Go Tshela Botshelo jo boNang le Bokao—Jesu o Bontsha Tsela ya go Dira Jalo

JAAKA re ile ra tlhalosa mo setlhogong se se fetileng, Jesu o ne a tshela botshelo jo bo nang le bokao. Ka jalo, fa re batla gore botshelo jwa rona bo nne le bokao, re tla bo re dira sentle fa re etsa sekao sa gagwe le go reetsa kgakololo ya gagwe.

Tota e bile, Jehofa o re kgothaletsa go dira jalo jaaka temana e e fa godimo e bontsha. Go tsamaya fela jaaka Jesu a ne a tsamaya go akaretsa gore re tshele botshelo jwa rona ka go latela sekao sa gagwe le dithuto tsa gagwe. Fa re dira jalo, go tla re thusa gore Modimo a re amogele le gore re tshele botshelo jo bo nang le bokao.

Thuto ya ga Jesu e ne e akaretsa melaometheo e e ka re thusang go tsamaya fela jaaka a ne a tsamaya. Re bona mengwe ya melaometheo eno mo Therong ya gagwe e e tumileng ya kwa Thabeng. Mma re sekaseke melaometheo e le mmalwa mme re bone kafa re ka e dirisang ka teng mo botshelong jwa rona.

MOLAOMOTHEO: “Go itumela ba ba tshwenyegang ka se ba se tlhokang semoyeng.”—Mathaio 5:3.

KAFA MOLAOMOTHEO ONO O THUSANG KA TENG GORE RE TSHELE BOTSHELO JO BO NANG LE BOKAO:

Jesu o ne a bontsha gore ka tlholego batho ba batla go itse ka dilo tsa semoya. Re batla go itse dikarabo tsa dipotso tse di jaaka tseno: Ke ka ntlha yang fa re le mono? Ke ka ntlha yang fa go na le pogo e e kana kana mo lefatsheng? A ruri Modimo o amega ka rona? A go na le botshelo morago ga loso? Re tlhoka go itse dikarabo tsa dipotso tseno gore re nne le botshelo jo bo nang le bokao. Jesu o ne a itse gore go na le motswedi o le mongwe fela o o ka ikanngwang, o o ka arabang dipotso tseo—Lefoko la Modimo. Fa a rapela Rraagwe, Jesu o ne a re: “Lefoko la gago ke boammaaruri.” (Johane 17:17) A tota Lefoko la Modimo le ka re thusa go itse ka dilo tse re di tlhokang mo semoyeng?

SEKAO SA MMATOTA:

E re ka Esa e ne e le moopedi yo o eteletseng pele mo setlhopheng sa bone se se itsegeng, o ne a tla tloga a nna moopedi yo o tumileng mo mminong wa rock. Le fa go ntse jalo, Esa o ne a sa itumela. A re: “Le fa ke ne ke itumelela go nna mo setlhopheng seno, ke ne ke eletsa gore botshelo jwa me bo nne le bokao jwa mmatota.” Le fa go ntse jalo, fa nako e ntse e ya, Esa o ne a kopana le mongwe wa Basupi ba ga Jehofa. Esa a re: “Ke ne ka mmotsa dipotso tse dintsi. Dikarabo tsa gagwe tse di tswang mo Dikwalong di ne tsa nkgatlha, ka jalo, ke ne ka dumela gore a ithute Baebele le nna.” Se Esa a se ithutileng mo Baebeleng se ne sa mo ama mme seo sa dira gore a ineele mo go Jehofa. A re: “Mo nakong e e fetileng ke ne ke tsena mo mathateng ka metlha. Gone jaanong botshelo jwa me bo na le bokao jwa mmatota.”a

MOLAOMOTHEO: “Go itumela ba ba kutlwelobotlhoko.”—Mathaio 5:7.

KAFA MOLAOMOTHEO ONO O THUSANG KA TENG GORE RE TSHELE BOTSHELO JO BO NANG LE BOKAO:

Kutlwelobotlhoko e akaretsa go bontsha ba bangwe bopelotlhomogi, go nna pelonomi mo go bone le go ba akanyetsa. Jesu o ne a bontsha batho ba ba humanegileng kutlwelobotlhoko. E re ka a ne a le kutlwelobotlhoko, o ne a tsaya kgato go fokotsa pogo mo bathong ba bangwe. (Mathaio 14:14; 20:30-34) Fa re etsa Jesu ka go nna kutlwelobotlhoko, re dira gore botshelo jwa rona bo nne le bokao, ka gonne batho ba ba bontshang ba bangwe kutlwelobotlhoko ba a itumela. (Ditiro 20:35) Re ka bontsha ba bangwe kutlwelobotlhoko ka mafoko a rona a bopelonomi le ka ditiro tsa rona, mme fa re dira jalo, re thusa batho ba ba tlhokang. A tota go bontsha kutlwelobotlhoko go tokafatsa boitekanelo jwa rona?

