Tlotlomatsa Bolaodi Jwa ga Jehofa!

1, 2. Re tshwanetse go tlhomamisega ka eng? (Bona setshwantsho se se simololang setlhogo.)

JAAKA re bone mo setlhogong se se fetileng, Diabolo a re Jehofa ga a buse batho ka tsela e e siameng e bile a re batho ba ne ba tla tshela sentle fa ba ipusa. A o bua boammaaruri? A re re batho ba ba sa batleng go busiwa ke Modimo ba ne ba ka kgona go tshelela ruri. A ba ne ba tla tshela sentle? A o ne o tla itumela fa o ne o ka kgona go tshelela ruri mme gone o sa kaelwe ke Modimo?

² Ga go ope yo a ka go arabelang dipotso tseo. Mongwe le mongwe o tshwanetse go akanyetsa dipotso tseno sentle. Go dira jalo go tla re thusa go bona gore bolaodi jwa Modimo ke jone bo siameng. Ga bo ka ke jwa lekanngwa le bope jo bongwe. Mme re tshwanetse go bo ema nokeng ka pelo yotlhe. Baebele e re naya mabaka a a utlwalang a a re tlhomamisetsang gore bolaodi jwa Modimo bo siame. Ka sekai, akanya ka se Baebele e se buang ka tshwanelo ya ga Jehofa ya go busa.

JEHOFA O NA LE TSHWANELO YA GO BUSA

3. Ke eng fa Jehofa e le ene fela a tshwanetseng go busa?

³ Jehofa o na le tshwanelo ya go busa ka gonne ke Modimo mothatayotlhe e bile ke Mmopi. (1 Ditir. 29:11; Dit. 4:24) Mo go Tshenolo 4:11, babusimmogo le Keresete ba ba 144 000 ba tlhagelela mo ponatshegelong ba bua jaana: “O a tshwanela, Jehofa, wena Modimo wa rona, go amogela kgalalelo le tlotlo le maatla, ka gonne o bopile dilo tsotlhe, mme ka ntlha ya thato ya gago di ne tsa nna gone e bile di ne tsa bopiwa.” Jehofa o na le tshwanelo ya go busa batho le dibopiwa tsa semoya ka gonne ke ene a bopileng sengwe le sengwe.

4. Ke eng fa go tsuologela Modimo e le go dirisa kgololesego ya go itlhophela ka tsela e e botlhaswa?

⁴ Satane ga a bopa sepe. Ka jalo, ga a na tshwanelo epe ya go nna mmusi wa lobopo. Satane le banyalani ba ntlha ba ile ba bontsha gore ba boikgogomoso fa ba ne ba tsuologela bolaodi jwa ga Jehofa. (Jer. 10:23) Gone ke boammaaruri gore e re ka ba ne ba na le kgololesego ya go itlhophela, ba ne ba ka tlhopha gore ba se ka ba ikobela Modimo. Mme gone, a ba ne ba na le tshwanelo ya go dira jalo? Nnyaa. Kgololesego ya go itlhophela e letla batho gore ba kgone go dira ditshwetso tse di siameng letsatsi le letsatsi. Le fa go ntse jalo, kgololesego eo ga e ba neye tshwanelo ya go tsuologela Mmopi le Moneibotshelo wa bone. Go tsuologela Jehofa ke go dirisa kgololesego ya go itlhophela ka tsela e e botlhaswa. Re tshwanetse go kaelwa ke Jehofa.

5. Ke eng fa re ka tlhomamisega gore ditshwetso tsa Modimo di siame?

⁵ Go na le lebaka le lengwe gape le le dirang gore Jehofa a nne le tshwanelo ya go busa. O busa ka tshiamiso. O bua jaana: “Ke nna Jehofa, Yo o supang bopelonomi jwa lorato, tshiamiso le tshiamo mo lefatsheng; gonne ke itumedisiwa ke dilo tseno.” (Jer. 9:24) Ga a tlhoke go kaelwa ke melao e e kwadilweng ke batho ba ba sa itekanelang gore a itse gore ke eng se se siameng. Ene ka boene o itse sentle gore ke eng se se siameng, ka ntlha ya seo, o neile batho melao e e kwadilweng. Mopesalema o ne a re: “Tshiamo le katlholo ke lefelo le le tlhomameng la setulo sa [gagwe] sa bogosi,” ka jalo, re ka tlhomamisega gore melao, melaometheo le ditshwetso tsotlhe tsa gagwe di siame. (Pes. 89:14; 119:128) Go farologana le seo, le fa gone Satane a re bolaodi jwa ga Jehofa ga bo a siama, o palelwa ke go dira gore go nne le tshiamiso mo lefatsheng.

