E Boloke

Dipuisano Tse di Akantshiwang Tsa Tirelo ya Tshimo

Dirisa dikakantsho tse di latelang go go thusa go baakanyetsa dipuisano tse di tla dirisiwang fa go buelelwa dikgatiso tse di tla bong di tsamaisiwa mo kgweding.

Atamalana le Jehofa

“Batho ba le bantsi ba ba dumelang mo Modimong ba ka rata go ikutlwa ba atamalane le ene. A o ne o itse gore Modimo o re laletsa gore re mo atamele? [Bala Jakobe 4:8.] Buka eno e diretswe go thusa batho go dirisa Dibaebele tsa bone gore ba kgone go atamalana le Modimo.” Bala serapa 1 mo tsebeng ya 16.

“Gompieno go na le tshiamololo e e seng kana ka sepe. Go ntse fela jaaka go tlhalosiwa fano. [Bala Moreri 8:9b.] Batho ba le bantsi ba ipotsa gore a tota Modimo o amega ka se se diregang. [Bala mela ya ntlha e mebedi ya serapa 4 mo tsebeng ya 119.] Kgaolo eno e tlhalosa lebaka la go bo Modimo a letleletse tshiamololo gore e tswelele ka nakwana.”

Nnang lo Disitse!

“Batho ba le bantsi ba tshwenyegile ka mathata a magolo le dilo tse di tshosang tse di diragalang gompieno. [Umaka tiragalo nngwe e e itsegeng mo lefelong la lona.] A o ne o itse gore dilo tse di ntseng jalo ke karolo ya sesupo sa lefatshe lotlhe se se bontshang gore go ise go ye kae puso ya Modimo e tla tsaya marapo mo lefatsheng lotlhe? [Mo letle gore a arabe. Morago ga moo bala temana e e tshwanelang, e e tshwanang le Mathaio 24:3, 7, 8; Luke 21:7, 10, 11; kana 2 Timotheo 3:1-5.] Boroutšhara jono bo tlhalosa gore ke ka ntlha yang fa go le botlhokwa thata go ela tlhoko bokao jwa ditiragalo tseno.”

“Batho ba le bantsi gompieno ba ngomogile pelo ka ntlha ya ditiragalo tse di tshosang kana ka ntlha ya go latlhegelwa ke dilo tsa bone. Ba bangwe ba ipotsa gore ke ka ntlha yang fa Modimo a sa tsenye letsogo go thibela dilo tse di ntseng jalo. Baebele e re tlhomamisetsa gore go ise go ye kae Modimo o tla dira sengwe go golola batho mo pogong ya bone. [Bala Tshenolo 14:6, 7.] Ela tlhoko gore katlholo ya Modimo e tla ama batho jang. [Bala 2 Petere 3:10, 13.] Boroutšhara jono bo na le tshedimosetso e e botlhokwa malebana le seno.”

Kitso E E Isang Botshelong Jo bo Sa Khutleng

“Fa o ne o ka lalediwa go tshela mo lefelong le lentle le le tshwanang le leno, a o ne o tla dumela? [Mmontshe setshwantsho se se mo tsebeng ya 4-5, mme o mo letle gore a arabe.] Ela tlhoko gore Lefoko la Modimo la re ke eng se se ka dirang gore re tshele botshelo jo bo ntseng jalo ka bosakhutleng. [Bala Johane 17:3.] Buka eno e tla go thusa go nna le kitso e e isang botshelong jo bo sa khutleng.” Rulaganyetsa go tla go tlotla ka dirapa tsa ntlha tse tlhano tsa kgaolo 1 fa o mo etela gape.

Bula setshwantsho se se mo tsebeng ya 188-9, mme o dirisa mafoko a a tlhalosang setshwantsho, botsa mong wa ntlo jaana: “A o eletsa go tshela mo Paradaiseng, ka nako ya fa kitso ya Modimo e tletse ka lefatshe? [Mo letle gore a arabe. Morago ga moo bala Isaia 11:9.] Buka eno e tla go thusa go ithuta gore Baebele ya reng ka Paradaise le se re ka se dirang gore re tshele mo go yone.” Rulaganyetsa go tla go tlotla ka dirapa 11-16 tsa kgaolo ya 1 fa o mo etela gape.

Ithute mo Morutising yo Mogolo

“A o akanya gore lefatshe le ka bo le le botoka fa batho ba ka bo ba tshela go ya ka mafoko ano? [Bala Mathaio 7:12a. Morago ga moo mo letle gore a arabe.] Buka eno e na le dithuto di le dintsi tse morutisi yo mogolo go gaisa botlhe ba ba kileng ba tshela a neng a di ruta.” Mmontshe ditshwantsho le mafoko a a fa thoko ga one mo kgaolong ya 17.

