Tsayang Baporofeti e le Sekao—Jona
1. Jona o ne a na le dinonofo dife tse di molemo?
1 O gakologelwa eng fa o akanya ka moporofeti Jona? Bangwe ba ka tswa ba mo leba e le legatlapa kgotsa a le peloethata. Le fa go ntse jalo, go lebega a ile a bontsha boikokobetso, bopelokgale le moya wa go intsha setlhabelo. Re ka tsaya dinonofo tse di molemo tsa ga Jona ‘e le sekao’ jang?—Jak. 5:10.
2. Re ka etsa boikokobetso jwa ga Jona jang?
2 Boikokobetso: Kwa tshimologong, Jona o ne a tshabela kwa ntlheng e sele ya lefelo le a neng a romilwe kwa go lone. Ga go gakgamatse go bo a ile a tshaba ka gonne Asiria e ne e itsege ka bosetlhogo e bile Ninife e ne ya bidiwa “motse wa tshololo ya madi.” (Nah. 3:1-3) Mme Jehofa o ne a otlhaya Jona, yo o neng a bontsha boikokobetso ka go amogela tiro eo fa a ne a newa tshono e nngwe gape. (Dia. 24:32; Jona 3:1-3) Le fa kwa tshimologong a ile a tshaba, o ne a dira thato ya ga Jehofa. (Math. 21:28-31) A le rona ka tsela e e tshwanang re ikemiseditse go rera dikgang tse di molemo, le fa re ka tswa re ile ra otlhaiwa kgotsa re tshwanetse go bereka tshimo e e thata?
3. Ke dilo dife mo bodireding jwa gago tse o tlhokang go nna pelokgale mo go tsone le go intsha setlhabelo ka ntlha ya tsone?
3 Bopelokgale le go Intsha Setlhabelo: Fa Jona a lemoga gore tshwetso ya gagwe e e sa siamang e tsentse matshelo a batsamaisasekepe mo kotsing, o ile a ikemisetsa go intsha setlhabelo. (Jona 1:3, 4, 12) Moragonyana, fa a diragatsa taelo e a e neilweng ya go ya kwa Ninife, o ne a tsena kwa gare ga motse, gongwe a batla lefelo le le tshwanetseng la go bolela dikatlholo tsa ga Jehofa. Ditiro tseo e ne e se tsa legatlapa, mme e ne e le tsa moporofeti yo o pelokgale wa Modimo! (Jona 3:3, 4) Go tweng ka rona gompieno? Re tlhoka bopelokgale jo bo tswang kwa Modimong gore re rere re sa tshabe fa re ganediwa. (Dit. 4:29, 31) Re tlhoka go intsha setlhabelo ka go dirisa nako le dithoto tsa rona mo bodireding.—Dit. 20:24.
4. Ke ka ntlha yang fa re tshwanetse go ipha nako ya go akanya ka sekao se se molemo se se tlhomilweng ke baporofeti ba ga Jehofa?
4 Nako le nako fa o bala pego e e rileng ka mongwe wa baporofeti ba ga Jehofa, o tla solegelwa molemo fa o ka ipona ka leitlho la mogopolo o le mo seemong sa bone. Ipotse jaana: ‘Ke ne ke tla itshwara jang? Nka etsa jang dinonofo tsa gagwe tse di molemo?’ (Baheb. 6:11, 12) Ditlhogo tse di tlang tsa Tirelo ya Rona ya Bogosi di tla tlotla ka dithuto tse di botlhokwa tse re ka di ithutang mo baporofeting ba bangwe ba ba ikanyegang ba ga Jehofa.