SETLHOGO SA KA FA NTLE | KE ENG FA O TSHWANETSE GO IKANYEGA?

Kafa go sa Ikanyege go go Amang ka Teng

“Ka metlha go na le maemo a a thata a a ka rarabololwang ka go sa ikanyege go le gonnye.”—Samantha, Afrika Borwa.

A o dumalana le seo? Fela jaaka Samantha, rotlhe re kile ra lebana le maemo a a thata. Tsela e re itshwarang ka yone fa re le mo maemong a a re tlhotlheletsang gore re se ka ra ikanyega, e ka senola gore ke eng se re se tsayang se le botlhokwa. Ka sekai, fa re tshwenyegile thata ka gore re se ka ra tlhabiwa ke ditlhong, re ka nna ra leba go sa ikanyege e le selo sa botlhokwa. Le fa go ntse jalo, fa ba bangwe ba lemoga gore ga o ikanyege, gantsi seo se nna le ditlamorago tse di botlhoko. Ela tlhoko dintlha tse di latelang.

GO SA IKANYEGE GO DIRA GORE O SE TLHOLE O IKANNGWA

Dikamano tse di molemo di nna teng fa batho ba ikanyega mo go ba bangwe. Fa batho ba babedi ba ikanyana, ba ikutlwa ba sireletsegile. Mme gone, seno ga se itiragalele fela. Batho ba kgona go ikanyana fa ba fetsa nako mmogo, ba buisana ka boikanyegi e bile ba akanyetsana. Go ikanngwa go ka senngwa ke go dira selo se sennye fela sa go sa ikanyege. Mme fa o sa tlhole o ikanngwa, go thata gore o boe o ikanngwe gape.

A o kile wa tsiediwa ke mongwe yo o neng o mo tsaya e le tsala ya gago e kgolo? Fa go le jalo, o ne wa ikutlwa jang? Ga go pelaelo gore o ne wa utlwa botlhoko, e kete motho yoo o go tlhanogetse. Ruri go a utlwala gore o ikutlwe jalo. Go bonala sentle gore go sa ikanyege go ka senya motheo wa dikamano tse di molemo.

GO SA IKANYEGE GO A TSHELANWA

Dipatlisiso tse di neng tsa dirwa ke Robert Innes, porofesa wa tsa ikonomi kwa Yunibesithing ya California, di ne tsa bontsha gore “go sa ikanyege go a tshelanwa.” Ka jalo, go sa ikanyege go ka tshwantshiwa le mogare—fa o dirisana thata le motho yo o sa ikanyegeng, o ipaya mo kotsing ya go “tshwaediwa” ke go sa ikanyege.

O ka tila jang go wela mo serung sa go sa ikanyege? Baebele e ka go thusa. Tsweetswee sekaseka melaometheo e le mmalwa ya Baebele.

Mefuta Ya go Sa Ikanyege

Go Aka

TLHALOSO: Go bolelela mongwe tshedimosetso e e seng boammaaruri, mme tota a tshwanetse go itse boammaaruri. Go aka go ka akaretsa go bua dintlha tse di seng boammaaruri kgotsa go sokamisa boammaaruri ka boikaelelo jwa go tsietsa mongwe, go fitlha tshedimosetso ya botlhokwa le go feteletsa dilo gore batho ba nne le dikgopolo tse di phoso.

SE BAEBELE E SE BUANG: “Motho yo o tsietsang ke selo se se makgapha mo go Jehofa, mme O atamalane thata le bathokgami.” (Diane 3:32) “E re ka jaanong lo latlhile maaka, a mongwe le mongwe wa lona a bue boammaaruri le moagelani wa gagwe.”—Baefeso 4:25.

Go Senya Motho Leina

TLHALOSO: Go bua dilo tse di seng boammaaruri le tse di kgobang tse di senyang motho leina.

SE BAEBELE E SE BUANG: “Motho wa maano o nna a baka manganga, mme yo o senyang batho leina o kgaoganya ba ba tlwaelaneng.” (Diane 16:28) “Fa go se nang dikgong teng molelo o a tima, mme fa go se nang yo o senyang batho leina teng manganga a a kokobela.”—Diane 26:20.

Boferefere

TLHALOSO: Go tsietsa motho gore a go neye madi kgotsa sengwe se a nang le sone ka go nna loleme lo borethe.

SE BAEBELE E SE BUANG: “O se ka wa tsietsa modiri yo o thapilweng yo o mo mathateng e bile a humanegile.” (Duteronome 24:14, 15) “Yo o tsietsang motho wa maemo a a kwa tlase o kgobile Modiri wa gagwe, mme yo o utlwelang mohumanegi botlhoko o a Mo galaletsa.”—Diane 14:31.

Go Utswa

TLHALOSO: Go tsaya dilo tsa motho yo mongwe o sa newa tetla.

SE BAEBELE E SE BUANG: “A moutswi a se ka a tlhola a utswa, mme go na le moo a a dire ka natla, a dira ka diatla tsa gagwe se e leng tiro e e molemo, gore a tle a nne le sengwe se a se abelang mongwe yo o tlhokang.” (Baefeso 4:28) ‘Lo se ka lwa tsiediwa. . . . Magodu, batho ba ba bogagaru, matagwa, bagobolodi le ba ba tsayang ka dikgoka ga ba na go rua bogosi jwa Modimo.’—1 Bakorintha 6:9, 10.