“Batsadi ba le bantsi gompieno ba leka go ruta bana ba bone mekgwa e mentle. A o akanya gore go botlhokwa go dira jalo? [Mo letle gore a arabe. Morago ga moo o bale Diane 22:6.] Ela tlhoko gore batsadi ba kgothalediwa gore ba simolole go thapisa bana ba bone ba sa le bannye. Buka eno e diretswe go ba thusa go dira jalo.” Mmontshe ditshwantsho le mafoko a a fa thoko ga tsone mo kgaolong ya 15 kana ya 18.

“Gantsi batsadi ba gakgamadiwa ke dipotso tse bana ba bone ba di botsang. A ga go jalo gore go ka nna thata go araba dingwe tsa dipotso tseno? [Mo letle gore a arabe. Morago ga moo o bale Baefeso 6:4.] Buka eno e ka thusa batsadi gore ba kgone go araba dipotso tsa bana ba bone gompieno.” Mmontshe ditshwantsho di sekae le mafoko a a fa thoko ga tsone mo kgaolong ya 11 le ya 12 kana ya 34 go ya go ya 36.

Matsapa a a Tserweng ke Motho go Batla Modimo

“E re ka go na le madumedi a le mantsi jaana gompieno, a o kile wa ipotsa gore re ka bona jang gore Modimo o amogela bodumedi bofe?” Fa a sena go araba, bula tsebe 377. Mmontshe ntlha ya bo7, mme o botse mong wa ntlo gore a o dumela gore bodumedi jwa boammaaruri bo tshwanetse jwa kopanya ditšhaba tsotlhe tsa batho. Bala temana nngwe e e umakilweng, mme fa nako e letla, tlotla ka dintlha tse dingwe tse di oketsegileng. Fa o bona gore tota o a kgatlhega, mo tsamaisetse buka eo. Fa lo kgaogana, o ka nna wa mmotsa jaana, “Bodumedi jwa boammaaruri bo tshwanetse go ama jang tsela e motho a itshwarang ka yone?” Rulaganya loeto lwa go boela go tla go araba potso eo.

Fa mongwe a go raya a re ene ke leloko la bodumedi bongwe jo bogolo, o ka nna wa re: “Go a itumedisa go kopana le batho ba bodumedi jo bo farologaneng. Batho ba ile ba batla Modimo ka ditsela di le dintsi. [Fa go tshwanela, bala Ditiro 17:26, 27.] Gantsi batho ba latela bodumedi jwa batsadi ba bone. [Bala serapa 12 mo tsebeng ya 8.] Go ithuta ka madumedi a mangwe go sedimosa motho e bile go dira gore o nne le kitso. Buka eno e tlhalosa gore madumedi a magolo a lefatshe a simologile kae, e tlhalosa le ditlwaelo tsa one le dithuto tsa one.” Mmontshe sekai sa se buka eno e se buang ka bodumedi jwa gagwe, jaaka mo ditsebeng tse di latelang: Bosiki (100-1); Bohindu (116-17); Bobuda (141); Bo-Tao (164-6); Bo-Confucius (177); Boshinto (190-5); Bojuda (220-1); le Boiselamo (289).

Tshenolo—Konelo ya Yone e e Molemolemo e Atametse!

“O tshwanetse wa bo o utlwile ka [umaka kgang nngwe]. Fa batho ba swa ka tsela e e setlhogo jaana, batho ba le bantsi ba ipotsa gore malapa a batho ba ba swetsweng a ka gomodiwa jang. Wena o akanya eng?” Mo letle gore a arabe. Morago ga moo bula mo tsebeng ya 299, o bo o mmontsha setshwantsho sa tsogo se se bontshitsweng moo. Morago ga moo o bo o re: “Batho ba le bantsi ba a gakgamala fa ba ithuta gore batho ba ba siameng mmogo le ba ba sa siamang ba tla tsosediwa botshelong mo Paradaiseng mo lefatsheng. [Bala Ditiro 24:15 jaaka e nopotswe mo serapeng sa 9 mo tsebeng ya 297, morago ga moo o bo o tlhalosa serapa 10.] Buka eno e tlhalosa dintlha tse dingwe tse dintsi malebana le maikaelelo a Modimo ka isagwe.”

Bibela—A Ke Lefoko la Modimo Kana Ke la Batho?