6. Ke eng fa Jehofa a na le tshwanelo ya go busa lefatshe?

⁶ Mo godimo ga moo, Jehofa o na le tshwanelo ya go busa ka gonne o na le kitso le botlhale jo bo tlhokegang gore a kgone go tlhokomela lobopo. Ka sekai, akanya ka ntlha ya gore Modimo o ne a naya Morwawe maatla a go fodisa malwetse a dingaka di neng di sa kgone go a fodisa. (Math. 4:23, 24; Mar. 5:25-29) Le fa rona re ka tsaya gore eo e ne e le kgakgamatso, mo go Jehofa ga go a nna jalo. O itse gore mmele wa motho o bereka jang e bile o na le bokgoni jwa go baakanya bothata bongwe le bongwe jwa mmele. Gape o na le bokgoni jwa go tsosa baswi le go thibela masetlapelo a tlholego.

7. Ke eng fa re ka re botlhale jwa ga Jehofa bo feta jwa batho ba ba mo lefatsheng leno le le laolwang ke Satane?

⁷ Batho ba ba mo lefatsheng leno la ga Satane ba sa ntse ba batla ditsela tsa go fedisa dintwa. Le fa go ntse jalo, ke Jehofa fela a ka kgonang go dira gore go nne le kagiso mo lefatsheng. (Isa. 2:3, 4; 54:13) Fa re ntse re ithuta ka kitso le botlhale jwa ga Jehofa, re ikutlwa fela jaaka moaposetoloi Paulo fa a ne a re: “A boteng jwa dikhumo tsa Modimo le botlhale le kitso! A bo dikatlholo tsa gagwe di ka se ka tsa hukutsega jang ne le ditsela tsa gagwe e le tse di sa ka keng tsa latedisiwa!”—Bar. 11:33.

BOLAODI JWA GA JEHOFA BO MOLEMO THATA

8. Ke eng fa tsela e Jehofa a busang ka yone e go ama pelo?

⁸ Baebele ga e re tlhalosetse fela gore Jehofa o na le tshwanelo ya go busa. Gape e re tlhalosetsa gore ke eng fa bolaodi jwa ga Jehofa bo le molemo go feta bope jo bongwe. Lebaka lengwe ke gore o busa ka lorato. Eleruri tsela e Jehofa a busang ka yone e re ama pelo. Ke Modimo yo “o kutlwelobotlhoko le yo o pelontle, yo o bonya go galefa le yo o nang le bopelonomi jo bogolo jwa lorato le boammaaruri.” (Ekes. 34:6) Modimo o tlotla batlhanka ba gagwe. O re tlhokomela go feta kafa rona re ka itlhokomelang ka gone. Go farologana le se Diabolo a se buang, Jehofa ga a time baobamedi ba gagwe ba ba ikanyegang dilo tse di molemo. Kana e bile, o ile a ntsha Morwawe yo o rategang gore re nne le tsholofelo ya go tshelela ruri.—Bala Pesalema 84:11; Baroma 8:32.

9. Re itse jang gore Modimo o kgatlhegela mongwe le mongwe wa rona?

⁹ Jehofa o rata batlhanka ba gagwe botlhe. Mme gape o kgatlhegela mongwe le mongwe wa bone fela thata. Ka sekai, go ne ga feta dingwaga di le dintsi Jehofa a tlhoma baatlhodi e bile a ba nonotsha gore ba kgone go golola setšhaba sa Iseraele mo bokgobeng. Ka nako eo e e thata, o ile a bona mosadi mongwe yo e neng e se Moiseraele e bong Ruthe. Mosadi yono o ne a tsaya matsapa a magolo gore e nne moobamedi wa gagwe. Jehofa o ne a mo segofatsa ka monna le ngwana wa mosimane. Mme ga se gone gotlhe. Fa Ruthe a tsosiwa mo baswing, o tlile go utlwa gore Mesia o ne a tswa mo losikeng lwa ga morwawe. Mme akanya kafa a tlileng go itumela ka gone fa a utlwa gore pego ya botshelo jwa gagwe e kwadilwe mo Baebeleng, mo bukeng e e bidiwang ka leina la gagwe!—Ruthe 4:13; Math. 1:5, 16.

10. Ke eng fa re ka re Jehofa ga a gatelele batho ba a ba busang?

¹⁰ Jehofa ga a gatelele batho ba a ba busang e bile ga a ba beele melao e e gagametseng. O busa ka tsela e e dirang gore ba nne le kgololesego le boitumelo. (2 Bakor. 3:17) Dafide o ne a bua jaana: “Seriti le bontlentle di fa pele ga [Modimo], nonofo le boipelo di kwa lefelong la gagwe.” (1 Ditir. 16:7, 27) Gape mopesalema Ethane o ne a kwala jaana: “Go itumela batho ba ba itseng mokgosi wa boipelo. Ao tlhe Jehofa, ba nna ba tsamaya mo leseding la sefatlhego sa gago. Ba ipela mo leineng la gago letsatsi lotlhe mme ba godisiwa mo tshiamong ya gago.”—Pes. 89:15, 16.

