Go Gatelelwa ke Balekane—A go Ka go Solegela Molemo?
Rotlhe re tshotswe re na le keletso ya go batla go amogelwa ke balekane. Ga go na ope yo o batlang go tlhoiwa, le go ngalelwa. Ka gone, balekane ba rona ba re tlhotlheletsa ka ditsela tse di sa tshwaneng.
MOLEKANE o tlhalosiwa e le “motho yo o nang le boemo jo bo tshwanang le jwa yo mongwe; . . . yo o mo setlhopheng se le sengwe sa batho, [segolo jang] go ikaegile ka dingwaga, kana maemo.” Kgatelelo ya balekane yone ke go gatelelwa ke balekane ba rona e le gore re fetogele mo tseleng ya bone ya go akanya kana ya go dira dilo, e ka ne re lemoga kana re sa lemoge. Gantsi kgatelelo ya balekane e tsewa e le selo se se sa siamang. Le fa go ntse jalo, jaaka re tla bona, re ka dira gore e re solegele molemo.
E Tlhotlheletsa Bannye le Bagolo
Kgatelelo ya balekane ga e ame basha fela; e ama bannye le bagolo. Re lemoga tlhotlheletso ya yone fa re simolola go botsa dipotso tse di jaaka: “Batho ba bangwe ba a go dira, nna ke tla bo ke palelwa ke eng?” “Ke eng fa ke tshwanetse go farologana le ba bangwe ka metlha?” “Batho ba bangwe ba tla akanya eng kana ba tla reng?” “Ditsala tsa me tsotlhe di a ntshana e bile di tsena mo lenyalong, mme nna ga ke ise ke simolole go dira jalo. A go na le sengwe se se phoso ka nna?”
Le mororo kgatelelo ya go batla go dira dilo jaaka batho ba bangwe e ama bannye le bagolo, go bonala e nna kgolo thata mo dingwageng tsa bosha. The World Book Encyclopedia e bolela gore “basha ba le bantsi ba inaakanya thata le balekane ba bone—ke gore, ditsala tsa bone le batho ba ba tlwaelaneng thata le bone. Basha bano ba ba mo dingwageng tsa bolesome ba batla go kgatlha balekane ba bone, go na le go kgatlha batsadi ba bone, mme ba ka nna ba fetola boitshwaro jwa bone e le gore ba ba amogele.” E oketsa ka go re, basha ba ba mo dingwageng tsa bolesome “ba akanya gore ba gola sentle fa ba amogelwa le go ratiwa ke balekane ba bone.” Ka jalo ba “tshwarega mo dilong tse ba akanyang gore di tla dira gore ba tume, tse di jaaka mofuta wa bone wa go apara, bokgoni jwa go etelela pele le go atlega mo go ntshaneng.”
Banyalani ba ka nna ba fitlhela e le gore ditshwetso tsa bone tse di malebana le gore ba reke ntlo e e ntseng jang kana go e hira, ba reke koloi e e ntseng jang, a ke ba nne le bana kana nnyaa, le dilo tse dingwe tse dintsi, di tlhotlhelediwa ke kgatelelo ya balekane—go ya ka se se amogelwang mo tikologong ya bone, ke ditsala tsa bone kana setso sa bone. Malapa a mangwe a ikgama ka dikoloto e le fela gore ba nne le dilo tse baagelani le balekane ba bone ba nang le tsone. Ee, mekgele ya rona, tsela ya rona ya go akanya le ditshwetso tse re di dirang gantsi di senola tsela e e bofitlha e kgatelelo ya balekane e re amang ka yone. Ka ntlha ya maatla a kgatelelo ya balekane e nang le one, a re ka kgona go e dirisa ka tsela e e ka re solegelang molemo, go re thusa mo tseleng e re batlang go tsamaya mo go yone? Ee, re ka kgona!
Go Dirisa Tlhotlheletso e e Molemo ya Balekane ka Botlalo
Dingaka le bomankge ba bangwe ba boitekanelo ba a itse gore go botlhokwa gore balwetse ba bone ba nne gaufi le batho ba ba nang le maikutlo a a siameng le dilo tse dingwe tse di ka ba tlhotlheletsang ka tsela e e molemo. Tikologo e e ntseng jalo e ka ba thusa gore ba fole. Ka sekai, batho ba ba kgaogileng tokololo nngwe gantsi ba thusiwa ka thulaganyo e e tsayang nako e telele e e thusang balwetse go fola mo mmeleng le mo maikutlong ka go bona sekao se se molemo le go kgothadiwa ke batho ba bangwe ba ba nnileng le bothata jo bo tshwanang. Go phepafetse gore go ipaya mo tikologong e e molemo e e akaretsang batho ba ba tlhomang sekao se se molemo ba ba nang le tsholofelo, ke tsela ya go dirisa mofuta wa kgatelelo e e siameng ya balekane ka botlalo.