SEKAO SA MMATOTA:

Maria le monna wa gagwe Carlos, ba ile ba tlhoma sekao sa go nna kutlwelobotlhoko. Rraagwe Maria ke moswagadi, mme mo dingwageng tsa bosheng o ne a nna fela mo bolaong. Maria le Carlos ba ne ba mo tsaya gore a tle go nna le bone mme ba mo tlhokomela ka sengwe le sengwe se a se tlhokang. Go ne go na le masigo a mantsi a ba neng ba sa robale ka one, ka dinako tse dingwe ba ne ba tshwanelwa ke go mo isa bookelong ka bonako ka ntlha ya bolwetse jwa gagwe jwa sukiri. Ba dumela gore ka dinako tse dingwe ba lapa thata. Mme ba itumetse, fela jaaka Jesu a buile, ka gonne ba kgotsofadiwa thata ke go itse gore ba tlhokomela rraagwe Maria ka dilo tse a di tlhokang.

MOLAOMOTHEO: “Go itumela ba ba kagiso.”—Mathaio 5:9.

KAFA MOLAOMOTHEO ONO O THUSANG KA TENG GORE RE TSHELE BOTSHELO JO BO NANG LE BOKAO:

Polelwana e e reng ‘go nna kagiso’ fa e tsewa fela jaaka e ntse e raya go nna “modirakagiso.” Go nna motho yo o dirang kagiso, go dira jang gore botshelo bo nne le bokao jwa mmatota? Sa ntlha, re nna le dikamano tse di botoka le bone. Re dira sentle fa re tsaya tsia kgakololo eno ya Baebele: “Fa go kgonega, kafa go ka kgonegang ka gone mo go lona, agisanang le batho botlhe.” (Baroma 12:18) “Batho botlhe” ba akaretsa ba lelapa le batho ba bangwe ba ba ka tswang ba sa dumele dilo tse re di dumelang. A tota go agisana le “batho botlhe” go ka dira gore botshelo jwa rona bo nne le bokao?

SEKAO SA MMATOTA:

Akanya ka se se diragaletseng mosadi mongwe yo o bidiwang Nair. Ka dingwaga di le dintsi, o ne a lebana le mathata a mantsi a a neng a mo tlhoka gore a bontshe gore a ke motho yo o nang le kagiso, segolobogolo mo go ba lelapa la gagwe. Fa e sa le monna wa gagwe a mo tlogela mo e ka nnang dingwaga di le 15 tse di fetileng, o ntse a godisa bana ba gagwe a le nosi. Mongwe wa bomorwawe o ne a tshwakgotswe ke diokobatsi mme gantsi o ne a sa laolesege e bile a mo tshosetsa ene le morwadie. Nair o dumela gore se a se ithutileng mo Baebeleng se dirile gore a nne le maatla a go nna le kagiso tota le mo maemong a a thata jaaka ano. O leka gore a se ka a ngangisana kgotsa a se ka a lwa ka ntlha ya dilo dingwe. O leka go nna pelonomi, kutlwelobotlhoko le go akanyetsa ba bangwe. (Baefeso 4:31, 32) O tlhatswegile pelo gore go ithuta go nna le kagiso go mo thusitse gore a kgone go dirisana sentle le ba lelapa le batho ba bangwe.

GO AKANYA KA ISAGWE

Fa re latela kgakololo e e botlhale ya ga Jesu, re tla itumela le go kgotsofala mo botshelong. Le fa go ntse jalo, gore botshelo jwa rona bo nne le bokao jwa mmatota, re tlhoka go itse gore go tla direga eng mo isagweng. Gone mme, a botshelo bo ka nna le bokao jwa mmatota fa re itse gore kgabagare re tlile go tsofala, go lwala re bo re swa? Mme ke se se diregang mo lefatsheng gompieno.

Le fa go ntse jalo, go na le dikgang tse di molemo! Go na le masego a mantsi a Jehofa a tla nayang batho ba ba lekang “go tsamaya fela jaaka Jesu a ne a tsamaya.” Jehofa o solofetsa gore go ise go ye kae o tla dira gore go nne le lefatshe le lesha la tshiamo, le batho ba ba ikanyegang ba tla tshelang mo go lone ka tsela e Jehofa a neng a ikaeletse ka yone—ba tshelela ruri ba na le botsogo jo bo itekanetseng. Lefoko la gagwe le a re: “Bona! Mogope wa Modimo o mo bathong, mme o tla aga le bone, mme ba tla nna batho ba gagwe. Mme Modimo ka boene o tla nna le bone. Mme o tla phimola dikeledi tsotlhe mo matlhong a bone, mme loso lo tla bo lo seyo, le fa e le khutsafalo le fa e le selelo le fa e le botlhoko di tla bo di sa tlhole di le gone. Dilo tsa pele di fetile.”—Tshenolo 21:3, 4.

Maria wa dingwaga di le 84 yo o umakilweng mo setlhogong sa ntlha sa motseletsele ono, o itumelela tsholofelo ya go bona mafoko ao a diragadiwa. Go tweng ka wena? A o ka rata go itse mo go oketsegileng ka “botshelo jwa mmatota”—jo bo tla nnang teng mo Bogosing jwa Modimo? (1 Timotheo 6:19) Fa e le gore go ntse jalo, o ka kopa Basupi ba ga Jehofa ba ba nnang mo lefelong la lona gore ba go thuse kgotsa o kwalele bagatisi ba makasine ono.b