Pego ya Baboledi ba Bogosi

India—“Kutlwano Gare ga Batho ba ba Farologaneng”

“KUTLWANO Gare ga Batho ba ba Farologaneng” ke moano o o tumileng o o dirisiwang go tlhalosa go kopakopana ga ditšhabatšhaba kwa India. Go dira gore go nne le kutlwano mo nageng eno e kgolo e e nang le dingwao, dipuo, bodumedi, tshimologo ya ditso, meaparo le dijo tse di farologaneng ga se kgetsi e potlana. Le fa go ntse jalo, kutlwano e e ntseng jalo e ka bonwa kwa ofising ya tsamaiso ya Basupi ba ga Jehofa kwa India, le fa gone baithaopi ba ba nnang koo e bile ba bereka teng ba tswa kwa dinageng le kwa dikgaolong di le dintsi tse di kopantsweng mme ba bua dipuo di le dintsi tse di farologaneng.

• Ikopanye le Rajrani—lekgarejana le le tswang kwa Punjab, kwa bokonebophirima jo bo kgakala jwa India. Fa Rajrani a sa ntse a tsena sekolo, mongwe wa baithutikaene o ne a simolola go ithuta Baebele le Basupi ba ga Jehofa. Mosetsana yo mmotlana yono o ne a leka go dira gore Rajrani a kgatlhegele Baebele. E re ka moithuti yono a ne a sa itse Seesemane sentle, mme makasine wa Tora ya Tebelo o ne o seyo ka Se-Punjabi ka nako eo, o ne a kopa gape Rajrani gore a mo thuse ka go mo ranolela diteng tsa makasine ono. Se Rajrani a neng a se bala mo makasineng wa Tora ya Tebelo se ile sa mo ama thata jaana mo e leng gore le mororo batsadi ba gagwe ba ne ba mo ganetsa, o ne a gatela pele go fitlha a bo a ineela mo go Jehofa Modimo. Jaaka a direla kwa Bethele gompieno, o dira sone selo se se ileng sa bula matlho a gagwe gore a bone boammaaruri. O ranolela dikgatiso tsa Bokeresete mo puong ya Se-Punjabi!

• Akanya gape le ka Bijoe, yo o tswang kwa karolong e nngwe ya India—kwa nageng e e kwa borwabophirima ya Kerala. Bijoe o ne a kobiwa kwa sekolong se segolwane ka ntlha ya boemo jwa gagwe jwa boitlhaodi ka nako ya meletlo ya bosetšhaba. Morago ga kgetsi ya kgotlatshekelo e e ileng ya tsaya nako e telele e e neng ya felela ka phenyo e kgolo ya kobamelo e e itshekileng, Bijoe o ne a boela sekolong.a O bile a bo a ya le kwa kholetšheng. Le fa go ntse jalo, boitsholo jo bo sa siamang jo bo neng bo tletse koo bo ile jwa tshwenya segakolodi sa gagwe, ka gone, o ne a tlogela a le mo karolong ya ntlha ya ngwaga. Gone jaanong morago ga dingwaga di le lesome a le kwa Bethele, o akanya gore o solegetswe molemo thata ke go nna leloko la lelapa la Bethele la batho ba ditšhaba tse di farologaneng mme ba utlwana go na le fa a ka bo a ile a latelela thuto e e kwa godimo.

• Norma le Lily ka bobedi ba na le dingwaga di le 70 mme ba na le dingwaga di le dintsi e le batlholagadi. Mongwe le mongwe wa bone o weditse dingwaga tse di fetang 40 mo tirelong ya nako e e tletseng. Lily o setse a feditse dingwaga di ka nna 20 a dira mo lekaleng e le moranodi wa puo ya Se-Tamil. Norma o ne a tla Bethele dingwaga di le 13 tse di fetileng fa a sena go swelwa ke monna wa gagwe. Mo godimo ga gore e nne dikao tsa babereki ba ba tlhoafetseng le ba ba matsetseleko, ba tlhotlheletsa kutlwano mo lelapeng lotlhe la Bethele. Ba rata go amogela baeng e bile ba rata go tsalana le maloko a masha a lelapa, ba ba bolelela ka boipelo jwa dingwaga tse dintsi tsa botshelo jwa Bokeresete. Mme basha ba tsibogela seo ka go ba laletsa kwa dikamoreng tsa bone go nna le botsalano le bone le go ba thusa fa go tlhokega. A bo e le dikao tse di molemo ruri!

E re ka baithaopi bano ba kgonne go fenya mathata a a bakang dikgotlhang le go sa utlwane mo mafelong a mantsi, ba bereka mmogo ka boitumelo go direla ba bangwe e le maloko a lelapa la Bethele le le utlwanang kwa India.—Pesalema 133:1.

[Ntlha e e kwa tlase]

[Motswedi wa Setshwantsho mo go tsebe 8]

Background: Mountain High Maps® Copyright © 1997 Digital Wisdom, Inc.