Gape molaomotheo ono o dira le mo phuthegong ya Bokeresete, ka gonne lengwe la mabaka a a dirileng gore Jehofa a laele batho ba gagwe go phuthega mmogo ka metlha ke tlhotlheletso e e siameng ya balekane. Modimo o re rotloetsa go ‘tlhotlheletsana mo loratong le mo ditirong tse di molemo le go kgothatsana.’ (Bahebera 10:24, 25) Kgothatso e e ntseng jalo e botlhokwa ka gonne go na le dikgatelelo di le dintsi tse di sa siamang le tse di botlhoko mo lefatsheng la gompieno. Ka ntlha ya dikgatelelo tseno, Bakeresete ba tshwanetse go ‘iteka ka tlhagafalo’ gore ba nne ba nonofile semoyeng. (Luke 13:24) Ka gone, re tlhoka tshegetso e e lorato le kanaanelo e e tswang mo badumeding ka rona. Mo godimo ga moo, ba bangwe ba ka tswa ba tshwanelwa ke go itshokela “mutlwa mo nameng,” gongwe e le bolwetse kana bogole bongwe. (2 Bakorintha 12:7) Ba bangwe ba ka nna ba bo ba lwantshana le go tlogela mekgwa e e bosula kana go tshwenyega thata mo maikutlong, kana ba ka tswa ba palelwa ke go itshokela mathata a botshelo. Ka gone, re tla bo re le botlhale fa re inaakanya le batho ba ba nnang ba kgomaretse Jehofa Modimo e bile ba itumelela go mo direla. Balekane ba ba ntseng jalo ba tla re kgothatsa le go re thusa go ‘itshoka go ya bokhutlong.’—Mathaio 24:13.
Ka go tlhopha balekane ba ba siameng he, re ka kgona go laola tlhotlheletso e ba nang le yone mo go rona. Mo godimo ga moo, dijo tsa semoya tse di molemo le kaelo e e mosola e re e neelwang kwa dipokanong tsa Bokeresete di nonotsha tsela e balekane ba rona ba re kgothatsang ka yone.
Legale, ga se ka metlha go leng motlhofo go ya kwa dipokanong tsa Bokeresete. Bangwe ba ka nna ba se ka ba engwa nokeng ke balekane ba bone ba lenyalo, ba bangwe ba ka nna ba bo ba na le bana ba ba tlhokang go baakanngwa, mme ba bangwe ba ka nna le bothata jwa dipalangwa. Mme akanya: Fa o sa letle dikgoreletsi tseno go go thibela, he sekao sa gago se ka tlhotlheletsa ba bangwe ba ba ka tswang ba itshokela maemo a a tshwanang le ao. Ka mafoko a mangwe, wena le batho ba bangwe ba ba tshwanang le wena ga lo bontshe sekao se se molemo fela mme gape lo na le tlhotlheletso e e molemo ya balekane—mme lo dira jalo kwantle ga dikgotlhang.
Tota e bile, moaposetoloi Paulo, yo le ene a neng a tshwanelwa ke go itshokela mathata le dikgoreletsi di le dintsi, o ne a kgothaletsa Bakeresete gore ba etse sekao sa gagwe le sa Bakeresete ba bangwe ba ba godileng. O ne a re: “Nnang baetsi ba me lo tshwaragane, bakaulengwe, mme bayang leitlho ba ba tsamayang ka tsela e e dumalanang le sekao se lo nang le sone mo go rona.” (Bafilipi 3:17; 4:9) Bakeresete ba bogologolo ba kwa Thesalonika ba ne ba etsa sekao se se molemo sa ga Paulo. Paulo o ne a kwala jaana ka bone: “Lo ne lwa nna baetsi ba rona le ba Morena, ka lo ne lwa amogela lefoko lo le mo pitlaganong e kgolo ka boipelo jwa moya o o boitshepo, mo e leng gore lo ne lwa simolola go nna sekao mo badumeding botlhe mo Makedonia le mo Akaia.” (1 Bathesalonika 1:6, 7) Boikutlo jwa rona jo bo siameng le sekao sa rona di ka ama batho ba re kopanelang le bone ka tsela e e tshwanang.