“Re tshela mo nakong e mo go yone mo e ka nnang mongwe le mongwe a nang le mathata a magolo. Ba le bantsi ba ya kwa bagakoloding ba mefuta yotlhe go bona kaelo. Ba bangwe ba batla thuso mo bathong ba ba dirisanang le badimo. O akanya gore re ka bona kae kgakololo e e tla re thusang tota? [Mo letle gore a arabe.] Baebele e bua ka ntlha nngwe ya botlhokwa e rotlhe re tlhokang go e tlhaloganya. [Bala 2 Timotheo 3:16. Morago ga moo o bo o bula mo tsebeng ya 187, o bo o bala serapa 9.] Buka eno e tla go thusa go bona kafa go dira se Baebele e se buang go re solegelang molemo ka gone ka metlha.”

Monna Yo Mogolo go Gaisa Botlhe Ba Ba Kileng Ba Tshela

“Ka nako eno ya ngwaga batho ba le bantsi ba akantse ka Jesu. Le fa go ntse jalo, e re ka go direga dilo di le dintsi jaana tse di maswe go dikologa lefatshe, bangwe ba ka nna ba ipotsa gore a ruri Jesu o amega ka rona. Wena o akanya eng ka seo?” Mo letle gore a arabe. Bula mo kgaolong ya 24, mme o tlhalose ka bokhutshwane lebaka la go bo Jesu a ne a tlile mo lefatsheng. Morago ga moo bala Johane 15:13, o gatelela tsela e ka yone Jesu a neng a rata batho go tswa pelong.

“Fa mongwe a bua ka Jesu Keresete, batho ba le bantsi ba akanya ka ene e le lesea kana monna yo o bogang yo o gaufi le go swa. Fa ba akanya ka Jesu ba akanya fela ka botsalo jwa gagwe le loso lwa gagwe. Gantsi batho ga ba bue ka dilo tse di molemo tse a neng a di dira le tse a neng a di bua fa a ne a le mo lefatsheng. Se a ileng a se dira se ama motho mongwe le mongwe yo o kileng a tshela mo lefatsheng. Ke ka moo go leng botlhokwa gore re ithute go le gontsi ka moo re ka kgonang ka teng ka dilo tse di molemolemo tse a re diretseng tsone.” Bala Johane 17:3. Bula mo tsebeng ya ntlha ya ketapele, o bo o bala serapa sa bonè.

Modimo o Batla Gore re Direng?

“A o akanya gore Modimo o ne a ikaeletse gore re tshele re na le mathata a re nang le one gompieno? [Mo letle gore a arabe. Morago ga moo o bo o bala Mathaio 6:10.] A o kile wa akanya gore Bogosi jwa Modimo ke eng tota?” Bula mo go thuto 6, o bo o bala dipotso tse di bodiwang mo tshimologong ya thuto eno. Simolola motlotlo ka thuto eno kana rulaganyetsa go dira jalo mo loetong lo lo latelang.

“Le fa botshelo bo tlhabologile thata gompieno, batho ba sa ntse ba boga le go utlwa botlhoko ka ntlha ya bolwetse le loso. A o a itse gore ke eng se Jesu a tla se direlang balwetse, batsofe le e leng batho ba ba suleng?” Mo letle gore a arabe. Fa motho a batla go itse karabo, bula thuto 5 o bo o bala dipotso tse di mo serapeng 5-6. Tlotla ka dirapa tseo, kana rulaganyetsa go dira jalo mo loetong lo lo latelang.

Obamela Modimo yo o Esi wa Boammaaruri

“O akanya gore re ka bona kae thuso ya go lepalepana le mathata a botshelo? [Mo letle gore a arabe. Morago ga moo bala Baroma 15:4.] Ela tlhoko gore Dikwalo tse di tlhotlheleditsweng di re naya kaelo, kgomotso le tsholofelo, mme seno se ka re nonotsha gore re kgone go itshokela mathata. Buka eno e re naya dikakantsho tsa kafa go bala Baebele go ka re solegelang molemo thata ka gone.” Mmontshe dintlha tse nnè tse di mo tsebeng ya 30.

“Fa e sa le go tloga ka nako ya fa Jesu a ne a le mo lefatsheng, batho ba le bantsi ba ntse ba rapelela gore Bogosi jwa Modimo bo tle. A o kile wa ipotsa gore ke eng se Bogosi joo bo tla se direlang batho fa bo tla? [Mo letle gore a arabe. Morago ga moo bala Daniele 2:44.] Buka eno e tlhalosa gore Bogosi jwa Modimo ke eng, bo tla dirang le kafa puso ya jone ya tshiamo e ka re solegelang molemo ka gone.” Mmontshe setshwantsho se se mo tsebeng ya 92-3.