Melemo ya go Rata Lefoko la Modimo

“O [rate botlhale], mme bo tla go dibela. . . . Bo tla go galaletsa ka gonne o bo tlamparela.”—DIANE 4:6, 8, NW.

1. Go rata Lefoko la Modimo tota go akaretsa eng?

GO BOTLHOKWA thata gore Mokeresete a bale Baebele. Le fa go ntse jalo, go e bala ka bogone fela ga go bontshe gore motho o rata Lefoko la Modimo. Go tweng fa motho a bala Baebele mme a bo a dira dilo tse Baebele e di kgalang? Ga go pelaelo gore, ga a rate Lefoko la Modimo ka tsela e mokwadi wa Pesalema 119 a neng a le rata ka yone. Go rata Lefoko la Modimo go ne ga dira gore a tshele ka tsela e e dumalanang le ditaelo tsa lone.—Pesalema 119:97, 101, 105.

2. Ke melemo efe e re e bonang ka ntlha ya botlhale jo bo tswang mo Lefokong la Modimo?

² Go tshela ka tsela e e dumalanang le Lefoko la Modimo go tlhoka motho gore gangwe le gape a fetole tsela ya gagwe ya go akanya le e a tshelang ka yone. Go dira jalo go bontsha gore motho o na le botlhale jwa bomodimo jo bo kayang go dirisa kitso le temogo tse a nnang le tsone ka ntlha ya go ithuta Baebele ka tsela e e molemo. “[Rata botlhale] mme bo tla go dibela. Bo tseele kwa godimo, mme bo tla go godisa. Bo tla go galaletsa ka gonne o bo tlamparela. Bo tla naya tlhogo ya gago serwalo sa bontle jo bo gogelang sa dithunya tse di tshophilweng; bo tla baya serwalo sa bontle mo go wena.” (Diane 4:6, 8, 9, NW) A bo e le kgothatso e e molemo jang ne ya gore re rate Lefoko la Modimo mme le re kaele! Ke mang yo o sa batleng go dibelwa, go tseelwa kwa godimo le go galalediwa?

Go Dibelwa mo Dikotsing Tse di Nnelang Ruri

3. Ke ka ntlha yang fa Bakeresete ba tlhoka go dibelwa go feta le fa e le leng pele, mme ba tshwanetse go dibelwa mo go mang?

³ Motho a ka dibelwa jang ke botlhale jo a nnang le jone ka ntlha ya go ithuta le go dirisa Lefoko la Modimo? Selo sengwe se se botlhokwa ke gore, bo mo dibela mo go Satane Diabolo. Jesu o ne a ruta balatedi ba gagwe gore ba rapelele gore ba gololwe mo go yo o bosula, e bong Satane. (Mathaio 6:13) Gompieno go botlhokwa thata gore re akaretse kopo eno mo dithapelong tsa rona. Satane le badimona ba gagwe ba ne ba lelekwa kwa legodimong morago ga 1914, mme seo sa dira gore Satane a tlale “bogale jo bogolo, ka a itse gore o na le lobaka lo lokhutshwane lwa nako.” (Tshenolo 12:9, 10, 12) Mo nakong eno e e khutshwafetseng, o tshwanetse a bo a tuka bogale le e leng go feta fa a ntse a lwa ntwa e a sa atlegeng mo go yone kgatlhanong le “ba ba bolokang ditaolo tsa Modimo e bile ba na le tiro ya go naya bosupi ka Jesu.”—Tshenolo 12:17.

