Dikotsi Tsa Masetlapelo a Tlholego—Ke Eng Fe di Le Dintsi Jaana?

GO LEBEGA go buiwa thata ka dikotsi tsa masetlapelo mo dikgannyeng. Batho ba le bantsi go feta le fa e le leng pele, ba welwa ke dikotsi tse di farologaneng tsa masetlapelo. Go ya ka setheo sa Centre for Research on the Epidemiology of Disasters sa kwa Belgium, ka 2010 fela go ne ga nna le dikotsi tsa masetlapelo di le 373 tse di neng tsa bolaya batho ba le 296 000.

Palo ya dikotsi tsa masetlapelo tse di ileng tsa begiwa le yone e oketsegile thata mo masomeng a dingwaga a le mmalwa a a fetileng. Ka sekai, go tloga ka 1975 go ya go 1999, go ne ga begiwa dikotsi tsa masetlapelo tse di kafa tlase thata ga 300 ngwaga le ngwaga. Le fa go ntse jalo, go tloga ka 2000 go ya go 2010, palogare ya dikotsi tsa masetlapelo e ne e batlile e tshwara 400 ka ngwaga. Gongwe o ka tswa o le mongwe wa batho ba ba ipotsang go re, ‘Ke ka ntlha yang fa go na le dikotsi tse dintsi jaana tsa masetlapelo gompieno?’

Le fa gantsi batho ba tsaya dikotsi tse di ntseng jalo tsa masetlapelo e le “ditiro tsa Modimo,” tota seo ga se boammaaruri. Modimo ga se ene a bakang dikotsi tsa masetlapelo tse di amang batho ba le bantsi jaana gompieno. Le fa go ntse jalo, Baebele e ne ya bolelela pele gore go ne go tla nna le ditiragalo tsa masetlapelo mo motlheng wa rona. Ka sekai, re bala mafoko ano a ga Jesu mo go Mathaio 24:7, 8: “Go tla nna le ditlhaelo tsa dijo le dithoromo tsa lefatshe mo mafelong ka go latelana. Dilo tseno tsotlhe ke tshimologo ya ditlhabi tsa tlalelo.” Ke ka ntlha yang fa Jesu a ne a bolelela pele ditiragalo tseno, mme di kaya eng mo go rona?

Fa Morwa Modimo, Jesu, a ne a bua mafoko a a fa godimo, o ne a araba potso eno e a neng a e boditswe: “Sesupo e tla nna eng . . . sa bokhutlo jwa tsamaiso eno ya dilo?” (Mathaio 24:3) O ne a umaka dilo tse di farologaneng tse di neng di tla direga, go akaretsa dikotsi tsa masetlapelo tse di jaaka tse di umakilweng pelenyana. Go tswa foo, o ne a bua mafoko ano a a nang le bokao jwa botlhokwa: “Fa lo bona dilo tseno di diragala, itseng gore bogosi jwa Modimo bo gaufi.” (Luke 21:31) Ka jalo, dikotsi tseo tsa masetlapelo a tlholego di re lemotsha sengwe sa botlhokwa. Di lemotsha gore go tloga go direga diphetogo tse dikgolo mo bogautshwaneng.

Dilo Tse di Bakang Dikotsi Tsa Masetlapelo

Batho ba le bantsi ba sa ntse ba ipotsa go re, Fa e le gore Modimo ga se ene a bakang dikotsi tsa masetlapelo, di bakwa ke mang kgotsa ke eng? Re ka kgona go tlhaloganya karabo fa fela re lemoga boammaaruri jono jo bo botlhokwa jo bo umakwang mo Baebeleng: “Lefatshe lotlhe le namaletse mo maatleng a yo o boikepo.” (1 Johane 5:19) Temana eno e senola gore Modimo ga se ene a bakang maemo a a ngomolang pelo mo lefatsheng, mme gantsi a bakwa ke mmaba wa gagwe, “yo o boikepo”—yo gape Baebele e mmitsang “Diabolo.”—Tshenolo 12:9, 12.

