Dingwaga di le Lekgolo Tsa go Itsise Bogosi!

1. Ke eng se batho ba ga Jehofa ba neng ba kgothalediwa go se dira dingwaga di le lekgolo tse di fetileng?

¹ “Bonang, Kgosi e a busa! Lona lo baemedi ba yone ba ba e itsiseng. Ka gone, itsiseng, itsiseng, itsiseng, Kgosi le bogosi jwa yone.” Mafoko ano a Mokaulengwe Rutherford a a buileng mo e ka nnang dingwaga di le lekgolo tse di fetileng, a ne a kgothaletsa batho ba ga Jehofa gore ba phasalatse molaetsa wa Bogosi gaufi le kgakala. Mme ke sone se re neng ra se dira! Fela jaaka Bakeresete ba bogologolo, re ne ra rera dikgang tse di molemo tsa Bogosi “mo popong yotlhe e e kafa tlase ga legodimo.” (Bakol. 1:23) Fa re akanya ka ditiragalo tsa dingwaga di le lekgolo tse di fetileng, re dirile eng go itsise Bogosi jwa Modimo? Fa re ntse re atamela ngwaga wa bo100 fa e sa le Bogosi bo simolotse go busa, re ka dirang go tswelela re bo itsise?

2. Dikgatiso tsa rona di tlotlomaditse Bogosi jwa Modimo jang?

² Se se Diragetseng: Ka masome a dingwaga dikgatiso tsa rona di ntse di tlotlomatsa Bogosi jwa Modimo. Fa e sa le ka 1939 makasine wa rona wa konokono o ntse o na le setlhogo se se reng: Tora ya Tebelo e Itsise Bogosi Jwa ga Jehofa. Gangwe le gape makasine ono o itsise Bogosi le se bo tla se dirang. Makasine wa Tsogang! le one o gatelela gore Bogosi jwa Modimo ke jone fela tsholofelo ya batho. Ruri go a tshwanela go bo jaanong dimakasine tseno ka bobedi di ranolelwa mo dipuong di le dintsi e bile di anamisiwa thata mo lefatsheng!—Tshen. 14:6.

3. Re dirisitse ditsela dife go itsise Bogosi?

³ Batho ba ga Jehofa ba dirisitse ditsela tse di farologaneng go itsise Bogosi. Mo nakong e e fetileng re ne re dirisa dikoloi tse di nang le dibuelagodimo, re gasa mo radiong e bile re dirisa difonokerafo tse dinnye. Ditsela tseno tsa go rera di re thusitse go anamisetsa dikgang tse di molemo kwa bathong ba le bantsi ka nako e ka yone baboledi ba Bogosi ba neng ba le mmalwa fela. (Pes. 19:4) Bosheng jaana, re tsentse tshedimosetso mo jw.org, gore re itsise dimilione tsa batho—go akaretsa ba ba nnang kwa mafelong a tiro ya rona e thibetsweng gone—ka Bogosi.

4. Ke ditsela dife tse di kgethegileng tsa go rera tse re di dirisang?

⁴ Gape batho ba ga Jehofa ba anamisitse molaetsa wa Bogosi ka ditsela tse dingwe tse di kgethegileng. Ka sekai, go tloga mo bogareng jwa bo1990, re ne ra oketsa tiro ya rona ya go rera ka ntlo le ntlo ka go rera mo diparakeng, mo mafelong a go phaka dikoloi le mo mafelong a kgwebo. Bosheng jaana, re dirisa thulaganyo e e kgethegileng ya go neela bosupi mo ditoropong tse dikgolo mo lefatsheng lotlhe. Mo godimo ga moo, diphuthego di le dintsi di rera phatlalatsa mo ditshimong tsa tsone di dirisa dikolotsana le ditafole tsa dikgatiso tse di beilweng mo mafelong a batho ba fetang mo go one ka bontsi mo toropong. Le fa go ntse jalo, go rera ka ntlo le ntlo ke tsela ya konokono e re e dirisang fa re rera.—Dit. 20:20.

5. Ngwaga o mosha wa tirelo o tla naya bontsi jwa rona ditshono dife?

⁵ Se se Tla Diregang: Fa ngwaga o mosha wa tirelo o simologa ka Lwetse, bontsi bo tla tsenela bobulatsela jwa ka metlha. A o tla nna mongwe wa bone? Fa o sa kgone, a o ka tsaya bobulatsela jo bo thusang gangwe le gape? Le fa o sa kgone go nna mmulatsela, Jehofa o tla go segofatsa ka go bo o ithontsha dilo dingwe gore o nne le seabe ka botlalo mo go itsiseng Bogosi.—Mal. 3:10.

6. Ke eng fa kgwedi ya Diphalane 2014 e tla bo e kgethegile?

⁶ Ka kgwedi ya Diphalane 2014, e tla bo e le ngwaga wa bo100 Bogosi bo busa. Go a tshwanela go bo mo kgweding eno makasine wa batho botlhe wa Tora ya Tebelo o bua ka Bogosi jwa Modimo. Ke eng fa o sa dire maiteko a go naya batho ba le bantsi kafa go ka kgonegang ka gone makasine ono? Fa re ntse re akantse ka isagwe, e kete mongwe le mongwe wa rona a ka tswelela a “bolela dikgang tse di molemo tsa Bogosi jwa Modimo.”—Dit. 8:12.