4. Bakeresete ba dibelwa jang mo dikgatelelong le mo dirung tsa ga Satane?

⁴ Satane ka ntlha ya kgalefo ya gagwe o tswelela pele go feretlha badiredi bano ba Bakeresete le go dira gore ba bogisiwe setlhogo kana go ba bakela dikgoreletsi tse dingwe mo tirong ya bone. Gape o batla go gogela baboledi ba Bogosi gore ba tlhome megopolo ya bone thata mo go batleng go tlotlomala ka tsela ya lefatshe, go rata botshelo jwa boiketlo, go nna le dikhumo le go rata menate go na le go tlhoma mogopolo mo tirong ya go rera ka Bogosi. Ke eng se se ka dibelang batlhanka ba ba ikanyegang ba Modimo go ineelela dikgatelelo tsa ga Satane kana go wela mo dirung tsa gagwe? Ke boammaaruri gore, go rapela, go nna le kamano e kgolo ya botsala le Jehofa le go dumela ditsholofetso tsa gagwe o sa belaele, go botlhokwa. Mme gone, dilo tseno tsotlhe di tsamaelana le go nna le kitso ya Lefoko la Modimo le go ikemisetsa go sekegela tsebe dikgakololo tsa lone. Motho o bona dikgakololo tseno ka go bala Baebele le dikgatiso tse di tlhalosang Baebele, go nna gone kwa dipokanong tsa Bokeresete, go sekegela tsebe kgakololo ya Dikwalo e e tswang mo modumedingmmogo, kana ka go tlhatlhanya ka melaometheo e moya wa Modimo o re gopotsang yone.—Isaia 30:21; Johane 14:26; 1 Johane 2:15-17.

5. Botlhale jo bo ikaegileng ka Lefoko la Modimo bo re dibela ka ditsela dife?

⁵ Batho ba ba ratang Lefoko la Modimo ba dibelwa ka ditsela tse dingwe. Ka sekai, ba tila mathata a maikutlo le malwetse a a bakwang ke dilo tse di jaaka go se dirise diokobatsi sentle, go goga le boitsholo jo bo maswe jwa tlhakanelodikobo. (1 Bakorintha 5:11; 2 Bakorintha 7:1) Ga ba ipakele mathata a go se tshedisane sentle ka go sebana kana go tlhabana ka mafoko a a sa bontsheng bopelonomi. (Baefeso 4:31) E bile ga ba nne le bothata jwa go tsenwa ke dipelaelo ka ntlha ya go inaakanya le difilosofi tse di tsietsang tsa botlhale jwa lefatshe leno. (1 Bakorintha 3:19) Ka ntlha ya go rata Lefoko la Modimo, ba dibelwa mo dilong tse di ka senyang botsala jwa bone le Modimo le go latlhegelwa ke tsholofelo ya botshelo jo bo sa khutleng. Ba semeletse mo tirong ya go thusa baagelani ba bone go nna le tumelo mo ditsholofetsong tse di molemo tse di fitlhelwang mo Baebeleng, ka go itse gore ka go dira jalo ba tla ‘ipoloka ba bo ba boloka le ba ba ba reetsang.’—1 Timotheo 4:16.

6. Botlhale jo bo tswang mo Lefokong la Modimo bo ka re dibela jang tota le fa re le mo maemong a a thata?

⁶ Ke boammaaruri gore, mongwe le mongwe wa rona—tota le batho ba ba ratang Lefoko la Modimo—o welwa ke “nako le tiragalo e e sa bonelwang pele.” (Moreri 9:11, NW) Ga re ka ke ra tila kgang ya gore bangwe ba rona ba tla welwa ke masetlapelo a tlholego, malwetse a a masisi, dikotsi kana go swa pele ga nako. Le fa go ntse jalo, re a dibelwa. Ga go na masetlapelo ape a a ka fekeetsang motho yo o ratang Lefoko la Modimo go ya go ile. Ka gone, ga re a tshwanela go itshwenya thata ka se se ka diregang mo isagweng. Fa re sena go tsaya dikgato tsotlhe tse di tlhokegang go itshireletsa, go molemo go tlogelela Jehofa dilo mme re se ka ra letla gore go sa tlhomamang ga botshelo gompieno go re tlhobaetse thata. (Mathaio 6:33, 34; Bafilipi 4:6, 7) Se lebale tsholofetso e e tlhomameng ya tsogo le ya botshelo jo bo botoka fa Modimo a “dira dilo tsotlhe disha.”—Tshenolo 21:5; Johane 11:25.

Itshupe o le ‘Mmu o o Molemo’