Tila Ditlhotlheletso Tse di sa Siamang
Fa re batla go tila kgatelelo e e sa siamang ya balekane, re tshwanetse go gana tlhotlheletso ya ‘ba ba tsamayang tumalanong le nama.’ (Baroma 8:4, 5; 1 Johane 2:15-17) Fa re sa dire jalo, kgatelelo ya balekane e e utlwisang botlhoko e tla re katosetsa kgakala le Jehofa le gore re gane kgakololo ya gagwe e e molemo. Diane 13:20 ya re: “Tsamaya le batho ba ba botlhale, mme o tlaa nna botlhale, mme monkana wa dieleele o tlaa utlwisiwa botlhoko ke gone.” A o ka akanya ka mongwe yo o neng a utlwa botlhoko ka ntlha ya kgatelelo e e sa siamang ya balekane? Ka sekai, Bakeresete bangwe ba ile ba tlhotlhelediwa ke balekane ba bone gore ba rate dilo tse di bonalang, ba tsenelele mo boitshwarong jo bo sa siamang, kana ba dirise diokobatsi le go nwa bojalwa ka tsela e e sa tshwanelang.
Tota le mo phuthegong ya Bokeresete, re ka tlhotlhelediwa ke kgatelelo e e sa siamang ya balekane fa re tlhopha batho ba ba bokoa mo semoyeng go nna ditsala tsa rona tse dikgolo. (1 Bakorintha 15:33; 2 Bathesalonika 3:14) Gantsi batho ba ba ntseng jalo ga ba rate go tlotla ka dilo tsa semoya; ba ka nna ba bo ba sotla batho ba ba ratang go tlotla ka tsela e e ntseng jalo. Fa re tlhopha batho ba ba ntseng jalo go nna ditsala tsa rona tse dikgolo, kgatelelo ya balekane e ka re tlhotlheletsa gore re tshwane le bone, mme go ise go ye kae megopolo le boikutlo jwa rona di ka tshwana le tsa bone. Re ka nna ra ba ra simolola go nyatsa batho ba ba tlhoafetseng mo tumelong le ba ba lekang go gatela pele mo semoyeng.—1 Timotheo 4:15.
A bo go le botlhale jang ne go nna le ditsala tse di gagamalelang go itumedisa Jehofa, tse di ratang dilo tsa semoya! Ditsala tse di ntseng jalo di tla re thusa go nna le “botlhale jo bo tswang kwa godimo.” Bo “itshekile, go tswa foo bo kagiso, bo kakanyetso, bo iketleeleditse go utlwa, bo tletse kutlwelobotlhoko le maungo a a molemo, . . . ga bo itimokanye.” (Jakobe 3:17) Seno ga se bolele gore batho ba ba ratang dilo tsa semoya ga ba bue ka sepe se sele fa e se dilo tsa semoya fela. Tota nnyaa! Akanya fela ka ditlhogo tse dintsi tse di kgatlhang tse go tlotliwang ka tsone mo dikgatisong tsa Watch Tower tse di jaaka tse di mo makasineng wa Tsogang! Di na le ditlhogo tse dintsi tse di molemo tse go ka tlotliwang ka tsone, mme fa re kgatlhegela ditlhogo tse dintsi, re a bo re bontsha gore re rata botshelo le tiro ya diatla tsa ga Jehofa.
Fela jaaka motshameki yo o itseng tenese a oketsa botswerere jwa gagwe ka go tshameka le batshameki ba bangwe ba ba e itseng, ditsala tse di molemo le tsone di re aga mo mogopolong, mo maikutlong le mo semoyeng. Mo letlhakoreng le lengwe, ditsala tse di bosula di ka dira gore re nne baitimokanyi ka go re kgothaletsa go tshela matshelo a a gabedi. A bo go le molemo jang ne go itumelela go nna le segakolodi se se phepa mmogo le go itlotla!
Bangwe ba ba Ileng ba Solegelwa Molemo
Batho ba le bantsi ba fitlhela go se thata go ithuta dithuto tsa Baebele le melao ya yone ya boitsholo le dilo tsa semoya. Le fa go ntse jalo, se se thata ke go dira dilo tseno. Jaaka dikai tse di latelang di bontsha, tlhotlheletso e e molemo ya balekane e ka re thusa go direla Jehofa ka moya otlhe.
Mosupi mongwe yo o mo bodireding jwa nako e e tletseng le mosadi wa gagwe o ne a bolela gore dikao tsa balekane ba gagwe di ne tsa mo tlhotlheletsa gore a ipeele mekgele mo botshelong. Fa a ntse a gola, o ne a tshwanelwa ke go itshokela ditlhotlheletso tse di sa siamang. Mme o ne a tlhopha ditsala tse di neng di mo kgothaletsa go nna ka metlha mo bodireding le go nna gone mo dipokanong tsa Bokeresete. Go ngaparela ditsala tse di ntseng jalo go ne ga mo thusa gore a gole mo semoyeng.