11. Ke eng se se ka re thusang go tlhomamisega gore bolaodi jwa ga Jehofa bo molemo thata?

¹¹ Go tlhatlhanya ka dilo tse di molemo tse Jehofa a re direlang tsone go tla re thusa go tlhomamisega gore bolaodi jwa gagwe bo molemo thata. Re tla ikutlwa jaaka mopesalema yo o neng a re: “Letsatsi le le lengwe fela mo malwapeng a gago le botoka go na le a le sekete go sele!” (Pes. 84:10) Eleruri joo ke boammaaruri jo bo ka se ganediweng. E re ka Jehofa e le Mmopi wa rona, o a itse gore re tlhoka eng gore re itumele, mme o re naya sone seo. Dilo tse a kopang gore re di dire di solegela rona molemo, le fa go dira dilo tseo go ka tlhoka gore re itime dilo dingwe.—Bala Isaia 48:17.

12. Ke eng se se re tlhotlheletsang go tlotlomatsa bolaodi jwa ga Jehofa?

¹² Baebele e tlhalosa gore morago ga Puso ya ga Keresete ya Dingwaga di le Sekete, batho bangwe ba tlile go tsuologela bolaodi jwa ga Jehofa. (Tshen. 20:7, 8) Ke eng se se ka ba tlhotlheletsang go dira jalo? E re ka Satane a tla bo a golotswe e bile a batla go tsietsa batho, ga go pelaelo gore o tla ba tlhotlheletsa gore ba nne pelotshetlha. O tswa kgakala le mokgwa oo. A ka nna a leka go tlhotlheletsa batho gore ba akanye gore ba ka kgona go tshelela ruri ba sa ikobele Jehofa. Mme seo ke maaka a matala! Le fa go ntse jalo, ntlha ya botlhokwa ke go re: A re tla kgatlhiwa ke tsholofetso eo ya maaka? Fa re rata Jehofa e bile re mo direla ka gonne a le molemo le ka gonne e le ene Molaodimogolo yo o siameng wa lobopo, ga re kitla re kgatlhiwa ke tsholofetso eo ya maaka. Ga re kitla re batla go tshela re sa busiwe ke molaodi yo o siameng le yo o lorato e bong Jehofa.

TLOTLOMATSA BOLAODI JWA MODIMO KA BOIKANYEGI

13. Re ka bontsha jang gore re ema bolaodi jwa ga Jehofa nokeng?

¹³ Eleruri re tshwanetse go ema nokeng bolaodi jwa ga Jehofa ka pelo yotlhe. O na le tshwanelo ya go busa e bile bolaodi jwa gagwe bo molemo thata. Re ka ema bolaodi jwa ga Jehofa nokeng ka go tswelela re ikanyega le go mo direla ka boikanyegi. Gape re ka bontsha seo ka go dira dilo go ya ka se a se batlang. Fa re dira dilo go ya ka se Jehofa a se batlang, re tla bo re bontsha gore re rata bolaodi jwa gagwe.—Bala Baefeso 5:1, 2.

14. Ditlhogo tsa malapa le bagolwane ba ka etsa Jehofa jang?

¹⁴ Baebele e re thusa go lemoga gore Jehofa o busa ka lorato. Go dumalana le seo, ditlhogo tsa malapa le bagolwane ga ba gatelele ba bangwe gore ba dire dilo dingwe, ba dira gore go nne e kete bone ka bobone ke balaodi. Go na le moo, ba etsa Jehofa. Paulo le ene o ne a etsa Jehofa le Morwawe. (1 Bakor. 11:1) Paulo ga a ka a tlhabisa ba bangwe ditlhong kgotsa go ba pateletsa gore ba dire dilo sentle. Go na le moo, fa a ba kopa go dira dilo dingwe, o ne a ba rapela. (Bar. 12:1; Baef. 4:1; File. 8-10) Eo ke tsela e Jehofa a batlang gore dilo di dirwe ka yone. Ka jalo, botlhe ba ba mo ratang e bile ba ema bolaodi jwa gagwe nokeng ba tshwanetse go dira dilo jalo.

15. Re ka bontsha jang gore re rata tsela e Jehofa a busang ka yone?

¹⁵ A re ikobela thulaganyo ya Modimo ya botlhogo? Fa re dirisana sentle le ba ba eteletseng pele, re a bo re bontsha gore re ema bolaodi jwa ga Jehofa nokeng. Le fa re sa tlhaloganye kgotsa re sa dumalane le tshwetso nngwe e e dirilweng, re batla go ikobela ba ba eteletseng pele mo phuthegong. Batho ba ba sa ikobeleng Jehofa ga ba dire jalo, le fa go ntse jalo, eno ke tsela e botlhe ba ba ikobelang bolaodi jwa Modimo ba tshwanetseng go dira dilo ka yone. (Baef. 5:22, 23; 6:1-3; Baheb. 13:17) Go dira jalo go re solegela molemo ka gonne Modimo o re batlela dilo tse di molemo fela.