7. Ke setshwantsho sefe se Jesu a neng a se bolelela boidiidi jo bo neng bo tlile go mo reetsa?

⁷ Setshwantsho sengwe sa ga Jesu se ne sa gatelela kafa go leng botlhokwa ka teng go nna le pono e e siameng ka Lefoko la Modimo. E ne ya re fa Jesu a ntse a bolela dikgang tse di molemo go ralala Palesetina yotlhe, boidiidi jwa batho bo ne bo kgobokana go tla go mo reetsa. (Luke 8:1, 4) Le fa go ntse jalo, ga se botlhe ba ba neng ba rata Lefoko la Modimo ka mmatota. Ga go pelaelo gore, ba le bantsi ba ne ba tla go mo reetsa ka gonne ba ne ba batla go bona dikgakgamatso kana ba kgatlhiwa ke tsela ya gagwe e e molemo ya go ruta. Ke gone ka moo Jesu a ileng a bolelela boidiidi joo setshwantsho seno: “Mojadi o ne a tswa a ya go jala peo ya gagwe. Ebu, ya re a ntse a jala, nngwe ya yone ya wela go bapa le tsela mme ya gatakwa, mme dinonyane tsa legodimo tsa e ja tsa e fetsa. E nngwe ya wela mo godimo ga lefika, mme, morago ga go tlhoga, ya omelela ka ntlha ya go bo e se na bongola. E nngwe ya wela mo mitlweng, mme mitlwa e e neng ya gola le yone ya e hupetsa. E nngwe ya wela mo mmung o o molemo, mme, fa e sena go tlhoga, ya ungwa maungo go menagane ga lekgolo.”—Luke 8:5-8.

8. Mo setshwantshong sa ga Jesu, peo ke eng?

⁸ Setshwantsho sa ga Jesu se ne se bontsha gore batho ba ne ba tla tsibogela dikgang tse di molemo ka ditsela tse di sa tshwaneng, go ikaegile ka maemo a pelo ya motho. Peo e e jalwang ke “lefoko la Modimo.” (Luke 8:11) Kana, jaaka fa pego e nngwe ya setshwantsho seno e e baya, peo ke “lefoko la bogosi.” (Mathaio 13:19) Jesu o ne a ka dirisa epe fela ya dipolelwana tseno ka gonne setlhogo sa Lefoko la Modimo ke Bogosi jwa Modimo jo bo busiwang ke Jesu Keresete e le Kgosi, jo ka jone Jehofa a tla tlotlomatsang bolaodi jwa gagwe le go itshepisa leina la gagwe. (Mathaio 6:9, 10) Ka jalo he, peo ke molaetsa wa dikgang tse di molemo o o mo Lefokong la Modimo, Baebele. Basupi ba ga Jehofa ba gatelela molaetsa ono wa Bogosi fa ba ntse ba jala peo ka go etsa Mojadi wa pele e bong Jesu Keresete. O tsibogelwa jang?

9. Dipeo tseno di tshwantshetsa eng, (a) e e welang fa thoko ga tsela? (b) mo godimo ga lefika? (c) mo mitlweng?

⁹ Jesu o ile a re peo e nngwe e wela fa thoko ga tsela mme e a gatakwa. Fano go buiwa ka batho ba ba tshwaregileng thata mo peo ya Bogosi e sa kgoneng go mela medi mo dipelong tsa bone. Pele ga ba simolola go rata Lefoko la Modimo, “Diabolo [o a tla] a tseye lefoko mo dipelong tsa bone e le gore ba tle ba se ka ba dumela mme ba bolokwa.” (Luke 8:12) Peo e nngwe e wela mo godimo ga lefika. Fano go buiwa ka batho ba ba kgatlhegelang molaetsa wa Baebele mme ba bo ba sa o dumelele gore o ame dipelo tsa bone. Fa ba rakana le diteko kana fa ba ketefalelwa ke go dirisa kgakololo ya Baebele, “ba a wa” ka gonne ga ba na modi. (Luke 8:13) Go na gape le ba bangwe ba ba utlwang lefoko mme ba bo ba fekeediwa ke “ditlhobaelo le dikhumo le menate ya botshelo.” Kgabagare, fela jaaka semela se se hupeditsweng ke mitlwa, “ba hupediwa ka mo go feletseng.”—Luke 8:14.

10, 11. (a) Mmu o o molemo o tshwantshetsa bomang? (b) Ke eng se re tshwanetseng go se dira gore re “tshegetse” Lefoko la Modimo mo dipelong tsa rona?