Mmaba yono wa Modimo o tlhotlhelediwa ke moya wa bopelotshetlha gore a tseye batho ba se na mosola. E re ka lefatshe lotlhe le le mo taolong ya gagwe, o ile a tlhotlheletsa batho gore ba nne le moya oo. Tota e bile, Baebele e bua ka kgang eno fa e bolelela pele gore “mo metlheng ya bofelo” batho e tla nna “baithati, barati ba madi, baipegi, ba ba mabela.” (2 Timotheo 3:1, 2) Ka jalo, ga go gakgamatse go bo Diabolo a dirile gore go nne le tsamaiso ya lefatshe lotlhe e e engwang nokeng ke batho ba ba itshwarang jalo le ba ba dirang ditiro tse dingwe tse di sa amogelweng ke Modimo. O tlhotlheletsa batho gore ba nne pelotshetlha le go nna bogagapa, e leng dilo tse gantsi di ba tsenyang mo kotsing.

Tsamaiso e e bogagapa ya gompieno e rotloetsa dikotsi tsa masetlapelo ka tsela efe? Pego ya lekgotla la Ditšhaba Tse di Kopaneng e e malebana le dikotsi tsa masetlapelo tse di diregang mo lefatsheng lotlhe ya re: “Gantsi batho ba bantsi ba nna mo mafelong a a kotsi a a jaaka a a tshabelelwang ke merwalela. Gape go senngwa ga dikgwa le ditsobotla go dira gore tikologo e se ka ya tlhola e kgona go lebana le maemo a a kotsi. Mo godimo ga tseno tsotlhe, go na le kotsi ya go fetoga ga maemo a bosa le go oketsega ga metsi a lewatle mo go bakwang ke go oketsega ga digase tse di kotsi . . . tse di bakilweng ke ditiro tsa batho.” Le fa gone bontsi jwa “ditiro [tseno] tsa batho” go twe di tokafatsa maemo a tsa ikonomi, tota ke ditiro tsa moya wa bopelotshetlha le bogagapa o o anameng mo lefatsheng.

Ka gone, bontsi jwa baitse jaanong ba lemoga gore ditiro tse batho ba di dirang ba sa akanyetse, di okeditse ditlamorago tse di senyang tsa dikotsi tsa masetlapelo. Boammaaruri ke gore batho ba ema nokeng tsamaiso e Diabolo a e dirisang go oketsa pogo ya batho ka dikotsi tsa masetlapelo.

Ka jalo, re kgona go lemoga gore dikotsi tse dintsi tsa masetlapelo di bakwa ke ditiro tsa batho tsa go se akanyetse. Dikotsi dingwe tsa masetlapelo di ne di ka se senye thata jaana fa di ka bo di diragetse kwa lefelong le sele. Mo dikarolong di le dintsi tsa lefatshe, ditlamorago tsa dikotsi tsa masetlapelo a tlholego di ile tsa gakadiwa ke ditiro tsa boferefere tsa batho ba ba bosula kgotsa ke kgang ya gore bontsi jwa batho ba ile ba patelesega go nna mo mafelong a a kotsi ka ntlha ya go tlhoka tekatekano mo go tsa ikonomi le tsa loago mo go anameng mo lefatsheng gompieno. Gone ke boammaaruri gore batho ba bangwe ba welwa ke dikotsi tsa masetlapelo, e se ka ntlha ya phoso ya motho mongwe yo o rileng kgotsa go itlhokomolosa kotsi mme e le ka gonne “botlhe ba diragalelwa ke motlha le tiragalo e e sa bonelwang pele.”—Moreri 9:11.

Le fa lebaka e ka tswa e le lefe la go bo o wetswe ke kotsi ya masetlapelo a tlholego, o ka lebana le yone jang? Jaanong re tlile go bona gore ke eng se re ka se dirang go fokotsa ditlamorago tse di nnang gone fa go nna le dikotsi tsa masetlapelo.