Go Rapela le go Tlhatlhanya—Go Botlhokwa mo Badireding ba ba Tlhagafetseng
1. Ke eng se se thusitseng Jesu gore a se ka a iteega tsebe mo tirong ya gagwe e e botlhokwa?
1 Jesu o ne a fetsa maitseboa otlhe a alafa batho le go leleka madimona. Fa barutwa ba gagwe ba ne ba mmona letsatsi le le latelang, ba ne ba mo raya ba re: “Batho botlhe ba a go batla,” ba mo rotloetsa gore a tswelele go dira dikgakgamatso. Le fa go ntse jalo, Jesu ga a ka a letla gore a iteege tsebe mo tirong ya gagwe e e botlhokwa ya go rera dikgang tse di molemo. O ne a araba jaana: “A re yeng golo gongwe go sele, mo metsanasetoropong e e fa gautshwane, gore ke tle ke rere le koo, gonne ke tletse jone boikaelelo jono.” Ke eng se se thusitseng Jesu go nna a tlhomile mogopolo mo tirong ya gagwe? O ile a tsoga phakela go ya go rapela le go tlhatlhanya. (Mar. 1:32-39) Go rapela le go tlhatlhanya go ka re thusa jang gore re nne bareri ba ba tlhagafetseng?
2. Re ka tlhatlhanya ka eng se se ka re thusang go nna re tlhagafetse mo bodireding?
2 Re ka Tlhatlhanya ka Eng? Jesu o ne a lemoga gore batho ba ne ba “sotlegile e bile ba gasame jaaka dinku tse di se nang modisa.” (Math. 9:36) Ka tsela e e tshwanang, re ka akanya kafa batho ba tlhokang dikgang tse di molemo thata ka gone. Re ka akanya kafa dinako di potlakileng ka gone. (1 Bakor. 7:29) Re ka tlhatlhanya ka ditiro le dinonofo tsa ga Jehofa, tshiamelo ya rona ya go nna Basupi ba ga Jehofa le matlotlo a a botlhokwa a semoya a re a ithutileng mo Lefokong la Modimo, a batho ba ba mo tshimong ya rona ba iseng ba a itse.—Pes. 77:11-13; Isa. 43:10-12; Math. 13:52.
3. Re ka tlhatlhanya leng?
3 Re ka Tlhatlhanya Leng? Jaaka Jesu a ile a dira, batho bangwe ba tsoga phakela go sa ntse go didimetse. Ba bangwe ba fitlhela go le botoka go tlhatlhanya maitseboa pele ba ya go robala. (Gen. 24:63) Tota le fa re tshwaregile, re sa ntse re ka kgona go dira nako ya go tlhatlhanya. Bangwe ba dira jalo fa ba tsamaya ka dipalangwa tsa batho botlhe. Ba bangwe ba dirisa nako ya bone ya dijo tsa motshegare go tlhatlhanya ba sa iteege tsebe. Ba le bantsi ba fitlhela gore go tlhatlhanya pele ba ya bodireding, tota le fa e ka nna ka metsotso e se kae, go ba thusa gore ba rere ka tlhagafalo e kgolwane le ka bopelokgale.
4. Ke eng fa re tshwanetse go tlhatlhanya?
4 Go rapela le go tlhatlhanya go tla oketsa keletso ya rona ya go direla Jehofa, go tla re thusa gore re lebe kobamelo ya rona e le selo sa botlhokwa mo matshelong a rona e bile go tla nonotsha boikemisetso jwa rona jwa go tswelela re rera. Modiredi yo Mogolo wa Modimo e bong Jesu, o ne a solegelwa molemo ke go tlhatlhanya mme le rona re tla solegelwa molemo.