¹⁰ Kwa bofelong, go na le peo e e welang mo mmung o o molemo. Fano go buiwa ka batho ba ba amogelang molaetsa “ka pelo e e molemomogolo le e e molemo.” Re ka lebelela gore mongwe le mongwe wa rona a itseye a wela mo setlhopheng seno. Le fa go ntse jalo, pono ya Modimo ke yone e e kgaolang kgang. (Diane 17:3; 1 Bakorintha 4:4, 5) Lefoko la gagwe le bolela gore go nna ga rona le “pelo e e molemomogolo le e e molemo” ke selo se re se supang ka ditiro tsa rona go tloga jaanong go fitlha re swa kana go fitlha Modimo a fedisa tsamaiso eno e e boikepo ya dilo. Fa e le gore re ile ra simolola go tsibogela molaetsa wa Bogosi ka tsela e e molemo, seo se molemo. Le fa go ntse jalo, batho ba ba nang le pelo e e molemo ba utlwa Lefoko la Modimo ba bo “ba le tshegetse mme ba ntshe maungo ka boitshoko.”—Luke 8:15.

¹¹ Tsela e le nosi fela ya gore re tshegetse Lefoko la Modimo mo dipelong tsa rona ke ka go le bala le go le ithuta re le nosi kana fa re kopane le badumedikarona. Seno se akaretsa go solegelwa molemo ke dijo tsa semoya tse re tlamelwang ka tsone ke motswedi o o tlhomilweng go tlamela balatedi ba boammaaruri ba ga Jesu ka dilo tsa semoya. (Mathaio 24:45-47) Seo se tlhotlheletsa batho ba ba tshegetsang Lefoko la Modimo mo dipelong tsa bone gore ka lorato ba “ntshe maungo ka boitshoko.”

12. Ke maungo afe a re tshwanetseng go nna le one ka boitshoko?

¹² Ke maungo afe a mmu o o molemo o a tlhagisang? Ka tlholego fela, dipeo di gola go nna dimela tse di ungwang maungo a a nang le one mofuta oo wa dipeo, tse di ka nnang tsa anamisiwa gore di ungwe maungo a mangwe. Go ntse jalo le ka batho ba ba nang le dipelo tse di molemo, peo ya lefoko e a mela mo go bone e dira gore ba gatele pele semoyeng go fitlha le bone ba kgona go jala peo mo dipelong tsa batho ba bangwe. (Mathaio 28:19, 20) Ba dira tiro eno ya bone ya go jala ka boitshoko. Jesu o ile a bontsha kafa boitshoko bo leng botlhokwa ka teng fa go jalwa fa a ne a re: “Mme yo o itshokileng go ya bokhutlong ke ene yo o tla bolokwang. Mme dikgang tse di molemo tseno tsa bogosi di tla rerwa mo lefatsheng lotlhe le le nang le banni gore e nne bosupi mo merafeng yotlhe; mme go tswa foo bokhutlo bo tla tla.”—Mathaio 24:13, 14.

Go “Ntsha Maungo mo Tirong Nngwe le Nngwe e e Molemo”

13. Ke thapelo efe e Paulo a neng a e rapela e e neng e amanya go nna le maungo le kitso ya Lefoko la Modimo?

¹³ Moaposetoloi Paulo le ene o ile a bua ka botlhokwa jwa go nna le maungo e bile o ile a amanya go nna le maungo le Lefoko la Modimo. O ile a rapela gore badumedikaene ba “tladiwe ka kitso e e leng yone ya thato ya [Modimo] ka botlhale jotlhe le go tlhaloganya ga semoya, e le gore [ba] tsamaye kafa go tshwanetseng Jehofa gore [ba] mo itumedise ka botlalo jaaka [ba] tswelela [ba] ntsha maungo mo tirong nngwe le nngwe e e molemo.”—Bakolosa 1:9, 10; Bafilipi 1:9-11.

14-16. Go dumalana le thapelo ya ga Paulo, batho ba ba ratang Lefoko la Modimo ba tlhagisa maungo afe?

¹⁴ Ka jalo Paulo o ne a bontsha gore go nna le kitso ya Baebele ka bogone fela ga go a lekana. Go na le moo, go rata Lefoko la Modimo go re tlhotlheletsa gore re “tsamaye kafa go tshwanetseng Jehofa” ka go tswelela pele re “ntsha maungo mo tirong nngwe le nngwe e e molemo.” Tiro efe e e molemo? Tiro ya go rera dikgang tse di molemo tsa Bogosi ke tiro e kgolo e e dirwang ke Bakeresete mo malatsing ano a bofelo. (Mareko 13:10) Mo godimo ga moo, batho ba ba ratang Lefoko la Modimo ba leka ka bojotlhe gore ba eme tiro eno nokeng ka metlha ka madi. Ba itumelela tshiamelo eno thata ka gonne ba itse gore “Modimo o rata monei yo o thamileng.” (2 Bakorintha 9:7) Meneelo ya bone e dirisediwa go duelela ditshenyegelo tsa dikago tsa Bethele tse di fetang lekgolo tse tiro ya go rera ka Bogosi e kaelwang go tswa mo go tsone e bile go gatisiwa Dibaebele le dibuka tsa Baebele mo go dingwe tsa tsone. Gape meneelo ya bone e dirisediwa go duelela ditshenyegelo tsa dikopano tse dikgolo tsa Bokeresete le go romela balebedi ba ba etang, barongwa, le bareri ba bangwe ba nako e e tletseng.

