Atamalana le Modimo
A go Na le Sengwe Se se Ka re ‘Kgaoganyang le Lorato Lwa Modimo’?
KE MANG yo o sa batleng go ratwa? Ke boammaaruri gore re a itumela fa re lemoga gore ba lelapa le ditsala ba a re rata. Le fa go ntse jalo, ka maswabi, botsala bo ka senyega motlhofo kgotsa jwa fela fa nako e ntse e ya kgotsa ka ntlha ya maemo mangwe. Batho ba ba re ratang ba ka nna ba re utlwisa botlhoko, ba re tlogela kgotsa le go se re amogele. Le fa go ntse jalo, go na le mongwe yo lorato lwa gagwe lo se kitlang lo fela. Lorato lo Jehofa Modimo a ratang baobamedi ba gagwe ka lone lo tlhalosiwa sentle mo go Baroma 8:38, 39.
Moaposetoloi Paulo a re: “Ke tlhatswegile pelo.” Ka eng? Ka gore ga go na sepe se se ka re ‘kgaoganyang le lorato lwa Modimo.’ Paulo ga a tlhalose fela ka tsela e ene a ikutlwang ka yone mme o tlhalosa ka tsela e le rona “re” ikutlwang ka yone—ke go re, batho botlhe ba ba direlang Modimo ka boikanyegi. Paulo o gatelela se a se buang ka go umaka dilo di le mmalwa tse di ka se kang tsa thibela Jehofa go rata batlhanka ba gagwe ba ba ineetseng.
“Le fa e le loso kgotsa botshelo.” Lorato lo Jehofa a ratang batho ba gagwe ka lone ga lo fele fa ba swa. Modimo o bontsha gore o rata batho bano ka go ba boloka mo mogopolong wa gagwe, mme o tla ba tsosetsa mo lefatsheng le lesha la tshiamo le le tlang. (Johane 5:28, 29; Tshenolo 21:3, 4) Go sa ntse go le jalo, lorato lo Modimo a ratang baobamedi ba gagwe ba ba ikanyegang ka lone ga lo fetoge go sa kgathalesege gore ba ka nna ba lebana le eng mo tsamaisong eno ya dilo.
“Kgotsa baengele kgotsa dipuso.” Batho ba ka tlhotlhelediwa motlhofo ke batho ba ba nang le taolo kgotsa dipuso tse di maatla, mme ga go a nna jalo ka Jehofa. Dibopiwa tsa semoya tse di maatla tse di jaaka moengele yo o neng a nna Satane, di ka se kgone go tlhotlheletsa Modimo gore a se ka a rata baobamedi ba gagwe. (Tshenolo 12:10) Le fa e le dipuso, tse di ka nnang tsa ganetsa Bakeresete ba boammaaruri, di ka se fetole tsela e Modimo a lebang batlhanka ba gagwe ka yone.—1 Bakorintha 4:13.
“Kgotsa dilo tse jaanong di leng fano kgotsa dilo tse di tlang.” Lorato lwa Modimo ga lo fele fa nako e ntse e tsamaya. Ga go na sepe se se ka diragalelang batlhanka ba gagwe gone jaanong kgotsa mo isagweng se se tla dirang gore Modimo a se ka a ba rata.
“Kgotsa maatla.” Paulo o umakile “baengele” le “dipuso”—mme jaanong o umaka “maatla.” Lefoko la Segerika le le dirisitsweng fano le na le bokao jo bo farologaneng. Go sa kgathalesege gore bokao jo bo siameng ke bofe, re tlhomamisegile ka selo se le sengwe: Ga go na maatla ape kwa legodimong kgotsa mo lefatsheng a a ka dirang gore Jehofa a se ka a rata batho ba gagwe.
“Kgotsa bogodimo kgotsa boteng.” Jehofa o rata batho ba gagwe go sa kgathalesege maemo a ba leng mo go one.
“Kgotsa sebopiwa le fa e le sefe se sengwe.” Fa Paulo a ne a bua mafoko ano a a akaretsang popo yotlhe o raya gore ga go na sepe gotlhelele se se ka kgaoganyang baobamedi ba ba ikanyegang le lorato lwa ga Jehofa.
Go farologana le lorato lwa batho, lo lo ka fetogang kgotsa lwa fela, lorato lo Modimo a ratang batho ba ba dumelang mo go ene ka lone ga lo fetoge; lo nnela ruri. Ruri go itse seno go re tlhotlheletsa go atamalana le Jehofa le go leka ka natla go bontsha gore re a mo rata.