Go Kgaratlhela go Dira ka Natla mo Bodireding
1 Moaposetoloi Paulo o ne a gakolola Bakeresete go tsamaya mo tseleng ya Modimo le ‘gore ba nne ba dire jalo ka botlalo segolo.’ (1 Bathes. 4:1) Seno se akaretsa eng? Se akaretsa gore re tswelele pele re senka ditsela tsa go kgaratlhela go dira go le gontsi mo ditirong tsa semoya, re leka ka metlha gore re ‘wetse bodiredi jwa rona ka botlalo.’—2 Tim. 4:5.
2 Maitlhomo a Rona: Selo se se dirang gore re kgaratlhele go dira ka natla mo bodireding jwa rona ke keletso e re nang le yone ya go batla go direla Mmopi wa rona ka botlalo. Re batla go gola semoyeng le go senka ditsela tsa go tokafatsa bodiredi jwa rona. Go nna le thulaganyo ya ka metlha e e molemo le maitlhomo a a siameng go tla re thusa go fitlhelela mekgele e e amanang le tirelo ya rona go Modimo.—Pes. 1:1, 2; Bafil. 4:6; Baheb. 10:24, 25.
3 Go oketsa bodiredi jwa rona go tla re tlhoka gore re lwele go nna le moya wa go aba le wa go intsha setlhabelo. Re ka kgona go nna le moya o o ntseng jalo fa re tlhatlhanya ka thapelo ka sekao se se molemo sa ga Jesu. (Math. 20:28) Jesu o ne a nna le boipelo jo bogolo ka ntlha ya go direla ba bangwe mo bodireding jotlhe jwa gagwe. (Dit. 20:35) Re ka etsa Jesu ka go bontsha go kgatlhegela batho ka namana le go dirisa ditshono tsa go dira ka natla mo bodireding jwa rona.—Isa. 6:8.
4 Seabe sa Batsadi: Batsadi ba ka jala mo baneng keletso ya go direla ba bangwe le go oketsa bodiredi jwa bone go tloga fela ba sa le bannye. Bana ba ka ela tlhoko tlhoafalo le tlhagafalo tse ba malapa a bone ba nang le tsone mo go oketseng bodiredi jwa bone. Mokaulengwe mongwe o ne a tlhotlheletsega go kgaratlhela go oketsa bodiredi jwa gagwe fa a sa ntse a le mosimanyana ka ntlha ya go bereka ditiro tsa phuthego le rraagwemogolo. Go bona tlhagafalo le boipelo jwa ga rraagwemogolo go ne ga mo tlhotlheletsa go senka ditshono tsa go direla bakaulengwe ba gagwe. Gone jaanong ke motlhanka wa bodiredi.
5 Go Tlhokega Bakaulengwe ba ba Oketsegileng: “Fa monna ope a kgaratlhela [maikarabelo a a oketsegileng] . . . , o eletsa tiro e e molemo.” (1 Tim. 3:1) Mafoko ano a kgothaletsa bakaulengwe go kgaratlhela go tshwanelegela dikabelo tse di oketsegileng mo phuthegong ya ga Jehofa. Go dira jalo ga go tlhoke gore motho a bo a na le bokgoni bongwe jo bo kgethegileng. Mokaulengwe yo o kgaratlhelang maikarabelo a a oketsegileng o tla batla Bogosi pele le go tlhagafala mo bodireding. (Math. 6:33; 2 Tim. 4:5) O tla leka go nna sekao se se molemo mo go ba bangwe.
6 Lefatshe ka Bophara: Jehofa o akofisa tiro ya go phutha. (Isa. 60:22) Go tlhokega thata gore batho ba ba latelang sekao sa ga Jesu ba dire bodiredi jwa bone ka botlalo. Pego ya lefatshe ka bophara ya ngwaga wa tirelo wa 2006 e bontsha gore go ne ga kolobediwa batho ba le 243 327. Palo eo ke palogare ya barutwa ba basha ba le 680 ba ba neng ba kolobediwa letsatsi le letsatsi! E kete rotlhe re ka tswelela pele re senka ditsela tsa go dira bodiredi jwa rona ka botlalo.