¹⁵ Ditiro tse dingwe tse di molemo di akaretsa go agiwa le go tlhokomelwa ga dikago tsa kobamelo ya boammaaruri. Go rata Lefoko la Modimo go tlhotlheletsa baobamedi ba gagwe go tlhomamisa gore ga ba tlogele Diholo Tsa Dikopano le Diholo Tsa Bogosi di sa tlhokomelwa. (Bapisa Nehemia 10:39.) E re ka leina la Modimo le kwadilwe mo dikagong tse di ntseng jalo, go botlhokwa thata gore di bolokwe di le phepa e bile di le dintle mo teng le kwa ntle le gore ba ba obamelang mo go tsone ba nne le boitshwaro jo bo siameng. (2 Bakorintha 6:3) Bakeresete ba bangwe ba kgona go dira go le gontsinyana. Go rata Lefoko la Modimo go ba tlhotlheletsa go tsamaya dikgala tse ditelele go nna le seabe mo go ageng mafelo a masha a kobamelo kwa dikarolong tsa lefatshe tse di tlhokang thuso thata ka ntlha ya khumanego kana go tlhaela ga babereki ba ba nang le bokgoni.—2 Bakorintha 8:14.

¹⁶ Go “ntsha maungo mo tirong nngwe le nngwe e e molemo” gape go akaretsa go dira maikarabelo a lelapa le go bontsha go amega ka Bakeresetekarona. Go rata Lefoko la Modimo go re tlhotlheletsa go ela tlhoko dilo tse “ba ba amanang le rona mo tumelong” ba di tlhokang le “go itlwaetsa [go tshela ka] boineelo jwa bomodimo mo [matlong a rona].” (Bagalatia 6:10; 1 Timotheo 5:4, 8) Malebana le kgang eno, go molemo gore re etele ba ba lwalang le go gomotsa ba ba mo khutsafalong. A bo bagolwane ba phuthego le ba Dikomiti Tsa Puisano le Dikokelo ba dira tiro e e molemo jang ne mo go thuseng batho ba ba lebaneng le dikgwetlho tsa kalafi! (Ditiro 15:29) Gape go na le masetlapelo a a ntseng a oketsega—mangwe e le a tlholego mme a mangwe e le a a bakwang ke boeleele jwa batho. Ka thuso ya moya wa Modimo, Basupi ba ga Jehofa ba itiretse leina le le molemo mo dikarolong tse dintsi tsa lefatshe ka go tlamela badumedikabone le batho ba bangwe ba ba wetsweng ke masetlapelo kana dikotsi ka dithuso tsa namolo. Dilo tseno tsotlhe ke maungo a a molemo a a tlhagisiwang ke batho ba ba ratang Lefoko la Modimo.

Melemo e Megolo ya mo Isagweng

17, 18. (a) Ke eng se se ntseng se dirwa ka ntlha ya tiro ya go jala peo ya Bogosi? (b) Ke ditiragalo dife tse di tla fetolang lefatshe thata tse batho ba ba ratang Lefoko la Modimo ba tla di bonang?

¹⁷ Go jalwa ga peo ya Bogosi go ntse go tlhagisa melemo e mentsi mo bathong. Mo dingwageng tsa bosheng jaana, ngwaga le ngwaga batho ba ba fetang 300 000 ba ntse ba letla gore molaetsa wa Baebele o mele mo dipelong tsa bone gore ba bo ba neele matshelo a bone mo go Jehofa le go bontsha seo ka kolobetso ya mo metsing. Ba tlile go nna le isagwe e e molemo ruri!

