DIKARABO TSA DIPOTSO TSA BAEBELE
A baengele ba ka re thusa?
Fela jaaka baengele mo nakong e e fetileng ba thusitse motlhanka wa Modimo yo o ikanyegang Daniele, le gompieno ba thusa batho go solegelwa molemo ke dikgang tse di molemo
Jehofa Modimo o bopile dimilione tsa baengele lobaka lo loleele pele a bopa batho. (Jobe 38:4, 7) Baengele bano ke dibopiwa tse di maatla tse di direlang Modimo mme ka dinako tse dingwe o di romela go kaela le go sireletsa batlhanka ba gagwe mo lefatsheng. (Pesalema 91:10, 11) Gompieno, baengele ba thusa batho go solegelwa molemo ke dikgang tse di molemo tse di rerwang ke balatedi ba ga Jesu.—Bala Tshenolo 14:6, 7.
A re tshwanetse go rapela baengele gore ba re thuse? Nnyaa. Thapelo ke karolo ya kobamelo e e tshwanelang Modimo fela. (Tshenolo 19:10) E re ka baengele e le batlhanka ba Modimo, ba ikobela ditaelo tsa gagwe e seng tsa batho. Ka jalo, ka metlha re tshwanetse go rapela Modimo fela re dirisa leina la ga Jesu.—Bala Pesalema 103:20, 21; Mathaio 26:53.
A go na le baengele ba ba bosula?
Fela jaaka batho, baengele ba bopilwe ba na le bokgoni jwa go itlhopela go dira se se siameng kgotsa se se sa siamang. Ka maswabi, baengele ba le bantsi ba ne ba tsuologela Modimo. (2 Petere 2:4) Satane ke ene wa ntlha go tsuologa; ba bangwe ba ne ba latela mme ba fetoga madimona. Moragonyana Satane le madimona a gagwe ba ne ba lelekwa kwa legodimong mme ba latlhelwa mo lefatsheng.—Bala Tshenolo 12:7-9.
Go oketsega ga boikepo le thubakanyo fa e sa le ka 1914, ke sesupo sa gore mo bogautshwaneng Modimo o tla nyeletsa Satane le madimona a gagwe. Go tswa foo Modimo o tla dira gore lefatshe le boele mo maemong a lone a a itumedisang.—Bala Tshenolo 12:12; 21:3, 4.