Naya Bahumanegi Tsholofelo
1 Jesu o ne a kgatlhegela bahumanegi ka tsela e e kgethegileng. Go na le dinako dingwe tse a ileng a ba thusa ka dilo tse ba di tlhokang ka go dira dikgakgamatso le go fodisa ba ba lwalang, le fa go ntse jalo, o ne a tlhomile mogopolo thata mo go boleleleng bahumanegi “dikgang tse di molemo.” (Math. 11:5) Bodiredi jwa Bokeresete le gompieno bo sa ntse bo solegela bahumanegi le batho ba bangwe molemo.—Math. 24:14; 28:19, 20.
2 Tsholofelo ya Mmatota: Gantsi baruti ba madumedi a a ipitsang a Bokeresete ba solofetsa bahumanegi gore ba tla segofala fa ba abela kereke ka bopelotshweu. Le fa go ntse jalo, Baebele e ruta gore ke Bogosi jwa Modimo fela jo bo ka fedisang khumanego le go rarabolola mathata otlhe a batho. (Pes. 9:18; 145:16; Isa. 65:21-23) Ka go bontsha bahumanegi se tota Baebele e se rutang, re a bo re ba naya tsholofelo le go ba thusa go kgotsofatsa keletso ya bone ya go nna le kitso ya dilo tsa semoya.—Math. 5:3.
3 Bafarasai ba motlha wa ga Jesu ba ne ba tseela bahumanegi kwa tlase, ka tshotlo ba ba bitsa gore ke ‘am-ha·’aʹrets, kgotsa “batho ba naga.” Le fa go ntse jalo, Jesu ene o ne a tsaya “madi a bone,” kgotsa botshelo jwa bone bo le “tlhwatlhwakgolo.” (Pes. 72:13, 14) Re ka etsa Jesu mme ra ‘utlwela bahumanegi botlhoko’ ka go nna pelonomi mo go bone le go bontsha go amega ka bone. (Dia. 14:31) Le ka motlha ga re batle go bua ka tsela ya go nyenyefatsa batho ba ba nnang mo mafelong a a humanegileng kgotsa go bontsha go se rate go ba neela bosupi. Bontsi jwa batho ba ba amogelang molaetsa wa Bogosi ke batho ba ba humanegileng.
4 Ba Thuse Gone Jaanong: Go ruta bahumanegi melaometheo ya Baebele mo tshimong ya rona gape go ba thusa go fokotsa matswela a khumanego gone jaanong jaana. Ka sekai, Baebele e kgala botagwa, go betšha, botshwakga, go goga motsoko le mekgwa e mengwe e e bakang khumanego. (Dia. 6:10, 11; 23:21; 2 Bakor. 7:1; Baef. 5:5) Dikwalo di re kgothaletsa go ikanyega le go dira ka “moya otlhe,” e leng dinonofo tse bathapi ba di batlang mo bathapiweng ba bone. (Bakol. 3:22, 23; Baheb. 13:18) Tota e bile, mo patlisisong nngwe, bathapi ba le bantsi ba ile ba bolela gore go ikanyega ke selo se se ba kgatlhang go gaisa tsotlhe fa ba senka mothapiwa.
5 Jehofa o a amega ka tshotlego ya bahumanegi. Jesu Keresete o tla tloga a golola “mohumanegi yo o goang a kopa thuso.” (Pes. 72:12) Fa re sa ntse re letile nako eo, re na le tshiamelo e e kgethegileng ya go gomotsa ba bangwe, go akaretsa le bahumanegi ka molaetsa wa Baebele wa tsholofelo.