Tswelang Pele lo Ruta lo sa Kgaotse
1 Bibela ga e re tlogele re belaela malebana le gore ke tshimo ya mofuta mang eo baaposetoloi le barutwa ba pele ba Bakeresete ba neng ba na le yone. Go ise go ye kae fela morago ga loso lwa ga Jesu, balaodi ba ne ba ba tlhagisa gore “ba se ka ba bua gopè, leha e le go ruta” kaga Jesu. (Dit. 4:18) Ka ntlhayang? Lebaka le lengwe e ne e le ka ntlha ya tsela eo ba neng ba atlega ka tsela e e gakgamatsang ka gone. Ba le diketekete ba ne ba nna badumedi, jaaka Ditihō 4:4 e bega jaana: “Me ba bantsi ba bōnè ba ba utlwileñ lehoko ba dumèla; me palō ea banna ea tloga ea nna e ka ne e le makgolo a mashomè matlhano.”
2 Ka gonne le rona re ne ra tswelela pele re ntse re rera re sa kgaotse, batho ba ba makgolokgolo a a dikete, ee, ba le dimilione e nna badumedi mo motlheng wa rona. Mo kgweding ya October re na le tshiamelo ya go tsamaisa dipeeletso tsa Tsogang! le Tora ya Tebelo. Ga go belaetse gore Tsogang! e nnile le seabe se se botlhokwa thata mo go direng gore batho ba nne ba amegile ka seo ba se tlhokang semoyeng. Seno se ile sa feleletsa ka gore ba le bantsi ba itumele, ka gonne ba ithutile go dira thato ya ga Jehofa.—Bapisa Mathaio 5:3.
FITLHELELANG MONGWE LE MONGWE
3 Lemororo re ka nna ra bo re na le tshimo eo e berekwang kgapetsa, go santse go ka kgonagala gore re bue le bangwe ba ba nnileng le tshono e potlana ya go utlwa mafoko a a molemo. Jang jalo? Mo tshimong eo e sa kgoneng go fitlhelelwa mo bodiheding jwa ka ntlo le ntlo, ke ka ntlha yang fa o sa dirise go neela bosupi ka thelefouno ka tsela e e molemo? Kana dira boiteko jo bo kgethegileng jwa go bua le rre wa ntlo fa o neela bosupi mo maitseboeng kana ka mafelobeke. Fa re boloka dipego tsa ntlo le ntlo tseo di tlhokomelwang sentle, re ka kgona go batlana le maloko a mangwe a lelapa, ba ba ntseng jaaka mmemogolo, setlogolo kana ntsala yo o tsenang sekolo, kana mogadibo yo o berekang mo gare ga beke. Boiteko jo bo oketsegileng joo bo dirwang gore go ke go buiwe le leloko lengwe le lengwe la lelapa bo ka duelelwa ka mo go molemo.
4 Go na le ditsela di le dintsi tse di molemo tsa go amogela peeletso mo kgweding eno. Tsela e nngwe e ka nna ka go kopa diithuti tsa rona tsa Bibela le batho ba bangwe bao ba kgatlhegang gore ba dire peeletso. Gongwe mongwe wa diithuti tsa rona tsa Bibela o setse a na le peeletso ya nngwe ya dimakasine tseno. Ke ka ntlhayang fa o sa mo akantshe gore a nne le ya tsone tsoopedi? Malapa a ka kgothalediwa gore a nne le peeletso ya Tora ya Tebelo ya leloko lengwe le lengwe la lelapa e le gore ba tle ba baakanyetse Thuto ya Tora ya Tebelo. Kakantsho e nngwe e ne e tla nna gore o nne le batho bao o ba isetsang dimakasine ka metlha mme morago ga moo o tsamaise dipeeletso go bao ba bontshang go kgatlhega thata. Gape re tshwanetse ra leka go ithuta Bibela le bao ba bontshang gore eleruri ba a kgatlhega.
ATOLOSA BODIHEDI JWA GAGO
5 Go santse go ise go nne thari gore o ka tlisa kopo ya gago ya tirelo ya bobulatsela jo bo thusang ka kgwedi ya October. Jaaka lelapa, a lo rulaganyetsa go nna le seabe mo tirong ya bobulatsela ka malatsi a boikhutso a selefatshe ka December? Jaanong ke nako ya gore lo simolole go akanya gore lo ka dira seno jang ka katlego. Fa e le gore ga se lelapa lotlhe leo le ka kgonang go tsaya bobulatsela jo bo thusang, a lo ka dirisana mmogo jaana gore leloko le le lengwe kana a a oketsegileng a lelapa a ka dira jalo? Fa go sa nna jalo, a gongwe go ka kgonega gore bogolo lo dirise nako e e oketsegileng mo bodiheding lo tsamaisa dimakasine tsa Tsogang! le Tora ya Tebelo?
6 Re anaanela melemo ya semoya le masego a semoya tseo re di amogetseng go tswa mo ditsebeng tsa Tsogang! le Tora ya Tebelo. Re a itse gore batho ba ba dipelo tse di ikanyegang ba ba mo tshimong ya rona le bone ba tla solegelwa molemo ka mo go humileng fa ba bala dimakasine tseno ka metlha. Ka kgwedi ya October, a re ko re tsweletse go ruta ga rona ka didirisiwa tse di molemo tseo Jehofa a re fileng tsone. Fa re dira jalo, re tla roba masego a ga Jehofa ebile re tla itshupa re le tshegofatso mo go ba bangwe.—Bagal. 6:9.