Fitlhelela Pelo ya Motho yo o Ithutang le Ene
1 Pele Jesu a tlhatlogela kwa legodimong, o ne a bolelela barutwa ba gagwe gore ba rute batho ba bangwe go “boloka” dilo tsotlhe tse a di laetseng. (Math. 28:19, 20) Gore motho a ‘boloke’ ditaelo tsa ga Keresete, tshedimosetso kaga tsone e tshwanetse go fitlhelela pelo ya gagwe. (Pes. 119:112) O ka ama pelo ya motho yo o ithutang Baebele le ene jang?
2 Rapelela Kaelo ya ga Jehofa: Tiro ya go dira batho barutwa ke ya Modimo. Re tlhoka masego a gagwe, e seng bokgoni jwa rona, gore re atlege. (Dit. 16:14; 1 Bakor. 3:7) Ka jalo, go botlhokwa gore re rapelele thuso ya ga Jehofa fa re ruta ba bangwe boammaaruri.—Isa. 50:4.
3 Ela Tlhoko Gore Motho Yono o Dumela Eng: Go itse se batho ba se dumelang le gore ke ka ntlha yang fa ba se dumela go ka dira gore re itse se re ka se buang gore re fitlhelele dipelo tsa bone. Ke eng fa moithuti a kgatlhwa thata ke thuto e e rileng? Ke eng se se mo tlhotlheleditseng go e dumela? Kitso eno e ka re thusa go bua ka temogo.—Dit. 17:22, 23.
4 Tlhalosa Dilo ka Tsela e e Utlwalang, ya Dikwalo: Moithuti o tshwanetse go tlhaloganya boammaaruri. (Dit. 17:24-31) Re tshwanetse go ntsha lebaka le le utlwalang la tsholofelo ya rona. (1 Pet. 3:15) Le fa go ntse jalo, ka metlha dira seno ka tsela e e bonolo, o le pelotelele.
5 Gatelela Thuto ka Ditshwantsho: Ditshwantsho ga di felele fela ka go tlhofofaletsa moithuti go tlhaloganya mme gape di tlhotlheletsa le maikutlo a gagwe. Di ama mogopolo le pelo. Jesu o ne a di dirisa gantsi. (Mar. 4:33, 34) Gone mme, gore setshwantsho se se dirisiwang se nne le matswela se tshwanetse go tshwanela ntlha e go tlotliwang ka yone, mme e tshwanetse go nna setshwantsho se se buang ka dilo tse di amang moithuti yono.
6 Bontsha Melemo ya go Amogela Boammaaruri: Batho ba batla go itse melemo ya go dirisa se ba se ithutang. Thusa moithuti wa gago go bona gore mafoko a ga Paulo mo go 2 Timotheo 3:14-17 a botlhale go le kana kang.
7 O se ka wa kgobega marapo fa batho bangwe ba sa amogele se o ba rutang sone. Ga se dipelo tsotlhe tse di amogelang. (Math. 13:15) Le fa go ntse jalo, batho bangwe ba fetoga go nna badumedi. (Dit. 17:32-34) E kete maiteko a o a dirang go fitlhelela dipelo tsa batho ka dikgang tse di molemo a ka thusa ba bangwe ba le bantsi go amogela le go “boloka” dilo tse Jesu a di laetseng.