne ba dumela mo leineng—mo maatleng le mo taolong—la ga Kaesare le mo pusong ya gagwe. Ba ne ba bo ba swetsa ka gore Jesu o tshwanetse go bolawa gore ba boloke maemo a bone.—Johane 11:47-53.

Mo makgolong a dingwaga morago ga loso lwa ga Jesu, bontsi jwa batho ba ba neng ba ipolela gore ke Bakeresete ba ile ba nna le boikutlo jo bo tshwanang le jwa baeteledipele ba Bajuda. Batho bano ba ba ipitsang Bakeresete ba ne ba dumela mo maatleng le mo taolong ya Puso mme ba nna le seabe mo dikgogakgoganong tsa yone. Ka sekai, mo lekgolong la dingwaga la bo11, fa kereke e sena go rulaganya batlhabani ba ba sa berekeng go nna militia Christi, kana megaka ya Bokeresete, “boikarabelo jwa go lwa ntwa e e siameng bo ne bo sa tlhole bo le mo magetleng a dipuso tsa lefatshe tsa Labokeresete, go na le moo, jaanong bo ne bo le mo magetleng a kereke e e neng e emelwa ke megaka ya yone ya Bokeresete.” (The Oxford History of Christianity) Pego eno e oketsa ka gore dikakgelo dingwe tsa bomopapa di ile tsa dira gore bontsi jwa batlhabanelatumelo ba dumele gore “ba dirile kgolagano le Modimo le gore ba itiretse tshono ya go tsena mo Paradaiseng” ka go nna le seabe mo ntweng ya botlhabanelatumelo.

Batho bangwe ba ka nna ba re, go a kgonega gore motho a nne boikanyego mo go Jesu fa kafa letlhakoreng le lengwe a ntse a nna le seabe mo dikgannyeng tsa dipolotiki le mo dintweng tsa dinaga. Ba ka nna ba akanya gore ke boikarabelo jwa Mokeresete go lwantsha boikepo ka mekgwa yotlhe le gore seno se akaretsa go tlhabana fa go tlhokega. Mme gone, a Bakeresete ba bogologolo ba ne ba na le pono e e ntseng jalo?

Setlhogo sengwe sa makasine wa The Christian Century se bolela gore “Bakeresete ba bogologolo ba ne ba sa nne masole.” Se tlhalosa gore go fitlha ka lesome la dingwaga la 170-180 C.E., ga go na bosupi bope jwa gore Bakeresete ba ne ba bereka mo sesoleng. Go tswa foo setlhogo seno se oketsa jaana: “Bakeresete ba ile ba nna ba tlogela maemo a bone a go gana go tsenela bosole ka iketlo.”

Matswela e ile ya nna afe? Setlhogo sa The Christian Century sa re: “Gongwe ga go na selo se se ileng sa koafatsa Bokeresete go gaisa go ineelela go tsaya kgato ya go se farologane le batho ba e seng Bakeresete mo dilong tse di malebana le ntwa. Ruri Bakeresete ba koafaditse tumelo ya bone thata ka go tlhagafalela go ema dintwa tsa bodumedi kana tsa naga nokeng ntswa kafa go je lengwe ba re ba latela tumelo ya Mmoloki yo o bonolo.”

Go Etsa Bakeresete ba Bogologolo Gompieno

A go a kgonega gore gompieno Bakeresete ba etse sekao se sentle sa Bakeresete ba bogologolo? Mo lekgolong leno la dingwaga Basupi ba ga Jehofa ba ile ba supa gore go a kgonega. Fa mokwadi wa Holocaust Educational Digest a bua ka bone o ile a re: “Ga go ope mo Basuping ba ga Jehofa yo o ka tsenelang ntwa. . . . Fa batho botlhe ba ba busang mo lefatsheng ba ka bo ba le mo bodumeding jono, go ka bo go ile ga se ka ga nna le [Ntwa ya Lefatshe II].”