16. Batho ba ba ikobelang bolaodi jwa Modimo ba dira ditshwetso jang?

¹⁶ Gape re ka bontsha gore re ema bolaodi jwa Modimo nokeng ka ditshwetso tse re di dirang. Jehofa ga a re naya melao ya sengwe le sengwe. Go na le moo, o re bolelela kafa a lebang dilo ka teng. Ka sekai, ga a re bolelele gore re apare eng. Go na le moo, o re tlhalosetsa gore o batla gore re apare e bile re ipaakanye ka tsela e e bori le ka tsela e e tshwanelang Bakeresete. (1 Tim. 2:9, 10) Gape ga a batle gore ditshwetso tsa rona di kgopise Bakeresete ba bangwe kgotsa di ba tshwenye. (1 Bakor. 10:31-33) Fa re dira ditshwetso go ya ka se Jehofa a se batlang e seng se rona re se ratang, re tla bo re bontsha gore re ema bolaodi jwa gagwe nokeng.

17, 18. Banyalani ba ka bontsha gore ba ema bolaodi jwa ga Jehofa nokeng ka ditsela dife?

¹⁷ Akanya ka tsela nngwe e banyalani ba Bakeresete ba ka bontshang gore ba dira dilo go ya ka se Jehofa a se batlang le gore ba ema bolaodi jwa gagwe nokeng. Ba ka dira eng fa ba lemoga gore lenyalo la bone le nna le mathata a ba neng ba sa a lebelela? Gotweng fa lenyalo la bone le simolola go ba swabisa? Go ka nna molemo gore ba akanye ka tsela e Jehofa a neng a dirisana le Baiseraele ka yone. O ne a itsaya jaaka monna wa setšhaba seo sa bogologolo. (Isa. 54:5; 62:4) Eleruri, seemo seo se ne se tshwana le go nna mo lenyalong le le nang le mathata! Le fa go ntse jalo, Jehofa ga a ka a itlhaganelela go ba latlha. O ne a tswelela a ba bontsha kutlwelobotlhoko e bile ga a ka a lebala kgolagano e a neng a e dirile le bone. (Bala Pesalema 106:43-45.) A seno ga se dire gore re rate Jehofa le go feta?

¹⁸ Ka jalo, banyalani ba ba ratang bolaodi jwa ga Jehofa ba tshwanetse go mo etsa. Fa go na le mathata mo lenyalong la bone, ga ba leke go fedisa lenyalo la bone ka tsela e e sa dumalaneng le Dikwalo. Ba a itse gore ba kopantswe ke Jehofa le gore o batla gore ba ‘ngaparelane.’ Lebaka le le lengwe fela la Dikwalo le le letlang Mokeresete gore a tlhale le go boa a nyala gape, ke fa molekane wa gagwe wa lenyalo a dirile boaka. (Math. 19:5, 6, 9) Fa ba tsaya matsapa go rarabolola mathata a bone le go tokafatsa lenyalo la bone, ba tla bo ba bontsha gore ba ema bolaodi jwa ga Jehofa nokeng.

19. Re tshwanetse go dira eng fa re dirile diphoso?

¹⁹ E re ka re sa itekanela, ka dinako dingwe re ka nna ra dira dilo tse Jehofa a sa di rateng. Jehofa o itse seno, ke ka moo a ileng a dira gore Keresete a re swele. Ka jalo, fa re dira diphoso, re tshwanetse go kopa Jehofa gore a re itshwarele. (1 Joh. 2:1, 2) Go na le gore re nnele go ipona molato, re tshwanetse go ithuta mo diphosong tsa rona. Fa re tswelela re na le kamano e e molemo le Jehofa, o tla re itshwarela e bile o tla re thusa gore re se ka ra dira diphoso tse di tshwanang mo isagweng.—Pes. 103:3.

20. Ke eng fa re tshwanetse go ema bolaodi jwa ga Jehofa nokeng gone jaanong?

²⁰ Mo lefatsheng le lesha, batho botlhe ba tla itse ditsela tsa ga Jehofa tse di siameng e bile ba tla ikobela bolaodi jwa gagwe. (Isa. 11:9) Mme rona re setse re simolotse go ithuta ditsela tsa gagwe. Go ise go ye kae, kgang ya gore ke mang yo o tshwanelwang ke go busa e tla rarabololwa. Gone jaanong, re tshwanetse go bontsha gore re ema bolaodi jwa Modimo nokeng ka go tswelela re ikanyega, ka go mo direla le ka go leka ka natla go mo etsa mo go sengwe le sengwe se re se dirang.