A o Tla Simolola Thuto ya Baebele ka October?

1. Go tla tsamaisiwa kgatiso efe ka October?

¹ Ka October go tsamaisiwa dimakasine tsa Tora ya Tebelo le Tsogng! Fa re boela kwa bathong ba ba bontshitseng kgatlhego, re kgothalediwa go buelela pampitshana ya A o Ka Rata go Itse Boammaaruri? le go leka go simolola thuto ya Baebele. Re ka dira seno jang mo loetong lwa go boela?

2. Re ka dirisa pampitshana ya Go itse Boammaaruri jang go simolola thuto ya Baebele fa re dira loeto lwa go boela kwa mothong yo o ileng a amogela dimakasine?

² Kafa o ka Dirisang Pampitshana ka Gone: Re ka nna ra re: “Dimakasine tse ke go tlogeletseng tsone di kgothaletsa batho ba maemo otlhe le ditumelo tsotlhe go sekaseka Baebele. [Neela mong wa ntlo pampitshana ya Go Itse Boammaaruri, mme o bo o mmontsha dipotso tse di fa pele.] Dingwe tsa dipotso tse di kgatlhang tse Baebele e neelang dikarabo tsa tsone tse di kgotsofatsang ke tseno. A o kile wa botsa dingwe tsa tsone?” Fa mong wa ntlo a sena go araba, sekasekang karabo ya potso ya gagwe mmogo go tswa mo pampitshaneng mme lo bo lo bala nngwe ya ditemana tse di umakilweng. Go tswa foo o bo o mo tlhalosetsa gore seno ke sekai fela sa se Baebele e se rutang mme o bo o mo neela buka ya Baebele e Ruta Eng? Morago ga foo re ka nna ra tlotla ka dirapa tsa ntlha mo kgaolong e a e tlhophileng go tswa mo diteng tsa buka eno. Kgotsa re ka nna ra tlhopha go ya kwa tsebeng e e nang le tshedimosetso e e oketsegileng ka setlhogo se re tlotlileng ka sone mo pampitshaneng. Dingwe tsa ditshupiso tse re ka di dirisang ke tseno:

● A ruriruri Modimo o amega ka rona? (ts. 9-11, ser. 6-10)

● A dintwa le pogo di tla tsamaya di fela? (ts. 12, ser. 12-13)

● Go direga eng ka rona fa re swa? (ts. 59-60, ser. 7-8)

● A go na le tsholofelo nngwe ka baswi? (ts. 71, ser. 13-15)

● Nka rapela jang gore Modimo a utlwe dithapelo tsa me? (ts. 166-167, ser. 5-8)

● Nka bona jang boitumelo mo botshelong? (ts. 9, ser. 4-5)

3. Re ka fetofetola matseno a rona jang go ikaegile ka maemo?

³ Gone mme fa maemo a sa re letle go simolola le go bontsha kafa buka ya Baebele e Ruta Eng? e ithutiwang ka teng mo loetong lwa go boela lwa ntlha, re ka nna ra dira dithulaganyo tsa go boela le go tsweledisa motlotlo wa rona. Mme go ikaegile ka gore motho o kgatlhega go le kana kang, re ka nna ra tlhopha go tlotla ka potso e e fetang e le nngwe go tswa mo pampitshaneng mo maetong a le mmalwa a go boela pele ga re ka mo neela buka. E kete re ka dirisa pampitshana eno e e molemo go simolola thuto ya Baebele ka October mme re thuse batho ba ba dipelo di ikanyegang go “itse boammaaruri.”—Joh. 8:31, 32.