Mosupi yo mongwe o ne a kwala jaana: “Fa nna le mosadi wa me re sena go nyalana, re ne ra fudugela kwa phuthegong e e neng e na le banyalani ba ba batlileng ba lekana le rona ba e neng e le babulatsela ba ka metlha. Sekao sa bone se re tlhotlheleditse gore re tsenele bodiredi jwa nako e e tletseng. Morago ga moo le rona re ne ra batla go nna le moya wa go nna babulatsela mo phuthegong. Ka ntlha ya seo, batho ba le bantsi ba ne ba nna babulatsela le rona.”
Go nna tsala ya batho ba ba nang le mekgele ya puso ya Modimo go ka dira gore go ikobela Jehofa go nne motlhofo. Ke tsela e nngwe e tlhotlheletso e e molemo ya balekane e thusang ka yone. Mosupi mongwe yo o neng a simolola bodiredi jwa nako e e tletseng fa e sa le lekawana mme moragonyana a nna molebedi yo o etang, jaanong o direla kwa go e nngwe ya diofisi tsa makala a Mokgatlho wa Watch Tower. O kwala jaana: “Dingwe tsa dilo tse ke sa di lebaleng tsa bogologolo fa ke ne ke sa ntse ke le ngwana e bile ke di rata thata, ke fa re ne re etelwa ke batlhanka ba nako e e tletseng kwa gae. Go ne go aga go na le setulo se se emetseng moeng yo o neng a ka tla go ja dijo le rona. Molebedi mongwe wa potologo o ne a mpha kgetsana gore ke e dirise mo go neeleng bosupi fa ke ne ke na le dingwaga di le lesome. Ke sa ntse ke rata kgetsana eno le gompieno.”
Mosupi yono o oketsa jaana fa a ne a bua ka nako ya fa a sa le mo dingwageng tsa gagwe tsa bolesome: “Makawana a le mantsi mo phuthegong a ne a batla go dira ditiro tsa phuthego, mme dikao tsa bone di ne tsa tlhotlheletsa bangwe ba rona gore re rate go dira se se tshwanang.” Fela jaaka letlhogela, balekane ba ba molemo ba ne ba thusa mosha yono go gola go nna monna wa Mokeresete yo o tshwanang le setlhare se se tsepameng. Batsadi, a lo laletsa batho ba ba ka tlhotlheletsang le go aga bana ba lona ka tsela e e siameng kwa magaeng a lona?—Malaki 3:16.
Ke boammaaruri gore ga se mongwe le mongwe wa rona yo o ka nnang le seabe mo bodireding jwa nako e e tletseng jaaka batho ba ba umakilweng fano. Mme rotlhe re ka ithuta go rata Jehofa ‘ka pelo yotlhe ya rona, moya otlhe le ka mogopolo otlhe.’ (Mathaio 22:37) Tsela e re tlhophang balekane ka yone e botlhokwa thata gore re nne le lorato lo lo ntseng jalo, mme ka gone, le mo ditebelelong tsa rona tsa botshelo jo bo sa khutleng.
Mopesalema o ne a re neela molaomotheo o o motlhofo mme o le molemo gore re atlege mo botshelong: “Go sego monna yo o sa tsamayeng mo kgakololong ya baikepi, le fa e le go ema mo tseleng ya baleofi, le fa e le go dula mo setulong sa basotli. Go itumela ga gagwe go mo molaong wa ga Jehofa; mme o akanya mo molaong wa gagwe motshegare le bosigo. O tlaa nna jaaka setlhare se se tlhomilweng mo dinokaneng tsa metsi, se se ungwang loungo lwa sone mo motlheng wa sone, se lekakaba la sone le lone le se keng le swaba; mme le fa e le eng se o se dirang se tlaa segofala.”—Pesalema 1:1-3.
A bo e le tlhomamisetso e e molemo jang ne! Le mororo re sa itekanela e bile re dira diphoso, re tla atlega mo botshelong fa re letla Jehofa a re kaela le fa re dirisa ka botlalo tlhotlheletso e e molemo ya balekane e re e filweng ke Modimo—‘lesomo lotlhelotlhe la bakaulengwe ba rona mo lefatsheng.’—1 Petere 5:9.
[Setshwantsho mo go tsebe 24]
Phuthego e na le tlhotlheletso e e molemo ya balekane
[Setshwantsho mo go tsebe 25]
Batsadi, kgothaletsang bana ba lona go tsalana le balekane ba ba agang