SETLHOGO SA KA FA NTLE | A SATANE O TENG?
A Satane o Teng?
Sefikantswe sa kwa Madrid, Spain, se bontsha Satane e le moengele yo o oleng wa lenweenwee
Ke goletse kwa El Salvador. Fa ke ne ke sa reetse, mmè o ne a tle a ntshosetse ka go re, ‘Diabolo o tlile go go utswa!’ Ke ne ke tle ke arabe ka go re, ‘A a tle!’ Ke ne ke dumela mo Modimong e seng mo go Satane.”—ROGELIO.
A o dumalana le Rogelio yo mmotlana? Ke efe ya dikgopolo tse di latelang e o dumalanang le yone?
Satane ga se motho wa mmatota; ke boikepo jo bo dirwang.
Satane o teng mme ga a kgatlhegele batho.
Satane ke sebopiwa se se maatla sa moya se se nang le tlhotlheletso e kgolo mo bathong.
Batho, gongwe ba le dimilione, ba dumalana le nngwe ya dikgopolo tseno. A go botlhokwa go itse gore ke efe ya tsone e e nepileng? Mme gone, fa e le gore Satane ga a yo, batho ba ba dumelang gore o teng ba tsieditswe. Fa e le gore Satane o teng mme ga a kgatlhegele batho, go raya gore batho ba bantsi ba ba kelotlhoko gore a se ka a ba tsietsa kgotsa ba ba mmoifang ba dira jalo kwantle ga lebaka. Mme fa e le gore Satane ke motsietsi yo o bofitlha, o kotsi thata go feta kafa batho ba ka akanyang ka gone.
Mma re sekaseke kafa Dikwalo Tse di Boitshepo di arabang dipotso tseno ka gone: Satane ke eng kgotsa ke mang—boikepo jo bo dirwang kgotsa motho wa moya? Fa e le gore Satane ke motho, a a ka go utlwisa botlhoko? Fa go le jalo, o ka itshireletsa jang?