¹⁸ Batho ba ba ratang Lefoko la Modimo ba a itse gore Jehofa Modimo o tla tloga a tsaya kgato ya go tlotlomatsa leina la gagwe. “Babelona o Mogolo,” mmusomogolo wa lefatshe lotlhe wa bodumedi jwa maaka, o tla senngwa. (Tshenolo 18:2, 8) Go tswa foo, batho ba ba ganang go tshela ka tsela e e dumalanang le Lefoko la Modimo, ba tla bolawa ke Kgosi, Jesu Keresete. (Pesalema 2:9-11; Daniele 2:44) Morago ga moo, Bogosi jwa Modimo bo tla namola batho go ya go ile mo bokebekweng, dintwa le masetlapelo a mangwe. Go tla bo go sa tlhole go tlhokega gore batho ba gomodiwe ka ntlha ya kutlobotlhoko, malwetse le loso.—Tshenolo 21:3, 4.

19, 20. Batho ba eleruri ba ratang Lefoko la Modimo ba tlile go nna le isagwe e e molemo go le kana kang?

¹⁹ A bo batho ba ba ratang Lefoko la Modimo ba tla kgona go dira ditiro tse di molemo jang ne! Bafalodi ba Haramagedona ba tla simolola ka tiro e e monate ya go fetola lefatshe go nna paradaise. Ba tla nna le tshiamelo e e itumedisang ya go baakanyetsa baswi dilo tse ba tla di tlhokang, ba gone jaanong ba ikhuditseng mo mabitleng e bile Modimo a sa ntse a ba gakologelwa mme e le ba ba nang le tsholofelo ya go tsosiwa ka nako ya tsogo ya baswi. (Johane 5:28, 29) Ka nako eo, ditaelo tse di molemo di tla bo di romelelwa baagi ba lefatshe di tswa kwa go Morena Molaodimogolo, Jehofa, a di romela ka Morwawe yo o tlotlomaditsweng, e bong Jesu Keresete. ‘Dikwalomomeno di tla bulwa,’ di bolela ditaelo tsa ga Jehofa malebana le go tshela mo lefatsheng le lesha.—Tshenolo 20:12.

²⁰ Mo nakong e Jehofa a e tlhomileng, setlhopha sotlhe sa Bakeresete ba ba ikanyegang ba ba tloditsweng se tla tlhatlosediwa kwa legodimong go bona tuelo ya bone, gore e nne “baruaboswammogo le Keresete.” (Baroma 8:17) Mo Pusong ya Dingwaga Tse di Sekete ya ga Keresete, batho botlhe ba ba ratang Lefoko la Modimo mo lefatsheng ba tla dirwa gore ba itekanele sentle mo mogopolong le mo mmeleng. Morago ga teko ya bofelo, fa ba setse ba supile gore ba a ikanyega, ba tla duelwa ka botshelo jo bo sa khutleng mme ba tla itumelela go nna le “kgololesego e e galalelang ya bana ba Modimo.” (Baroma 8:21; Tshenolo 20:1-3, 7-10) A bo e tla bo e le nako e e monate jang ne! Ee ruri, e ka ne Jehofa o re abetse tsholofelo ya botshelo jwa kwa legodimong kana jwa mo lefatsheng, go nna le lorato lo lo nnetseng ruri ka Lefoko la gagwe le go ikemisetsa go tshela ka tsela e e dumalanang le botlhale jwa bomodimo go tla re dibela. Mme mo isagweng go tla re ‘galaletsa ka gonne re bo tlamparela.’—Diane 4:6, 8, NW.

A o Ka Tlhalosa?

◻ Go rata Lefoko la Modimo go tla re dibela jang?

◻ Peo ya setshwantsho sa ga Jesu ke eng, mme e jalwa jang?

◻ Re ka itshupa go nna ‘mmu o o molemo’ jang?

◻ Ke melemo efe e batho ba ba ratang Lefoko la Modimo ba ka e letelang?

[Setshwantsho mo go tsebe 16]

Peo ya setshwantsho sa ga Jesu e emela molaetsa wa dikgang tse di molemo tsa bogosi tse di fitlhelwang mo Lefokong la Modimo

[Motswedi wa Setshwantsho]

Garo Nalbandian

[Setshwantsho mo go tsebe 17]

Basupi ba ga Jehofa ba etsa Mojadi yo Mogolo

[Ditshwantsho mo go tsebe 18]

Bafalodi ba Haramagedona ba tla itumelela maungo a lefatshe