Go ka buiwa jalo le ka dintwa tsa bosheng jaana tsa kwa mafelong mangwe, tse di jaaka e e fagileng kwa Ireland Bokone. Dingwaga di sekae tse di fetileng, mongwe wa Basupi ba ga Jehofa o ne a rera ka ntlo le ntlo mo kgaolong ya Baporotesetanta kwa toropongkgolo ya Belfast. Mong wa ntlo mongwe o ne a bua jaana fa a sena go utlwa gore Mosupi yono e kile ya bo e le Mokatoliki: “Ka nako ya fa o ne o le Mokatoliki a o ne o ema IRA [Irish Republican Army] nokeng?” Mosupi yono o ne a lemoga gore monna yono a ka nna a galefa thata ka gonne o ile a tshwarwa morago ga go fitlhelwa a tshotse tlhobolo fa a ne a ya go bolaya Mokatoliki mongwe mme o ne a sa tswa go gololwa. Ka jalo, Mosupi o ne a araba jaana: “Gone jaanong ga ke Mokatoliki. Ke mongwe wa Basupi ba ga Jehofa. E re ka ke le Mokeresete wa boammaaruri nka se bolaye motho ope ka ntlha ya puso epe kana motho ope.” Ka ntlha ya seo, mong wa ntlo yono o ne a mo naya letsogo a bo a re: “Go bolaya gotlhe fela ga go a siama. Ruri lo dira tiro e e molemo. Tshwarang fela jalo.”

Se go Dumela mo Leineng la ga Jesu go se Bolelang

Mme gone, go dumela mo leineng la ga Jesu ga go bolele go ikeha fela mo ntweng. Go kaya go reetsa ditaelo tsotlhe tsa ga Keresete. Kana e bile Jesu o ne a re: “Lo ditsala tsa me fa lo dira se ke se lo laolelang,” mme nngwe ya ditaelo tsa gagwe ke gore re “ratane.” (Johane 15:14, 17) Lorato lo re tlhotlheletsa go batla go direla ba bangwe molemo. Lo fedisa mekgwa yotlhe ya go ilana ka ntlha ya lotso, bodumedi le maemo. Jesu o ne a bontsha kafa seo se ka diregang ka teng.

Bajuda mo motlheng wa ga Jesu ba ne ba ila Basamaria. Go na le moo, Jesu o ne a bua le mosadi wa Mosamaria, mme seo se ne sa dira gore mosadi yoo le batho ba bangwe ba bantsi ba dumele mo leineng la gagwe. (Johane 4:39) Gape Jesu o ne a bolela gore barutwa ba gagwe ba ne ba tla nna basupi ba gagwe “mo Jerusalema mmogo le mo Judea yotlhe le Samarea le go ya karolong e e kwa kgakalakgakala ya lefatshe.” (Ditiro 1:8) Molaetsa wa gagwe o o nayang batho botshelo o ne o se kitla o felela fela mo Bajudeng. Ke gone ka moo Petere a ileng a laelwa go etela molaodi wa masole a Roma e bong Korenelio. Le mororo molao o ne o sa letle gore Mojuda a etele motho wa lotso lo sele, Modimo o ne a bontsha Petere gore ‘a se ka a bitsa motho ope a re o leswafetse kana ga a phepa.’—Ditiro 10:28.

Ka go etsa Jesu, Basupi ba ga Jehofa ba ithaopa go thusa batho botlhe—le fa e ka tswa e le ba lotso lofe, bodumedi kana maemo—go ithuta kaga poloko e e ka bonwang ka leina la ga Jesu. Go dumela mo leineng la ga Jesu go ba tlhotlheletsa ‘go bolela phatlalatsa gore Jesu ke Morena.’ (Baroma 10:8, 9) Re go kgothaletsa gore o dumele gore ba go thuse e le gore le wena o tle o ithute go dumela mo leineng la ga Jesu.

Ruri leina la ga Jesu le tshwanetse go re tlhotlheletsa go nna boikobo, go nna tlotlo le go nna kutlo. Moaposetoloi Paulo o ne a bolela jaana: “Ka leina la ga Jesu lengole lengwe le lengwe le tle le obame la ba ba kwa legodimong le ba ba mo lefatsheng le ba ba kafa tlase ga lefatshe, le loleme longwe le longwe lo tle lo bolele ka tshosologo fa lo dumela gore Jesu Keresete ke Morena kgalalelong ya Modimo Rara.” (Bafilipi 2:10, 11) Le fa bontsi jwa baagi ba lefatshe ba sa batle go ikobela taolo ya ga Jesu, Baebele e bontsha gore nako e setse e le gaufi gore batho botlhe ba dire jalo e seng jalo ba tla nyelediwa. (2 Bathesalonika 1:6-9) Ka gone, gone jaanong ke nako ya gore re dumele mo leineng la ga Jesu ka go boloka ditaelo tsotlhe tsa gagwe.

[Ntlha e e kwa tlase]

[Setshwantsho mo go tsebe 6]

Dimilione tsa batho di ile tsa bolaya le go bolawa go dirisiwa leina la ga Jesu

[Setshwantsho mo go tsebe 7]

Jesu o ne a sa ile batho ka ntlha ya lotso lwa bone. Wena?