Dipotso Tse di Tswang Kwa Babading
Go kolobelediwa baswi go kaya eng?
Fa moaposetoloi Paulo a ne a kwala ka tsogo ya ba ba yang kwa legodimong, o ne a kwala temana nngwe e e kgatlhang tota. Mo thanolong ya Baebele e e Boitshepo re bala jaana: “Fa go sa nna jalo, ba ba kolobelediwang baswi ba tlaa dirang? Fa baswi ba sa tsosiwe ka gope, ba tlaa ba ba kolobelediwe go reng?”—1 Bakorintha 15:29.
A Paulo fano o ne a akantsha gore batho ba ba tshelang ba tshwanetse go kolobediwa mo boemong jwa batho ba ba suleng ba sa kolobediwa? Go ka nna ga lebega go ntse jalo go ya ka thanolo eno ya Baebele le tse dingwe. Le fa go ntse jalo, go sekaseka ka kelotlhoko Dikwalo le Segerika sa ntlhantlha se Paulo a se dirisitseng go ka dira gore re akanye ka tsela nngwe e e farologaneng. Paulo o ne a raya gore Bakeresete ba ba tloditsweng ba kolobelediwa mo tseleng ya botshelo e e ka felelang ka gore ba swe ba ikanyega jaaka Keresete. Moragonyana, ba ne ba tla tsosiwa go nna dibopiwa tsa semoya fela jaaka ene.
Dikwalo di tshegetsa tlhaloso eno. Fa Paulo a ne a kwalela Baroma, o ne a re: “A ga lo itse gore rotlhe ba re neng ra kolobediwa mo go Keresete Jesu re ne ra kolobediwa mo losong lwa gagwe?” (Baroma 6:3) Mo lekwalong le Paulo a neng a le kwalela Bafilipi, o ne a bua ka ga gagwe a re: “Go tlhakanela mo dipogong tsa [ga Keresete], ke ineela mo losong lo lo tshwanang le lwa gagwe, go bona fa ka tsela nngwe ke ka fitlhelela tsogo ya pele ya baswi.” (Bafilipi 3:10, 11) Paulo o ne a bolela gore botshelo jwa molatedi yo o tloditsweng wa ga Keresete ke jwa go nna a ikanyega fa a lebane le teko, go lebana le loso letsatsi le letsatsi, le gore kgabagare a swe a ikanyega, go tswa foo a bo a tsosediwa kwa legodimong.
Re a lemoga gore ditemana tseno le tse dingwe tse di buang ka loso le batho ba ba kolobeditsweng, tota di bua ka batho ba ba tshelang ba ba setseng ba kolobeditswe e seng ba ba suleng. Gape, Paulo o ne a raya Bakeresete ka ene ba ba tloditsweng a re: “Lo ne lwa fitlhwa le ene mo kolobetsong ya gagwe, mme ka go nna le kamano le ene gape lo ne lwa tsosiwa mmogo ka tumelo ya lona mo go direng ga Modimo, yo o neng a mo tsosa mo baswing.”—Bakolosa 2:12.
Lefoko la Segerika hy·perʹ, le le ranotsweng ka gore “kolobelediwa” mo dithanolong tse di farologaneng tsa Baebele mo go 1 Bakorintha 15:29, gape le ka raya “ka boikaelelo jwa gore.” Ka jalo, go dumalana le ditemana tse dingwe tsa Baebele, Thanolo ya Lefatshe le Lesha ya Dikwalo Tse di Boitshepo e ranola temana eno sentle fa e re: “Ba tla dirang ba ba kolobediwang ka boikaelelo jwa gore ba nne ba ba suleng? Fa e le gore baswi ga ba na go tsosiwa ka gope, ke ka ntlha yang fa gape ba kolobediwa ka boikaelelo jwa gore ba nne jalo?”